Xo̱jo̱n Salmoo̱ 103 - Xo̱jo̱n eén Néná

¡Ngayeje ngaꞌniúna nga sa̱ꞌintsjaá!

Só xi katsꞌénda Ndabii̱.

¹ ¡Ngayeje ngaꞌniú xí tjínna nga sa̱ꞌintsjáa̱ Néna!

² ¡Ngayeje ngaꞌniú xí tjínna nga sa̱ꞌintsjáa̱ ko̱jo nga sa̱ꞌinkjaꞌátsjien an xikó kjiꞌi nga ndaxota̱!

³ Néna jè katsꞌénjetakónna ngayeje ni xi ndajín xi katsꞌen an, kó katsꞌéndaya nginína,

⁴ tsꞌaxiéꞌána nga kꞌienjín an, ¡kó íkitsie mána kjo̱a̱tjó ko̱jo kjo̱a̱ni̱ma̱takón!

⁵ Ngatsjéni̱xtjin nga ni xi nda ngasee̱ xi tsjána Néna, ¡tsjána ngaꞌniú xikoó ja̱a̱!

⁶ Néna, kuí boá xi ngo ne ndiꞌa masien xi kixi̱, xi be kjo̱a̱nda xi tjiín xota̱ xi ndyi̱foaꞌatio kjo̱a̱ni̱ma̱a̱.

⁷ Moisee̱ ko̱jo xota̱ Israee̱l, katsóyaà ni xi índa ko̱jo ni xi tsíꞌaá nga sa̱ꞌín kui xotaa̱.

⁸ Néna achichí nda ko̱jo ndaxota̱ tsꞌénjo̱na, jmí tsi ta̱xkiya tsꞌénxchán, kó achichí tsie kjo̱a̱tjó tjiín.

⁹ Jmí tsi ngatsjéni̱xtjin tsꞌénxchánjo̱ná, ti̱nde jmí tsi ngatsjéni̱xtjin nga on ko̱a̱ꞌa̱ná.

¹⁰ Jmí tsi bo̱a̱ tsꞌén atíjéná xikó tsꞌén tsoboaá jé xí kiniꞌán, ko̱jo ni xi ndajín xi kiniꞌán.

¹¹ Achichí tsie ko̱jo je kjo̱a̱tjó xi tsjaá xota̱ xi bendikón, xikó kjiꞌi je ngayeje nga̱sondiee̱.

¹² Xín katsꞌénkjaꞌáná kui jé xí kiniꞌán, xikó má tsꞌén kja̱xín kja̱xín índo nga ngo nga ngo tji̱ngi̱i̱ tꞌanangii̱.

¹³ Kui xota̱ xi tsꞌéndíkón Néná, Néná achichí nda tsꞌénjo̱, xikó má tsꞌénjo̱ ndií ngo na̱ꞌmi.

¹⁴ Jè be nda nda Néná kókón ñá, ¡jè be nda nda nga chojo boá ñá!

¹⁵ Kjo̱a̱mindyionná xikónií kꞌijñaá, nga achichí tsá xíꞌniú, ñá xikónií naxó xí ꞌbé ngi̱jin kꞌijñaá: maxchá ñá, kó ꞌbéná naxó,

¹⁶ ta̱nga ngije foaꞌa tjo̱o̱, jè ngiti̱ mindyiónján nga̱sondie, kó ingojín xi ma be ngasená.

¹⁷ Ta̱nga kjo̱a̱tjoó Néná, jmíni̱xtjin sa̱síkjo, Néná tsꞌéntjó xota̱ xi tsꞌéndíkón kuí, kó ngatsjéni̱xtjin nga kixi̱ tsꞌénjo̱ xota̱ tji̱e̱ xi jaskan ndibaá,

¹⁸ kui xota̱ xi kixi̱ tsꞌénkjátjosón ni xi índa ko̱jo kjo̱a̱botíxomaa̱.

¹⁹ Néna kuí boá xi ree̱ nkꞌajmii̱, kuí boá xi tsi̱ꞌe̱ ngayeje ni xi tjiín.

²⁰ Jún xi ndítsjie xi tjiín ngaꞌniuú, jún xi niꞌánkjatjosónjnú kjo̱a̱botíxomaa̱, kó niꞌánkjatjosónjnú nga tsjá ngo kjo̱a̱, ¡ti̱ꞌantsjàjnúu̱ Néna!

²¹ Kó jún xi jájuún, xi ki̱a̱ ndyi̱niꞌánxátꞌajnúu̱, kó nga niꞌánkjatjosónjnú ni xi mejeén kui, ¡ti̱ꞌantsjàjnúu̱ Néna!

²² Kó jún xi ndií kui májnú, xi tindyiónjnú ngayeje ngi̱ndie, ¡ti̱ꞌantsjàjnúu̱ Néna! Kó an ki, ¡sa̱ꞌintsjáa̱ Néna ngayeje ngaꞌniúna!