Xki̱ 3 - Xo̱jo̱n eén Néná

Xá xí katsꞌén xota̱ tji̱e̱e̱ Lebii̱

¹ Kjiꞌanga Néná tsíchji̱a̱jo Moisee̱ ki̱a̱ na̱xi̱ Sinaii̱, Aaroo̱n je nijón má ndií, kó kuí bí xi̱ꞌbi̱:

² Nandaa̱b, ko̱jo Abiuu̱, ko̱jo Eleasaa̱, ko̱jo Itamaa̱r. Nandaa̱b boá ndií xi xchaá.

³ Nga nijón kui jaá xi kachjaꞌájin nga katseꞌeé xá chináꞌmii̱ Néná.

⁴ Ta̱nga ta̱ Eleasaa̱ ko̱jo Itamaa̱r tsí xi katsꞌén xá chináꞌmii̱ ngajoo̱ Aaro̱n na̱ꞌmii̱. Nandaa̱b ko̱jo Abiuu̱ jmí ndí kisꞌiejiín, ngatꞌa̱ Néná katsꞌénkꞌién nga jó kui jaá, ta̱ngatꞌanii̱ nga ki̱a̱ ndiꞌandikoón ítí ngo nisije̱n xi jmí tsi bo̱a̱ tsꞌén katsꞌénda xikótsꞌèn atíxoma Néná nga si̱ꞌanda.

⁵ Néná bi̱ katsoó Moisee̱:

^6-8 «Ndokjoée̱ xota̱ tji̱e̱e̱ Lebii̱, tsi̱ꞌe̱ nga ko̱síko̱jo xá xí tsꞌén chináꞌmi Aaroo̱n, ko̱jo xá xí tsoboaá nga sa̱ꞌín xota̱ na̱xi̱ńdaá ki̱a̱ ndiꞌandikoón, ngatꞌa̱ kuí boá xi skoón ndiꞌandikoón ko̱jo ngayeje ni xi niꞌánkjién kuí ngi̱ndiee̱.

^9-10 »Ngi̱jii̱n ngayeje xota̱ Israee̱l, ta̱kuítsí Aaroo̱n ko̱jo xota̱ tji̱e̱e̱ xi chináꞌmi ka̱ma. Xota̱ tji̱e̱e̱ Lebii̱ xi ngasee̱ ngatasikójo xota̱ tji̱e̱e̱ Aaroo̱n. Ta̱ꞌya xota̱ní xi ta̱xkiya sa̱ꞌín xá chináꞌmii̱, kó tsi xota̱ tji̱e̱e̱ Aaroo̱njín chji̱a̱ni, ko̱yà».

Xota̱ tji̱e̱e̱ Lebii̱ Néná chji̱a̱ni

¹¹ Néná bi̱ katsoó Moisee̱:

^12-13 «Ni̱xtjin nga katsꞌenkꞌién an ndí tjoón ngayeje xtín xota̱ ndiꞌa xi chji̱a̱ni nangi Ejipto̱, katsjáa̱ko̱n an nga xota̱ Israee̱l an sa̱ꞌínkꞌasꞌienna ndí tjoón kui, ko̱jo ndí tjoón cho̱ xi tjiín. Kó ngajoo̱ ndií kui xotaa̱, mejénna nga xota̱ tji̱e̱e̱ Lebii̱ sa̱ꞌínkꞌasꞌienna tsi̱ꞌe̱ nga kui xi sa̱ꞌín xána, kó ndikóntsꞌèn skuiekon an nga tsa̱ꞌa̱n ka̱ma kui xotaa̱. Án boá xi nee̱ xota̱ Israee̱l».

Moisee̱ katsꞌénda xki̱i̱ xota̱ tji̱e̱e̱ Lebii̱

¹⁴ Néná bi̱ katsoó Moisee̱ ki̱a̱ nangi kixií na̱xi̱ Sinaii̱:

¹⁵ «Ngo xo̱jo̱n tjatꞌe ji xki̱i̱ xota̱ tji̱e̱e̱ Lebii̱, ngayeje xi je tsꞌatio ngo sánií nga katsen, ta̱ xikó kjiꞌi xtín xota̱ ndiꞌa xi chji̱a̱ni».

^16-21 Kuí bí xi̱ꞌbi̱ xki̱i̱ xota̱ xi katsꞌénda Moisee̱, xikótsꞌèn síndo xtín xota̱ ndiꞌaa̱: Ndií Lebii̱, kuí bí xi̱ꞌbi̱: Ngersoo̱n, Koaa̱t, ko̱jo Merarii̱. Ndií Ngersoo̱n, kuí bí xi̱ꞌbi̱: Libnii̱, ko̱jo Simii̱. Ndií Koaa̱t, kuí bí xi̱ꞌbi̱: Amraa̱n, Isaa̱r, Ebroo̱n, ko̱jo Usiee̱l. Ndií Merarii̱, kuí bí xi̱ꞌbi̱: Majlii̱, ko̱jo Musii̱.

^22-24 Já xíꞌín xi chji̱a̱ni ngayeje xtín xota̱ ndiꞌaa̱ Ngersoo̱n xi je tsꞌatio ngo sánií nga katsen, yito mi̱ masien kamá. Ngito̱ko̱o̱ kui xtín xota̱ ndiꞌaa̱ Ngersoo̱n, Eliasaa̱f boá, kui xi ndií Laee̱l. Ngayejee̱ nga ki̱a̱ kisꞌińdo ndiꞌaa̱ xtji̱e̱e̱n nínga ꞌbosꞌien tsꞌueé, ki̱a̱ nga̱xto̱n ndiꞌandikoón,

²⁵ kó kuí boá xi askoo̱n ndiꞌandikoón ko̱jo ńjño xi kjiꞌisón nkꞌaa̱. Askoo̱n ńjño xi tji̱xi̱ín cho̱ kamándani xi kjiꞌisón nkꞌaa̱ kui ndiꞌandikoón, ko̱jo ńjño kortina̱ xi tji̱e̱n nínga bitjasꞌi̱e̱nnii̱,

²⁶ ko̱jo ńjño kortina̱ xi tji̱e̱n ndi̱tsee̱n nínga bitjasꞌi̱e̱nnii̱, ko̱jo ńjño kortina̱ xi tji̱e̱n nga̱ntjo̱a̱ xi tikón ndi̱tsee̱n nga ngo foaꞌatjiyajoo̱n ndiꞌandikoón, ko̱jo ṉchandikoón. Kó ti̱ kuí boá xi askoo̱n ńꞌniú xí kiniꞌánkjién nga ikjien kui ńjño kortinaa̱.

^27-30 Xtín xota̱ ndiꞌa xi chji̱a̱ni Koaa̱t, kuí boá xi chji̱a̱ni Amraa̱n, ko̱jo Isaa̱r, ko̱jo Ebroo̱n, ko̱jo Usiee̱l, kó ki̱a̱ kisꞌińdo ndiꞌaa̱ nga̱nde xi tikón xtji̱e̱e̱n na̱ngii̱ ndiꞌandikoón. Ngayeje jáxíꞌín xi je tsꞌatio ngo sánií nga katsen, jin mi̱ jun úchán kamá, kó ngito̱ko̱o̱, Elisafaa̱n boá, kui xi ndií Usiee̱l.

³¹ Xota̱ tji̱e̱e̱ Koaa̱t boá xi askoo̱n koxa̱a̱ kjo̱a̱ꞌbíndaa̱, ko̱jo yámíxa̱a̱ pan xi niꞌánkꞌasꞌiee̱n Néná, ko̱jo ni xi ꞌbítíyá ndiꞌí xí tsꞌentsíjee̱n, ko̱jo ṉchaa̱n, ko̱jo ńjño kortina̱ xi tji̱e̱n ngi̱ndie nínga ꞌniú ndikoón, ko̱jo ngayeje ni xi kamáchjién kjiꞌanga kiniꞌántsjaá Néná.

³² Eleasaa̱ ndií Aaroo̱n boá xi kamá ngito̱ko̱ xi ꞌniú nkꞌa xaá tsi̱ꞌe̱ ngayeje xota̱ tji̱e̱e̱ Lebii̱, ko̱jo ngayeje xota̱ xi askondá ndiꞌandikoón.

^33-35 Xtín xota̱ ndiꞌaa̱ Merarii̱, kuí boá xi chji̱a̱ni Majlii̱ ko̱jo Musii̱, kó ki̱a̱ kisꞌińdo ndiꞌaa̱ nga̱nde xi tikón xtji̱e̱e̱n ta̱ꞌii̱n ndiꞌandikoón. Ngayeje jáxíꞌín xi je tsꞌatio ngo sánií nga katsen, jun mi̱ jó úchán kamá, kó Suriee̱l, ndií Abiayii̱l boá xi kamá ngito̱ko̱o̱.

^36-37 Xota̱ tji̱e̱e̱ Merarii̱ kuí boá xi askoo̱n yátiee̱ ndiꞌandikoón, ko̱jo ngindie xi tjíchjáꞌyáni kui ndiꞌaa̱, ko̱jo yáseé, ko̱jo ngindiee̱ kui yáseé, ko̱jo yásé xi jaꞌatjiyajonnii̱ ndi̱tsee̱n, ko̱jo ngindiee̱, ko̱jo yáyojó xi ikindyianijiín, ko̱jo ńꞌniú xí ikítꞌani, ko̱jo ngayeje ni xi kiniꞌánkjieén ndiꞌandikoón.

³⁸ Moisee̱, ko̱jo Aaroo̱n ko̱jo ndií ki̱a̱ kisꞌińdo nga̱nde xi tikón xtji̱e̱e̱n nínga fotjo tsꞌueé, kje̱n ndiꞌandikoón. Kuí boá xi askoo̱n ndiꞌandikoón, kó kuí boá xi katsꞌén xá xí tsi̱ꞌe̱ xota̱ na̱xi̱ńdá Israee̱l. Tsi tjín xí chináꞌmijín, kó ta̱xkiya katsꞌén ngo xá xí ta̱kuítsí chináꞌmii̱ xi ka̱ma sa̱ꞌín, niꞌánkꞌién.

³⁹ Moisee̱ ko̱jo Aaroo̱n katsꞌén ni xi Néná atíxomaa̱ nga sa̱ꞌín. Íxki̱ ko̱jo ítꞌa xo̱jo̱n ngayeje jáxíꞌín xi je tsꞌatio ngo sánií nga katsen, xi chji̱a̱ni xota̱ tji̱e̱e̱ Lebii̱, xikótsꞌèn síndo xtín xota̱ ndiꞌaa̱. Kan jó mi̱ kamá ngayejee̱.

Xota̱ tji̱e̱e̱ Lebii̱, tsi̱ꞌe̱ Néná kamá

⁴⁰ Néná bi̱ katsoó Moisee̱: «Ngo xo̱jo̱n tjatꞌe ji jaꞌeén ngayeje jáxíꞌín xi chji̱a̱ni nga ngo xtín xota̱ ndiꞌaa̱ xota̱ Israee̱l, kui xi tjón katsee̱n ko̱jo xi je tsꞌatio ngo sánií nga katsen,

⁴¹ kó tꞌíndetꞌaxínní kui xi xota̱ tji̱e̱e̱ Lebii̱, kó ngajoo̱ ndí tjoón xota̱ na̱xi̱ńdá Israee̱l ngatama. Kó ti̱ tꞌíndetꞌaxínní ngayeje cho̱ xi kamáxchaá xota̱ tji̱e̱e̱ Lebii̱, ngajoo̱ ngayeje cho̱ xi tjón katsee̱n. Án boá xi Nee̱ xota̱ Israee̱l».

⁴² Xikó má tsꞌén Néná atíxomaa̱ Moisee̱ bo̱a̱ má katsꞌén. Moisee̱ íxki̱ ndí xíꞌín xi tjón kisꞌiee̱ nga ngo nga ngo xtín xota̱ ndiꞌa.

⁴³ Kan jó mi̱ jó úchán ichítié ko̱jo kan ján kamá ngayejee̱.

⁴⁴ Jaskan ngije jaꞌa ni̱xtjin, Néná bi̱ katsó nginií Moisee̱:

^45-48 «Xota̱ tji̱e̱e̱ Lebii̱ án tsa̱ꞌa̱n, kó kuí boá xi kꞌuíndo ngajoo̱ ndí tjoón xota̱ Israee̱l. Ko̱jo cho̱ tjié xi tjiín ti̱ an tsoboána nga, ngi̱ndiee̱ cho̱ tji̱e̱é xota̱ Israee̱l. Kó nga achichí kjín kamá ndí tjoón xota̱ Israee̱l ta̱bo̱a̱jiín xota̱ tji̱e̱e̱ Lebii̱, kuíni nga ka̱má ka̱machjítaꞌín kui xi jó úchán ichítié ko̱jo kan ján ndí tjón xi jaꞌatjoón xki̱i̱. Kó tsi̱ꞌe̱ nga ka̱machjítaꞌín, chjiéngá ún to̱ntiboa xi tiengo ngramo̱ é chji̱a̱ꞌaa̱ nga ngo nga ngo. Xikó kjiꞌi chjií to̱n xi niꞌánkjién ki̱a̱ ndiꞌandikoón. Kui to̱o̱n tsi̱ꞌe̱ Aaroo̱n ko̱jo xota̱ tji̱e̱e̱ ka̱ma. Án boá xi Nee̱ xota̱ Israee̱l».

⁴⁹ Kó Moisee̱ iskjíbé kui to̱n xi ikꞌíchjítjéni ndí tjoón xota̱ Israee̱l kui xi tsꞌatio kamaá,

⁵⁰ kó ngo mi̱ ján úchán ichítié ko̱jo tjiꞌún kamá kui to̱ntiboa xi jaꞌátikó, xikó kjiꞌi chjií to̱n xi niꞌánkjién ki̱a̱ ndiꞌandikoón.

⁵¹ Moisee̱ katsꞌénkꞌasꞌiee̱n kui to̱o̱n Aaroo̱n ko̱jo xota̱ tji̱e̱e̱, xikó má katsoó Néná nga sa̱ꞌín, bo̱a̱ má katsꞌén.