Xki̱ 9 - Xo̱jo̱n eén Néná

Sꞌué Paskuaa̱

¹ Jè má jaꞌa ngo nó nga je jatjoni nangi Ejipto̱ xota̱ Israee̱l, kjiꞌanga Néná tsíchji̱a̱jo Moisee̱, ki̱a̱ nangi kixií na̱xi̱ Sinaii̱, kó Néná bi̱ katsoó:

^2-3 «Xota̱ Israee̱l chjiéngá sa̱ꞌín sꞌué paskuaa̱, kó nga kamángixoón ni̱xtjin tienijoón sá xí ꞌmí Abii̱b ku̱i̱ꞌítsꞌi̱yanii̱ nga sa̱ꞌín, xikótsꞌèn je akoyájnúꞌun».

⁴ Moisee̱ atíxomaa̱ xota̱ Israee̱l tsi̱ꞌe̱ nga sa̱ꞌín sꞌué paskuaa̱.

⁵ Kó xota̱ Israee̱l katsꞌén kui sꞌueé ki̱a̱ nangi kixií na̱xi̱ Sinaii̱, nga kamángixoón ni̱xtjin tienijoón, xikó má tsꞌén atíxomaa̱ Néná Moisee̱ nga tsíchji̱a̱jo.

⁶ Ta̱nga tjín xota̱ Israee̱l xi ini̱ma̱ katsꞌénjo̱, kó kjo̱a̱kitii̱ katsjandièjiín kui xotaa̱ nga sa̱ꞌín kui sꞌueé. Kósꞌe̱ kijíkoón Moisee̱ ko̱jo Aaroo̱n,

⁷ kó bi̱ katsoó: —Ini̱ma̱ kiniꞌánjo̱jne̱ ji̱n, kó mejénjne̱ xcha̱jne̱ tsi ka̱ma si̱ꞌankꞌasꞌienjne̱ kjo̱a̱tjó Néná xikó ndyi̱tsꞌèn xota̱ Israee̱l xi ngasee̱.

⁸ Kó Moisee̱ bi̱ katsoó: —Chiyárachiíjnúꞌun. Kosíyámáráa̱ Néná ni xi chjiéngá si̱ꞌánjnú.

⁹ Kó Néná bi̱ katsoó Moisee̱:

¹⁰ «Bo̱a̱ tꞌíi̱n xota̱ Israee̱l nga chjiéngá nga ngayejee̱ nga sa̱ꞌín sꞌué Paskuaa̱. Tsi tjín xí ini̱ma̱ katsꞌénjo̱ ko̱jo tsi tjín xí kjin tjimá,

^11-12 chjiéngá sa̱ꞌín kui sꞌueé, kó nga kamángixoón ni̱xtjin tienijoón sá xí ꞌmí Sii̱b ku̱i̱ꞌítsꞌi̱yani. Kó bi̱ sa̱ꞌín nga kꞌo̱xié kui sꞌueé: xka̱ sa ku̱i̱ndyiaá yojoo̱ kui cho̱tsa̱nga̱a̱ nga skji̱ni̱e̱, kó pan xi jmí nisanjiín skji̱ni̱e̱tꞌajo̱. Ngojín ńdaa̱ kui cho̱tsa̱nga̱a̱ skjítꞌó, ti̱nde ka̱májín kjo̱a̱ꞌátjó chií nichiniee̱ tsi̱ꞌe̱ nga kamángindyiojón skji̱ni̱e̱.

¹³ »Ta̱nga kui xota̱ xi jmíjiín ngo kjo̱a̱ nga sa̱ꞌínjín kui sꞌueé, ko̱jo tsi xi sa̱ꞌínkꞌasꞌienjín kjo̱a̱tjó kui ni̱xtjii̱n, ka̱majérií. Ka̱májín ko̱e̱ꞌéndièjnú nga ki̱a̱ kꞌuijñájinjnú, chjiéngá si̱ꞌankjie kui xotaa̱.

¹⁴ Tsi síndojinjnú xota̱ xi xín nangi chji̱a̱ni, ti̱ chjiéngá sa̱ꞌín sꞌué Paskuaa̱ nga, bo̱a̱ tsꞌén sa̱ꞌín xikó má tsꞌén je akatíxomájnú jún. Kjo̱a̱kitii̱ ta̱ són chjínií ngi̱jii̱n ngayeje xotaa̱».

Néná kistsoꞌbátjoón xota̱ na̱xi̱ńdaá

¹⁵ Ni̱xtjin nga kachjaninkꞌa ndiꞌandikoón kjo̱a̱ꞌbíndaa̱, ngo ṉdi̱ kjindibá xi kisꞌijña nga̱soón kui ngi̱ndiee̱. Kó nga kamájñoó ngo ndiꞌí kisꞌijña nga̱soón ndiꞌandikoón, ta̱nga nga ta̱jño̱ó kichajá.

¹⁶ Kó ngatsjéni̱xtjin nga bo̱a̱ kamá: nga ni̱xtjii̱n ngo ṉdi̱ kisꞌijñasón nkꞌaa̱, kó nga jñoó ngo ni xi ja̱kjiꞌi ndiꞌí kjíꞌí xi kisꞌijñasón nkꞌaa̱ xi katsꞌéntsijee̱n.

^17-23 Néná boá xi katsóyaà xota̱ Israee̱l kjiꞌanga tjín nínga kijí, ko̱jo kjiꞌanga katsꞌénkjaꞌyá. Bi̱ tsꞌén katsꞌén kui nii̱: kjiꞌanga katjoninkꞌa kui ṉdi̱i̱ ko̱jo nga katsꞌéntíyá, xota̱ Israee̱l katsꞌéntíyaá yojoo̱, kó ki̱a̱ kijítji̱ngii̱ kui ṉdi̱i̱, kó kjiꞌanga kasasien kui ṉdi̱i̱, ki̱a̱ kisꞌińdo xota̱ Israee̱l nga. Kó ki̱a̱ iskjininkꞌa ndiꞌaa̱, sꞌe̱ ki̱a̱ kisꞌińdo tji̱e̱nga kui ṉdi̱i̱ ki̱a̱ kisꞌijña nga̱són nkꞌaa̱ ndiꞌandikoón. Tjín ni̱xtjin nga kui ṉdi̱i̱, ta̱ ngo tsí ko̱jo tsi ta̱ chiboa tsí ni̱xtjin nga xió kisꞌijña ngo ngi̱ndie, ta̱nga tjín ni̱xtjin nga ngaskande ngo sá, ko̱jo tsi ngaskande ngo nó kamaá. Kjiꞌanga kjín ni̱xtjin katsꞌéntíyájín kui ṉdi̱i̱, xota̱ Israee̱l tsintꞌiéꞌén, kó ti̱ ki̱a̱ kisꞌińdo kui nga. Kó jmí ndasénjín tsi ni̱xtjin ko̱jo tsi ni̱xtji̱e̱n, kjiꞌanga katsꞌéntíyá kui ṉdi̱i̱, xota̱ Israee̱l ki̱a̱ kijítji̱ngii̱, kjiꞌanga kasasien, ti̱ ki̱a̱ kisꞌińdo xota̱ Israee̱l nga, kó ki̱a̱ katsꞌéntsjaà Néná. Bo̱a̱ katsꞌén Néná nga atíxomaa̱ xota̱ Israee̱l nga tsíchji̱a̱jo Moisee̱, kó xota̱ Israee̱l tsintꞌiéꞌeén.