Xo̱jo̱n Salmoo̱ 104 - Xo̱jo̱n eén Néná

Só xi ndaa̱ Néná

^1-3 ¡Si̱ꞌantsjàa̱ Néná ngayeje ini̱ma̱ná! Ji Ne, jí boá ngo Ne xi achichí kjo̱a̱je tjiín, kó tjikítsie maá kjo̱a̱tsjakjiꞌi ko̱jo kjo̱a̱yandikón, kó ngo ndiꞌí tsꞌentsíjen nínga tindyinjin ji. Ikꞌíjñí ji nkꞌajmii̱ xikó tsꞌén jme ngo ńjño kortina̱, kó nga̱soón ndáfoa xi tikón nkꞌajmii̱ ki̱a̱ ikꞌíjñí ji ngi̱ndie nínga mindyin. Ṉdi̱i̱ kuí boá xi xikoó karroo̱ kjo̱a̱xcháa̱n, ¡kó xikoó tsi ki̱a̱ ꞌmisén ji nga̱a̱ tjo̱o̱!

⁴ Tjo̱o̱ boá xi chji̱ni̱e̱ꞌée̱n, kó ndiꞌí xí tjítíngaá boá xi mosoo̱.

⁵ ꞌNiú ikꞌíjñí ji nínga tikónsón nga̱sondiee̱, kó jmíni̱xtjin ka̱matíyaá ki̱a̱a̱.

⁶ Ndáfoaa̱ ndáchíkoón akjaꞌmeni ji nga̱sondiee̱, ¡akjaꞌmeni ndo̱jò ndójo̱ ji nga̱soón ngayeje na̱xi̱i̱!

⁷ Ta̱nga kiniꞌínxchínje̱ ji, kó ndáchíkoón kijíboaꞌá nga tsintꞌieé nda̱a̱, kui xi xikoó maá cho̱ꞌo̱o̱n, ndáchíkoón tsanga boaꞌá.

⁸ Ngaskande nga̱són na̱xi̱i̱ jachó ndáfoaa̱, kó ngaskande nínga soón kijíkꞌíjén, ngaskande nga jachó ki̱a̱ ngi̱ndie nínga ji ikꞌíjñíchi̱bo̱e̱e̱.

⁹ Jí boá xi ikꞌíjñíchi̱bo̱e̱ ji ngo ngi̱ndie nínga ka̱májín kjo̱a̱ꞌatjoón, tsi̱ꞌe̱ nga nginijánjín ku̱i̱ꞌíngandá nga̱sondiee̱.

¹⁰ Ji Ne, jí boá xi niꞌín ji nga xo̱ngàndántꞌieé mongajin ngi̱jin na̱xi̱i̱, kó nga kui xi ku̱i̱ꞌíkitsienii̱ ndáfoa ndejeèꞌ,

¹¹ kó ndáfoaa̱ xí tsꞌénkꞌíxió xíndaá cho̱ tamaá xí tjín ngi̱jin kꞌijñaá, ko̱jo bórró kꞌijñaá nga,

¹² ki̱a̱ tjiaa̱ yá xí tjín nínga tiñaa̱, ki̱a̱ tsꞌénda ndo̱bo̱a̱a̱ ni̱sie xi tjín nkꞌa jàn, kó ki̱a̱ ndaꞌyaá nga sie.

¹³ Ji Ne, ji ko̱jo stsé xí nangiye ji, ndeskande nkꞌa jàn bosíndeníi̱ na̱xi̱i̱, kjo̱a̱ndaxota̱a̱ achichí tsjá maá tꞌanangii̱.

¹⁴ Jí boá xi niꞌín ji nga maxchá kꞌijñaá, tsi̱ꞌe̱ nga ka̱ma skji̱ni̱e̱ cho̱o̱, kó ti̱ jí boá xi niꞌín ji nga maxchá xka̱a̱ nganda tsi̱ꞌe̱ ngayeje xotaa̱, xikoó:

¹⁵ kui paa̱n xi tsjáná ngaꞌniuú, ko̱jo kui bino̱ xi tsjáná kjo̱a̱tsjaa̱, ko̱jo kui isti̱ xi tsꞌénꞌna̱ kje̱en.

¹⁶ Yákón xi chji̱a̱ni nangi Líbanoo̱, kui yá xí ti̱ jíní bo̱a̱ xi ikꞌítji̱e̱ ji, achichí ndáfoa tjiín.

¹⁷ Ki̱a̱ boá nínga tsꞌénda ndo̱bo̱a̱ ni̱siee̱, kó ki̱a̱ tjiaa̱ yaá ꞌbíndo cho̱ singeñaa̱.

¹⁸ Ki̱a̱ nínga síndo na̱xi̱ xi ꞌniú nkꞌaá ki̱a̱ síndo tindso̱ xi ꞌbé na̱xi̱i̱, kó ki̱a̱ ngi̱jin ndi̱jo̱o̱ ki̱a̱ ꞌbíndo chińtsi̱e̱é.

¹⁹ Jí boá xi kiniꞌínde ji saá, tsi̱ꞌe̱ nga xcha̱ ni̱xtjin xi tjiín ngo sá, kó akakoyée̱ tsꞌueé, mí chi̱bo̱a̱ nga chjiéngá kꞌo̱sꞌien.

²⁰ Ngije tsꞌasꞌien tsꞌueé, ma jñó. Kjiꞌa boá nga ꞌbítso̱ma ngayeje cho̱ xi ꞌbé ngi̱jin kꞌijñaá.

²¹ Kuí boá chi̱bo̱a̱a̱ nga kjandayà xandi̱je̱e̱, nga míꞌaá nichinie.

²² Ta̱nga ngije fotjo nginí tsꞌueé monga má nga fíkꞌíndo nginí ti̱xa̱na̱xi̱i̱, kó ki̱a̱ foyojofé ngijee̱.

²³ Kósꞌe̱ kjiꞌá boá nga ñá bistjíe̱n, kó niꞌán xáná, ngaskande nga ma jñó nginí.

²⁴ Ji Ne, achichí ni xi je kiniꞌínde ji, kó kjo̱a̱kjíntakóo̱n kiniꞌínkjín nga kiniꞌínde ji ngayejee̱. ¡Jè tjikítsieni nga̱sondiee̱ ngayeje ni xi ji kiniꞌínde!

²⁵ Ki̱a̱ tikón ki̱a̱a̱ ndáchíkón tiyaá, achichí cho̱ tjín ngi̱jii̱n, cho̱ xi yiꞌi, ko̱jo cho̱ xi xi̱xi̱, ¡yá xí ka̱maxki̱i̱!

²⁶ Ki̱a̱ boá nínga tjimájin tjotso yiꞌii̱, kó ki̱a̱ boá nínga tikón lebiataa̱n, cho̱o̱ ndáchíkoón, kui cho̱ xi ńtenje̱ ji.

²⁷ Ta̱ngatꞌanii̱ ji nga síndo ngayeje kui cho̱o̱, kó ndyi̱koya nga kjo̱chó chi̱bo̱a̱ nga ji ko̱e̱ꞌée̱ nichinie.

²⁸ Ji boeꞌée̱, kó kui kjíbé, chjéxꞌé jí ndse̱, kó ni xi nda ngasee̱ xi kjinie kui.

²⁹ Tsi niꞌínsénjíi̱n achichí tsakjón má, tsi chje̱ꞌéxíi̱n tjo̱ xi kjiendáni, fesón kó chojo má nginí,

³⁰ ta̱nga nangíyé ji A̱si̱énni̱xtjìi̱n, kó ngayeje nga̱sondiee̱ nga matja̱tsi̱e̱ya nginí.

³¹ Ji Ne, ¡ngatsjéni̱xtjin ngatꞌíjñá ngaꞌniúu̱!, ¡Ngayeje ni xi ji kiniꞌínde ji xi ngatsjaá kjo̱a̱tsja!

³² Kjiꞌanga tsitsijìi̱n nga̱sondiee̱, fotsié má, kó kjiꞌanga niꞌínje̱ ji na̱xi̱i̱, fotjo maá ṉdi̱.

^33-35 Ngatjie xota̱ xi ndyi̱tsꞌènjeé, kó ngatjiesón xota̱ xi ndajiín. Ji Ne, ¡tji̱e̱nga tindyionjne̱ nga̱sondie si̱ꞌantsjajne̱ ji, kó ko̱ndájne̱ só! Tsjangatamaa̱ nga chjábé kjo̱a̱niꞌánkjójne̱, ¡jí boá xi kjo̱a̱tsja xi ꞌniú jejne̱! ¡Si̱ꞌantsjàa̱ Néná, ngayeje ini̱ma̱ná! ¡Jo̱o̱n, si̱ꞌantsjàa̱ Néná!