Xki̱ 28 - Xo̱jo̱n eén Néná

Kjo̱a̱tjó xi si̱ꞌankꞌasꞌien ndyiojón ndyiojón

¹ Néná bi̱ katsó nga atíxomaa̱ Moisee̱:

² «Bo̱a̱ tꞌíi̱n xota̱ Israee̱l, nga kuí má ni̱xtjin xi je kiꞌmií, nga sa̱ꞌínkꞌasꞌienna kjo̱a̱tjó tsi̱ꞌe̱ paa̱n ko̱jo kjo̱a̱tjó xi ꞌbítí nganda tsa̱ꞌa̱n. Bo̱a̱ má nga tsꞌén, xikótsꞌèn tsja mana an,

^3-8 kꞌi̱e̱ kꞌuijñá chi̱bo̱a̱ an xikótsꞌèn sa̱ꞌín: »Ndyiojón ndyiojón sa̱ꞌínkꞌién ko̱jo ku̱i̱ꞌítí jó ndií cho̱tsa̱nga̱ xi ngo noó, xi ndakón. Ngo sa̱ꞌínkꞌasꞌienna nga ta̱jño̱ó, sꞌe̱ ngo sa̱ꞌínkꞌasꞌienna nga kamángixoón. Ngo litro̱ bino̱ ngataꞌa nga kjo̱jo nga ngo nga ngo cho̱tsa̱nga̱a̱, kó kui binoo̱ ki̱a̱ skjitjónjón ndiꞌandikoón, bo̱a̱ tsꞌén nga sa̱ꞌíndikónna, ko̱jo jó kilo̱ ndso̱ko̱a̱n ṉño̱pan xi nda ngasee̱, xi je kiniꞌánda̱ꞌyo̱ni istii̱ toꞌolibo̱. Ki̱a̱ na̱xi̱ Sinaii̱ je kixiyàa̱ kótsꞌèn nga tsja mana nga niꞌánkꞌasꞌienna kjo̱a̱tjoó.

Kjo̱a̱tjó xi si̱ꞌankꞌasꞌien nga xotoo̱

^9-10 »Ki̱a̱ kui kjo̱a̱tjó xi niꞌánkꞌasꞌien ndyiojón ndyiojoón nijan si̱ꞌankꞌien ko̱jo ku̱i̱ꞌítí jó ndií cho̱tsa̱nga̱ xi ngo noó xi ndakón nga ni̱xtjin xotoo̱. Nga ngo nga ngo kui cho̱tsa̱nga̱a̱ nijan sa̱ꞌínkꞌasꞌienna bino̱ ko̱jo nijón kilo̱ ndso̱ko̱a̱n ṉño̱pan xi nda ngasee̱, kui xi je kiniꞌánda̱ꞌyo̱ni isti̱.

Kjo̱a̱tjó xi si̱ꞌankꞌasꞌien xki̱ sá

¹¹ »Kó ko̱jo kui kjo̱a̱tjó xi je sa̱ꞌínkꞌasꞌienna ndyiojón ndyiojón, xki̱ ni̱xtjin tjoón nga ngo nga ngo saá, sa̱ꞌínkꞌiénna jó cho̱yojo toro̱, ko̱jo ngo cho̱tsa̱nga̱ xi jaꞌatji ndi̱ja̱a̱, ko̱jo yito ndií cho̱tsa̱nga̱ xi ngo noó xi ndakón.

^12-15 »Nga ngo nga ngo cho̱yojo toroo̱ nijan sa̱ꞌínkꞌasꞌienna jó litro̱ bino̱, ko̱jo jun kilo̱ ndso̱ko̱a̱n ṉño̱pan xi ꞌniú ndaa̱ xi je kiniꞌánda̱ꞌyo̱ni isti̱. Kó kui cho̱tsa̱nga̱ xi jaꞌatji ndi̱ja̱a̱ nijan sa̱ꞌínkꞌasꞌienna ngo litro̱ masien bino̱, ko̱jo nijón kilo̱ ndso̱ko̱a̱n ṉño̱pan, kó nga ngo nga ngo kui ndií cho̱tsa̱nga̱a̱ nijan sa̱ꞌínkꞌasꞌienna ngo litro̱ bino̱, ko̱jo jó kilo̱ ndso̱ko̱a̱n ṉño̱pan nga. »Kó ti̱ sa̱ꞌínkꞌasꞌienna ngo kjo̱a̱tjó xi ngo tindso̱ nga, tsi̱ꞌe̱ nga an, kui xi Nee̱ kui xotaa̱, sa̱ꞌinjetakóo̱n jeé. Bo̱a̱ tsꞌén nga tsja mana nga niꞌánkꞌasꞌienna kui kjo̱a̱tjoó.

Kjo̱a̱tjó xi si̱ꞌankꞌasꞌien sꞌué paskuaa̱

^16-25 »Ni̱xtjin tienijoón sá xí ꞌmí Abii̱b xki̱ nó, ku̱i̱ꞌítsꞌi̱yani nga ka̱ma sꞌué Paskuaa̱ nganda tsa̱ꞌa̱n, kó ngo xomana̱ kꞌo̱ndíyaá. Ni̱xtjin tjoón ko̱jo ni̱xtjin xi fetꞌanii̱ kui sꞌueé jmíjín xi sa̱ꞌínxá, ta̱sá ngatamatikó tsi̱ꞌe̱ nga an sa̱ꞌíndikónna. Ni̱xtjin xi ma joó kui sꞌueé, chjiéngá skji̱ni̱e̱ pan xi jmí nisanjiín. »Nga yito ni̱xtjin nga ma kui sꞌueé, chjiéngá sa̱ꞌínkꞌién ko̱jo ku̱i̱ꞌítí nganda tsa̱ꞌa̱n jó cho̱yojo toro̱, ngo cho̱tsa̱nga̱ xi jaꞌatji ndi̱ja̱a̱, ko̱jo yito ndií cho̱tsa̱nga̱ xi ngo noó xi ndakón. Kó ti̱ chjiéngá sa̱ꞌínkꞌasꞌienna kjo̱a̱tjó xi niꞌánkꞌasꞌien ndyiojón ndyiojón nga. »Nga ngo nga ngo kui cho̱yojo toro̱ xi sa̱ꞌínkꞌasꞌienna, chjiéngá nijan sa̱ꞌínkꞌasꞌienna jun kilo̱ ndso̱ko̱a̱n ṉño̱pan xi nda ngasee̱ xi je kiniꞌánda̱ꞌyo̱ni isti̱, kó kui cho̱tsa̱nga̱ xi jaꞌatji ndi̱ja̱a̱ nijan sa̱ꞌínkꞌasꞌienna nijón kilo̱ ndso̱ko̱a̱n ṉño̱pan, kó nga ngo nga ngo kui ndií cho̱tsa̱nga̱a̱ nijan sa̱ꞌínkꞌasꞌienna jó kilo̱ ndso̱ko̱a̱n ṉño̱pan. »Kó ti̱ sa̱ꞌínkꞌasꞌienna ngo kjo̱a̱tjó xi ngo tindso̱ nga, tsi̱ꞌe̱ nga an, kui xi Nee̱ kui xotaa̱, sa̱ꞌinjetakóo̱n jeé. Bo̱a̱ tsꞌén nga tsja mana nga niꞌánkꞌasꞌienna kui kjo̱a̱tjoó.

Ni xi tjón maxchaá

^26-31 »Ni̱xtjin nga tjón kjo̱a̱ꞌátikójnú cha̱a̱n ni xi ítji̱e̱, kjiꞌá boá nga ku̱i̱ꞌítsꞌi̱yanii̱ nga sa̱ꞌín sꞌueé cha̱a̱n. Kui ni̱xtjii̱n ngojín xi sa̱ꞌínxá, ta̱sá ngatamatikó tsi̱ꞌe̱ nga an si̱ꞌandikónna. »Kó ko̱jo kui kjo̱a̱tjó xi je sa̱ꞌínkꞌasꞌienna ndyiojón ndyiojón, ti̱ sa̱ꞌínkꞌién ko̱jo ku̱i̱ꞌítí nganda tsa̱ꞌa̱n jó cho̱yojo toro̱, ngo cho̱tsa̱nga̱ xi jaꞌatji ndi̱ja̱a̱, ko̱jo yito ndií cho̱tsa̱nga̱ xi ngo noó xi ndakón. »Nga ngo nga ngo kui cho̱yojo toroo̱ nijan sa̱ꞌínkꞌasꞌienna jun kilo̱ ndso̱ko̱a̱n ṉño̱pan xi nda ngasee̱ xi je kiniꞌánda̱ꞌyo̱ni istii̱ toꞌolibo̱, kó kui cho̱tsa̱nga̱ xi jaꞌatji ndi̱ja̱a̱ nijan sa̱ꞌínkꞌasꞌienna nijón kilo̱ ndso̱ko̱a̱n ṉño̱pan, kó nga ngo nga ngo kui ndií cho̱tsa̱nga̱a̱ nijan sa̱ꞌínkꞌasꞌienna jó kilo̱ ndso̱ko̱a̱n ṉño̱pan. »Kó ti̱ sa̱ꞌínkꞌasꞌienna ngo kjo̱a̱tjó xi ngo tindso̱ nga, tsi̱ꞌe̱ nga an, kui xi Nee̱ kui xotaa̱, sa̱ꞌinjetakóo̱n jeé.