Xo̱jo̱n Salmoo̱ 107 - Xo̱jo̱n eén Néná

Néná achichí nda̱ tsꞌénjo̱ xota̱ na̱xi̱ńdaá

¹ ¡Si̱ꞌantsjàa̱ Néná! ¡Ko̱e̱ꞌée̱ ndokꞌóchji̱ì ngatꞌa̱ achichí ndaxota̱! ¡Néná ngatsjéni̱xtjin nga tjoó ñá!

² ¡Bo̱a̱ kꞌuin ñá, ngatꞌa̱ kuí boá xi tsꞌaxiéꞌáná kjiꞌanga xota̱ Ejiptoo̱ atíxománá!

³ Bo̱a̱ kꞌuin ñá, xi xota̱ na̱xi̱ńdaá má ñá, xota̱ na̱xi̱ńdá xí ítikoní ndeskande na̱xi̱ńdáꞌniú xí síndo ta̱ꞌin, ko̱jo xi síndo nangi, ko̱jo xi síndo nínga fotjo tsꞌueé, ko̱jo xi síndo nínga ꞌbosꞌien tsꞌueé.

⁴ Ta̱xkiya kisꞌiṉtso̱ma xota̱ xi xcháná, ki̱a̱ nangi kixií, kó kasakojiín ngo ndi̱yà xi kijíjo̱ni ngo ngi̱ndie nínga ma mindyion.

⁵ Kamá bojó kamá xíndaá, kó ngiti̱ katsꞌénkjójín ngase nga kꞌuíndo ngase nga̱sondie.

⁶ Kjiꞌanga achichí nda̱ kamaá, tsíchji̱a̱a̱ Néná, kó Néná jaꞌáxiín kui kjo̱a̱ni̱ma̱a̱.

⁷ Kó kijíjo̱ ngo ndi̱yà xi kixi̱ tsi̱ꞌe̱ nga kjo̱chó ngi̱ndie nínga ma mindyion.

⁸ ¡Ko̱e̱ꞌée̱ ndokꞌóchjì Néná ta̱ngatꞌanii̱ nga tjoó ñá, ta̱ngatꞌanii̱ ngayeje ni xi je katsꞌén nganda tsa̱ñá!

⁹ ¡Néná foaꞌáxín xíndaá xota̱ xi xíndaá, kó foaꞌáxín bojoó xota̱ xi bojoó!

¹⁰ Xota̱ xi xcháná achichí ndasen kisꞌińdo, mosoo̱ kamá, kó kamábejín mí ni xi sa̱ꞌín, ko̱jo ñání ko̱e̱je̱,

¹¹ ngatꞌa̱ katsꞌénsénjiín ni xi atíxoma kui Néná xi tikón nkꞌajmii̱, kó kondra̱ kisꞌińdonii̱.

¹² Kuíni nga Néná atíjeé nga katsjaá xá xi ꞌniú ngasee̱, kastingí, kó nde ngojín xi katsꞌénkjastjíe̱n.

¹³ Ngije achichí nda̱ kamaá, tsíchji̱a̱a̱ Néná, kó Néná tsꞌaxiéjinni kjo̱a̱ni̱ma̱ xi ndyi̱foaꞌatio,

¹⁴ akoó ndi̱yà nínga chjiéngá ko̱e̱je̱, kó katsꞌéndé nga moso̱ kamá.

¹⁵ ¡Ko̱e̱ꞌée̱ ndokꞌóchjì Néná ta̱ngatꞌanii̱ nga tjoó ñá, ta̱ngatꞌanii̱ ngayeje ni xi katsꞌén nganda tsa̱ñá!

¹⁶ ¡Katsꞌénxi̱ nga̱ntjo̱a̱ xi ki̱cha̱ bronse̱ kamándani, ko̱jo kui ki̱cha̱ xi índoꞌniúná!

¹⁷ Xota̱ xi xcháná achichí kitikjo̱a̱ kamá, kó xikó tsꞌén xota̱ xi chi̱ni, bo̱a̱ katsꞌén, achichí kjo̱a̱ni̱ma̱ jaꞌa ta̱ngatꞌanii̱ ni xi ndajín xi katsꞌén.

¹⁸ ¡Achichí kamáꞌoón nga ngaskande nga kamábe nichiniee̱ katsꞌénkjasó!

¹⁹ Ngije ꞌniú nda̱ kamaá, tsíchji̱a̱a̱ Néná, kó Néná tsꞌaxiéjinni kjo̱a̱ni̱ma̱ xi jaꞌatio,

²⁰ ta̱ ngo tsí én tsíchji̱a̱, kó kamándaya. ¡Bo̱a̱ tsꞌén tsꞌaxiéꞌáni ngi̱ya tsja kjo̱a̱bo̱yaa̱!

²¹ ¡Ko̱e̱ꞌée̱ ndokꞌóchjì Néná ta̱ngatꞌanii̱ nga tjoó ñá, ta̱ngatꞌanii̱ ngayeje ni xi katsꞌén nganda tsa̱ñá!

²² ¡Ko̱kóo̱ Néná nga máná boeꞌée̱ ndokꞌóchjì, kó si̱ꞌankꞌasꞌiée̱n kjo̱a̱tjó! ¡ꞌNiú tsjá ngatamaná nga xchaꞌayà nga kꞌuiyá ngayeje ni xi fíndikónná xi je katsꞌén kuí!

²³ Xota̱ xi xcháná tsꞌatsie tjotso yiꞌi, kó atíñá ko̱jo tsꞌatsie ni kje̱ꞌe na̱xi̱ńdá, kó bo̱a̱ tsꞌén kisꞌińdo.

²⁴ Kó ki̱a̱ ngi̱jii̱n ndáchíkoón kamábe ni xi fíndikónná xi katsꞌén Néná:

²⁵ Néná katsjá ngo kjo̱a̱, kó kjindibá ngo tjo̱ꞌniú xí iskjininkꞌa ngaꞌniuú ndáfoaa̱.

²⁶ Kjiꞌanga kamábe nga je mejeén ko̱yà, já xí tsꞌénxájo̱ tjotso yiꞌii̱ ngiti̱ katsakjónjín, kó bo̱a̱a̱ nkꞌa bo̱a̱a̱ ngindie kiniꞌánkjaꞌa,

²⁷ kó nde jmí chjí kamájiín ndatsi ta̱nisién ꞌniú maá nda niꞌánxájin ngi̱jin ndáchíkoón, ngatꞌa̱ kastingí kó ixó, xikoó tsi chꞌi̱.

²⁸ Ngije achichí nda̱ kamaá, tsíchji̱a̱a̱ Néná, kó Néná tsꞌaxiéjin kjo̱a̱ni̱ma̱ xi jaꞌatio,

²⁹ katsꞌénkꞌíxió kui tjo̱ꞌniuú, kó kixixió tjo̱o̱ ndáchíkoón.

³⁰ Ngije kixixió kui tjo̱ꞌniuú, kui xotaa̱ achichí tsjá kamaá, kó Néná kijíjo̱ ki̱a̱ ngi̱ndie nínga chjiéngá ko̱e̱je̱.

³¹ ¡Ko̱e̱ꞌée̱ ndokꞌóchjì Néná ta̱ngatꞌanii̱ nga tjoó ñá, ta̱ngatꞌanii̱ ngayeje ni xi katsꞌén nganda tsa̱ñá!

³² ¡Ngatsꞌèntsjaà ngayeje xota̱ na̱xi̱ńdaá, ko̱jo xota̱xá xi botixómaá!

³³ Néná asíkjoyá nangi kixií, kó ngi̱ndie nínga tjín ndejèꞌ ko̱jo nínga tjo ndáfoa katsꞌén,

³⁴ ta̱nga nangi xi ndaa̱, nangi xi ndajín katsꞌén, ngatꞌa̱ kui xota̱ xi ki̱a̱ kisꞌińdoo̱, xota̱ xi ꞌniú ndajín boá,

³⁵ ta̱nga ki̱a̱ nangi kixií, ngi̱ndie xi nda katsꞌén, kó índo ngi̱ndiò ko̱jo ndáńchꞌi̱.

³⁶ Kui xota̱ na̱xi̱ńdá xí jaꞌa kjindiaá, ki̱a̱ katsꞌénkꞌíndo, kó a xi̱xi̱ yiꞌi na̱xi̱ńdáꞌniú katsꞌénda,

³⁷ ítji̱e̱ ni tjié, ítji̱e̱ tostsi̱je̱è, kó achichí nda kamá ni tjieé.

³⁸ Néná katsꞌénchikonñé, kó achichí kamá ndií, kó cho̱ tji̱e̱é achichí kamákjín nga.

³⁹ Jaskan ngije jaꞌa ni̱xtjin, xota̱ xi ꞌniú ndajiín, ndajín katsꞌénjo̱, kó katsꞌénkjaꞌa kjo̱a̱ni̱ma̱, ngaskande nga ta̱ chiboa tsí kamá xi kisꞌińdo ngase nga̱sondie.

⁴⁰ Ta̱nga Néná katsꞌénjeé kui xota̱ xi ꞌniú ndajiín, kó ki̱a̱ katsꞌénchaja ngi̱jii̱n nangi kixií nínga jmí ndi̱yàjín.

⁴¹ Xota̱ xi ni̱ma̱a̱ Néná boá xi ꞌboxiéjin ngi̱jii̱n kjo̱a̱ni̱ma̱ xi foaꞌajin, kó kuí xí tsꞌén nga xota̱ xi ngo ndiꞌa mani, ma kjín ngase xikoó cho̱ tji̱e̱é.

⁴² Kjiꞌanga xota̱ xi kixi̱i̱ be kui nii̱, achichí tsjá maá, ta̱nga xota̱ xi ꞌniú ndajiín ta̱ xió tsí ꞌbíndo.

⁴³ Chꞌi̱a̱xki̱jnú kui nii̱, jún xota̱ xi kjínkón, kó nda má ti̱ꞌankjójnú xikó tsꞌén ꞌniú tjoó Néná ñá.