Xo̱jo̱n Salmoo̱ 111 - Xo̱jo̱n eén Néná

Si̱ꞌantsjàa̱ Néná

¹ ¡Si̱ꞌantsjàa̱ Néná! Jún xota̱ xi kixi̱, si̱ꞌanngo yojoná nga si̱ꞌantsjàa̱ Néná ngayeje ini̱ma̱ná.

² ¡Achichí yiꞌi kjo̱a̱ndikón xi je katsꞌén Néná! Achichí tsjá maá xotaa̱ nga ꞌbindíkón kuí nii̱.

³ Ngayeje ni xi tsꞌén, bokó kjo̱a̱tsjakjiꞌi ko̱jo kjo̱a̱je xi tsoboaá kui Néná ko̱jo xi rená, kjo̱a̱kixi̱i̱ ngatsjéni̱xtjin nga tikón.

⁴ Néná achichí tjó ko̱jo ndaxota̱ tsꞌénjo̱ná ñá, kó kuí boá xi tsꞌén nga ngatsjéni̱xtjin si̱ꞌankjaꞌátsjien ni xi fíndikónná xí tsꞌén.

⁵ Néná tsjaá nichinie kui xota̱ na̱xi̱ńdá xí tsꞌéntsjaà kui, kó jmíni̱xtjin chíyaá ni xi índajo̱.

⁶ Bokoó xota̱ na̱xi̱ńdaá ni xi fíndikónná xí tsꞌén, kó ki̱a̱ tsꞌénkꞌíndo tꞌanangi xi tsi̱ꞌe̱ kje̱ꞌe xota̱ na̱xi̱ńdá.

⁷ Ja̱koxi̱ boá kjo̱a̱kitii̱ Néná, ka̱ma ka̱maꞌniátakón kjo̱a̱botíxomaa̱,

⁸ ngatꞌa̱ ngatsjéni̱xtjin nga chjínií, ngi̱jii̱n ni xi kixi̱i̱, ko̱jo ni xi na̱xo̱o̱ kjindibánii̱.

⁹ Néná boá xi katsꞌéndé xota̱ na̱xi̱ńdaá, kó bo̱a̱ tsꞌén katsjá tsꞌoa nga ngatsjéni̱xtjin sa̱ꞌínkjatjosón ni xi índajo̱. ¡Achichí ngaꞌniú tjiín Nee̱ xota̱ Israee̱l, tsjie kuí Néná xí ngototoo̱!

¹⁰ Ngayeje xota̱ xi mejeén nga xota̱ xi kjínkón ka̱ma, tjón mára ngatamabendikón Néná. Kui xota̱ xi bo̱a̱ tsꞌeén, bokó nga xota̱ xi kjínkón boá. ¡Néná, ngatsjéni̱xtjin tsoboaá nga si̱ꞌantsjaa̱!