Xki̱ 36 - Xo̱jo̱n eén Néná

Tꞌanangi xi tsi̱ꞌe̱ ínchjiín

¹ Ngo ndi̱yà já ngito̱ko̱o̱ xtín xota̱ xi chji̱a̱ni Ngalaa̱nd, kui xi xota̱ tji̱e̱e̱ Manasee̱, kijíkoón Moisee̱, kó ngindyi̱ko̱n já ngito̱ko̱o̱ xota̱ tji̱e̱e̱ xota̱ Israee̱l bi̱ katsoó:

² «Néná boá xi bo̱a̱ katsoó nga ji si̱ꞌinkabisée̱n xota̱ Israee̱l tꞌanangii̱ nga si̱ꞌin ji ngo kjo̱a̱chꞌáṉcha̱. Kui tꞌanangi xi tsi̱ꞌe̱ nda̱ xingi̱jne̱ xi kiꞌmí Selofaa̱nd jí katseꞌée̱ ndí ínchjín xí kisꞌiee̱ kui.

³ Ta̱nga nda̱ kjimajne̱ nga kui ínchjiín ku̱i̱xanjo̱ xota̱ xi kje̱ꞌe xota̱ tji̱e̱ chji̱a̱ni. Kósꞌe̱ jaskan kui nangi xi tsi̱ꞌe̱ kui ínchjiín kamá, ko̱jo xi tsi̱ꞌe̱ xota̱ tji̱e̱jne̱ kamá, jè tsi̱ꞌe̱ kui já xí ku̱i̱xanjo̱ kui ínchjiín ka̱ma ngijee̱. Kó ji̱n jè xcha̱jajne̱ kui nangi xi ji katseꞌéjne̱.

⁴ Kó bo̱a̱ tsꞌén kjiꞌanga kjo̱chó nó ndeé, je kui tsi̱ꞌe̱ kui xotaa̱ ka̱ma ndi̱yà tꞌanangijne̱. Kó xota̱ tji̱e̱jne̱ xcha̱ja ngo ndiè tꞌanangi xi kasakoo̱».

⁵ Néná bi̱ katsoó Moisee̱ ni xi chjiéngá sa̱ꞌín. Kósꞌe̱ Moisee̱ bi̱ katsoó xota̱ Israee̱l: «Xota̱ tji̱e̱e̱ Manasee̱ kjénní ni xi tsó.

^6-9 Néná bi̱ katsóna nga ndí ínchjiín Selofaa̱nd ka̱ma kjo̱a̱ꞌájin jáxíꞌín xi mejeén ku̱i̱xanjo̱, ta̱nga chjiéngá kui já xí ku̱i̱xanjo̱ ki̱a̱ ku̱i̱chji̱a̱ni xtín xota̱ xi chji̱a̱ni xota̱ tji̱e̱e̱ ti̱ kuii̱ xkjín. Chjiéngá kui nii̱ xi sa̱ꞌín ngayeje xota̱ tji̱e̱ xi ngasee̱: Tsi ngo na̱ sa̱ko̱ó tꞌanangii̱ xota̱ xkjín, chjiéngá ngo nda̱ xi ti̱ kuii̱ xota̱ tji̱e̱e̱ xi ku̱i̱xanjo̱. Kó bo̱a̱ tsꞌén nga tꞌanangii̱ kui xota̱ tji̱e̱e̱ ka̱májín tsi̱ꞌe̱ kje̱ꞌe xota̱ tji̱e̱ ka̱ma. Ngayeje xota̱ tji̱e̱e̱ chjiéngá skoón tꞌanangi xi katseꞌeé ndeskande koó nga tjón tjón».

^10-11 Kósꞌe̱ na̱ Majlaa̱, na̱ Tirsaa̱, na̱ Onglaa̱, na̱ Milkaa̱ ko̱jo na̱ Noáa̱ kui ndí ínchjiín Selofaa̱nd, katsꞌénkjatjosón ni xi Néná katsoó Moisee̱, kó já ntsꞌi̱e̱xtio kui ínchjiín ixánjo̱,

¹² kui xi chji̱a̱ni xota̱ tji̱e̱e̱ Manasee̱. Kó bo̱a̱ tsꞌén nga tꞌanangii̱ kui ínchjiín to̱kó tsi̱ꞌe̱ xota̱ tji̱e̱e̱ na̱ꞌmii̱ kamá.

¹³ Kuí bí kui kjo̱a̱botíxomaa̱ xi Néná katsjaá xota̱ Israee̱l nga tsíchji̱a̱jo Moisee̱, nga kisꞌińdo ki̱a̱ nangi soón nangii̱ xota̱ tji̱e̱e̱ Moaa̱b, ki̱a̱ tꞌa ndejèꞌ Jorndaa̱n, kje̱n na̱xi̱ńdáꞌniú Jerikoo̱.