Xki̱ 27 - Xo̱jo̱n eén Néná

Ndí xí ínchjiín Selofaa̱nd

¹ Ki̱a̱ na̱xi̱ńdá Israee̱l kisꞌijña ngo nda̱ xi kiꞌmí Selofaa̱nd, kui xi ndií Éfee̱r kamá, ndíndee̱ Ngalaa̱nd, ko̱jo ndínde xi ma joó Makii̱r. Ngayejee̱ nga xota̱ tji̱e̱e̱ Manasee̱ kamá, kui xi ndií Kosiee̱. Selofaa̱nd ún kamá ndí ínchjín xí kisꞌiee̱, kó kuí boá xi na̱ Majlaa̱, na̱ Noáa̱, na̱ Onglaa̱, na̱ Milkaa̱ ko̱jo na̱ Tirsaa̱.

² Ngo ndi̱yà kijí kui ínchjiín ki̱a̱ nínga bitjasꞌi̱e̱nnii̱ ndiꞌandikoón nga kijíchji̱a̱jo Moisee̱, ko̱jo Eleasaa̱, ko̱jo xota̱ ngito̱ko̱o̱ na̱xi̱ńdaá, ko̱jo ngayeje xota̱ Israee̱l, kó bi̱ katsoó:

³ «Na̱ꞌmijne̱ ki̱a̱jín nijan kamájo̱ Koree̱ nga kisꞌińdoni kondraa̱ Néná. Ta̱nga, ti̱ ki̱a̱ kꞌien nangi kixií ta̱ngatꞌanii̱ jé xí katsꞌén. Kó kui jmíni̱xtjin kisꞌiee̱ ngo ndí xí xíꞌín,

⁴ ta̱nga kixi̱jín kjiꞌi nga ta̱ngatꞌanii̱ kui nii̱ nga kiniꞌánkjié jaꞌeén, ki̱a̱ nínga kjitꞌa xki̱i̱ xtín xota̱ ndiꞌaa̱. Kixi̱jín kjiꞌi nga ngotꞌe̱ ꞌne̱ jmí tꞌanangi si̱ꞌankꞌasꞌienjínjne̱ ji̱n. ꞌNiú chjiáꞌájne̱ jún nga te̱ꞌéjne̱ ngo chikjan tꞌanangi, tsi̱ꞌe̱ nga ki̱a̱ ku̱i̱ndyionjo̱jne̱ xota̱ xingi̱jne̱».

⁵ Kó Moisee̱ asíyaá Néná kjo̱a̱a̱ kui nii̱,

⁶ kó Néná bi̱ katsoó:

⁷ «Kjénní ni xi tsó kui ndí ínchjiín Selofaa̱nd. Te̱ꞌée̱ kui tꞌanangi xi tsi̱ꞌe̱ na̱ꞌmii̱ kamá, tsi̱ꞌe̱ nga ki̱a̱ kꞌuíndo nínga síndo xkjín.

⁸ Kó bi̱ tꞌíi̱n xota̱ Israee̱l: »Tsi ngo nda̱ ko̱yà xi jmí ndí xí xi̱ꞌin kisꞌiejiín, tsi̱ꞌe̱ ndí xí ínchjiín boá ka̱ma tꞌanangi xi kisꞌiee̱.

⁹ Tsi ngojiín ndí xí ínchjín, ja̱ tsi̱ꞌe̱ ntsꞌi̱e̱ ngatama kui tꞌanangii̱.

¹⁰ Kó tsi jmíjiín ntsꞌi̱e̱, tsi̱ꞌe̱ ntsꞌi̱e̱ na̱ꞌmii̱ ngatama kui tꞌanangii̱.

¹¹ Kó tsi jmíjín ntsꞌi̱e̱ na̱ꞌmii̱, ja̱ xota̱ xkjín xi ꞌniú tiña mánii̱ ngatama tsi̱ꞌe̱ kui tꞌanangii̱. Kuí bí kui kjo̱a̱botíxomaa̱ xi án má xi tsꞌéntsja an, kó chjiéngá ngatsjéni̱xtjin nga si̱ꞌankjatjosónjnú.»

Ngo ngito̱ko̱ tja̱tsi̱e̱ kisꞌijña ki̱a̱ Israee̱l

^12-14 Néná bi̱ katsoó Moisee̱: —Ti̱nde ji, ti̱nde ntsꞌie ji Aaroo̱n kamábejín kjo̱a̱jena. Nga jójnú kandaꞌyáꞌénjínjnúꞌun ki̱a̱ nangi kixií nangi Sii̱n, kjiꞌanga xota̱ na̱xi̱ńdaá askjanjo̱na, kó ꞌniú tsíꞌána nga tsjàa̱ ndáfoa ki̱a̱ Meribaa̱. Ta̱nga tꞌennijíngí ji na̱xi̱ Abarii̱n tsi̱ꞌe̱ nga xchi̱e̱ ji tꞌanangi xi tsjàa̱ xota̱ Israee̱l. Ta̱nga ji, ko̱yè jí, kó xchi̱e̱jín ji kui ngi̱ndiee̱, xikó kamaá ntsꞌie ji Aaroo̱n.

¹⁵ Kó Moisee̱ bi̱ katsoó Néná:

¹⁶ —Ne tsa̱ꞌa̱n, jí boá xi tiboeꞌéjne̱ kjo̱a̱mindyion ngayeje ji̱n. Án míꞌaá nga te̱ꞌée̱ xota̱ Israee̱l ngo ngito̱ko̱

¹⁷ xi ko̱e̱je̱tjoón ta̱ nínga ko̱e̱je̱. Ngata̱ boeꞌéndièjín ji nga xota̱ na̱xi̱ńdáa̱ kꞌuitsómá xikoó cho̱tsa̱nga̱ xi jmíjín nda̱ xi koo̱n.

^18-21 Kósꞌe̱ Néná bi̱ tsꞌén atíxomaa̱ Moisee̱: —Ndokjoée̱ Josuee̱, kui nda̱ xi tsakjónjín ko̱jo xi ntꞌiéꞌénna, kó ki̱a̱ tꞌenje̱ ji ngindyi̱ko̱n chináꞌmi Eleasaa̱, ko̱jo ngindyi̱ko̱n ngayeje xota̱ na̱xi̱ńdaá, kó ngindyi̱ko̱n ngayeje kui xota̱ na̱xi̱ńdaá tꞌíjñisée̱n ndse̱ to̱ko̱ Josuee̱. Ki̱a̱ boá nínga kui ko̱e̱ꞌée̱ xá xí tjiín ji, kó kuí xí si̱ꞌin ji ngito̱ko̱ xi nkꞌa xaá kui na̱xi̱ńdaá. Eleasaa̱ boá xi sa̱ꞌinkjièn án nga xiyàa̱ mí ni xi sa̱ꞌín nga kui xi je ngito̱ko̱o̱ jájún xi chji̱a̱ni Israee̱l. Tatíxomée̱ xota̱ Israee̱l nga chjiéngá ku̱i̱ntꞌiéꞌeén ngayeje ni xi ka̱tso̱ Josuee̱.

^22-23 Kó Moisee̱ katsꞌén ngayeje kui nii̱, xikó má tsꞌén atíxomaa̱ Néná nga sa̱ꞌín.