Xki̱ 26 - Xo̱jo̱n eén Néná

Xki̱ tja̱tsi̱e̱ xi katjoꞌóꞌyaá

¹ Néná tsíchji̱a̱jo Moisee̱ ko̱jo Eleasaa̱, ndií chináꞌmi Aaroo̱n, kó bi̱ katsoó:

² «Tsitsíjenjnúu̱ kótjín má jáxíꞌín xi chji̱a̱ni xota̱ Israee̱l xi tjiín, kui xi je tsꞌatio kan noó. Mejénna nga ngo xki̱ kꞌuítꞌajnú jaꞌeén xi je ka̱ma ko̱e̱je̱ kjo̱a̱xchán. Kui xki̱i̱ bo̱a̱ tsꞌén ka̱manda xikótsꞌèn chji̱a̱ni nga ngo xtín xota̱».

³ Nga kisꞌińdo ki̱a̱ nangi Moaa̱b, ki̱a̱ tꞌa ndejèꞌ Jorndaa̱n ko̱jo kje̱n na̱xi̱ńdáꞌniú Jerikoo̱, Moisee̱ ko̱jo Eleasaa̱, bi̱ katsoó xota̱ Israee̱l,

⁴ nga bo̱a̱ tsꞌén sa̱ꞌín ngayeje nii̱ xikó má tsꞌén atíxomaa̱ Néná nga sa̱ꞌín. Kuí bí kui xotaa̱ xi jatjoni nangi Ejipto̱, xi kisitꞌa jaꞌeén ki̱a̱ kui xki̱i̱:

⁵ Ndií Rubee̱n, kui xi ndí xí xchaá Jakoo̱b, kuí bí xi̱ꞌbi̱: Enoo̱k, Faluu̱,

⁶ Esroo̱n, ko̱jo Karmii̱.

⁷ Ngayeje xota̱ tji̱e̱ xi chji̱a̱ni Rubee̱n, yichán ján mi̱ yito úchán ko̱jo kantié kamá jáxíꞌín xi kamáxki̱.

⁸ Faluu̱ ngo kamá ndií, kui xi kiꞌmí Eliaa̱b.

⁹ Eliaa̱b ján kamá ndií, kó kuí bí xi̱ꞌbi̱: Nemuee̱l, Ndataa̱n, ko̱jo Abiraa̱n. Ndataa̱n ko̱jo Abiraa̱n ki̱a̱ chji̱a̱ni xtín xota̱ xi chji̱a̱ni Koree̱, kui xi kondra̱ kijínii̱ Néná, ko̱jo kondra̱ kamánii̱ Moisee̱ ko̱jo Aaroo̱n.

¹⁰ Kuíni nga katjoxꞌá tꞌanangii̱ kó katjéjén tikón kui xotaa̱. Ngo xtín xota̱ xi jó úchán ichítié kamá. Ngayejee̱ nga kití nga jesón, kó bo̱a̱ tsꞌén nga xota̱ na̱xi̱ńdaá kamábe nga Néná botíjeé xota̱ xi ntꞌiéꞌénjiín.

¹¹ Ta̱kuítsí ndií Koree̱ xi jmí ni kamájiín. Kisꞌińdora ngase nga̱sondie.

¹² Xota̱ tji̱e̱e̱ Simeoo̱n nga xki̱ xtín xota̱ ndiꞌa, kuí bí xi̱ꞌbi̱: Nemuee̱l, Jamii̱n, Jakii̱n,

¹³ Seraa̱, ko̱jo Sauu̱l.

¹⁴ Kan jó mi̱ jó úchán jáxíꞌín kamá ngayeje xi kamáxki̱ xi chji̱a̱ni kui xtín xota̱ ndiꞌaa̱ Simeoo̱n.

¹⁵ Xota̱ tji̱e̱e̱ Ngaa̱nd nga xki̱ xtín xota̱ ndiꞌa, kuí bí xi̱ꞌbi̱: Sefoo̱n, Angii̱, Sunii̱,

¹⁶ Osnii̱, Erii̱,

¹⁷ Aroo̱nd, ko̱jo Arelii̱.

¹⁸ Yichán mi̱ masien jáxíꞌín kamá ngayeje xi chji̱a̱ni xtín xota̱ ndiꞌaa̱ Ngaa̱nd.

^19-20 Xota̱ tji̱e̱e̱ Jundáa̱ nga xki̱ xtín xota̱ ndiꞌa, kuí bí xi̱ꞌbi̱: Ee̱r, Onaa̱n, Selaa̱, Faree̱, ko̱jo Seraa̱. Ee̱r ko̱jo Onaa̱n ki̱a̱ jesón nangi Kanaa̱n, kuíni nga ngiti̱ kamáxki̱jín.

²¹ Jó kamá ndií Faree̱, kó kuí bí xi̱ꞌbi̱: Esroo̱n, ko̱jo Amuu̱l.

²² Ichítié ko̱jo kan jun mi̱ masien jáxíꞌín kamá ngayeje xi chji̱a̱ni xtín xota̱ ndiꞌaa̱ Jundáa̱.

²³ Xota̱ tji̱e̱e̱ Isakaa̱r nga xki̱ xtín xota̱ ndiꞌa, kuí bí xi̱ꞌbi̱: Tolaa̱, Pubaa̱,

²⁴ Jasuu̱b, ko̱jo Simroo̱n.

²⁵ Ichítié ko̱jo tie nijón mi̱ ján úchán jáxíꞌín kamá ngayeje xi chji̱a̱ni xtín xota̱ ndiꞌaa̱ Isakaa̱r.

²⁶ Xota̱ tji̱e̱e̱ Sabuloo̱n nga xki̱ xtín xota̱ ndiꞌa, kuí bí xi̱ꞌbi̱: Seree̱nd, Eloo̱n, ko̱jo Jajlee̱l.

²⁷ Ichítié ko̱jo tie mi̱ masien jáxíꞌín kamá ngayeje xi chji̱a̱ni xtín xota̱ ndiꞌaa̱ Sabuloo̱n.

²⁸ Xota̱ tji̱e̱e̱ Kosiee̱ nga xki̱ xtín xota̱ ndiꞌa, kuí bí xi̱ꞌbi̱: Manasee̱, ko̱jo Efraii̱n.

²⁹ Manasee̱ kisꞌiee̱ ngo ndí xí kiꞌmí Makii̱r. Makii̱r kisꞌiee̱ ngo ndí xí kiꞌmí: Ngalaa̱nd.

³⁰ Xota̱ tji̱e̱e̱ Ngalaa̱nd nga xki̱ xtín xota̱ ndiꞌa, jun kamá, kó kuí bí xi̱ꞌbi̱: Lesee̱r, Elee̱k,

³¹ Asriee̱l, Sikee̱n,

³² Semidaa̱, ko̱jo Éfee̱r.

³³ Éfee̱r kisꞌiee̱ ngo ndí xí kiꞌmí Selofaa̱nd. Selofaa̱nd jmí ndí xíꞌín kisꞌiejiín, ta̱soboá ndí ínchjín, kó kuí bí xi̱ꞌbi̱: Na̱ Majlaa̱, na̱ Noáa̱, na̱ Onglaa̱, na̱ Milkaa̱, ko̱jo na̱ Tirsaa̱.

³⁴ Ichítié ko̱jo jó mi̱ yito úchán jáxíꞌín kamá ngayeje xi chji̱a̱ni xtín xota̱ ndiꞌaa̱ Manasee̱.

³⁵ Xota̱ tji̱e̱e̱ Efraii̱n nga xki̱ xtín xota̱ ndiꞌa, kuí bí xi̱ꞌbi̱: Sutélaa̱j, Bekee̱r, ko̱jo Taa̱n.

³⁶ Xota̱ tji̱e̱e̱ Sutélaa̱j boá xi kamá ngo xtín xota̱ xi chji̱a̱ni Eráa̱n.

³⁷ Kantié jó mi̱ masien jáxíꞌín kamá ngayeje xi chji̱a̱ni xtín xota̱ ndiꞌaa̱ Efraii̱n. Kui xotaa̱ ko̱jo xota̱ xi chji̱a̱ni Manasee̱, xota̱ tji̱e̱e̱ Kosiee̱ boá.

³⁸ Xota̱ tji̱e̱e̱ Benjaa̱ nga xki̱ xtín xota̱ ndiꞌa, kuí bí xi̱ꞌbi̱: Belaa̱, Asbee̱l, Airaa̱n

³⁹ Sufaa̱n, ko̱jo Ufaa̱n.

⁴⁰ Belaa̱ jó kamá ndií, kó kuí bí xi̱ꞌbi̱: Aa̱rd, ko̱jo Naamaa̱n.

⁴¹ Yichán ún mi̱ jun úchán jáxíꞌín kamá ngayeje xi chji̱a̱ni xtín xota̱ ndiꞌaa̱ Benjaa̱.

^42-43 Ndaa̱n kisꞌiee̱ ngo ndí, kó ngo xtín xota̱ ndiꞌa kamá xota̱ tji̱e̱e̱, kuí boá xi Suaa̱n. Kó ichítié ko̱jo tienijón mi̱ nijón úchán jáxíꞌín kamá ngayeje xi chji̱a̱ni xtín xota̱ ndiꞌaa̱.

⁴⁴ Xota̱ tji̱e̱e̱ Asee̱r nga xki̱ xtín xota̱ ndiꞌa, kuí bí xi̱ꞌbi̱: Imnaa̱, Isbii̱, ko̱jo Beriaá.

⁴⁵ Beriaá jó kamá ndií, kó kuí bí xi̱ꞌbi̱: Ebee̱r, ko̱jo Malkiee̱l.

⁴⁶ Asee̱r ti̱ kisꞌiee̱ ngo ndí chjo̱on xi kiꞌmí Seraa̱.

⁴⁷ Ichítié ko̱jo ján mi̱ nijón úchán jáxíꞌín kamá ngayeje xi chji̱a̱ni xtín xota̱ ndiꞌaa̱ Asee̱r.

⁴⁸ Xota̱ tji̱e̱e̱ Neftalii̱ nga xki̱ xtín xota̱ ndiꞌa, kuí bí xi̱ꞌbi̱: Jasee̱l, Ngunii̱,

⁴⁹ Jesee̱r, ko̱jo Silee̱n.

⁵⁰ Yichán ún mi̱ nijón úchán jáxíꞌín kamá ngayeje xi chji̱a̱ni xtín xota̱ ndiꞌaa̱ Neftalii̱.

⁵¹ Jun úchán ko̱jo ngo mi̱ yito úchán ko̱jo kantié jáxíꞌín kamá ngayeje xota̱ Israee̱l xi kamáxki̱ xi kisitꞌa xo̱jo̱o̱n.

Xikó tsꞌén akakjangaa̱ tꞌanangi xotaa̱

⁵² Néná ti̱ tsíchji̱a̱jo nginí Moisee̱, kó bi̱ tsꞌén atíxomaa̱:

⁵³ «Ngotꞌe̱ ꞌne̱ takjangàjnúu̱ tꞌanangii̱ ngayeje xota̱ xi je kamáxki̱i̱.

⁵⁴ Xtín xota̱ xi kjín ngase maa̱, tsie ngase tꞌanangi te̱ꞌéjnúu̱. Xtín xota̱ xi chiboa ngase maa̱, chiboa ngase tꞌanangi te̱ꞌéjnúu̱. Chjiéngá ńgó ńgó chikjan tꞌanangi ko̱e̱ꞌeé nga ngo nga ngo xtín xota̱ xi je kjitꞌa xki̱i̱.

^55-56 Ngo kjo̱a̱chꞌáṉcha̱ chjábéngíjnúu̱ nga si̱ꞌankabíjnú tꞌanangii̱ ngi̱jii̱n ngayeje xtín xota̱ xi kjín má ko̱jo xi chiboa maa̱. Ngayeje tꞌanangii̱ nga nda tsꞌén ka̱makabi, xikótsꞌèn síndo xki̱i̱ tji̱e̱e̱ xotaa̱, ko̱jo xki̱ xtín xota̱ ndiꞌa xi chji̱a̱ni nga ngo nga ngo».

Xota̱ tji̱e̱ xi chji̱a̱ni Lebii̱

^57-58 Ti̱ kamáxki̱ ngayeje xota̱ ndiꞌa xi chji̱a̱ni xota̱ tji̱e̱e̱ Lebii̱ nga. Ján kamá ndií Lebii̱, kó kuí bí xi̱ꞌbi̱: Ngersoo̱n, Koaa̱t, ko̱jo Merarii̱. Kó bo̱a̱ tsꞌén nga ján tjín xtín xota̱ ndiꞌa kamá, kósꞌe̱ ngi ún kamá xtín xota̱ ndiꞌa xi jatjojinni kꞌi̱e̱e̱, kó kuí bí xi̱ꞌbi̱: Libnii̱, Ebroo̱n, Koaa̱t, Majlii̱, ko̱jo Musii̱. Koaa̱t kisꞌiee̱ ngo ndí xi kiꞌmí Amraa̱n.

⁵⁹ Amraa̱n ixánjo̱ ngo tsa̱kji̱ín Lebii̱ xi kiꞌmí na̱ Jokabee̱nd. Kui naa̱ ki̱a̱ katsen nangi Ejipto̱ kjiꞌanga to̱kó ki̱a̱ tikón Lebii̱. Amraa̱n ko̱jo na̱ Jokabee̱nd jó kamá ndí xíꞌín xi kisꞌiee̱, ko̱jo ngo ndí chjo̱on, kó kuí bí xi̱ꞌbi̱: Aaroo̱n, Moisee̱, ko̱jo na̱ Riyaa̱.

⁶⁰ Aaroo̱n nijón kamá ndí xí kisꞌiee̱, kó kuí bí xi̱ꞌbi̱: Nandaa̱b, Abiuu̱, Itamaa̱r, ko̱jo Eleasaa̱.

⁶¹ Ta̱nga Nandaa̱b ko̱jo Abiuu̱ jesón kjiꞌanga ta̱xkiya ítí ni sije̱n ndiꞌandikoón Néná, kó ki̱a̱jín kijítji̱ngi xikó má katsó Néná nga si̱ꞌanda kui nii̱.

⁶² Kan ján mi̱ kamá ngayeje jáxíꞌín xi je tsꞌatio ngo saá xi chji̱a̱ni xota̱ tji̱e̱e̱ Lebii̱. Ngayeje kui jaá ki̱a̱jín nijan kamáxki̱jo xota̱ Israee̱l, ngatꞌa̱ jmí tꞌanangi katseꞌéjiín.

⁶³ Kuí bí xki̱i̱ ngayeje xota̱ Israee̱l xi íxki̱ Moisee̱ ko̱jo chináꞌmi Eleasaa̱, kjiꞌanga síndo ki̱a̱ nangi soón nangi Moaa̱b, ki̱a̱ tꞌa ndejèꞌ Jorndaa̱n, kje̱n na̱xi̱ńdáꞌniú Jeriko̱.

⁶⁴ Kui xki̱i̱ yaꞌajín jaꞌeén jáxíꞌín xi tjón íxki̱ Moisee̱ ko̱jo Aaroo̱n ki̱a̱ nangi kixií na̱xi̱ Sinaii̱.

⁶⁵ Ngayeje kui xotaa̱ ki̱a̱ jesón nangi kixií nga atíjeé Néná. Ta̱kuítsí Kalee̱b ko̱jo Josuee̱ xi kisꞌińdo ngase nga̱sondie.