Xki̱ 7 - Xo̱jo̱n eén Néná

Kjo̱a̱tjó xi katseꞌé nga kiniꞌánkꞌasꞌien ndiꞌandikoón

¹ Ngije Moisee̱ kamándo̱jo̱ó ndiꞌandikoón, katsangijon isti̱, tsi̱ꞌe̱ nga kui nii̱ xi ko̱kó nga kui ndiꞌandikoón ko̱jo ngayeje ni xi tjín ngi̱yaa̱, je tsi̱ꞌe̱ nga si̱ꞌantsjaa̱ Néná boá.

² Já ngito̱ko̱o̱ xota̱ Israee̱l, kui xi asíko̱jo nga ikꞌíxki̱ xotaa̱ katsꞌénkꞌasꞌien Néná ngo kjo̱a̱tjó xi

³ jun karreta̱ ko̱jo tiejó cho̱yojo xi bokján tꞌanangi. Nga ngo nga ngo já ngito̱ko̱o̱ katsjá ngo cho̱yojo xi bokján tꞌanangi, kó xki̱ jó jó ngito̱ko̱, ngo karreta̱ katsjá. Ngayeje kui nii̱ xi katsꞌénkꞌasꞌien ki̱a̱ ndiꞌandikoón.

⁴ Kó Néná bi̱ katsoó Moisee̱:

⁵ «Chjábé jí kui karretaa̱ ko̱jo kui cho̱yojo xi bokján tꞌanangii̱, kó xota̱ tji̱e̱e̱ Lebii̱ ti̱ꞌinkꞌasꞌíi̱n. Bo̱a̱ tꞌíi̱n nga ki̱a̱ ngatsꞌénkjién kjiꞌanga sa̱ꞌín xaá ki̱a̱ ndiꞌandikoón, ta̱ xikó kjiꞌi xá xí tsoboaá nga sa̱ꞌín nga ngo nga ngo».

⁶ Kó Moisee̱ iskjíbé kuí karretaa̱ ko̱jo kui cho̱yojo xi bokján tꞌanangii̱, kósꞌe̱ katsjaá xota̱ tji̱e̱e̱ Lebii̱,

^7-8 tsi̱ꞌe̱ nga sa̱ꞌín xaá. Kui xtín xota̱ ndiꞌa xi chji̱a̱ni Ngersoo̱n jó karreta̱ ko̱jo nijón cho̱yojo xi bokján tꞌanangi katsjaá, kó xtín xota̱ ndiꞌa xi chji̱a̱ni Merarii̱ nijón karreta̱ ko̱jo jin cho̱yojo xi bokján tꞌanangi katsjaá. Ngito̱ko̱o̱ kui jaá Itamaa̱r boá, kui xi ndií chináꞌmi Aaroo̱n.

⁹ Xtín xota̱ ndiꞌa xi chji̱a̱ni Koaa̱t jmí ni katsjájiín, ngatꞌa̱ kui xotaa̱, kuí boá xi tsaꞌanijín nga̱són tjiaa̱ ni ndikoón ndiꞌandikoón.

¹⁰ Ni̱xtjin nga kiniꞌánkꞌasꞌiee̱n Néná ndiꞌandikoón, já ngito̱ko̱o̱ xota̱ tji̱e̱e̱ jachójo̱ kjo̱a̱tjoó, kó ki̱a̱ índo kje̱n nínga tikón ṉchandikoón.

¹¹ Kósꞌe̱ Néná bi̱ katsoó Moisee̱: «Ti̱ꞌin ji nga ndyiojón ndyiojón, ja̱ kje̱ꞌe ja̱ kje̱ꞌe ngito̱ko̱ xi ngatjachójo̱ kjo̱a̱tjó tsi̱ꞌe̱ nga si̱ꞌankꞌasꞌienna ṉchandikoón».

^12-83 Kuí bí kui kjo̱a̱tjó xi katsꞌénkꞌasꞌiee̱n Néná já ngito̱ko̱o̱ nga tiejó tji̱e̱e̱ xota̱ Israee̱l: Ngo ndástsié xí to̱ntiboa xi ngo kilo̱ masien é, ngo jarra̱ xi to̱ntiboa xi ján kuarto̱ kilo̱ é, ngo chꞌa̱ to̱nsinié xi je, xi úchán ko̱jo tie ngramo̱ é, xi tjikítsie maá nisije̱n, ngo ndií cho̱yojo, ngo cho̱tsa̱nga̱ xi jaꞌatji ndi̱ja̱a̱, ngo ndií cho̱tsa̱nga̱ xi jaꞌatji ndi̱ja̱a̱ xi ngo noó, tsi̱ꞌe̱ nga kꞌuití ndo̱jò ndójo̱ ngandaa̱ Néná, ngo tindso̱ xi kꞌuití tsi̱ꞌe̱ nga ka̱machjí jeé, jó cho̱yojo toro̱ xi ka̱ma kjo̱a̱tjó tsi̱ꞌe̱ nga Néná nda ko̱a̱ꞌa̱ nginí xotaa̱, ún cho̱tsa̱nga̱ xi jaꞌatji ndi̱ja̱a̱, ún tindso̱, ko̱jo ún cho̱tsa̱nga̱ xi ngo noó. Ngayeje kui nii̱ kichꞌíchi̱bo̱a̱ xikótsꞌèn chꞌíchi̱bo̱a̱ ni ki̱a̱ ndiꞌandikoón. Ndástsieé ko̱jo jarraa̱ tjikítsie má ndso̱ko̱a̱n ṉño̱pan xi nda, xi isti̱ kiniꞌánda̱ꞌyo̱ni, tsi̱ꞌe̱ nga ka̱manda kjo̱a̱tjó xi ni xi maxchá jno̱o̱. Ngayeje kui kjo̱a̱tjoó xi katsꞌénkꞌasꞌien nga tiejó já ngito̱ko̱o̱, kó bi̱ tsꞌén katsoboaá nga katsꞌénkꞌasꞌien nga ngo nga ngo: Ni̱xtjin xi tjoón, Naasoo̱n katsoboaá, nda̱ xi chji̱a̱ni xota̱ tji̱e̱e̱ Jundáa̱, ni̱xtjin xi ma joó, Natanaee̱l katsoboaá, nda̱ xi chji̱a̱ni xota̱ tji̱e̱e̱ Isakaa̱r, ni̱xtjin xi ma jaán, Eliaa̱b katsoboaá, nda̱ xi chji̱a̱ni xota̱ tji̱e̱e̱ Sabuloo̱n, ni̱xtjin xi ma nijoón, Elisuu̱r katsoboaá, nda̱ xi chji̱a̱ni xota̱ tji̱e̱e̱ Rubee̱n, ni̱xtjin xi ma uún, Selumiee̱l katsoboaá, nda̱ xi chji̱a̱ni xota̱ tji̱e̱e̱ Simeoo̱n, ni̱xtjin xi ma juu̱n, Eliasaa̱f ndií Reuee̱l katsoboaá, nda̱ xi chji̱a̱ni xota̱ tji̱e̱e̱ Ngaa̱nd, ni̱xtjin xi ma yitoo̱, Elisamaa̱ katsoboaá, nda̱ xi chji̱a̱ni xota̱ tji̱e̱e̱ Efraii̱n, ni̱xtjin xi ma jii̱n, Ngamaliee̱l katsoboaá, nda̱ xi chji̱a̱ni xota̱ tji̱e̱e̱ Manasee̱, ni̱xtjin xi ma nijan, Abindaa̱n katsoboaá, nda̱ xi chji̱a̱ni xota̱ tji̱e̱e̱ Benjaa̱, ni̱xtjin xi ma tiee̱, Ayiesee̱r katsoboaá, nda̱ xi chji̱a̱ni xota̱ tji̱e̱e̱ Ndaa̱n, ni̱xtjin xi ma tiengo, Pangiee̱l katsoboaá, nda̱ xi chji̱a̱ni xota̱ tji̱e̱e̱ Asee̱r, ni̱xtjin xi ma tiejoó, Ayiraa̱ katsoboaá, nda̱ xi chji̱a̱ni xota̱ tji̱e̱e̱ Neftalii̱.

^84-88 Já ngito̱ko̱o̱ xota̱ tji̱e̱e̱ Israee̱l katsjá ngayeje kui nii̱ tsi̱ꞌe̱ nga katsꞌénkꞌasꞌiee̱n Néná kui ṉchandikoón: Tiejó ndástsié xí to̱ntiboa xi ngo kilo̱ é kamá nga ngo nga ngo, tiejó jarra̱ xi to̱ntiboa xi masien kilo̱ é kamá nga ngo nga ngo, ko̱jo tiejó chꞌa̱ xi to̱nsinié xi úchán ngramo̱ é kamá nga ngo nga ngo. Kan jun kilo̱ masien kamáꞌé ngayeje ndástsieé ko̱jo jarraa̱, kó ngo kilo̱ ján úchán ko̱jo kan ngramo̱ kamáꞌé ngayeje chꞌa̱a̱, nga kichꞌíchi̱bo̱a̱ xikótsꞌèn chꞌíchi̱bo̱a̱ ni ki̱a̱ ndiꞌandikoón. Bi̱ tjín kamá ngayeje cho̱ xi ikꞌítí ndo̱jò ndójo̱ tsi̱ꞌe̱ nga Néná nda tsaꞌa nginí xotaa̱: Tiejó cho̱yojo toro̱, tiejó cho̱tsa̱nga̱ xi jaꞌatji ndi̱ja̱a̱, ko̱jo tiejó ndií cho̱tsa̱nga̱ xi ngo noó.

⁸⁹ Jaskan ngije kamá kui nii̱, Moisee̱ tsꞌasꞌien ndiꞌandikoón tsi̱ꞌe̱ nga tsíchji̱a̱jo Néná. Ki̱a̱ nínga tikón tsꞌoa kui koxa̱a̱ kjo̱a̱ꞌbíndaa̱, ki̱a̱ nínga síndo nga jó keruu̱b, ki̱a̱ tsintꞌieé Moisee̱ nda̱a̱ Néná.