Xki̱ 35 - Xo̱jo̱n eén Néná

Na̱xi̱ńdáꞌniú xí katseꞌeé xota̱ tji̱e̱e̱ Lebii̱

¹ Kjiꞌanga kisꞌińdo xota̱ na̱xi̱ńdaá ki̱a̱ nangi soón nangii̱ xota̱ tji̱e̱e̱ Moaa̱b, ki̱a̱ tꞌa ndejèꞌ Jorndaa̱n, kje̱n na̱xi̱ńdáꞌniú Jerikoo̱, Néná bi̱ katsoó Moisee̱:

^2-3 «Bo̱a̱ tꞌíi̱n ngayeje xota̱ tji̱e̱e̱ xota̱ Israee̱l, nga ngayeje na̱xi̱ńdáꞌniú xí síndo nangi xi je tsi̱ꞌe̱, chjiéngá tsja̱á xota̱ tji̱e̱e̱ Lebii̱ chiboa kui na̱xi̱ńdáꞌniuú, ko̱jo kui tꞌanangi xi síndotꞌa nga ngo foaꞌatjiyajoo̱n. Ki̱a̱ ka̱maa̱ nga kꞌuieé ngo ngi̱ndie nínga kꞌuíndo, ko̱jo nínga kꞌuitsómá nga ko̱kji̱e̱n ndi̱xcho̱ cho̱o̱.

^4-5 »Kui nangi xi ko̱e̱ꞌeé xota̱ tji̱e̱e̱ Lebii̱, chjiéngá ngo ndse̱je̱n ka̱ma nga tiyaá ko̱jo nga ndojoó, kó nijan úchán metro̱ ngatama nga ngo nga ngo ndieè, kó ki̱a̱ kꞌuíndo nga ngo foaꞌatjiyajoo̱n na̱xi̱ńdáꞌniuú, nijón úchán metronii̱ nínga tikón xoó kui na̱xi̱ńdaá.

^6-7 »Yichán jin na̱xi̱ńdáꞌniú ko̱e̱ꞌeé xota̱ tji̱e̱e̱ Lebii̱, nga ngo nga ngo ngatꞌieé ngi̱ndie nínga kꞌuitsómá cho̱o̱ nga ko̱kji̱e̱n ndi̱xcho̱. Jun kui na̱xi̱ńdaá xi ta̱ xá nínga ku̱i̱ndyionꞌmá tsí ka̱ma. Tsi ngo xota̱ xi jmí tsi ta̱ xá sa̱ꞌínkꞌiénni ngo xota̱, ka̱ma ki̱a̱ ko̱e̱je̱kꞌíjñá kui na̱xi̱ńdáꞌniuú, kó ki̱a̱ ka̱ma ko̱ngase xi ko̱síko̱jo, tsi̱ꞌe̱ nga jmíjín xi tjín ni xi sa̱ꞌínjo̱.

⁸ Tsi̱ꞌe̱ nga xchi̱e̱ ji kótjín na̱xi̱ńdáꞌniú xi tsjá nga ngo nga ngo xota̱ tji̱e̱e̱, chjiéngá kui nii̱ si̱ꞌin ji: Xota̱ tji̱e̱ xi tsie ngase ma nangii̱, kjín ngase na̱xi̱ńdáꞌniú nga tsjá, kó xota̱ tji̱e̱ xi chiboa ma ngase nangii̱, chiboa ngase na̱xi̱ńdáꞌniú nga tsjá».

Na̱xi̱ńdá nínga ku̱i̱ndyionꞌmaá

⁹ Kó Néná ti̱ bi̱ ti̱ katsoó Moisee̱ nga:

¹⁰ «Kuí bí kui nii̱ xi chjiéngá sa̱ꞌín xota̱ Israee̱l kjiꞌanga kjo̱a̱ꞌatio ndejèꞌ Jorndaa̱n, kó nga kꞌo̱sꞌien nangi Kanaa̱n:

^11-15 Jun na̱xi̱ńdáꞌniú ku̱i̱ꞌíjñátꞌaxín tsi̱ꞌe̱ nga ki̱a̱ kꞌuíndo xota̱ xi jmí tsi xá katsꞌénkꞌiénni ngo xota̱. Ján kui na̱xi̱ńdáꞌniuú xi kꞌuíndo xi ingoboaá ndejèꞌ Jorndaa̱n, sꞌe̱ ján kꞌuíndo ki̱a̱ nangi Kanaa̱n. »Kjiꞌanga ngo xota̱ jmí tsi xá sa̱ꞌínkꞌiénni ingo xota̱, tsi xota̱ Israee̱l, ko̱jo tsi xota̱ xi xín nangi chji̱a̱ni, ko̱jo tsi xota̱ xi ta̱ ngotjón jachókꞌíjñá tsi ki̱a̱a̱, ka̱ma ko̱nga, kó ki̱a̱ ka̱ma kꞌuijñá ngo kui na̱xi̱ńdáꞌniuú, tsi̱ꞌe̱ nga jmí ni si̱ꞌanjo̱jín. Kó bo̱a̱ tsꞌén nga kui xi katsꞌénkꞌieén, skoón yojoo̱ tsi̱ꞌe̱ nga ngojín xkjín kui xi kiniꞌánkꞌieén sa̱ꞌíngojo tsi̱ꞌe̱ nga sa̱ꞌínkꞌién nga. Ta̱nga kjiꞌanga kui xotaa̱ kjo̱chó kui na̱xi̱ńdá nínga ma mindyionꞌmaá, xota̱a̱ kui ngi̱ndiee̱ chjiéngá sa̱ꞌíndajin máraa̱ tsi nda ko̱jo tsi ndajín katsꞌén, sꞌe̱ jaskan bo̱a̱ ka̱tso̱ tsi kꞌuijñá ko̱jo tsi ko̱yà. Chjiéngá si̱ꞌankꞌien xota̱ xi katsꞌén kui jé xi̱ꞌbi̱:

¹⁶ »Kui xi ngo ni xi ki̱cha̱ katsꞌénkꞌiénni ngo xota̱.

¹⁷ »Kui xi ngo ndi̱jo̱ katsꞌénkꞌiénni ngo xota̱.

¹⁸ »Kui xi ngo yá katsꞌénkꞌiénni ngo xota̱.

¹⁹ Xota̱ xkjín xí kiniꞌánkꞌieén, kui xi ꞌniú tiña manii̱ ngatangase kui xi bo̱a̱ katsꞌeén, kósꞌe̱ ngatsꞌénkꞌién.

²⁰ »Kui xi kjo̱a̱a̱ nga chꞌoo̱, kꞌo̱jmitójó kósꞌe̱ sa̱ꞌínkꞌién ngo xota̱. »Kui xi sa̱ꞌínkꞌién ngo xota̱ nga kꞌo̱ya ngo ni nga tjitsꞌénxchán.

²¹ »Kui xi kjo̱a̱a̱ nga chꞌoo̱ ngo xota̱, kó sa̱ꞌínkꞌién nga ku̱i̱ꞌeé. Xota̱ xkjín kui xi kiniꞌánkꞌieén kui xi ꞌniú tiña manii̱ ngatangase kui xi bo̱a̱ katsꞌeén, kósꞌe̱ ngatsꞌénkꞌién.

²² »Ta̱nga jmí tsi si̱ꞌankꞌien ngo xota̱ xi katsꞌén kui ni xi xikoó xi̱ꞌbi̱: »Kui xi kꞌo̱jmitójó tꞌanangi ngo xota̱, kó jmí tsi xá katsꞌénkꞌiénni. »Kui xi sa̱ꞌínkꞌién ngo xota̱, nga jmí tsi xá kꞌo̱yani ngo ni.

²³ »Kui xi sa̱ꞌínkꞌién ngo xota̱ nga yeꞌeé ngo ndi̱jo̱, ta̱nga jmí tsi xá katsꞌénni. Ngase má tsi nda ndyi̱yaꞌa xkjín, kó nga jmí kjo̱a̱jín nga ni xi ndajín sa̱ꞌínjo̱.

Ni xi chjiéngá si̱ꞌan xi kjitꞌa kjo̱a̱kitii̱

²⁴ »Kuí bí kui nii̱ xi si̱ꞌanjo̱ xota̱ xi chjiénjín nga si̱ꞌankꞌienni:

^25-28 Xota̱ na̱xi̱ńdaá chjiéngá skoón kui xota̱ xi jmí tsi xá katsꞌénkꞌiénni ngo xota̱, kó ngata̱ tsja̱ndièjín nga xkjín kuí xi kiniꞌánkꞌieén sa̱ꞌíngojo nga sa̱ꞌínkꞌién. Kuíni nga xota̱ na̱xi̱ńdaá ko̱e̱je̱jo kui nda̱ xi jmí tsi xá katsꞌénkꞌiénnii̱, ki̱a̱ kui na̱xi̱ńdáꞌniú xi xá tikónnii̱. Tji̱e̱nga ki̱a̱ tikón kui xotaa̱ ki̱a̱ kui na̱xi̱ńdáꞌniuú, jmí ni ka̱májiín, kó jmíjín xi ni sa̱ꞌínjo̱. Ta̱nga ka̱májín kjo̱tjoni kui na̱xi̱ńdáꞌniuú, tji̱e̱nga tikón ngase ngito̱ko̱o̱ kui chináꞌmii̱. Ngije kꞌien ngito̱ko̱o̱ chináꞌmii̱, ka̱ma ko̱e̱je̱ nginí ndiꞌaa̱ kui nda̱a̱, kó jmíjín xi ni sa̱ꞌínjo̱. Ta̱nga tsi kui nda̱a̱ kjo̱tjoni kui na̱xi̱ńdáꞌniuú ngindiee̱ nga ko̱yà kuí ngito̱ko̱o̱ chináꞌmii̱, kó tsi ki̱a̱ sa̱ko̱ó xkjín kuí xota̱ xi kiniꞌánkꞌieén, kui xkjín xí kiniꞌánkꞌieén ka̱má sa̱ꞌínkꞌién kui xi bo̱a̱ katsꞌeén, kó jmí jé kꞌuiéjiín.

²⁹ »Chjiéngá ngatsjéni̱xtjin nga si̱ꞌankjatjosónjnú kui kjo̱a̱botíxomaa̱, ta̱jñà ngi̱ndiení nínga tindyiónjnú.

³⁰ »Chjiéngá si̱ꞌankꞌien kui xi sa̱ꞌínkꞌién ngo xota̱, kó nga jó ko̱jo tsi kjín ngase ka̱ma chistiko̱ xi ko̱óngítaꞌin. Tsi ta̱ ngo tsí ka̱ma chistikoo̱, chjiénjín nga si̱ꞌankꞌien.

³¹ Kjiꞌanga ngo xota̱ xi je si̱ꞌankꞌien kjo̱a̱a̱ nga ngo xota̱ katsꞌénkꞌién, ka̱májín kjo̱tjoꞌa nga jmí ni si̱ꞌanjo̱jín tsi ku̱i̱ꞌíchjí ngo to̱n, chjiéngá ko̱yà.

³² »Kui xota̱ xi je tikón ki̱a̱ na̱xi̱ńdáꞌniú nínga ma mindyionꞌmaá, ka̱májín ku̱i̱ꞌíchjí ngo to̱n tsi̱ꞌe̱ nga ko̱e̱je̱ nginí ndiꞌaa̱. Chjiéngá skoyá ngaskande nga ko̱yà ngito̱ko̱o̱ chináꞌmii̱.

^33-34 »Ngata̱ niꞌánkjatsónjínjnú nangi nínga tindyiónjnú, ngatꞌa̱ an xi Nejnú, ki̱a̱ tikónjinjnúꞌun, kó chikjo̱a̱jínna nga ki̱a̱ kotíjña̱ an nínga síndo xota̱ xi tsꞌenkꞌién ini̱ma̱. Ngototo ngije kiniꞌánkꞌién kui xota̱ xi katsꞌénkꞌién ini̱ma̱a̱, nga ka̱ma kotíjña̱ ngiñá an kui ngi̱ndiee̱».