Xo̱jo̱n Salmoo̱ 101 - Xo̱jo̱n eén Néná

Ni xi katsóyàtjón re Ndabii̱ nga sa̱ꞌínkjatjosoón Néná

Só xi katsꞌénda Ndabii̱.

¹ ¡Sie an kjo̱a̱a̱ kjo̱a̱ni̱ma̱takóo̱n ko̱jo kjo̱a̱kixìi̱! Jí boá xi siee̱ salmo̱ ji Ne.

² Mejénna skotsijen cha̱n cha̱a̱n ndi̱ya̱à kjo̱a̱kixi̱i̱. Kjiꞌání kji̱ndi̱béchinní. Kjiꞌanga kjótsoꞌbá an ki̱a̱ ndiꞌana, kixi̱ kjótsoꞌbá an xikó tsꞌén kixi̱ ini̱ma̱na.

³ Nde ngojín nii̱ xindajín xi koaꞌaxki̱ an, ngatꞌa̱ chꞌóna ni xi tsꞌén xota̱ xi xín ndi̱yà kjien, kó tsjandièjín an nga ki̱a̱ nijan sa̱ꞌínkamajo̱na.

⁴ Sa̱ꞌinkjìi̱n yojona ini̱ma̱ xi ni xi ndajín tsꞌénkjoó, kó chiíjín skuiendikón án kui xi ni xi ndajín ndyi̱tsꞌèn.

⁵ Sa̱ꞌinkjié kui xi én tsꞌéndataꞌin xota̱ xi xkjín, sa̱ꞌinchíkjo̱a̱jáa̱n kui xota̱ xi nkꞌa ngase, ko̱jo xi kjínkón ngase ka̱maa̱ yojoo̱.

⁶ Ta̱nga ki̱a̱ skotsijèe̱n xota̱ xi maꞌniátakón xi tjín kuí tꞌanangii̱, tsi̱ꞌe̱ nga nijan ku̱i̱ndyionjne̱. Kó kui xota̱ xi ndi̱yà xí kixi̱i̱ síndo, kuí boá xi ka̱ma sa̱ꞌínxátꞌana.

⁷ ¡Nde ngojín xota̱ ndiso xi ka̱ma ki̱a̱ kꞌuijñá ndiꞌana! ¡Kui xi chji̱a̱ éndísoó ka̱májín ki̱a̱ kꞌuijñá ngindyikón án!

⁸ ¡Ndyiojón ndyiojón sa̱ꞌinkjié an xota̱ xi ꞌniú ndajín xi tjín nga̱sondiee̱! ¡Tsi̱ꞌe̱ nga kjoaꞌaxín an ngayeje xota̱ xi tsꞌén ni xi ꞌniú ndajiín, ki̱a̱ na̱xi̱ńdáꞌniuú Néná!