Xki̱ 29 - Xo̱jo̱n eén Néná

Sꞌueé tjioo̱

^1-6 »Ni̱xtjin tjoón sá xí ꞌmí Etanii̱n, ngojín xota̱ xi síndo na̱xi̱ńdá Israee̱l xi sa̱ꞌínxá, ta̱sá ngatamatikó tsi̱ꞌe̱ nga an sa̱ꞌíndikónna. Kui ni̱xtjii̱n ngatsꞌénkjánié tjioo̱, kó ko̱jo kui kjo̱a̱tjó xi je sa̱ꞌínkꞌasꞌienna ndyiojón ndyiojón ko̱jo xi sa̱ꞌínkꞌasꞌienna xki̱ sá, xota̱ Israee̱l chjiéngá sa̱ꞌínkꞌiénna ko̱jo ku̱i̱ꞌítí ngo cho̱yojo toro̱, ngo cho̱tsa̱nga̱ xi jaꞌatji ndi̱ja̱a̱, ko̱jo yito ndií cho̱tsa̱nga̱ xi ngo noó xi ndakón. »Nga ngo nga ngo kui cho̱yojo toroo̱ chjiéngá nijan sa̱ꞌínkꞌasꞌienna jun kilo̱ ndso̱ko̱a̱n ṉño̱pan xi nda ngasee̱, xi je kiniꞌánda̱ꞌyo̱ni isti̱, kó kui cho̱tsa̱nga̱ xi jaꞌatji ndi̱ja̱a̱ nijan sa̱ꞌínkꞌasꞌienna nijón kilo̱ ndso̱ko̱a̱n ṉño̱pan, kó nga ngo nga ngo kui ndií cho̱tsa̱nga̱a̱ nijan sa̱ꞌínkꞌasꞌienna jó kilo̱ ndso̱ko̱a̱n ṉño̱pan. »Kó ti̱ sa̱ꞌínkꞌasꞌienna ngo kjo̱a̱tjó xi ngo tindso̱ nga, tsi̱ꞌe̱ nga an, kui xi Nee̱ kui xotaa̱, sa̱ꞌinjetakóo̱n jeé. Bo̱a̱ tsꞌén nga tsja mana nga niꞌánkꞌasꞌienna kui kjo̱a̱tjoó.

Kjo̱a̱tjó xi niꞌánkꞌasꞌien ni̱xtjin nga niꞌánjetakón jeé

⁷ »Ni̱xtjin tiee̱ sá xí ꞌmí Etanii̱n, ngojín xi ni skji̱ni̱e̱, ti̱nde ngojín xi sa̱ꞌínxá, ta̱sá ngayeje xota̱ na̱xi̱ńdaá ngatamatikó tsi̱ꞌe̱ nga an sa̱ꞌíndikónna.

^8-11 »Kó ko̱jo kui kjo̱a̱tjó xi je sa̱ꞌínkꞌasꞌienna ndyiojón ndyiojón, ko̱jo kui xi sa̱ꞌínkꞌasꞌienna kjo̱a̱a̱ jeé xotaa̱, kui ni̱xtjii̱n ti̱ sa̱ꞌínkꞌiénna ko̱jo ku̱i̱ꞌítína ngo cho̱yojo toro̱, ngo cho̱tsa̱nga̱ xi jaꞌatji ndi̱ja̱a̱, ko̱jo yito ndií cho̱tsa̱nga̱ xi ngo noó xi ndakón. »Nga ngo nga ngo kui cho̱yojo toroo̱ chjiéngá nijan sa̱ꞌínkꞌasꞌienna jun kilo̱ ndso̱ko̱a̱n ṉño̱pan xi nda ngasee̱ xi je kiniꞌánda̱ꞌyo̱ni isti̱, kó kui cho̱tsa̱nga̱ xi jaꞌatji ndi̱ja̱a̱ nijan sa̱ꞌínkꞌasꞌienna nijón kilo̱ ndso̱ko̱a̱n ṉño̱pan, kó nga ngo nga ngo kui ndií cho̱tsa̱nga̱a̱ nijan sa̱ꞌínkꞌasꞌienna jó kilo̱ ndso̱ko̱a̱n ṉño̱pan. »Kó ti̱ sa̱ꞌínkꞌasꞌienna ngo kjo̱a̱tjó xi ngo tindso̱ nga, tsi̱ꞌe̱ nga an, kui xi Nee̱ kui xotaa̱, sa̱ꞌinjetakóo̱n jeé. Bo̱a̱ tsꞌén nga tsja mana nga niꞌánkꞌasꞌienna kui kjo̱a̱tjoó.

Kjo̱a̱tjó xi niꞌánkꞌasꞌien sꞌueé ndiꞌańkꞌieén

¹² »Ni̱xtjin tjiꞌuún ti̱ kuii̱ kui saá, ngojín xi sa̱ꞌínxá, ta̱sá ngayeje xota̱ na̱xi̱ńdaá ngatamatikó tsi̱ꞌe̱ nga an sa̱ꞌíndikónna. Kui ni̱xtjii̱n ku̱i̱ꞌítsꞌi̱yani ngo sꞌué nganda tsa̱ꞌa̱n xi yito ni̱xtjin kꞌo̱ndíyaá.

^13-16 »Kó ko̱jo kui kjo̱a̱tjó xi je sa̱ꞌínkꞌasꞌienna ndyiojón ndyiojoón, ni̱xtjin tjoón kui xomanaa̱ ti̱ sa̱ꞌínkꞌiénna ko̱jo ku̱i̱ꞌítína tie ján cho̱yojo toro̱, jó cho̱tsa̱nga̱ xi jaꞌatji ndi̱ja̱a̱, ko̱jo tienijón ndií cho̱tsa̱nga̱ xi ngo noó xi ndakón. »Nga ngo nga ngo kui cho̱yojo toroo̱ chjiéngá nijan sa̱ꞌínkꞌasꞌienna jun kilo̱ ndso̱ko̱a̱n ṉño̱pan xi nda ngasee̱ xi je kiniꞌánda̱ꞌyo̱ni isti̱, kó nga ngo nga ngo kui cho̱tsa̱nga̱ xi jaꞌatji ndi̱ja̱a̱ nijan sa̱ꞌínkꞌasꞌienna nijón kilo̱ ndso̱ko̱a̱n ṉño̱pan, kó nga ngo nga ngo kui ndií cho̱tsa̱nga̱a̱ nijan sa̱ꞌínkꞌasꞌienna jó kilo̱ ndso̱ko̱a̱n ṉño̱pan. »Kó ti̱ sa̱ꞌínkꞌasꞌienna ngo kjo̱a̱tjó xi ngo tindso̱ nga, tsi̱ꞌe̱ nga an, kui xi Nee̱ kui xotaa̱, sa̱ꞌinjetakóo̱n jeé. Bo̱a̱ tsꞌén nga tsja mana nga niꞌánkꞌasꞌienna kui kjo̱a̱tjoó.

^17-19 »Kó ko̱jo kui kjo̱a̱tjó xi je sa̱ꞌínkꞌasꞌienna ndyiojón ndyiojoón, ni̱xtjin xi ma joó kui xomanaa̱, ti̱ sa̱ꞌínkꞌiénna ko̱jo ku̱i̱ꞌítína tiejó cho̱yojo toro̱, jó cho̱tsa̱nga̱ xi jaꞌatji ndi̱ja̱a̱, ko̱jo tienijón ndií cho̱tsa̱nga̱ xi ngo noó xi ndakón. »Nga ngo nga ngo kui cho̱o̱ nijan si̱ꞌankꞌasꞌienna ndso̱ko̱a̱n ṉño̱pan xi kiniꞌánda̱ꞌyo̱ni isti̱, xikó kjiꞌi chi̱bo̱a̱ xi je kixiya an, ko̱jo kui tindsoo̱, tsi̱ꞌe̱ nga an, kui xi Nee̱ kui xotaa̱, sa̱ꞌinjetakóo̱n jeé.

^20-34 »Kó ko̱jo kui kjo̱a̱tjó xi je sa̱ꞌínkꞌasꞌienna ndyiojón ndyiojoón, ni̱xtjin xi ma jaán, ngaskande ni̱xtjin xi ma yitoo̱ kui xomanaa̱, ti̱ sa̱ꞌínkꞌiénna ko̱jo ku̱i̱ꞌítína ti̱ bo̱a̱ ti̱ kjiꞌi cho̱ xi ndakón, xikó tjín xi je kixiya an, kó nga ngo nga ngo kui cho̱o̱ nijan sa̱ꞌínkꞌasꞌienna ndso̱ko̱a̱n ṉño̱pan xi kiniꞌánda̱ꞌyo̱ni isti̱, xikó kjiꞌi chi̱bo̱a̱ xi je kixiya an. Kó ti̱ sa̱ꞌínkꞌasꞌienna ndyiojón ndyiojón kui ni̱xtjii̱n ngo kjo̱a̱tjó xi ngo tindso̱, tsi̱ꞌe̱ nga an, kui xi Nee̱ kui xotaa̱, sa̱ꞌinjetakóo̱n jeé. »Ta̱ kuí tsi ni xi skján ka̱ma kjo̱a̱a̱ cho̱yojo toroo̱: ni̱xtjin xi ma jaán tiengo cho̱yojo toro̱ ka̱ma, ta̱nga ni̱xtjin xi ma nijoón tie cho̱yojo toro̱ ka̱ma xi sa̱ꞌínkꞌasꞌienna, ni̱xtjin xi ma uún, nijan cho̱yojo toro̱ ka̱ma, ni̱xtjin xi ma juu̱n, jin cho̱yojo toro̱ ka̱ma, ni̱xtjin xi ma yitoo̱, yito cho̱yojo toro̱ ka̱ma. Bo̱a̱ tsꞌén nga tsja mana nga sa̱ꞌínkꞌasꞌienna kui kjo̱a̱tjoó.

^35-38 »Ni̱xtjin xi ma jii̱n, ngojín xota̱ xi síndo na̱xi̱ńdá Israee̱l xi sa̱ꞌínxá, ta̱sá ngayeje xota̱ na̱xi̱ńdá ngatamatikó tsi̱ꞌe̱ nga an sa̱ꞌíndikónna. »Kó ko̱jo kui kjo̱a̱tjó xi je sa̱ꞌínkꞌasꞌienna ndyiojón ndyiojoón, kui ni̱xtjii̱n ti̱ sa̱ꞌínkꞌiénna ko̱jo ku̱i̱ꞌítína ngo cho̱yojo toro̱, ngo cho̱tsa̱nga̱ xi jaꞌatji ndi̱ja̱a̱, ko̱jo yito ndií cho̱tsa̱nga̱ xi ngo noó xi ndakón. »Kui cho̱yojo toroo̱ chjiéngá nijan sa̱ꞌínkꞌasꞌienna jun kilo̱ ndso̱ko̱a̱n ṉño̱pan xi nda ngasee̱ xi je kiniꞌánda̱ꞌyo̱ni isti̱, kó kui cho̱tsa̱nga̱ xi jaꞌatji ndi̱ja̱a̱ nijan sa̱ꞌínkꞌasꞌienna nijón kilo̱ ndso̱ko̱a̱n ṉño̱pan, kó nga ngo nga ngo kui ndií cho̱tsa̱nga̱a̱ nijan sa̱ꞌínkꞌasꞌienna jó kilo̱ ndso̱ko̱a̱n ṉño̱pan. »Kó ti̱ sa̱ꞌínkꞌasꞌienna ngo kjo̱a̱tjó xi ngo tindso̱ nga, tsi̱ꞌe̱ nga an, kui xi Nee̱ kui xotaa̱, sa̱ꞌinjetakóo̱n jeé. Bo̱a̱ tsꞌén nga tsja mana nga sa̱ꞌínkꞌasꞌienna kui kjo̱a̱tjoó.

³⁹ »Ngayeje kui kjo̱a̱tjoó xi chjiéngá sa̱ꞌínkꞌasꞌienna xota̱ Israee̱l kui ni̱xtjin xi je kixiya an, kó kje̱ꞌení kjo̱a̱tjó xi je bo̱a̱ katsó nga sa̱ꞌínkꞌasꞌienna, ko̱jo xi ngayeje kon nga tsja̱ana. Ka̱má sa̱ꞌínkꞌién ko̱jo ku̱i̱ꞌítí cho̱, ka̱má sa̱ꞌínkꞌasꞌienna pan, ko̱jo ka̱má sa̱ꞌínkꞌasꞌienna kjo̱a̱tjó tsi̱ꞌe̱ nga konda ngiñáa̱».

⁴⁰ Kó Moisee̱ katsóyaà xota̱ Israee̱l ngayeje kui ni xi Néná atíxomaa̱ nga sa̱ꞌín.