Xki̱ 32 - Xo̱jo̱n eén Néná

Xota̱ tji̱e̱e̱ Rubee̱n ko̱jo tsi̱ꞌe̱ Ngaa̱nd jaꞌájin ngi̱ndie nínga kꞌuíndo

¹ Xota̱ tji̱e̱e̱ Rubee̱n ko̱jo xota̱ tji̱e̱e̱ Ngaa̱nd achichí cho̱ xi kisꞌiee̱. Nga kamábe kui xotaa̱ nga nangi Jasee̱r ko̱jo nangi Ngalaa̱nd achichí nda kamá tsi̱ꞌe̱ nga si̱ꞌanxchá cho̱ ki̱a̱a̱,

² bi̱ katsoó Moisee̱, ko̱jo Eleasaa̱, ko̱jo já ngito̱ko̱o̱ xota̱ Israee̱l:

³ —Nangi Ataroo̱t, ko̱jo nangi Ndiboo̱n, ko̱jo nangi Jasee̱r, ko̱jo nangi Nimraa̱, ko̱jo nangi Esboo̱n, ko̱jo nangi Elalee̱, ko̱jo nangi Sebaa̱n, ko̱jo nangi Neboo̱, ko̱jo nangi Beoo̱n

⁴ achichí nda tsi̱ꞌe̱ nga si̱ꞌanxchá cho̱ ki̱a̱a̱, kó ji̱n achichí má xi je tjínjne̱. Néná boá xi je katsꞌén kui ngi̱ndiee̱ tsi̱ꞌe̱ xota̱ na̱xi̱ńdaá,

⁵ kuíni nga ꞌniú chjiáꞌájne̱ jún nga ko̱e̱ꞌéndièjne̱ ji̱n, nga ki̱a̱ ku̱i̱ndyionjne̱ kui ngi̱ndiee̱. Kó tsi nda sasiénijnú kui nii̱, ngiti̱ konginkíndyiónjínjne̱ ngi̱ndie xi ingoboaá ndejèꞌ Jorndaa̱n.

⁶ Ta̱nga Moisee̱ bi̱ katsoó: —Ann a bo̱a̱, a nda sasiénjnú nga kꞌi̱e̱ ku̱i̱ndyionjnú jún, tji̱e̱nga ntsꞌiejnú ko̱e̱je̱ kjo̱a̱xchán.

⁷ ¡Ta̱ngatꞌanii̱ jún nga xota̱ tji̱e̱ xi ngasee̱ sa̱ꞌínkjiékjo̱a̱, kó ngiti̱ ka̱mamejénjiín ko̱e̱je̱ tꞌanangi xi Néná je katsjaá!

^8-9 Bo̱a̱ má katsꞌén xota̱ xi xchájnú nga tjón tjón nga. Kjiꞌanga katsangiya an ndeskande Kandee̱-Barnea̱ nga kijíkatsijenꞌmá kui ngi̱ndiee̱, jachó ngaskande xo̱ngàndántꞌié Eskoo̱l. Sꞌe̱ jaskan jeꞌe kꞌi̱e̱e̱ nga jeꞌekoón xota̱ Israee̱l tsi̱ꞌe̱ nga sa̱ꞌínkjiékjo̱a̱, kó nga kjo̱a̱ꞌajín nangi xi Néná je katsóyàtjoón nga tsja̱á.

¹⁰ »Néná achichí katsꞌénxchán kuí ni̱xtjii̱n, kó bi̱ katsó:

¹¹ “Ja̱ kó nga kamámejénjiín tsintꞌiéꞌénna, ja̱koxi̱ ni xi xian an, nga ngojín kui xota̱ xi jatjoni nangi Ejipto̱ xi je tsꞌatio kan noó, xi kꞌo̱sꞌien kui tꞌanangi xi tsjajnúꞌun kixiáa̱n xota̱ xi xchájnú, kui xi Abraa̱n, ko̱jo Isaa̱, ko̱jo Jakoo̱b.

¹² Ta̱kuítsí Kalee̱b ko̱jo Josuee̱ xi kꞌo̱sꞌien, ngatꞌa̱ kamáꞌniátakónna kui”.

¹³ »Achichí katsꞌénxchán Néná, kó kuí boá xi katsꞌén nga xota̱ Israee̱l yichán nó kamaá nga ta̱ ki̱a̱ jaꞌatjiya ki̱a̱ nangi kixií, ngaskande nga jesón ngayeje xi tsintꞌiéꞌénjiín.

¹⁴ »¡Kó ngotꞌe̱ ꞌne̱ jún, xi achichí nga ndajínjnú xikó maá xota̱ xi xchájnú, ti̱ bo̱a̱ ti̱ ndyi̱niꞌánjnú nga! A mejénjnú nga Néná sa̱ꞌínxchánjo̱ nginí xota̱ Israee̱l.

¹⁵ Tsi kꞌi̱e̱ ku̱i̱ndyionjnú jún, kó tsi ko̱nda̱ꞌyáꞌénjínjnúu̱ Néná, kuí boá xi sa̱ꞌín nga ngayeje xota̱ na̱xi̱ńdaá ki̱a̱ kju̱i̱e̱són nangi kixií, kó jún boá xi sꞌi̱niéjnú kui nii̱.

¹⁶ Kósꞌe̱ xota̱ tji̱e̱e̱ Rubee̱n ko̱jo xota̱ tji̱e̱e̱ Ngaa̱nd, bi̱ katsoó Moisee̱: —Ji̱n boá xi si̱ꞌandajne̱ ndiꞌa nínga kꞌuíndo ndíjne̱, ko̱jo nchꞌoá nínga kꞌuíndo cho̱jne̱.

¹⁷ Ta̱nga ji̱n kongíntjónjne̱ jájuún, kó nijan ku̱i̱xkánjne̱ xota̱ tji̱e̱ xi ngasee̱, ngaskande nga kꞌuieé kui ngo ngi̱ndie nínga kꞌuíndo. Ta̱kuítsí ni xi mejénjne̱ nga nda si̱ꞌankꞌíndojne̱ ndíjne̱ ki̱a̱ na̱xi̱ńdá xí kꞌuichjáꞌyá xi si̱ꞌandajne̱, tsi̱ꞌe̱ nga xota̱ xi chji̱a̱ni kui ngi̱ndiee̱ jmí ni xi ndajín sa̱ꞌínjo̱jín.

^18-19 Ngije kꞌuieé ngo ngi̱ndie nínga kꞌuíndo xota̱ Israee̱l xi ngasee̱, kji̱ndi̱báꞌoyá nginíji̱n nangijne̱, ngatꞌa̱ mejénjínjne̱ nga ki̱a̱ nijan ku̱i̱ndyionjo̱jne̱ kui xotaa̱, ki̱a̱ xi ingoboaá ndejèꞌ Jorndaa̱n.

^20-22 Kó Moisee̱ bi̱ katsoó: —Ndakjíꞌí, ta̱nga tsi̱ꞌe̱ nga jmí kjo̱a̱xti kꞌuiéjín, nijan ku̱i̱tja̱tió ndejèꞌ Jorndaa̱n nga kongín kjo̱a̱xchán. Bo̱a̱ tsꞌén nga ku̱i̱ntꞌiéꞌeén Néná ngaskande nga sa̱ꞌínkjié xota̱ kondraa̱, kósꞌe̱ skjíbé kui tꞌanangii̱. Jaskan ka̱ma kji̱ndi̱báꞌoyá nginíjnú ndiꞌajnú, ngatꞌa̱ bo̱a̱ tsí tsꞌén nga je kiniꞌánkjatjosónjnúu̱ Néná ko̱jo xota̱ Israee̱l nga.

^23-24 »Kꞌi̱e̱ ti̱ꞌandajnú na̱xi̱ńdáꞌniú tsi̱ꞌe̱ ndíjnú ko̱jo nchꞌoá tsi̱ꞌe̱ cho̱jnú, ta̱nga ti̱ꞌankjatjosónjnú ni xi je kiꞌmíyatjónjnú nga si̱ꞌánjnú, ngatꞌa̱ tsi bo̱a̱jín si̱ꞌánjnú, ngo jé xí ta̱nisién ꞌniú xí si̱ꞌánjnú kondraa̱ Néná, kó kuí boá xi ko̱tíjéjnú.

^25-27 Xota̱ tji̱e̱e̱ Rubee̱n ko̱jo xota̱ tji̱e̱e̱ Ngaa̱nd, bi̱ katsoó Moisee̱: —Xá tse̱ boá xi niꞌánjne̱, kó ta̱ ni xi ko̱ti̱xomejne̱ xi si̱ꞌanjne̱. Ndíjne̱, ko̱jo ínchjínjne̱, ko̱jo ngayeje cho̱jne̱, ki̱a̱ kꞌuíndo na̱xi̱ńdá Ngalaa̱nd. Ta̱nga ji̱n ko̱nda̱ꞌyáꞌénjne̱ Néná, kó kongínki̱xkánjne̱ xi ingoboaá ndejèꞌ Jorndaa̱n.

²⁸ Moisee̱ tsíchji̱a̱jo Josuee̱, ko̱jo chináꞌmi Eleasaa̱, ko̱jo já ngito̱ko̱o̱ xota̱ tji̱e̱e̱ xota̱ Israee̱l,

²⁹ kó bi̱ katsoó: «Xota̱ tji̱e̱e̱ Rubee̱n ko̱jo xota̱ tji̱e̱e̱ Ngaa̱nd jè katsjá tsꞌoa nga nijan kjo̱a̱ꞌatiojo̱jnú ndejèꞌ Jorndaa̱n, tsi̱ꞌe̱ nga si̱ꞌánjnú nga tsa̱jún ka̱ma tꞌanangi xi Néná je katsóyàtjónjnú nga tsja̱ajnú. Kó ndyi̱míꞌá kjo̱a̱ nga kji̱ndi̱báꞌoyá nginí tsi̱ꞌe̱ nga ki̱a̱ kꞌuíndo nangi Ngalaa̱nd ngijee̱.

³⁰ Ta̱nga tsi sa̱ꞌínkjatjosónjín ni xi je katsóyà nga sa̱ꞌín, chjiéngá ki̱a̱ nijan kꞌuíndojo̱jnú ki̱a̱ nangi Kanaa̱n».

^31-32 Kósꞌe̱ xota̱ tji̱e̱e̱ Rubee̱n ko̱jo xota̱ tji̱e̱e̱ Ngaa̱nd, bi̱ katsó nga tsíchji̱a̱ nga sa̱ꞌínkjatjosón ngo ni ngindyi̱ko̱n ngayeje xotaa̱: «Ji̱n ko̱nda̱ꞌyáꞌénjne̱ Néná, kó ku̱i̱ndyiondajne̱ nga kongínki̱xkánjne̱ ki̱a̱ nangi Kanaa̱n. Ta̱nga jaskan kji̱ndi̱báꞌoyá nginí ji̱n kꞌi̱e̱ xtji̱e̱e̱n ndejèꞌ Jorndaa̱n, tsi̱ꞌe̱ nga kꞌi̱e̱ ku̱i̱ndyionjne̱. Kuí bí xi̱ꞌbi̱ xi ka̱ma nangijne̱».

³³ Bo̱a̱ tsꞌén nga Moisee̱ katsjaá kui nangii̱ xota̱ tji̱e̱e̱ Ngaa̱nd, ko̱jo xota̱ tji̱e̱e̱ Rubee̱n, ko̱jo masien xota̱ tji̱e̱e̱ Manasee̱. Ki̱a̱a̱ kisꞌijña na̱xi̱ńdá ko̱jo kꞌijñá nínga kisꞌijña ngasꞌe̱ nda̱ re Sijoo̱n xi xota̱ Amoo̱r kamaá, ko̱jo Oo̱j nda̱ ree̱ nangi Basaa̱n.

³⁴ Xota̱ tji̱e̱e̱ Ngaa̱nd katsꞌéndaya kui na̱xi̱ńdaá ꞌniuú: Ndiboo̱n, Ataroo̱t, Aroee̱r,

³⁵ Ataroo̱t-Sofaa̱n, Jasee̱r, Jojbeaa̱,

³⁶ Bee̱t-Nimraa̱, ko̱jo Bee̱t-Araa̱n. Ngayeje kui na̱xi̱ńdáꞌniuú xó íchjáꞌyáni, kó ti̱ katsꞌénda nchꞌoá tsi̱ꞌe̱ cho̱ xi katsꞌénxchá nga.

³⁷ Xota̱ tji̱e̱e̱ Rubee̱n katsꞌéndaya kui na̱xi̱ńdaá ꞌniuú: Esboo̱n, Elalee̱, Kiriataii̱n,

³⁸ Neboo̱, Baa̱l-Meoo̱n, ko̱jo Sibmaa̱. Tjín kuí na̱xi̱ńdáꞌniuú xi asíkjoo̱ jaꞌeén, kuí má xi kiniꞌándayaa̱.

^39-40 Moisee̱ katsjaá xota̱ tji̱e̱e̱ Makii̱r, kui xi ndií Manasee̱ kui nangi xi chji̱a̱ni Ngalaa̱nd, ngatꞌa̱ kuí boá kui xotaa̱ xi tsangatji̱ngii̱ xota̱ Amoo̱r xi kisꞌińdo ki̱a̱a̱. Kuíni nga ki̱a̱ kisꞌińdo kui ngi̱ndiee̱.

⁴¹ Jaii̱r, xi ingo ndií Manasee̱, jaꞌáxiín chiboa ndiꞌa nínga kisꞌińdo xota̱ Amoo̱r, kó Jaboo̱t-Jaii̱r ítꞌajaꞌén kuí ngi̱ndiee̱.

⁴² Nobaa̱j ki̱a̱ kisꞌijña nangii̱ Kenaa̱t ko̱jo xota̱ na̱xi̱ńdá xi kisꞌińdo nga ngo foaꞌatjiyajoo̱n, kó Nobaa̱j ítꞌajaꞌén xikó kiꞌmí kuí.