Xki̱ 31 - Xo̱jo̱n eén Néná

Nga kiniꞌánchaja xota̱ tji̱e̱e̱ Mandiaa̱n

¹ Néná bi̱ katsoó Moisee̱:

² «Kó nga xota̱ tji̱e̱e̱ Mandiaa̱n kamámejénjiín asíko̱jo xota̱ Israee̱l, chjiéngá si̱ꞌingojo ji, sꞌe̱ jaskan ngije kamá kui nii̱, ko̱yè jí».

³ Kósꞌe̱ Moisee̱ bi̱ katsoó xota̱ Israee̱l: «Ti̱ndyiondajnú tsi̱ꞌe̱ nga kongín ku̱i̱xkánjo̱jnú xota̱ tji̱e̱e̱ Mandiaa̱n. Chjiéngá si̱ꞌanngojó ngajoo̱ Néná kjo̱a̱a̱ nga kui xotaa̱ kamámejénjiín asíko̱joná.

⁴ Nga ngo nga ngo nga tiejó xota̱ tji̱e̱e̱, chjiéngá ngo mi̱ jájún sa̱ngíyá».

⁵ Kó bo̱a̱ tsꞌén nga kamátikó tiejó mi̱ jájún.

⁶ Moisee̱ katsangiya ngi̱jii̱n kjo̱a̱xcha̱án, kó katsꞌénkjíjo̱ Finee̱, kui xi ndií chináꞌmi Eleasaa̱. Finee̱ tsaꞌa ni ndikoón Néná ko̱jo tjioo̱, tsi̱ꞌe̱ nga kui xi tsja̱á ngo chi̱bo̱a̱ jájuún nga skjánjo̱ kui xotaa̱.

⁷ Kó xota̱ Israee̱l askjanjo̱ xota̱ tji̱e̱e̱ Mandiaa̱n, xikó má katsoó Néná, kó katsꞌénkjiesón ngayeje kui xotaa̱.

⁸ Ngi̱jii̱n xota̱ xi jesoón ki̱a̱ kisꞌińdo ún já re xi chji̱a̱ni xota̱ tji̱e̱e̱ Mandiaa̱n kui xi kiꞌmí: Ebii̱, Rékee̱n, Suu̱r, Uu̱r ko̱jo Rebaa̱. Ti̱ ki̱a̱ kisꞌijña Balaa̱n nga, ndií Beoo̱r.

⁹ Kó xikoó tsi ngo ni xi niꞌán nga jájún Israee̱l kijíjo̱ ínchjiín, ko̱jo jákjíndií xota̱ tji̱e̱e̱ Mandiaa̱n, ko̱jo ngayeje cho̱o̱, ko̱jo ni chjí xí kisꞌiee̱ kui xotaa̱.

¹⁰ Kó ítí ngayeje na̱xi̱ńdáꞌniú, ko̱jo ndí nangi xi kisꞌiee̱ xota̱ tji̱e̱e̱ Mandiaa̱n.

^11-12 Ngayeje kui ni xi kiniꞌaán, xi kiniꞌánkꞌasꞌiee̱n Moisee̱, ko̱jo Eleasaa̱, ko̱jo ngayeje xota̱ na̱xi̱ńdá Israee̱l, kui xi síndo ki̱a̱ nangi soón nangi Moaa̱b, ki̱a̱ tꞌa ndejèꞌ Jorndaa̱n, kje̱n na̱xi̱ńdáꞌniú Jerikoo̱.

^13-14 Nga kamábe Moisee̱ ko̱jo xota̱ xi nijan síndojo̱ nga je ndyi̱fochó nginí jájún Israee̱l, kijíkjaꞌáyíndi̱yà. Ta̱nga Moisee̱ achichí katsꞌénxchánjo̱ já ngito̱ko̱o̱ jájuún,

¹⁵ kó bi̱ katsoó: «Ánní nga kiniꞌánkꞌiénjínjnú ínchjiín nga.

¹⁶ Kuí boá kui ínchjiín xi ki̱a̱ kijítji̱ngi kjo̱a̱botíxoma xi ndajín xi katsjá Balaa̱n, ngatꞌa̱ kuí boá xi katsꞌén nga xota̱ Israee̱l tsintꞌiéꞌénjiín Néná, kósꞌe̱ ne Baa̱l-Peoo̱r katsꞌéndikón. ¡Ta̱ngatꞌanii̱ kui ínchjiín nga Néná katsꞌénjeé xota̱ Israee̱l nga katsangiyaa̱ ngo chiꞌin xi ta̱nisién ꞌniú!

^17-18 Ngata̱ niꞌánkꞌiénjínjnú ínchjín xi xo̱ngò xí kji̱e̱ jmí xi̱ꞌin ꞌbéjiín, kó jún chjábéjnú. Ta̱nga ti̱ꞌankꞌien tji̱ꞌni̱u̱jnú ínchjín xi je kisꞌiejo̱ xi̱ꞌin. Kó ti̱ ti̱ꞌankꞌiènjnú ngayeje jákjíndí xí xi̱ꞌii̱n nga.

¹⁹ »Jájún xí katsꞌénkꞌién xota̱ ko̱jo tsi xi ini̱ma̱ katsꞌénjo̱, chjiéngá ndi̱tsen nínga síndo ndiꞌaa̱ xotaa̱ kꞌuíndo yito ni̱xtjin. Jún ko̱jo xota̱ xi kandobájnú, chjiéngá ti̱ꞌantsjiejnú yojojnú ngindyi̱ko̱n Néná ni̱xtjin xi ma jaán ko̱jo ni̱xtjin xi ma yitoo̱.

²⁰ Ko̱niéjnú ńjñojnú ko̱jo ngayeje ni xi yá, ko̱jo ni xi tji̱xin, ko̱jo xi tsja̱a̱ tindso̱ chjo̱on kamándani».

^21-24 Kó Eleasaa̱, bi̱ katsoó ngayeje jájún xi kjindibáni kjo̱a̱xcha̱án: «Tsi̱ꞌe̱ nga ka̱ma ku̱i̱tjásꞌi̱e̱njnú nínga síndo ndiꞌaa̱ xotaa̱, chjiéngá si̱ꞌankjatjosónjnú kui kjo̱a̱botíxoma xi Néná katsjaá Moisee̱: Ngayeje ni xi jún kichꞌiájnú, chjiéngá ka̱matsjie. Kó nga tíjín ni xi to̱nsinieé, ko̱jo xi to̱ntiboaa̱, ko̱jo xi ki̱cha̱ bronsee̱, ko̱jo xi ki̱cha̱a̱, ko̱jo xi ki̱cha̱ estañoo̱, ko̱jo xi chiꞌisaá, chjiéngá ndiꞌí ko̱jo ndáfoa xi tjiín ndiso si̱ꞌantsjienijnú. Kó ni xi tií, ta̱ ndáfoa tsí xi ko̱niéjonnijnú. Ni̱xtjin xi ma yitoo̱ taniéjnú ńjñojnú, kó ngaskande kjiꞌá boá nga ka̱ma ku̱i̱tjásꞌi̱e̱jnú nínga síndo ndiꞌaa̱ xotaa̱».

²⁵ Néná bi̱ tsꞌén atíxomaa̱ Moisee̱:

²⁶ «Bo̱a̱ tꞌíi̱n Eleasaa̱ ko̱jo ngito̱ko̱o̱ xota̱ na̱xi̱ńdaá nga ngatasikójoo nga kꞌuíxki̱jnú ínchjiín ko̱jo cho̱ xi jeꞌejo̱ jájuún, ni xi katsꞌén nga kijíkján kui kjo̱a̱xcha̱án.

²⁷ Kósꞌe̱ jó tjín xí ndse̱je̱n ti̱ꞌánjnú nga takjangàjnú ínchjiín ko̱jo cho̱o̱. Masien xikó tjín má ko̱e̱ꞌeé jájuún, kó xi ngi masiee̱n, xota̱ Israee̱l xi ngasee̱ ko̱e̱ꞌeé.

²⁸ »Kui tjín xí tsoboaá jájuún, tꞌíndetꞌaxínní ńgó ńgó ínchjín xki̱ ún úchán ko̱jo ńgó ńgó cho̱ xki̱ ún úchán nga,

²⁹ kósꞌe̱ chináꞌmi Eleasaa̱ ti̱ꞌinkꞌasꞌíi̱n, xikoó tsi ngo kjo̱a̱tjó xi tsa̱ꞌa̱n.

³⁰ »Kui tjín xí tsoboaá xota̱ Israee̱l, tꞌíndetꞌaxínní ńgó ńgó ínchjín xki̱ ichítié ko̱jo ńgó ńgó cho̱ xki̱ ichítié, kó xota̱ tji̱e̱e̱ Lebii̱ ti̱ꞌinkꞌasꞌíi̱n, kui xi ndyi̱tsꞌènxá ki̱a̱ ndiꞌandikoón».

^31-32 Bi̱ kjiꞌi kamá xki̱i̱ ínchjín ko̱jo cho̱ xi íxki̱ Moisee̱ ko̱jo Eleasaa̱: jun úchán ichítié ko̱jo kan ún mi̱ kamá cho̱tsa̱nga̱a̱,

³³ ichítié ko̱jo kan jó mi̱ cho̱yojo xi bokján tꞌanangi,

³⁴ ichítié ko̱jo tiengo mi̱ bórró,

³⁵ ko̱jo kantié jó mi̱ ínchjín kꞌán xi kji̱e̱ jmí xi̱ꞌin ꞌbéjiín.

^36-46 Kui ni xi niꞌán xi katsꞌén jájuún, jó tjín xí ndse̱je̱n ndse̱je̱n akjángá, ngo tjín katseꞌeé jájuún, ko̱jo ngo tjín katseꞌeé xota̱ na̱xi̱ńdaá. Bi̱ kjiꞌi kamá ni xi katseꞌeé nga ngo nga ngo: ján úchán ko̱jo kantjiꞌún jó mi̱ masien cho̱tsa̱nga̱, kantjiꞌún ngo mi̱ cho̱yojo xi bokján tꞌanangi, kantié mi̱ masien bórró, ko̱jo tjiꞌún ngo mi̱ ínchjín. Kui tjín xí katsoboaá jájuún, Moisee̱ katsjaá chináꞌmi Eleasaa̱ ngo kjo̱a̱tjó tsi̱ꞌe̱ Néná xi: jun úchán ichítié ko̱jo kan ún cho̱tsa̱nga̱, ichítié ko̱jo kan jó cho̱yojo xi bokján tꞌanangi, ichítié ko̱jo tiengo bórró, ko̱jo kantié jó ínchjín.

⁴⁷ Ngo nga xki̱ ichítié ínchjín katsꞌénkꞌasꞌiee̱n Moisee̱ xota̱ tji̱e̱e̱ Lebii̱, xikó má katsoó Néná nga sa̱ꞌín. Kó ti̱ katsꞌénkꞌasꞌiee̱n ngo nga xki̱ ichítié cho̱o̱ nga.

Kjo̱a̱tjó xi katsꞌénkꞌasꞌien jájuún

⁴⁸ Kó já ngito̱ko̱o̱ jájún xi kijí kjo̱a̱xcha̱án,

⁴⁹ bi̱ katsoó Moisee̱: «Ngotꞌe̱ má ikꞌíxki̱ ji̱n xota̱ Israee̱l xi kijí kjo̱a̱xcha̱án, kó nde ngojín xi kꞌien.

⁵⁰ Kuíni nga ngo kjo̱a̱tjó kichꞌiájne̱ Néná, tsi̱ꞌe̱ nga sa̱ꞌínjetakón jéjne̱. Kꞌi̱e̱ síndo kꞌi̱e̱e̱ ngayeje ni to̱nsinié xi kasakojne̱ xikoó: ni ꞌbíkjá ndsa̱, ńꞌniúki̱cha̱ xi ꞌbíkjá ndsa̱, sti̱ngaro, nangínijon, ko̱jo kje̱ꞌe ngase ni xi bónda yojoo̱ xotaa̱».

^51-54 Kó Moisee̱ ko̱jo chináꞌmi Eleasaa̱ iskjíbé ngayeje kui ni to̱nsinié xi katsꞌénkꞌasꞌien já ngito̱ko̱o̱ jájuún. Nga ngo nga ngo jájuún katsjá chiboa ni xi jaꞌáxiín xota̱ kondraa̱. Ngayeje kui ni to̱nsinieé úchán ichítié ko̱jo kantié nijón kilo̱ kamáꞌé. Moisee̱ ko̱jo Eleasaa̱ kijíjo̱ kui nii̱ ki̱a̱ ndiꞌandikoón, xikoó tsi ngo ni xi chja̱ꞌátjó xi ko̱kó kjo̱a̱a̱ ni xi katsꞌén Néná ngandaa̱ xota̱ Israee̱l.