Xo̱jo̱n Salmoo̱ 11 - Xo̱jo̱n eén Néná

Ngayeje nii̱ ngi̱ya tsja Néná tikón

Só xi katsꞌénda Ndabii̱.

¹ Néná boá xi kónna. Kótsꞌèn bo̱a̱ sení nga ki̱a̱ konga an ngi̱jin na̱xi̱i̱, xikoó tsi ngo ni̱sie.

² Kjénní nga xota̱ xi ndajiín je ndyi̱kjienyà yáchjonyaá, ko̱jo je síndondaa̱ yáyojó xi tsꞌénkjién, tsi̱ꞌe̱ nga nínga jñoó skji̱nií yáyojoó xota̱ xi kixi̱ síndo ini̱ma̱a̱.

³ Tsi si̱ꞌankjatsón ni xi yaꞌanii̱ nga kamánda kui nga̱sondiee̱, mí ni xi ka̱maa̱ sa̱ꞌín xota̱ xi kixi̱i̱.

⁴ Néná ki̱a̱ tikón na̱ngo̱xi̱ tsjiee̱, kó ndiꞌakꞌajmii̱ boá nínga tikón ngi̱ndie xi botixómá, kó tsꞌénkotsijee̱n ko̱jo tsꞌénkotꞌa ni xi tsꞌén xota̱ nga̱sondiee̱.

⁵ Néná kjitꞌayákón xota̱ xi kixi̱i̱, ta̱nga chꞌórií xota̱ xi ndajiín, ko̱jo xi tsja maa̱ nga tsꞌén ni xi ꞌniú ndajiín.

⁶ Kuí boá xi sa̱ꞌínkixó ndiꞌí ngi̱jii̱n kui xotaa̱, ko̱jo ndiꞌí, ko̱jo ndso̱ko̱a̱n asufre̱, ko̱jo tjo̱ xi tsꞌénchjánná sa̱ngíyaá. Kuí boá ni xi tsoboaá kui xotaa̱.

⁷ Ngatꞌa̱ Néná kixi̱ boá, kó tjórií kjo̱a̱kixi̱i̱, ¡kuíni nga xota̱ xi kixi̱i̱ boá xi ka̱ma sku̱i̱e̱ kje̱n!