Xo̱jo̱n Salmoo̱ 106 - Xo̱jo̱n eén Néná

Xota̱ na̱xi̱ńdaá Néná katsꞌénkꞌoyá yojoo̱

¹ ¡Si̱ꞌantsjàa̱ Néná! ¡Ko̱e̱ꞌée̱ ndokꞌóchji̱ì ngatꞌa̱ achichí ndaxota̱! ¡Néná ngatsjéni̱xtjin nga tjoó ñá!

² ¡Ngojín xota̱ xi ka̱maa̱ ka̱tso̱yà cha̱n cha̱n kjo̱a̱ndikón yiꞌi xi katsꞌén Néná! ¡Ngojín xota̱ xi ka̱maa̱ sa̱ꞌíntsjaá xikótsꞌèn tsoboaá kui!

³ ¡Néná tsꞌénchíkonñé kui xota̱ xi kixi̱i̱, ko̱jo xi tsꞌéntjó kjo̱a̱kixi̱i̱!

⁴ Ji Ne, ngatjaꞌátsjiee̱n an kjiꞌanga ko̱kée̱ kjo̱a̱ndaxota̱a̱ kui xota̱ na̱xi̱ńdáa̱, chꞌi̱e̱xki̱ní kjiꞌanga kji̱ndi̱bé ꞌnaxiéꞌéjne̱.

⁵ Te̱ꞌéndièní nga si̱eé só, an ko̱jo kui xota̱ na̱xi̱ńdá xí jí kachjeꞌéjin ji, ¡te̱ꞌéndièní nga tsja ka̱mana nga nda ko̱jo nga tsjatsꞌèn síndo kui xotaa̱!

⁶ Kiniꞌánjéjne̱ ji̱n, jè kiniꞌánjne̱ ni xi ndajiín, achichí nga ꞌniú ndajín je kamájne̱, xikó maá xota̱ xi xchájne̱.

⁷ Kjiꞌanga ki̱a̱ kisꞌińdo nangi Ejipto̱, tsaꞌaxki̱jín ni yiꞌi xi kiniꞌín ji, katsꞌénkjaꞌátsjienjín kjo̱a̱tjó jèe̱, kó ki̱a̱ tꞌa Ndáchíkón Inií kondra̱ tse̱ kisꞌińdoni.

⁸ Ta̱nga ji kaꞌnaxiéꞌé ji, tsi̱ꞌe̱ nga sku̱i̱e̱ ngaꞌniú jèe̱, ko̱jo tsi̱ꞌe̱ nga ji sa̱ꞌíntsjaá.

⁹ Ndáchíkón Inií kitsjiee̱n ngo ndi̱yà xi kixí kjiꞌanga tsintꞌié nga kiniꞌínxchínje̱ ji, jí boá xi kiniꞌín ji nga xota̱ xi xchájne̱ jaꞌayise ki̱a̱ nínga na̱nga̱a̱ ndáchíkoón, kó jaꞌa xikoó tsi nangi kixií nínga jaꞌa.

^10-11 Kondraa̱ kui xotaa̱ achichí kamáchꞌoó, ta̱nga ki̱a̱ jesón ngándá ki̱a̱ ngi̱jin ndáchíkoón. Jí boá xi kaꞌnaxiéꞌé ji ngi̱ya tsja kui xotaa̱, ¡ngayeje xota̱ Ejiptoo̱ jesón!

¹² Kósꞌe̱ xota̱ xi xchájne̱ kisꞌijii̱n ni xi kaseyetjée̱n nga si̱ꞌinkjatjosén, kó kisiee̱ só nga katsꞌéntsjaà,

¹³ ta̱nga sꞌe̱ tsí chiboa ni̱xtjin jaꞌa nga kichíyá nginií ni xi kiniꞌín ji, kó nde askoyájiín nga sku̱i̱e̱ ni xi ngase xi je tjíndaa̱ ji.

¹⁴ Achichí ꞌniú kamábojoó nga ki̱a̱ nangi kixií, askotꞌayákoón, kó ꞌniú tsíꞌaá nichinie.

¹⁵ Kó ji katseꞌée̱ ni xi tsíꞌaá, ta̱nga ti̱ kanangiyèe̱ ngo chiꞌin xi tsꞌenkꞌiénná nga.

^16-17 Kjiꞌanga kisꞌińdo ki̱a̱ nangi kixií, kui xota̱ xi ki̱a̱ kijítji̱ngii̱ Ndataa̱n ko̱jo Abiraa̱n, kamáchi̱ni̱ kjo̱a̱a̱ Moisee̱, kó ti̱ kamáchi̱ni̱ kjo̱a̱a̱ Aaroo̱n nga, kui nda̱ xi ji kachjeꞌéjin ji, ta̱nga katjoxꞌá tꞌanangii̱, kó katjéjén kui xota̱ kitikjo̱a̱a̱,

¹⁸ ¡ndiꞌí xi tjítíngá kjindibánié kui xota̱ kjín xi ꞌniú ndajiín!

¹⁹ Xota̱ xi xchájne̱ jachó na̱xi̱ Oree̱b, kó ki̱a̱ katsꞌénda ngo ni xi Nénájín, ¡kó katsꞌéndikón ngo cho̱yojo toro̱ xi to̱nsinié kamándani!

²⁰ Ngiti̱ kuijín Néná xi katsꞌéntsjaà, kui Néná xí tjiín kjo̱a̱jee̱, kó ta̱sá a̱sie̱én ngo cho̱yojo toro̱ katsꞌéndikón.

^21-22 Achichí ni xi fíndikónná xi katsꞌén Néná ki̱a̱ tꞌa Ndáchíkón Inií: ¡Néná tsꞌaxiéꞌá kui xotaa̱ ngi̱ya tsja xota̱ Ejiptoo̱! Ta̱nga jaskan katsꞌénchíyà Néná,

²³ kó achichí katsꞌénxchán Néná nga ngaskande kamámején maá katsꞌénkjié. Kó Moisee̱, kui nda̱ xi jaꞌájin Néná tsíchji̱a̱tjé kui xotaa̱, sꞌe̱ jaskan jaꞌajenda Néná tsi̱ꞌe̱ nga ngiti̱ katsꞌénkjiéjín ngijee̱.

²⁴ Ta̱nga kui xotaa̱ kamámejénjiín kui tꞌanangi xi Néná katsjaá, kó katsꞌénsꞌijinjín ni xi katsóyàtjón nga sa̱ꞌín.

²⁵ Ki̱a̱ ngi̱ya ndiꞌaa̱ tsíchji̱a̱taꞌin Néná, kó kamámejénjiín tsintꞌiéꞌeén.

²⁶ Kó Néná ja̱bo̱a̱ je bo̱a̱ katsoó nga ki̱a̱ kju̱i̱e̱són nangi kixií,

²⁷ kó nga ko̱jo xota̱ tji̱e̱e̱ ti̱ sa̱ꞌínkjiesón nga, ko̱jo tsi sa̱ꞌíntsojoboa ngayeje nangi ko̱jo na̱xi̱ńdá.

²⁸ Ta̱nga kui xotaa̱, ta̱sá ne Baa̱l xi kamámejeén katsꞌéndikón, kui xi chji̱a̱ni na̱xi̱ńdáꞌniú Pengoo̱r, kó iskjinie nichinie xi niꞌánkꞌasꞌiee̱n kui ne xi je jesoón.

²⁹ Kó ta̱ngatꞌanii̱ kui ni xi ndajín xi katsꞌeén nga Néná katsꞌénxchán, kó ngo kjo̱a̱botíjé xí ꞌniú katsangiyaa̱.

³⁰ Ta̱nga ngo nda̱ xi ꞌmí Finee̱, tsíchji̱a̱tjé ngandaa̱ kui xotaa̱, kó kamá xi katsꞌén nga Néná atíjéjiín.

³¹ Kuíni nga Finee̱ ngatsjéni̱xtjin nga si̱ꞌankjaꞌátsjien ta̱ngatꞌanii̱ kui ni xi kixi̱ xi kamaá.

³² Ki̱a̱ nínga katjo ndáfoa ki̱a̱ Meribaa̱, xota̱ Israee̱l katsꞌénxtií Néná, kó ta̱ngatꞌanii̱ kui xotaa̱ nga Moisee̱ ndajín kamátaꞌin,

³³ achichí ꞌniú kamáxtií Moisee̱ nga ta̱xkiya tsíchji̱a̱.

^34-35 Néná boá xi katsjákjo̱a̱ nga si̱ꞌankjie ngayeje nangi xi ngasee̱, ta̱nga kui xotaa̱ tsintꞌiéꞌénjiín. ¡Ta̱sá bo̱a̱jín kjiꞌi ni xi katsꞌén! Ki̱a̱ katsꞌénkꞌájii̱n yojoo̱ kui xotaa̱, sꞌe̱ jaskan ki̱a̱ kijítji̱ngi kjo̱a̱xcha̱á,

³⁶ katsꞌéndikón ne xi kuijín xi kisꞌiee̱ kui xotaa̱, kósꞌe̱ ki̱a̱ nijan kijítji̱ngi kui nii̱.

^37-38 ¡Katsꞌéndándí tꞌanangii̱ nga iskjitjón jiín xota̱ xi jmí jéjiín! ¡Katsꞌénkꞌasꞌien ndií, xikoó tsi ngo kjo̱a̱tjó, tsi̱ꞌe̱ kui xindajiín!

³⁹ Ngije katsꞌén kui nii̱, katsꞌénkjatsón ti̱ kuii̱ yojoo̱, kó kisꞌiee̱ jé.

⁴⁰ Néná achichí ꞌniú katsꞌénxchánjo̱ kui xotaa̱, kó katsꞌénchꞌó ngijee̱.

^41-42 Kuíni nga katsjandiè nga ngi̱ya tsja kondra̱a̱ ixó, tsi̱ꞌe̱ nga ni̱ma̱kjo̱a̱ ku̱i̱ꞌíndo ko̱jo nga ndajín sa̱ꞌínjo̱.

⁴³ Achichí kjín ndi̱yà nga Néná katsꞌéndé, ta̱nga kui xotaa̱, ngatsjéni̱xtjin nga kitikjo̱a̱ kamá, kó to̱kó katsꞌénjérá ngase.

⁴⁴ Néná kamábe nga achichí nda̱ kamaá, kó tsintꞌieé nga ni̱ma̱ ndyi̱tsó,

⁴⁵ kuíni nga asíkjo ni xi sa̱ꞌín katsaki. Ta̱ngatꞌanii̱ kjo̱a̱tjoó Néná nga jaꞌátsjiee̱n ni xi índajo̱ xota̱ Israee̱l,

⁴⁶ kó katsꞌén nga kondra̱a̱ ni̱ma̱ kamaá.

⁴⁷ Ji Ne, ¡ꞌna̱xiéꞌéjne̱! ¡Te̱ꞌéndièjne̱ nga kongín nginíjne̱ nangijne̱, tsi̱ꞌe̱ nga ko̱e̱ꞌéjne̱ ndokꞌóchjì jí, kó ka̱ma si̱ꞌantsjajne̱ nga ji xi Nejne̱ ma ji!

⁴⁸ ¡Ngatamachikonñé, ngotꞌe̱ ko̱jo ta̱ kjiꞌání, Nee̱ xota̱ Israee̱l! ¡«Bo̱a̱ kjiꞌi», nga tsó xota̱ na̱xi̱ńdaá Néná! ¡Si̱ꞌantsjàa̱ Néná!