Xo̱jo̱n Salmoo̱ 109 - Xo̱jo̱n eén Néná

¡Ji Ne, tasíke̱jení!

Só xi katsꞌénda Ndabii̱.

¹ Ji Ne, án boá xi tsꞌéntsjaà, ¡ngata̱ xiójín mindyin ji!

² Tikón ngo xi ndiso ko̱jo xi ꞌniú ndajín xi ꞌbindísótaꞌinna.

³ Achichí chꞌoó an nga ngaskande nde jmí kjo̱a̱jín nga an kjánjo̱na, ¡jè íchjáꞌyána!

⁴ An chji̱a̱taꞌinna, ndatsi tjóna kui, kó chjiátje an.

⁵ Chꞌoo̱ an, kó ndajín tsꞌénjo̱na, ndatsi tjóna kui, kó nda tsꞌenjo̱ an.

⁶ Ji Ne, ¡ti̱ bo̱a̱ ti̱ tsꞌén tꞌíchjíi̱ nga! ¡Ti̱ꞌin ji nga ti̱ kuii̱ nda̱ xi ꞌboxiéꞌá ngatangítaꞌin!

⁷ ¡Ti̱ꞌin ji nga nendiꞌamasiee̱n nga tsó nga tjiín jé, kó nga nga tsꞌénjeé! ¡Ti̱ꞌin ji nga ko̱e̱ꞌéjeé, ta̱ngatꞌanii̱ ti̱ kuii̱ éndísoó!

⁸ ¡Ti̱ꞌinkꞌin ji ngindie ni̱xtjin, kó kje̱ꞌe xí ngatsꞌén xaá!

⁹ ¡Ngatꞌíndo xꞌi̱a̱n ndií! ¡Ngatꞌíjñá kꞌán chjo̱ón!

¹⁰ Ti̱ꞌin ji nga kꞌuitsómasón ko̱jo nga chji̱e̱ ku̱i̱ꞌa ndií, ¡ti̱ꞌin ji nga ku̱i̱yòtjíngií ki̱a̱ ngi̱ndie jatson nínga tjíndo!

¹¹ ¡Kui xota̱ xi to̱n katsꞌénkíyaá ngasꞌe̱ ngachjaꞌáxiín ngayeje ni xi tjiín!

¹² ¡Kui xota̱ xꞌi̱a̱a̱n nga ngojín xi tsꞌéntjó, ti̱nde nga jmíjín xi ni̱ma̱ ngatamaa̱!

¹³ ¡Ti̱ꞌin ji nga xota̱ tji̱e̱e̱ tsá ngatjie! ¡Ti̱ꞌin ji nga ngiti̱ jmíjín xi kjo̱a̱ꞌátsjiee̱n ni̱xtjin xi sꞌe̱ ndibaá!

¹⁴ Ji Ne, ngata̱chiíjín niꞌínchíyé ji ni xi ndajín xi katsꞌén na̱ꞌmii̱, ko̱jo jé xí katsꞌén na̱aa̱n,

¹⁵ kó nga jmíjín xi kjo̱a̱ꞌátsjiee̱n nga kisꞌińdo nga̱sondie. Ngata̱ niꞌínchíyéjín ji kondra̱na,

¹⁶ ngatꞌa̱ jmíni̱xtjin jaꞌátsjiee̱n nga tjín xí ndaxota̱ sa̱ꞌínjo̱, tsangatji̱ngii̱ xota̱ ni̱ma̱a̱, ko̱jo xota̱ xi ni̱ma̱kjo̱a̱ kisꞌińdo, ko̱jo xi ni kamáchjieén, ngaskande nga katsꞌénkꞌién.

^17-18 Kó nga achichí tsjá kamaá nga tsíchji̱a̱taꞌin, ¡ja̱ kui ngatꞌákanieé ni xi ndajiín tsobo̱a̱! Kó nga kamámejénjiín nga tjín xí sa̱ꞌínchikonñé, ¡ja̱ nga ngojín xi tsꞌénchíkonñé kuí! ¡Te̱ꞌéchjíi̱ nínga ꞌniú on ngase ka̱maa̱!

¹⁹ ¡Kui ni xi ndajiín kui xi ngatama xikoó ngo ńjño xi chajá! ¡Nga kjienꞌniuú kui ńjñoo̱ ngaskande nga sa̱ꞌínxíndo!

²⁰ Ji Ne, ¡bo̱a̱ ti̱ꞌinje̱ ji kui xi tsꞌénbongítaꞌinna, ko̱jo kui xi tsꞌénꞌbindísótaꞌinna nga!

²¹ Ta̱nga an ki, nda ti̱ꞌinje̱ní, jí boá ngo Ne xi ndaxota̱, ¡ꞌna̱xiéꞌéní, ta̱ngatꞌanii̱ kjo̱a̱ndàa̱!

²² Xota̱ ni̱ma̱ án, kó tsie kjo̱a̱ni̱ma̱ tsꞌénfoaꞌatio an, kó achichí je ni xi on kjimana.

²³ Inda inda kjife ngaꞌniúna, xikó maá ngo tji̱nkꞌi̱én, ¡ngaskande xikó maá tsi ngo xtjo̱tsie xi tsꞌéntíyaà tjo̱o̱ kjima an!

²⁴ Jè ndeskande ngiti̱ jmí nichinie kjíni̱e̱jín an, jè achichí xkꞌién án, nga ngaskande fotsié má tikóna.

²⁵ Kjiꞌanga bena xotaa̱, mojnókiena.

²⁶ Ji Ne, ¡tasíke̱jení! Ta̱ngatꞌanii̱ kjo̱a̱tjóo̱, ¡ꞌna̱xiéꞌéní!

²⁷ Ngatamabe nga kui nii̱ kjimana, ngatꞌa̱ jí boá xi bo̱a̱ tsꞌén kamámejeén.

²⁸ Ta̱nga tsi ji xi si̱ꞌinchikonñíní, jmí ndasénjín tsi tjín xí ku̱i̱chji̱a̱taꞌinna. Kondra̱na jè síndonda nga mejeén skjánjo̱na, ta̱nga jí boá xi ko̱e̱ꞌée̱ kjo̱a̱soboá, kó achichí kjo̱a̱tsja ko̱e̱ꞌéní án.

^29-30 Ji Ne, te̱ꞌée̱ kjo̱a̱soboá ko̱jo nga xcha̱ndikónjín kui xota̱ xi ndyi̱bongítaꞌinna. Án boá xi tsjaa ndokꞌóchjì, ko̱jo kui xota̱ na̱xi̱ńdá xi tsꞌéntsjaà jí,

³¹ ngatꞌa̱ jí boá xi ꞌnaxiéꞌé ji xota̱ ni̱ma̱a̱, kó ꞌna̱xiéꞌé ji ngi̱ya tsja xota̱ xi ꞌniú ndajiín, kui xi mejeén nga sa̱ꞌínkꞌién.