Xo̱jo̱n Salmoo̱ 108 - Xo̱jo̱n eén Néná

Si̱ꞌánjne̱, tsi ji xi ko̱si̱ke̱jejne̱

Só xi katsꞌénda Ndabii̱.

¹ Ji Ne, achichí mejeén ini̱ma̱na nga si̱eé só.

² ¡Mejénna nga kjo̱a̱ꞌána! ¡Sa̱ꞌinkjièn án arpaa̱ ko̱jo ńjnií! ¡Mejénna nga kjo̱a̱ꞌána nga si̱si̱eén!

³ Ji Ne, án boá xi sa̱ꞌintsjaá ngi̱jii̱n xota̱ na̱xi̱ńdaá, án boá xi si̱eé só ngi̱jii̱n na̱xi̱ńdaá.

⁴ Achichí tsie kó fejín kjo̱a̱tjóo̱, nga ngaskande nkꞌajmii̱ fochó.

⁵ Ji Ne, jí boá xi bitjetjée̱n nkꞌajmii̱, ¡kó kjo̱a̱jèe̱ sꞌikitsieni ngayeje tꞌanangii̱!

⁶ ꞌNiátakónjne̱ ji: ¡ti̱ꞌinsénjne̱! ¡ꞌNa̱xiéꞌéjne̱ nga si̱ꞌinkjìn jí ngaꞌniúu̱! Kó bo̱a̱ tsꞌén nga kjo̱tjoꞌa kui xota̱ na̱xi̱ńdá xí tjoó jí.

⁷ Ndeskande ki̱a̱ na̱ngo̱xi̱i̱ je bi̱ kase ji: «Kjiꞌanga an sa̱ꞌin an, sa̱ꞌinkjaꞌasóo̱n xota̱ na̱xi̱ńdána tꞌanangi xi chji̱a̱ni nangi Sikee̱n, ko̱jo xi chji̱a̱ni nangi soón Sukoo̱t.

⁸ Tꞌanangii̱ nangi Ngalaa̱nd án tsa̱ꞌa̱n, xtji̱e̱e̱n ta̱ꞌin síndo xota̱ tji̱e̱e̱ Kosiee̱ tsi̱ꞌe̱ nga skoón xota̱ na̱xi̱ńdána, kó ki̱a̱ nangi Jundáa̱ jè ijñá an ngo re.

⁹ Xota̱ xi chji̱a̱ni nangi Moaa̱b moso̱na boá, nangi Endoo̱n án tsa̱ꞌa̱n, kó ki̱a̱ nangii̱ xota̱ Filisteaa̱ ꞌniú kjandayà an nga án boá xi je katsꞌen an».

¹⁰ ꞌYá xí mejeén kjo̱jona ngaskande nínga tikón na̱xi̱ńdáꞌniú xí xó tjíchjáꞌyánii̱. ꞌYá xí mejeén ko̱kóna ndi̱yà xi fíni nangi Endoo̱n.

¹¹ ¡Ji Ne, jè kiniꞌínkjinjne̱ yojòo̱, kó jè ngiti̱ nijan bixkénje̱jínjne̱, xikoó kjiꞌanga ꞌmitjée̱n jájúnjne̱!

¹² Jmí ni chjíjiín ngaꞌniuú xota̱ nga̱sondiee̱, ¡tasíke̱jejne̱ tsi̱ꞌe̱ nga si̱ꞌanjne̱ kondraa̱!

¹³ Ji Ne, jí boá xi si̱ꞌìi̱n nga ku̱i̱xkénje̱, ¡si̱ꞌánjne̱, tsi ji xi ko̱si̱ke̱jejne̱!