Xki̱ 23 - Xo̱jo̱n eén Néná

Balaa̱n katsꞌénchikonñé xota̱ Israee̱l

¹ Kósꞌe̱ Balaa̱n bi̱ katsoó Balaa̱k: «Ti̱ꞌinde ji kꞌi̱e̱e̱ yito ṉchandikón tsi̱ꞌe̱ nga sa̱ꞌinkꞌasꞌièe̱n ngo kjo̱a̱tjó Néná xi yito cho̱yojo toro̱ ko̱jo yito cho̱tsa̱nga̱ xi jaꞌatji ndi̱ja̱a̱».

² Kó Balaa̱k katsꞌén ni xi tsíꞌá Balaa̱n. Sꞌe̱ jaskan nga joó nga katsꞌénkꞌién kui cho̱yojo toroo̱ ko̱jo kui cho̱tsa̱nga̱ xi jaꞌatji ndi̱ja̱a̱, kó ngo cho̱yojo toro̱ ko̱jo ngo cho̱tsa̱nga̱ xi jaꞌatji ndi̱ja̱a̱ íjñasón nga ngo nga ngo ṉchandikoón.

³ Kósꞌe̱ Balaa̱n bi̱ katsoó Balaa̱k: «Ti̱ndyinra ji kꞌi̱e̱e̱. An chjiéngá skoya an nga kji̱ndi̱bá Néná, tsi̱ꞌe̱ nga ka̱tso̱yàna ni xi sa̱ꞌin an». Kó Balaa̱n kijí ngo ngi̱ndie xi nkꞌa ko̱jo xi kjiꞌitiya.

⁴ Tji̱e̱nga tikón ki̱a̱a̱, Néná jatjokjaà. Kósꞌe̱ Balaa̱n bi̱ katsoó Néná: —Jè katsꞌenkꞌasꞌien an ngo kjo̱a̱tjó nganda tse̱ xi yito cho̱yojo toro̱, ko̱jo yito cho̱tsa̱nga̱ xi jaꞌatji ndi̱ja̱a̱, ki̱a̱ nínga síndo nga yito ṉchandikón xi katsangiya an nga si̱ꞌanda.

⁵ Kósꞌe̱ Néná katsjaá kui eén Balaa̱n: —Tꞌen nginí ji nínga tikón Balaa̱k, kó ndókjo̱e̱je ji kui én xí je katsjaa.

⁶ Kó Balaa̱n kijí nginí nínga síndo ṉchandikoón, kó ki̱a̱ kasakoo̱ Balaa̱k ko̱jo ngayeje já ngito̱ko̱o̱ nangi Moaa̱b.

⁷ Kó ki̱a̱ Balaa̱n, bi̱ tsó só xi kisie: «Balaa̱k ree̱ nangi Moaa̱b, ndeskande na̱xi̱i̱ Arabia̱ kjindibájo̱na, tsi̱ꞌe̱ nga chꞌo tsꞌén kuichjiátaꞌin an xota̱ Israee̱l, ko̱jo tsi̱ꞌe̱ nga skjinínié an jé.

⁸ »Ta̱nga ka̱májínna nga an kꞌuichjáa̱, ni xi katsóna Néná nga bi̱ katsóna: “Ngatꞌa̱ chꞌójín tsꞌén ndokjo̱a̱taꞌin ji xota̱ na̱xi̱ńdána, ti̱nde nga jmí jé chinínijín ji”.

⁹ »Ndeskande nínga ꞌniú nkꞌaá kui na̱xi̱i̱, tsꞌénkotsijée̱n kui xota̱ na̱xi̱ńdá ndikoón. Jo̱o̱n, ndeskande nínga nkꞌaa̱, tsꞌénkotsijée̱n kui xota̱ na̱xi̱ńdá xí ntꞌiéꞌeén.

¹⁰ »¡Xota̱ nda boá xota̱ Israee̱l! Jmíjín xi ka̱maa̱ ku̱i̱ꞌíxki̱. ¡Xota̱ xi tjiín kjo̱a̱xió boá xota̱ Israee̱l! ¡Achichíra̱ ndatsi bo̱a̱ kon ka̱ma an xikoó kui xotaa̱!»

¹¹ Nga tsintꞌié kuí nii̱, Balaa̱k katsꞌénxchánjo̱ Balaa̱n, kó bi̱ katsoó: —Mí xí kjimaa ji. ¡Kꞌi̱e̱ jéꞌe̱joo̱ tsi̱ꞌe̱ nga chꞌo tsꞌén ko̱ndókjo̱e̱taꞌin ji xota̱ xi kondra̱na, ta̱nga ta̱sá ndatsꞌèn kandokjo̱e̱taꞌin ji! Ta̱nga Balaa̱n bi̱ katsoó:

¹² —Ta̱kuítsí ni xi Néná ko̱tíxomana xi kuichjiá an.

Xi ma joó kjo̱a̱niꞌánchikonñé xi katsjá Balaa̱n

¹³ Kósꞌe̱ Balaa̱k bi̱ katsoó: —Ja̱bíchinní kó kje̱ꞌe ngi̱ndie kjuínjoo̱. Tsi ta̱ nda ni̱xtjin ka̱mamejeén chꞌo tsꞌén ko̱ndókjo̱e̱taꞌin ji kui xota̱ na̱xi̱ńdaá, tsi ta̱ chiboa tsí má xi xchi̱e̱ ji.

¹⁴ Kó Balaa̱k kijíjo̱ Balaa̱n ki̱a̱ kꞌijñá xí ꞌmí Sofii̱n, ki̱a̱ nínga ꞌniú nkꞌaá na̱xi̱ Pisgaa̱. Ki̱a̱ katsꞌénda yito ṉchandikón, kó nga ngo nga ngo kui ṉchandikoón katsꞌénkꞌiensón ngo cho̱yojo toro̱ ko̱jo ngo cho̱tsa̱nga̱ xi jaꞌatji ndi̱ja̱a̱.

¹⁵ Jaskan Balaa̱n bi̱ katsoó Balaa̱k: «Chiyéraní kꞌi̱e̱e̱, tꞌa nínga síndo ṉchandikoón, tji̱e̱nga an kjuín án nínga sa̱kóna Néná».

¹⁶ Kó Néná jatjokjaà Balaa̱n, kó kui eén katsjaá: «Tꞌen nginí ji nínga tikón Balaa̱k, kó tꞌíyée̱ nginíi̱ kui én xi je katsjaa».

¹⁷ Balaa̱n kijí nginí nínga tikón Balaa̱k ko̱jo xota̱ ngito̱ko̱o̱ nangi Moaa̱b, ki̱a̱ tꞌa nínga síndo ṉchandikoón. Kósꞌe̱ Balaa̱k bi̱ tsꞌén asíyaá Balaa̱n: —Mí xí katsoó Néná.

¹⁸ Kó Balaa̱n bi̱ tsó só xi kisiee̱: «Balaa̱k ndií Sipoo̱r, ¡ti̱sítji̱n ji kó nda má tasínijìnní!

¹⁹ »¡Néná jmí tsi bo̱a̱ kon xikoó ñá! Jmí éndísó chji̱a̱jín, ti̱nde bosíkjojín xi kókón kui. Néná tsꞌénkjátjosón ni xi tsáyàtjón nga sa̱ꞌín.

²⁰ »Néná boá xi atíxomana nga sa̱ꞌinchikonñé an xota̱ na̱xi̱ńdaá. Kuí boá xi bo̱a̱ tsꞌén atíxoma, Kó ka̱májín án kꞌuichjáa̱.

²¹ »Néná boá xi ree̱ xota̱ Israee̱l. Ki̱a̱ tikónjin kui ngamasiee̱n xota̱ na̱xi̱ńdaá. Néná jmí tsi ni xi ndajín xi mejeén nga ka̱maa̱, ti̱nde mejénjiín nga ni xi ndajín sa̱ꞌínjo̱.

²² »Ngo ngaꞌniú xí je ngase, xi xikoó tsi tsi̱ꞌe̱ ngo cho̱ búfalo̱ xi katsꞌénkjién Néná, nga katsꞌénkjatjoni nangi Ejipto̱ xota̱ na̱xi̱ńdaá.

²³ »Jmíjín kjo̱a̱tjiꞌe xi ka̱maa̱ sa̱ꞌínꞌoón xota̱ na̱xi̱ńdaá Néná. ¡Tsitsíjenjnúu̱ ngayeje ni nda xi Néná je katsꞌénjo̱ xota̱ na̱xi̱ńdaá!

²⁴ »Xikónií tsi ngo xtín xandi̱je̱, xi je mejeén sa̱ꞌínkꞌién cho̱ xi skji̱ni̱e̱. Xota̱ na̱xi̱ńdá Israee̱l sa̱ꞌínkjaꞌyájín ngaskande nga sa̱ꞌiín nga skjánjo̱ xota̱ kondraa̱».

²⁵ Kósꞌe̱ Balaa̱k bi̱ katsoó Balaa̱n: —¡Ja̱ tsi ka̱májiín chꞌo tsꞌén ko̱ndókjo̱e̱taꞌin ji kui xota̱ na̱xi̱ńdaá, ngata̱ bo̱a̱jín se ji nga nda ka̱maa̱ ni xi sa̱ꞌín!

²⁶ Ta̱nga Balaa̱n bi̱ katsoó: —¡Jè bo̱a̱ kixiaan nga chjiéngá kuintꞌieꞌée̱n Néná!

Xi ma jaán kjo̱a̱niꞌánchikonñé xi katsjá Balaa̱n

²⁷ Balaa̱k ti̱ bi̱ ti̱ katsó nginií Balaa̱n: —Ja̱bíꞌi̱n, kó xín ngi̱ndie kjuínjoo̱. Yá jàn tsi ta̱ ki̱a̱ tsja̱ndieè Néná nga chꞌo tsꞌén ko̱ndókjo̱e̱taꞌin ji xota̱ Israee̱l.

²⁸ Kó Balaa̱k kijíjo̱ Balaa̱n nínga ꞌniú nkꞌaá na̱xi̱ Peoo̱r. Ndeskande ki̱a̱a̱ yanii̱ ngayeje nangi kixií.

²⁹ Kó Balaa̱n bi̱ katsoó Balaa̱k: —Ti̱ꞌinde ji yito ṉchandikón tsi̱ꞌe̱ nga si̱ꞌankꞌasꞌiee̱n Néná yito cho̱yojo toro̱ ko̱jo yito cho̱tsa̱nga̱ xi jaꞌatji ndi̱ja̱a̱.

³⁰ Kjiꞌanga kamaá Balaa̱k nga katsꞌénda kui ṉchandikoón, Balaa̱n katsꞌénkꞌasꞌien kjo̱a̱tjó xi ngo cho̱yojo toro̱, ko̱jo ngo cho̱tsa̱nga̱ xi jaꞌatji ndi̱ja̱a̱ nga ngo nga ngo kui ṉchandikoón.