Xo̱jo̱n Salmoo̱ 10 - Xo̱jo̱n eén Néná

Nga ndokjo̱a̱a̱ Néná nga je kiniꞌán

¹ Ji Ne, ánní nga achichí kjin tindyinní, kó timindyiꞌminí kjiꞌanga nda̱ kjimana.

² Achichí nkꞌa maá yojoo̱ xota̱ xi ndajiín nga mongatji̱ngii̱ xota̱ ni̱ma̱a̱, ta̱nga ti̱kuíní xi ku̱i̱xo̱ya chja̱ya̱ xi índo kui.

³ Ngatꞌa̱ xota̱ xi ndajiín, achichí nkꞌa maá yojoo̱ kjo̱a̱a̱ ni xi mejeén ini̱ma̱a̱, kó xota̱ xi xki̱ꞌá to̱o̱n, chꞌo tsoó ko̱jo tsꞌenchꞌó Néná.

⁴ Xota̱ xi ndajiín kjin má mején kje̱n nga nkꞌakon maá yojoo̱, mongasejín Néná, ti̱nde chiíjín tsꞌénkjó kuí.

⁵ ¡Ngatsjéni̱xtjin nga ndi̱yà xí ndajín tjimá! Chꞌoo̱ ngayeje kondra̱a̱, kó kjin síndonii̱ kjo̱a̱botíjé xí boeꞌé ji,

⁶ kó bi̱ tsó ngi̱jin ini̱ma̱a̱: ¡Jmíni̱xtjin sti̱ngí an, kó jmíni̱xtjin nga ndajín ka̱mana!

⁷ Én xí chji̱a̱ tsꞌoa, tjikítsie maá ni xi ndajín, ko̱jo kjo̱a̱ndiso, ko̱jo kjo̱a̱chꞌáṉcha̱ kó ngindie na̱je̱n síndoꞌmaá ni xi tsꞌénꞌónná, ko̱jo ni xi ndajín xi mejeén sa̱ꞌín.

⁸ Ki̱a̱ ꞌbíndoꞌmá, tiña nínga síndo ndiꞌaa̱ xotaa̱, kó kondaꞌma nga tsꞌenkꞌién xota̱ xi jmíjéjiín, konda chikín chíkín xota̱ xi májiín ꞌboxiéꞌá yojoo̱.

⁹ Ngatsjéni̱xtjin nga ꞌbímaꞌma, xikó maá xandi̱je̱ xi ꞌbíndoyá ti̱xa̱na̱xi̱i̱, ngatsjéni̱xtjin nga síndonda nga stso̱ba̱ xota̱ ni̱ma̱a̱, kó ngije katsoboá, xikoó tsi ki̱a̱ nda̱ꞌya̱a̱ mindyiá.

¹⁰ Kó bo̱a̱ tsꞌén ki̱a̱ ni̱ma̱kjo̱a̱ ꞌbíndo ko̱jo mindyiańña, kui xota̱ ni̱ma̱a̱, kjín má xi je ki̱a̱ ngi̱ya tsja síndo.

¹¹ Kó bi̱ tsó ngi̱jin ini̱ma̱a̱: Néná jè kichíyaá, jè íꞌmá kje̱n, kó ngiti̱ bejín ni xi kjimaa̱.

¹² ¡Ye ꞌne̱ Ne, ti̱sítji̱n ji! ¡Chjanínkꞌé ji ndse̱ ji! ¡Kó nga niꞌínchíyéjín ji xota̱ xi ni̱ma̱kjo̱a̱a̱!

¹³ Míkjo̱a̱a̱ nga xota̱ xi ndajiín chꞌoo̱ Néná. Míkjo̱a̱a̱ nga tsꞌénkjó nga jmí xki̱ chji̱e̱ꞌéjíi̱n.

¹⁴ Ta̱nga tiye jí, ngatꞌa̱ titsitsijìi̱n kjo̱a̱ni̱ma̱ ko̱jo ni xi ndajín xi kjimataꞌin, tsi̱ꞌe̱ nga ji ko̱e̱ꞌée̱ ni xi tsoboaá. Jí boá xi kjima ꞌniákoón xota̱ xi jmíjiín xi bosikójoo̱, jí boá xi ꞌnaxiéꞌé ji xota̱ xi xꞌi̱a̱a̱n.

¹⁵ Chjátꞌé jí tjiaa̱ ko̱jo ṉꞌni̱u̱ xota̱ xi ndajiín, ti̱ꞌinkjie ji ni xi ndajín xi ndyi̱tsꞌèn, ngaskande nga kju̱i̱e̱ yeje kui nii̱.

¹⁶ Néná boá xi Re ta̱kjiꞌání, xota̱ na̱xi̱ńdá xí kisꞌińdo tꞌanangi xi tsi̱ꞌe̱ je jesón yeje.

¹⁷ Ji Ne, jí boá xi kandaꞌyée̱ ni xi mejeén xota̱ xi ni̱ma̱kjo̱a̱a̱. Jí boá xi boeꞌé ngaꞌníi̱ ini̱ma̱a̱, kó niꞌínsée̱n nga chji̱a̱a̱,

¹⁸ kó ꞌmijindeje̱ ji xota̱ xi síndo xꞌi̱a̱a̱n, ko̱jo xota̱ xi ndajín kjimataꞌii̱n, tsi̱ꞌe̱ nga ingojín xota̱ nga̱sondiee̱ xi sa̱ꞌiín ni xi ꞌniú ndajín kje̱ꞌe xota̱.