Xki̱ 6 - Xo̱jo̱n eén Néná

Kjo̱a̱botíxomaa̱ xota̱ xi nasareo̱ sa̱ꞌín yojoo̱

¹ Néná tsíchji̱a̱jo Moisee̱, kó bi̱ katsoó:

² «Bi̱ tꞌíi̱n xota̱ Israee̱l: Kjiꞌanga ngo nda̱ ko̱jo tsi ngo na̱ xi sa̱ꞌínkꞌasꞌienna yojoo̱ xikoó ngo xota̱ nasareo̱,

³ ka̱májín ni xi ꞌyó xi tsꞌenchꞌi̱ná kꞌuí. Ti̱nde ka̱májín skji̱ni̱e̱ tostsi̱jè xí kichjí ko̱jo tsi xi kixí.

⁴ Tji̱e̱nga tikón kui ni̱xtjii̱n ka̱májín skji̱ni̱e̱ ni xi tostsi̱jè kamándani.

⁵ Ngayeje kui ni̱xtjii̱n, ka̱májín ko̱tie tsja̱to̱ko̱, ngatꞌa̱ kuí boá kui nii̱ xi ko̱kó nga ta̱ xána tsí xi tjítsꞌén.

⁶ »Kó ti̱nde ka̱májín ko̱e̱je̱kon tiñaa̱ ngo ini̱ma̱,

⁷ ndatsi ngo xi xchaá xi kꞌien, ko̱jo tsi ngo ntsꞌi̱e̱, ko̱jo tsi ngo ndichja. Tsi sa̱ꞌínjo̱, jè ngiti̱ tsjiejín ka̱ma, xikótsꞌèn tsjie ma xota̱ xi ta̱ xána tsí xi tsꞌén.

⁸ Chjiéngá tsjie ka̱ma tji̱e̱nga kji̱e̱ fotjosónjín kui ni̱xtjii̱n.

⁹ »Tsi ngo xota̱ ko̱yátꞌaa̱, kui xota̱ xi tjítsꞌén nasareo̱ yojoo̱, tsi̱ꞌe̱ nga ka̱matsjie nginí, chjiéngá ku̱i̱ꞌíjón taka takaa̱ to̱ko̱ ngije jaꞌa ngo xomana̱.

¹⁰ Ngije jachó xi jin ni̱xtjii̱n, chjiéngá ko̱e̱je̱jo jó ndí toṉña̱ ko̱jo tsi jó ndií tójo, kó chináꞌmii̱ sa̱ꞌínkꞌasꞌiee̱n ki̱a̱ nínga bitjasꞌi̱e̱nnii̱ ndiꞌandikoón.

^11-12 »Kó tsi̱ꞌe̱ nga an, kui xi Nee̱, sa̱ꞌinjetakóo̱n jeé kui xota̱ nasareoo̱, chjiéngá chináꞌmii̱ tjón sa̱ꞌínkꞌién ngo kui cho̱ xi tjiín tsja̱nga̱a̱, kó ngatꞌítí ndo̱jò ndójo̱. Kósꞌe̱ jaskan ki̱a̱ nijan sa̱ꞌínkꞌién xi ingo kui cho̱o̱, ko̱jo kui cho̱tsa̱nga̱ xi ngo noó xi sa̱ꞌínkꞌasꞌien xota̱ nasareoo̱. Bo̱a̱ tsí tsꞌén nga an sa̱ꞌinjetakóo̱n kjo̱a̱a̱ nga ngo ini̱ma̱ katsꞌénjo̱, kó ngijee̱, kui xota̱ nasareoo̱ ka̱ma sa̱ꞌín nginí xána. »Kó ta̱ngatꞌanii̱ nga katsꞌéndándí yojoo̱ kui ni̱xtjin nga kamámára xota̱ nasareo̱, jè ngiti̱ jmí xki̱ xꞌi̱a̱jín kui ni̱xtjin xi̱ꞌba̱. Kuíni nga kui ni̱xtjin ngije katsꞌénkꞌasꞌien kjo̱a̱tjoó, ku̱i̱ꞌítsꞌi̱ya nginií ni̱xtjin xi katsó nga xota̱ nasareo̱ ka̱ma.

¹³ »Ngije jatjosón ni̱xtjin xi katsó nga sa̱ꞌín xána kui xota̱ nasareoo̱, chjiéngá ki̱a̱ ko̱si̱e̱nkixi̱ ki̱a̱ nínga bitjasꞌi̱e̱nnii̱ ndiꞌandikoón,

¹⁴ kó ki̱a̱ sa̱ꞌínkꞌasꞌienna kui kjo̱a̱tjó xi̱ꞌbi̱: ngo ndií cho̱tsa̱nga̱ xi ngo noó xi onjiín, kui xi ngo kjo̱a̱tjó ka̱ma xi kꞌuití ndo̱jò ndójo̱, ko̱jo ngo cho̱tsa̱nga̱ xi ngo noó xi onjiín, tsi̱ꞌe̱ nga si̱ꞌanjetakoón jeé, ko̱jo ingo cho̱tsa̱nga̱ xi jaꞌatji ndi̱ja̱a̱ xi onjiín, tsi̱ꞌe̱ nga kui xota̱ nasareoo̱ ka̱ma nda koaꞌa ngiñá an.

¹⁵ »Kó kui xota̱ nasareoo̱, chjiéngá ko̱e̱je̱jo ki̱a̱ ndiꞌandikoón ngo ni̱se̱nyá pan ko̱jo ṉño̱ xinié xi jmí nisanjiín, xi ndso̱ko̱a̱n ṉño̱pan xi nda kamándajo̱ni, xi ikindyiaa̱ isti̱ nga kiniꞌánda̱ꞌyo̱, ko̱jo ngatjíjo̱ kjo̱a̱tjó xi ngasee̱, kui xi ni xi maxchá jno̱o̱ ko̱jo binoo̱.

^16-19 »Kó chináꞌmii̱ xí sa̱ꞌínkꞌasꞌienna ni̱se̱nyá paa̱n, ko̱jo ni xi maxchá jno̱o̱, ko̱jo binoo̱. Sꞌe̱ jaskan kui xota̱ nasareoo̱ ku̱i̱ꞌíjón taka takaa̱ to̱ko̱ ki̱a̱ nínga bitjasꞌi̱e̱nnii̱ ndiꞌandikoón, kó kui chináꞌmii̱ ki̱a̱ nijan ku̱i̱ꞌítí tsja̱a̱ kui xotaa̱ ko̱jo kui cho̱ xi ka̱ma kjo̱a̱tjoó, tsi̱ꞌe̱ nga ka̱ma nga nda ko̱a̱ꞌa ngiñá an. Jaskan ngije kamá kui nii̱, chináꞌmii̱ tsja̱á xota̱ nasareoo̱ yojoyìtsꞌe̱n kui cho̱tsa̱nga̱ xi jaꞌatji ndi̱ja̱a̱ xi je kachjaán, ko̱jo ngo pan, ko̱jo ngo ṉño̱ xinié xi jmíjiín nisan.

²⁰ »Sꞌe̱ jaskan chináꞌmii̱ ku̱i̱ꞌítji̱ya ńdanisee̱n ko̱jo ti̱ꞌmi̱í kui cho̱ xi tjíniꞌánkꞌasꞌien nganda tsa̱ꞌa̱n. Ndikón kui chikjaa̱n kui cho̱o̱, kó ta̱ chináꞌmii̱ tsí xi ko̱e̱ꞌeé. Jaskan ngije katsꞌén kui nii̱, xota̱ nasareoo̱ ka̱ma kꞌuí bino̱.

²¹ »Kuí bí kui nii̱ xi sa̱ꞌín kui xota̱ xi ta̱ xá tsa̱ꞌa̱n tsí xi sa̱ꞌín nga xotaa̱ nasareo̱ ka̱ma. Kó kuí bí kui kjo̱a̱tjoó xi sa̱ꞌínkꞌasꞌienna, ko̱jo kje̱ꞌe ngase ni xi ka̱mamejeén sa̱ꞌínkꞌasꞌienna, ta̱nga ni xi ꞌniú chjí ngasenii̱, kuí boá nga sa̱ꞌín ni xi katsó nga sa̱ꞌínkjatjosónna».

Kjo̱a̱niꞌánchikonñé xi tsjá chináꞌmii̱

²² Kó Néná ti̱ bi̱ ti̱ katsoó Moisee̱ nga:

²³ «Bo̱a̱ tꞌíi̱n Aaroo̱n ko̱jo ndií, nga chjiéngá bi̱ tsꞌén sa̱ꞌínchikonñé xota̱ Israee̱l:

²⁴ “Néná ngatsꞌénchíkonñeé, kó ngatsjéni̱xtjin nga koon,

²⁵ Néná tsjangatamaa̱ nga skotsíjee̱n, kó ngatsjaá kjo̱a̱ni̱ma̱takoón.

²⁶ Néná tsjangatamaa̱ nga skotsíjee̱n, kó ngatsjaá kjo̱a̱xioó”.

²⁷ »Kjiꞌanga chináꞌmii̱ bi̱ tsꞌén sa̱ꞌínchikonñé xota̱ Israee̱l, án boá xi sa̱ꞌin an nga kjo̱tjosón kui nii̱».