Xki̱ 21 - Xo̱jo̱n eén Néná

Xota̱ Israee̱l katsꞌén, kó katsꞌénkjié na̱xi̱ńdá Ormaa̱

¹ Ki̱a̱ nangi kixí xi tikón xtji̱e̱e̱n na̱ngi kisꞌijña ngo nda̱ re xi nda̱ Kanaa̱n kamá ki̱a̱ na̱xi̱ńdáꞌniú Araa̱nd. Kjiꞌanga kui nda̱ ree̱ tsintꞌié nga xota̱ Israee̱l je ndyi̱ndibá xtji̱e̱e̱n ndi̱yà Atarii̱n, askjanjo̱ kó kijíjo̱ꞌniú chiboa kui xotaa̱.

² Kósꞌe̱ xota̱ Israee̱l tsíchji̱a̱a̱ Néná, kó bi̱ katsoó nga sa̱ꞌínkjatjosón ngo ni xi katsóyàtjoón: «Tsi ko̱si̱ke̱jejne̱ nga si̱ꞌanjne̱ nga ku̱i̱xkánjo̱jne̱ kui nda̱ ree̱ ko̱jo xota̱ na̱xi̱ńdaá, ji̱n si̱ꞌankjie yejejne̱ ngayeje na̱xi̱ńdáꞌniuú».

³ Kó Néná katsjaá ni xi tsíꞌaá, kó asíko̱jo nga katsꞌeén kondraa̱. Kó bo̱a̱ tsꞌén nga xota̱ Israee̱l katsꞌénkꞌién xota̱ Kanaa̱n, kó katsꞌénkjatsón ngayeje na̱xi̱ńdáꞌniuú. Kuíni nga kui ngi̱ndiee̱ “Jormaa̱” ítꞌajaꞌén.

Ye̱ xi ki̱cha̱ bronsee̱

⁴ Xota̱ Israee̱l jatjoni na̱xi̱ Oo̱r, sꞌe̱ kijí xtji̱e̱e̱n Ndáchíkón Inií, ta̱nga jaꞌajín nangi nínga botixómá nda̱ ree̱ nangi Endoo̱n. Kó ki̱a̱ ngi̱ya ndi̱ya̱à achichí nda̱ kamaá xotaa̱,

⁵ kó ítsꞌi̱yanii̱ nga katsꞌénxchán kondraa̱ Néná. Kó bi̱ katsoó Moisee̱: «Míkjo̱a̱a̱ nga kaꞌnaxiéjne̱ ki̱a̱ nangi Ejipto̱. A ta̱ tsi̱ꞌe̱ nga kꞌi̱e̱ tsí ko̱yàjne̱ nangi kixií. ¡Ti̱nde pan, ti̱nde ndáfoa jmíjínjne̱, kó jè tsꞌajónjne̱ kui nichinie xtoón!»

⁶ Kósꞌe̱ Néná katsangiyaa̱ ye̱ xi tsꞌenkꞌiénná tsi̱ꞌe̱ nga skji̱ni̱e̱e̱. Xota̱ xi iskjiniee̱ kui ye̱e̱ jesón, kó achichí kamá xota̱ xi jesoón.

⁷ Kó kuíni nga xota̱ Israee̱l kijíkoón Moisee̱ nga bi̱ katsoó: «Jè yàjne̱ nga ndajínkjiꞌi ni xi kiniꞌánjne̱ nga kiniꞌánxchánjne̱ kondraa̱ Néná, ko̱jo kondra̱ tse̱ ji. ¡Ngo kjo̱a̱nda chjiáꞌájne̱, ndokjoée̱ Néná, kó chji̱e̱ꞌèe̱ nga xín ngatjíjo̱ kui ye̱e̱!» Kó Moisee̱ tsíꞌaá Néná nga sa̱ꞌínjetakoón xota̱ Israee̱l,

⁸ kó Néná bi̱ katsoó Moisee̱: «Ngo ye̱ xi ki̱cha̱ bronse̱ ti̱ꞌinde ji, kó ngo yá ndojó tꞌítakí ji. Kó tsi tjín xota̱ xi ye̱ skji̱ni̱e̱e̱, bo̱a̱ tꞌíi̱n nga ki̱a̱ nga kotsijee̱n kui ye̱ xi ki̱cha̱ bronsee̱, kó ka̱mandaya ngijee̱».

⁹ Kó bo̱a̱ kamá. Moisee̱ katsꞌénda ngo ye̱ xi ki̱cha̱ bronse̱, kó ngo yá ndojó ítokó. Kó kjiꞌanga ngo xota̱ xi ye̱ iskjiniee̱, kui xi bo̱a̱ kamaá askotsijee̱n kui ye̱ xi ki̱cha̱ bronsee̱, kó jmí ni kamájiín ngijee̱.

Xota̱ Israee̱l kijíra ndi̱ya̱à

¹⁰ Xota̱ Israee̱l kijíra ndi̱ya̱à, kó jachó nangi Oboo̱t.

¹¹ Sꞌe̱ kijí xtji̱e̱e̱n nínga ꞌbosꞌien tsꞌueé nangi Moaa̱b, kó ki̱a̱ katsꞌénkjaꞌyá ngo ngi̱ndie xi ꞌmí Ilie̱-Abarii̱n, kui xi tikón xtji̱e̱e̱n nangi kixií.

¹² Ngi̱chí sájín ki̱a̱ katsꞌénkjaꞌyá xo̱ngàndántꞌié xi ꞌmí Seree̱nd,

¹³ sꞌe̱ jatjoni ki̱a̱a̱ kó kijí xi ingoboaá ndejèꞌ Arnoo̱n. Kui ndejeèꞌ kuí boá xi bokjangá nangii̱ xota̱ tji̱e̱e̱ Moaa̱b, ko̱jo nangii̱ xota̱ Amoo̱r, kó ki̱a̱ má nangi kixií tikón kui ndejeèꞌ.

¹⁴ Kjo̱a̱a̱ kui nii̱, ki̱a̱ xo̱jo̱n xi kjitꞌa nga askjan Néná kjitꞌa ngo én xí bi̱ tsó: «Tsangínjne̱ xtji̱e̱e̱n Baee̱b, ki̱a̱ nangii̱ Sufaa̱, ko̱jo xtji̱e̱e̱n xo̱ngàndántꞌié Arnoo̱n.

¹⁵ Kó ti̱ ikitjatjíyajonjne̱ ngayeje xo̱ngàndántꞌié, kui xi fochó ngaskande nangi Aa̱r, kui xi tikón nínga tsindió mánii̱ nangi Moaa̱b».

¹⁶ Sꞌe̱ jatjoni xota̱ Israee̱l ki̱a̱ ndejèꞌ Arnoo̱n, kó kijí ngo ngi̱ndie xi ꞌmí ndáńchꞌi̱. Ki̱a̱ boá nínga tikón ndáńchꞌi̱, nínga Néná atíxomaa̱ Moisee̱ nga ítikó xota̱ Israee̱l nga katsjaá ndáfoa.

¹⁷ Kui ni̱xtjii̱n xota̱ Israee̱l kisie ngo só xi bi̱ tsó: «¡Ngatjatjoo̱ ndáfoa ndáńchꞌií! ¡Ji̱n ko̱ndájne̱ só!

¹⁸ Kui ndáńchꞌií ndií ree̱ boá xi katsꞌénda nga katsꞌénkjién yá xí foyatsja ko̱jo yánísieé». Ngije jatjoni nangi kixií, xota̱ Israee̱l jaꞌa nangi Matana̱,

¹⁹ ko̱jo nangi Naaliee̱l, ko̱jo nangi Bamoo̱t,

²⁰ ko̱jo nangi són xi tikón ki̱a̱ Moaa̱b. Nga fetꞌani jachó nkꞌaa̱ na̱xi̱ Pisgaa̱, nínga yanii̱ nangi kixií.

Xota̱ Israee̱l katsꞌeén nga askjanjo̱ nda̱ re Sióo̱n

²¹ Xota̱ Israee̱l bi̱ tsó én xí katsangiyaa̱ Sijoo̱n, kui xi nda̱ ree̱ xota̱ Amoo̱r kamaá:

²² «Ngo kjo̱a̱nda chjiáꞌájne̱ ji nda̱ re. Te̱ꞌéndièjne̱ nga ki̱a̱ ku̱i̱tjájinjne̱ nangi nínga botíxome ji. Ndyi̱boeꞌéjne̱ ndso̱ꞌbajne̱ nga ki̱a̱jín ku̱i̱tjájinjne̱ nínga kjiꞌi ni tjieé, ti̱nde ki̱a̱jín ku̱i̱tjájinjne̱ nínga kjiꞌi tostsi̱je̱è, ti̱nde sꞌi̱o̱jínjne̱ ndáfoaa̱ ndáńchꞌíi̱. Ku̱i̱tjá kixi̱ kixi̱jne̱ nga konginyájne̱ ndi̱yà tiyaá, ngaskande nga je ikitjajne̱ na̱xi̱ńdá nínga botíxome ji».

²³ Ta̱nga nda̱ re Sijoo̱n, ngindiee̱ nga tsja̱á kjo̱a̱ nga ki̱a̱ kjo̱a̱ꞌajin nangi nínga botixómá, ta̱sá ítikó jájuún, kó askjanjo̱ xota̱ Israee̱l ki̱a̱ nangi kixií, ki̱a̱ tiña nangi xi ꞌmí Jaa̱.

^24-25 Ta̱nga xota̱ Israee̱l katsꞌeén kui jaá, kó iskjíbé ngayeje nangii̱. Bo̱a̱ tsꞌén nga xota̱ Israee̱l, ki̱a̱ kisꞌińdo ngayeje na̱xi̱ńdáꞌniú xí chji̱a̱ni xota̱ Amoo̱r, ki̱a̱ Esboo̱n ko̱jo ngayeje na̱xi̱ńdáꞌniú xí síndo ngamasiee̱n ndejèꞌ Arnoo̱n, ko̱jo xo̱ngàndántꞌié Jaboo̱k. Kꞌi̱e̱ kui ndejeèꞌ ꞌbítsi̱yani nangii̱ xota̱ tji̱e̱e̱ Amoo̱n, kui xi achichí ꞌniú askondá jájuún.

²⁶ Ki̱a̱ nangi Esboo̱n kisꞌijña re Sijoo̱n, kui xi askjanjo̱ kui re xi ngi̱chí tjón kisꞌijña ki̱a̱ nangi Moaa̱b, kó jaꞌáxiín nangii̱ ngaskande ndejèꞌ Arnoo̱n.

²⁷ Xikó tsó soó: «¡Ti̱ꞌandayajnú kó chjanínkꞌá nginíjnú nangi Esboo̱n, na̱xi̱ńdáꞌniú nínga tikón nda̱ re Sijoo̱n!

²⁸ »Ndeskande ki̱a̱ nangi Esboo̱n jatjoni ngo ndiꞌí xi ítí ngayeje kui nangii̱, kó ndeskande nangi Aa̱r, nangi xi chji̱a̱ni Moaa̱b, ngaskande ngi̱ndie nínga nkꞌaa̱ Arnoo̱n.

²⁹ »¡Ni̱ma̱ xò jí, nangi Moaa̱b! ¡Achichí nga ndajín kamátaꞌin ji, nangii̱ ne xi ꞌmí Kemoo̱! Kuí boá kui nee̱ xi katsjandieè re Sijoo̱n nga kijíjo̱ꞌniú ndí xíꞌíi̱n, ko̱jo ndí ínchjíi̱n.

³⁰ »Ngayeje nangi Esboo̱n jè kiniꞌánkjié, yaꞌanii̱ Ndiboo̱n ngaskande Nofaa̱j, ngayejee̱ nga kisꞌijña jatson. ¡Ngaskande nangi Mendeba̱ jachó kui ndiꞌií!»

³¹ Bo̱a̱ tsꞌén nga xota̱ Israee̱l kisꞌińdo nangii̱ xota̱ Amoo̱r.

Xota̱ Israee̱l katsꞌeén nga askjanjo̱ nda̱ ree̱ nangi Basaa̱n

³² Moisee̱ katsangiya xota̱ xi kijíkatsijenꞌmá ki̱a̱ na̱xi̱ńdá Jasee̱r. Kó xota̱ Israee̱l katsꞌeén nga askjanjo̱ xotaa̱ kui na̱xi̱ńdáꞌniuú, kó katsꞌéntsi̱ꞌe̱ kui ngi̱ndiee̱ ko̱jo ndí nangi xi síndotꞌa ki̱a̱a̱, kó tsangatji̱ngii̱ ngayeje xota̱ Amoo̱r xi kisꞌińdo ki̱a̱a̱.

³³ Sꞌe̱ jaskan kijí nangi Basaa̱n, ta̱nga nda̱ re Oo̱j kijí nangi Endreii̱, kó kijíjo̱ jájuún nga kijíkjánjo̱ xota̱ Israee̱l.

³⁴ Kósꞌe̱ Néná bi̱ katsoó Moisee̱: «Ngata̱ ndakinjín máa̱ nda̱ re Oo̱j. Án boá xi kosiko̱joo nga si̱ꞌìi̱n kui ko̱jo ngayeje jájuún. Ta̱nga mejénna nga bo̱a̱ si̱ꞌinje̱ ji kui, xikó kiniꞌínje̱ ji Sijoo̱n, nda̱ re xi chji̱a̱ni xota̱ Amoo̱r».

³⁵ Bo̱a̱ tsꞌén nga xota̱ Israee̱l katsꞌénkꞌién nda̱ re Oo̱j, ko̱jo jájuún, ko̱jo ngayeje xotaa̱, kó ki̱a̱ kisꞌińdo kui na̱xi̱ńdaá ngijee̱.