Xki̱ 5 - Xo̱jo̱n eén Néná

Kjo̱a̱botíxoma xikótsꞌèn kꞌuíndo xotaa̱ ki̱a̱ nínga síndo ndiꞌaa̱

¹ Néná bi̱ katsoó Moisee̱:

^2-3 «Bo̱a̱ tꞌíi̱n xota̱ Israee̱l nga ndi̱tsee̱n nínga síndo ndiꞌaa̱, ngatꞌaxié ngayeje xi chjo̱on ko̱jo tsi xi xi̱ꞌin xi ngo kui nii̱ kꞌuieé: Tsi tjín xí tjiín ngo chiꞌin yojo ndikoón, ko̱jo tsi tji̱xin yojoo̱, ko̱jo tsi xi ngo ini̱ma̱ katsꞌénjo̱. Bo̱a̱ tsí tsꞌén nga sa̱ꞌíndándíjín ki̱a̱ nínga síndo ndiꞌaa̱, ki̱a̱ nínga tikòn an nga».

⁴ Kó xota̱ Israee̱l tsintꞌiéꞌén kjo̱a̱a̱ ni xi Néná atíxomaa̱ Moisee̱ nga sa̱ꞌín, kó tsangatji̱ngii̱ ki̱a̱ nínga síndo ndiꞌaa̱ xotaa̱ kui xi kisꞌiee̱ kui chiꞌii̱n.

Kje̱ꞌe ngase kjo̱a̱botíxoma

⁵ Jaskan Néná bi̱ katsoó Moisee̱:

⁶ «Bo̱a̱ tꞌíi̱n xota̱ Israee̱l nga tsi tjín xí sa̱ꞌínchejeé ko̱jo tsi sa̱ꞌínkjatsón nii̱ kje̱ꞌe xota̱, án boá xi tjítsꞌénjo̱na kui nii̱, kó jé boá ni xi tjítsꞌén,

⁷ kó chjiéngá bi̱ tsꞌén sa̱ꞌíndaya yojoo̱: ngatsjá ngajo nginií ni xi jaꞌáxiín kui xotaa̱, kó ngo tíkjá nga ún ngatásoón.

⁸ Tsi je kꞌien kui xota̱ xi kiniꞌánchejeé, kó tsi ka̱májín xota̱ xkjín kui xi je kꞌiee̱n ko̱e̱ꞌéꞌoyaá nginií kui nii̱, chjiéngá Néná sa̱ꞌínkꞌasꞌiee̱n, kó kui nii̱ ka̱ma sa̱ꞌínkjién já chináꞌmii̱. Kó kui xota̱ xi katsꞌénchejeé ko̱jo tsi kui xi katsꞌénkjatsón nii̱ kui xotaa̱, chjiéngá kjo̱joo̱ chináꞌmii̱ ngo cho̱tsa̱nga̱ xi jaꞌatji ndi̱ja̱a̱ tsi̱ꞌe̱ nga sa̱ꞌínkꞌién, kó Néná sa̱ꞌínkꞌasꞌiee̱n, kó bo̱a̱ tsꞌén nga Néná sa̱ꞌínjetakoón jeé.

^9-10 »Ngayeje kui kjo̱a̱tjó xi xotaa̱ ko̱e̱je̱joo̱ Néná, tsi̱ꞌe̱ chináꞌmii̱ ka̱ma».

Kjo̱a̱botíxoma kjo̱a̱a̱ kjo̱a̱chi̱ni̱i̱

¹¹ Néná katsjaá ingo kjo̱a̱kiti Moisee̱, kó bi̱ katsoó:

^12-13 «Bi̱ tꞌíi̱n xota̱ Israee̱l: tsi ngo xota̱chjo̱on xí tjítsꞌéntꞌaa̱ kjo̱a̱ xi̱ꞌii̱n nga kje̱ꞌe xíꞌín tsꞌénfojñajo̱, kó tsi jmíjín xi sku̱i̱e̱ ni xi katsꞌén, ti̱nde xi̱ꞌii̱n sku̱i̱e̱jín,

¹⁴ ta̱nga tsi xi̱ꞌii̱n ka̱makjiín ni xi tjítsꞌén chjo̱ón, kó tsi ka̱ma chi̱ni̱, kó tsi ngaskande tjín xí ka̱makjiín nga chjo̱ón kui nda̱a̱ tsꞌénꞌboṉcha̱jo, ndatsi bo̱a̱jín kjiꞌi kui nii̱.

¹⁵ »Kjiꞌanga bo̱a̱ ka̱ma, xi̱ꞌii̱n kui xota̱chjo̱on chjiéngá kjo̱jo chjo̱ón ngindyi̱ko̱n chináꞌmii̱, kó ki̱a̱ sa̱ꞌínkꞌasꞌiee̱n Néná ngo kjo̱a̱tjó xi jó kilo̱ ndso̱ko̱a̱a̱n to sebanda̱. Kó nga kui kjo̱a̱tjoó tsi̱ꞌe̱ ngo xi̱ꞌin xi chi̱ni̱ xi mejeén sku̱i̱e̱ tsi chjo̱ón tjítsꞌéntꞌaa̱ kjo̱a̱, ka̱májín isti̱ ko̱jo tsi nisije̱n chjatjájón kui ndso̱ko̱a̱a̱n to sebanda̱.

¹⁶ »Kósꞌe̱ kui chináꞌmii̱ ku̱i̱ꞌaa̱ kui xota̱chjo̱on tsi̱ꞌe̱ nga ko̱e̱je̱kon tiñaa̱, kó ki̱a̱ sa̱ꞌínkꞌasꞌien ngindyi̱ko̱n Néná.

¹⁷ Sꞌe̱ jaskan kui chináꞌmii̱ kjo̱chójo̱ ndáfoa xi je Néná je kiniꞌánkꞌasꞌiee̱n, kó chií ńdiee̱ ndiꞌandikoón ku̱i̱ndyiaá.

¹⁸ »Sꞌe̱ jaskan, ko̱kó ngo chi̱bo̱a̱ nga on kjimaa̱ ni xi katsꞌén kui naa̱, kó chináꞌmii̱ skjíndó tsja̱a̱ kui naa̱, kósꞌe̱ sa̱ꞌínkꞌasꞌien ngindyi̱ko̱n Néná. Chináꞌmii̱ tsja̱á kui xota̱chjo̱on kui kjo̱a̱tjoó, tji̱e̱nga kjiꞌiꞌniuú ni xi ndyi̱a̱ ndáfoa xi sa xi ndajín tsꞌeén xota̱ xi tsꞌénjeé.

¹⁹ Kósꞌe̱ chináꞌmii̱ bi̱ tꞌín ji nga ngiboanéná tꞌín ji ka̱tso̱o̱: “Tsi ja̱koxi̱ nga kichꞌíi̱ṉche̱jejín ji xi̱ꞌíi̱n, kó tsi jmí tsi kje̱ꞌe xíꞌín xi je katsjajnije̱ ji, míꞌáa̱ Néná nga kjiꞌa ngije sꞌi̱ ji kui ndáfoa saa̱ jmí ni xi ndajín ka̱májiín.

²⁰ Ta̱nga tsi kiniꞌíntꞌée̱kjo̱a̱ xi̱ꞌíi̱n, kó tsi kje̱ꞌe xíꞌín je katsjajnije̱ ji,

^21-22 míꞌáa̱ Néná nga sa̱ꞌínjeé, kó nga ngije sꞌi̱ ji kui ndáfoaa̱, ngatamaske nga̱ntsꞌoe ji, kó ngatamandi̱ ji. Kó kui nii̱ xi chi̱bo̱a̱ ngatamaa̱ ngayeje xota̱ xi ngasee̱. Kuí bí kui nii̱ xi kjo̱a̱botíjée̱ ka̱ma”. »Kó chjiéngá bi̱ ka̱tso̱ kui naa̱: “Bo̱a̱ kjíꞌí, bo̱a̱ kjíꞌí”.

²³ »Kósꞌe̱ chináꞌmii̱ ku̱i̱ꞌítꞌa xo̱jo̱n kui ni xi ndajiín, kó kui ndáfoa saa̱ xi sa̱ꞌínkjiéni ngijee̱.

²⁴ Jaskan tsja̱á kui naa̱ kui ndáfoa saa̱ tsi̱ꞌe̱ nga kꞌuí,

²⁵ kó kui naa̱ tsja̱á kui chináꞌmii̱ kjo̱a̱tjoó tsi̱ꞌe̱ nga ki̱a̱ ku̱i̱ꞌíjñá nga̱són ṉchandikoón, kósꞌe̱ ngatsꞌénkꞌásꞌieén Néná.

²⁶ Kó kui chináꞌmii̱ skjíbé ngo tji̱ngo̱ ni xi maxchá jno̱o̱, kó ki̱a̱ ku̱i̱ꞌítí nga̱soón ṉchandikoón, tsi̱ꞌe̱ nga Néná kjo̱a̱ꞌátsjiee̱n ꞌyání bo̱a̱ xi katsꞌénkꞌasꞌien kui kjo̱a̱tjoó. »Jaskan kui naa̱ kꞌuí kui ndáfoa saa̱,

²⁷ tsi tsꞌenṉcha̱jo xi̱ꞌii̱n, kuí ndáfoaa̱ xi sa̱ꞌín nga ndajín ka̱maa̱, kó ka̱maske nga̱tsꞌo̱a̱, kó ngiti̱ jmí ndí kꞌuiéjiín. Kuí nii̱ xi chi̱bo̱a̱ ka̱maa̱ ngayeje xotaa̱.

²⁸ »Ta̱nga tsi kui naa̱ tsꞌenṉcha̱jojín xi̱ꞌii̱n, jmí ni xi ndajín ka̱maa̱, kó ka̱ma kꞌuieé ndí.

²⁹ »Kuí nii̱ xi ka̱ma sa̱ꞌín ngo xota̱chjo̱on xí kꞌo̱ṉcha̱jo xi̱ꞌii̱n nga kje̱ꞌe xíꞌín kjojñájo̱. Tsi ka̱ma chi̱ni̱ xi̱ꞌii̱n,

³⁰ tsi bo̱a̱ kjiꞌi, ko̱jo tsi bo̱a̱jín kjiꞌi, chjiéngá ngindyi̱ko̱n Néná ko̱e̱je̱jo, kó kui chináꞌmii̱ sa̱ꞌín ngayeje ni xi je kixiáa̱n.

³¹ Xi̱ꞌii̱n kui xota̱chjo̱on ka̱majéjiín. Ta̱nga tsi ndajín katsꞌén kui naa̱, chjiéngá ka̱majeé.»