Xo̱jo̱n Salmoo̱ 102 - Xo̱jo̱n eén Néná

¡Ji Ne, ngatsjéni̱xtjin nga ku̱i̱ndyin ji!

Én xí katsoó Néná ngo nda̱ xi ndasen kisꞌijña, kó ki̱a̱ kijítsáyá ngindyi̱ko̱n Néná ni xi kamaá

¹ Ji Ne, ndaꞌyéní nga kuichjiaá, kó ki̱a̱ ngatjachótꞌaa ni xi xiaán nga ni̱ma̱ kuichjiá an.

² ¡Ngata̱ ꞌbíꞌmíjínní kje̱n ji, ni̱xtjin nga nda̱ ka̱mana! Ndaꞌyéní kjiꞌanga kuichjiájoo, kó ti̱ꞌinsénní ni̱xtjin nga ji kuichjiáa̱.

³ Ngatꞌa̱ ni̱xtjinna achichí tsá tsꞌénfí, xikó maá ṉdi̱i̱, kó ńdana chichí ndakjàn ńdana, je kjife, xikó maá tsi chikín kixí xi tjítíngá.

⁴ Achichí oón ini̱ma̱na, kó xikó maá tsi kꞌijñá xi je kixíꞌniú kjima an. Kó ngaskande chíyá mána nga ni chinie skjíni̱e̱ an.

⁵ Ta̱ngatꞌanii̱ nga achichí askjandá an, nga ngaskande je ya má ńdana.

⁶ Jè tikón so̱bo̱a̱ an, xikó maá ngo jnó xí fotsoꞌbá soboá nangi kixií.

⁷ Achichí ńjñána, kó bo̱a̱ kjima xikó maá ngo ni̱sie xi tikón soboá ki̱a̱ nkꞌaa̱ ngo ndiꞌa.

⁸ Ndyiojón ndyiojón ndyi̱kjánjo̱na kondra̱na, kó xota̱ xi mojnókiena, mejeén nga ni xi ndajín ka̱mana.

⁹ Ngaskande ndiso je iskjíni̱e̱ an xi pan kixiáa̱n, kó ndándyíkón án je katsꞌenkꞌájìi̱n ni xi katsꞌè an,

¹⁰ ta̱ngatꞌanii̱ nga achichí ꞌniú kiniꞌínxchín jí, tjón mára kachjaninkꞌéní, sꞌe̱ jaskan akjatéjení.

¹¹ Ni̱xtjinna jè bo̱a̱kjimaa̱ xikó maá ngo tji̱nkꞌi̱én xí tsꞌénfoaꞌa, kó jè tjixíꞌniú án xikó maá kꞌijñaá.

¹² Ta̱nga ji Ne, ngatsjéni̱xtjin nga tindyin ji, kó jaꞌée̱n ta̱kjiꞌání nga si̱ꞌankjaꞌátsjien.

¹³ Kó jí ku̱i̱stji̱n ji, kó ni̱ma̱ ka̱maa̱ na̱xi̱ńdáꞌniú Sioo̱n, ngatꞌa̱ jè jachó ni̱xtjin nga ni̱ma̱ ka̱maa̱ kui. ¡Jè jachó kui ni̱xtjin xi ikꞌíndaa̱!

¹⁴ Ngatꞌa̱ xota̱ mosoo̱ achichí tjoó ndi̱jo̱o̱ na̱xi̱ńdáꞌniú Sioo̱n, kó ni̱ma̱ maa̱ ngaskande xa̱a̱ nga je ixóndó kuí na̱xi̱ńdáꞌniuú.

¹⁵ Xota̱ na̱xi̱ńdaá sku̱i̱e̱ndikón jaꞌeén Néná, kó ngayeje re xi botixómá ngayeje nga̱sondiee̱ sa̱ꞌínkie yojoo̱ nga sku̱i̱e̱ kjo̱a̱je xi tjiín.

¹⁶ Ngatꞌa̱ Néná boá xi sa̱ꞌíndaya nginí na̱xi̱ńdáꞌniú Sioo̱n, kó xotaa̱ sku̱i̱e̱ nginí kjo̱a̱jee̱.

¹⁷ Sa̱ꞌínsénríi̱ nga ꞌniú ku̱i̱chji̱a̱a̱ xota̱ xi ni̱ma̱ síndoo̱, kó sa̱ꞌínchꞌójín kjiꞌanga ndyi̱chji̱a̱a̱.

¹⁸ Ngo xo̱jo̱n nga si̱tꞌa kui nii̱, tsi̱ꞌe̱ nga sku̱i̱e̱ xota̱ xi jaskan kꞌuieé, tsi̱ꞌe̱ nga sa̱ꞌíntsjaá Néná, kui xota̱ na̱xi̱ńdá xí sꞌe̱ tsí kꞌuieé.

¹⁹ Ngatꞌa̱ Néná tsꞌénkotsijenjáyani ndeskande ngi̱ndie ndikoón ki̱a̱ ndiꞌakꞌajmii̱, kó askotsijen ndá ndaá tꞌanangii̱,

²⁰ tsi̱ꞌe̱ nga tsintꞌieé nga ni̱ma̱ ndyi̱tsó xota̱ xi síndoꞌniuú, ko̱jo tsi̱ꞌe̱ nga ku̱i̱ꞌíndondé xota̱ xi je katseꞌékjo̱a̱ nga si̱ꞌankꞌiee̱n.

²¹ Kó bo̱a̱ tsꞌén kꞌuiyá jaꞌeén ko̱jo nga niꞌántsjaá Néná, ki̱a̱ na̱xi̱ńdáꞌniú Jerusalee̱n,

²² kjiꞌanga ngayeje xota̱ na̱xi̱ńdaá, ko̱jo ngi̱ndie nínga botíxomaa̱, ta̱ ngo tsí ka̱ma nga ka̱matikó tsi̱ꞌe̱ nga sa̱ꞌínxátꞌaa̱ Néná.

²³ Tji̱e̱nga tikón an nga̱sondie, Néná jaꞌáxín ngaꞌniúna, kó chiboa tsí ni̱xtjin katsꞌénkꞌijñána.

²⁴ Kósꞌe̱ bi̱ kixiáa̱n: «Ji Ne, ngata̱ chjeꞌéxínjíi̱n masien ni̱xtjin nga kotíjña̱ an nga̱sondie, ¡ngata̱ jí tindyin jí ta̱kjiꞌání!

²⁵ Jí boá xi kiniꞌínde ji nga̱sondiee̱ ndeskande nga ítjatsꞌennii̱, kó nkꞌajmii̱, ni xi katsꞌenda ndse̱ boá.

²⁶ Kju̱i̱e̱ kuí xotaa̱, ta̱nga ji, ngatsjéni̱xtjin nga tindyin ji, ngayejee̱ nga kju̱i̱e̱ xikótsꞌèn fe nga maxchá ngo ńjño, kó xikoó ngo ńjño xi bosíkjo, bo̱a̱ tsꞌén ko̱si̱kje ji, kósꞌe̱ xcha̱ja.

²⁷ Ta̱nga ji, ti̱ jíní bo̱a̱, kó jmíni̱xtjin kju̱i̱e̱ ni̱xtjin nga ku̱i̱ndyin ji.

²⁸ Ndií mosoo̱ nda kꞌuíndo, kó xota̱ tji̱e̱e̱ ki̱a̱ ka̱maxchá ngindyikin ji».