Xki̱ 20 - Xo̱jo̱n eén Néná

Xota̱ Israee̱l katsꞌénxchán kondraa̱ Néná

¹ Sá xí ꞌmí Abii̱b má nga jachó xota̱ Israee̱l ki̱a̱ nínga ꞌmí Kandee̱, ki̱a̱ nangi kixií Sii̱n. Tsie chií kamaá nga kisꞌińdo ki̱a̱a̱, kó ki̱a̱ kꞌien na̱ Riyaa̱, kó ki̱a̱ akjanijín.

² Kó nga kui ngi̱ndiee̱ jmí ndáfoa kisꞌiejín, xota̱ na̱xi̱ńdaá kamátikó kó chꞌo tsꞌén tsíchji̱a̱taꞌin Moisee̱ ko̱jo Aaroo̱n.

³ Bi̱ kiꞌmií nga kandokjo̱a̱ꞌa Moisee̱: «¡Ta̱sara̱ ndatsi ki̱a̱ nijan akayajne̱, kjiꞌanga Néná katsꞌénjeé xota̱ xingi̱jne̱!

^4-5 ¡Kaꞌnaxiéjne̱ nangi Ejipto̱ ji̱n ko̱jo cho̱jne̱, ta̱ tsi̱ꞌe̱ nga kꞌi̱e̱ tsí jéꞌe̱niꞌínkꞌínjne̱ ngi̱jii̱n kui nangi kixií! Míkjo̱a̱a̱ nga kui ngi̱ndie xi achichí chꞌochoo̱n jéꞌe̱jejne̱. ¡Májín ꞌbítji̱e̱jne̱ toꞌingo̱ kꞌi̱e̱e̱, ti̱nde májín ꞌbítji̱e̱jne̱ tostsi̱jè, ko̱jo to ngrananda̱! ¡Nde ndáfoa xi ma ꞌyó jmíjínjne̱!»

⁶ Kó Moisee̱ ko̱jo Aaroo̱n jatjoxíntꞌaa̱ kui xotaa̱, kósꞌe̱ ki̱a̱ kijí ndiꞌandikoón. Kó ki̱a̱ nínga bitjasꞌi̱e̱nnii̱ kixindyiańña ngaskande nga kisitꞌaa̱ kje̱n tꞌanangii̱, kó Néná ki̱a̱ akó yojoo̱ nga jachójo̱ kjo̱a̱jee̱.

⁷ Kó Néná bi̱ katsoó Moisee̱:

⁸ «Chjábé jí yánísiée̱, kó chji̱e̱ꞌèe̱ ntsꞌie ji Aaroo̱n nga ngatasikójoo nga kꞌuitíkí jí ngayeje xota̱ na̱xi̱ńdaá. Sꞌe̱ ngindyi̱ko̱n ngayeje xotaa̱, te̱ꞌékjo̱e̱e̱ ndi̱jo̱jee̱ nga ngatsjájnú ndáfoa. Kó kui ndi̱jo̱o̱ kjo̱tjoo̱ ndáfoa, kó kꞌuí ngayeje xotaa̱ ko̱jo cho̱o̱».

⁹ Kó Moisee̱ katsꞌén ni xi Néná atíxomaa̱ nga sa̱ꞌín, kó iskjíbé yánísié xi tikón ngindyi̱ko̱n Néná.

¹⁰ Sꞌe̱ jaskan Moisee̱ ko̱jo Aaroo̱n ítikó ngayeje xotaa̱ ki̱a̱ kje̱n ndi̱jo̱jee̱, kó Moisee̱ bi̱ katsoó: «¡Nda má ndaꞌyájnúꞌun xota̱ kitikjo̱a̱! A mejénjnú nga kui ndi̱jo̱o̱ ko̱ꞌna̱xiéjne̱ ndáfoa tsi̱ꞌe̱ nga ka̱ma sꞌi̱o̱jnú.»

¹¹ Tji̱e̱nga bo̱a̱ tjítsó, Moisee̱ jó ndi̱yà tsaꞌon kui ndi̱jo̱jee̱ yánísieé, ¡kó ítsꞌi̱yani nga achichí ndáfoa jatjoo̱ kui ndi̱jo̱o̱, kó katsꞌe ngayeje xotaa̱ ko̱jo cho̱o̱!

¹² Ta̱nga Néná bi̱ katsoó Moisee̱ ko̱jo Aaroo̱n: «Jún kisꞌijinjínjnú an, ti̱nde kiniꞌándikónjínjnúꞌun ngindyi̱ko̱n xota̱ Israee̱l. Kuíni nga ki̱a̱jín nijan ku̱i̱tjásꞌi̱e̱njojnú kui xotaa̱ tꞌanangi xi an tsjàa̱».

¹³ Kui nii̱ xi kamá ki̱a̱ Meriba̱, «kjo̱a̱niꞌánxchaán» tsó kui jaꞌeén. Ngatꞌa̱ ki̱a̱ boá nínga xota̱ Israee̱l katsꞌénxchán kondraa̱ Néná, kó Néná akoó nga kuí boá, ngo Néná xí tsjie.

Nda̱ ree̱ nangi Endoo̱n

¹⁴ Kjiꞌanga xota̱ Israee̱l kisꞌińdo ki̱a̱ nínga ꞌmí Kandee̱, Moisee̱ katsangiyaa̱ nda̱ ree̱ nangi Endoo̱n ngo én xí bi̱ tsó: —Ji, an ko̱jo xota̱ Israee̱l, xingi̱ ñá má. Kó jè yé nde nde ji nga achichí kjo̱a̱ni̱ma̱ xi je ikitjatiójne̱.

¹⁵ Jè kjín nónií nga xota̱ xingi̱jne̱ kijíkꞌíndo nangi Ejipto̱. Ta̱nga xota̱ Ejiptoo̱ achichí ndajín katsꞌénjo̱, ti̱ bo̱a̱ ti̱ katsꞌénjo̱jne̱ ji̱n nga.

¹⁶ Kósꞌe̱ kichjiáꞌájne̱ nga ko̱síko̱jojne̱ Néná, kó kui tsintꞌiéjne̱ kósꞌe̱ katsangiya ngo ndítsjiee̱, tsi̱ꞌe̱ nga kꞌo̱xiéjne̱ nangi Ejipto̱. Kó kꞌi̱e̱ tindyionjne̱ ngotꞌe̱ ꞌne̱. Kꞌi̱e̱ tindyionjne̱ na̱xi̱ńdá Kandee̱, nínga tikón tsindioó na̱xi̱ńdáa̱.

¹⁷ »Ngo kjo̱a̱nda ndyi̱chjiáꞌájne̱ ji. Te̱ꞌéndièjne̱ nga ki̱a̱ ku̱i̱tjájinjne̱ nangi nínga botíxome ji. Ndyi̱boeꞌéjne̱ ndso̱ꞌbajne̱ nga ki̱a̱jín ku̱i̱tjájinjne̱ nínga kjiꞌi ni tjieé, ti̱nde ki̱a̱jín ku̱i̱tjájinjne̱ nínga kjiꞌi tostsi̱je̱è, ti̱nde sꞌi̱o̱jínjne̱ ndáfoaa̱ ndáńchꞌíi̱. Ku̱i̱tjá kixi̱ kixi̱jne̱, kó ki̱a̱ konginyájne̱ ndi̱yà tiyaá ngaskande nga je ikitjajne̱ nangi nínga botíxome ji.

¹⁸ Ta̱nga nda̱ ree̱ nangi Endoo̱n, bi̱ katsoó: —¡Ngata̱ niꞌánjínjnú ngo kjo̱a̱tsobé nga ki̱a̱ ku̱i̱tjájnú na̱xi̱ńdána! Tsi bo̱a̱ si̱ꞌánjnú, tsja̱akjo̱a̱a̱ jájúnna nga skjánjo̱jnú.

¹⁹ Kó xota̱ Israee̱l, bi̱ katsó ngase: —Ndyi̱boeꞌéjne̱ ndso̱ꞌbajne̱ nga ta̱ ki̱a̱ konginyájne̱ ndi̱yà tiyaá. Kó tsi tjín xota̱ xi ndokjo̱a̱niji̱n ko̱jo tsi cho̱jne̱ xi kꞌuí ndáfoa ki̱a̱ ndáńchꞌií, kꞌuíchjíjne̱. Ta̱kuítsí ni xi mejénjne̱ nga ku̱i̱tjá chiíjne̱ nangi nínga botíxome ji. Ta̱nga nda̱ ree̱ nangi Endoo̱n, bi̱ katsoó:

²⁰ —¡Jè bo̱a̱ kixianjnúꞌun nga tsjadiéjínjnúꞌun nga kꞌi̱e̱ ku̱i̱tjájnú! Kó kui nda̱ ree̱ jatjojo̱ni ngi̱ndie nínga tikón ngo tjín jájún xi achichí ꞌniú, kó ki̱a̱ kisꞌińdo kje̱n nínga síndo xota̱ Israee̱l,

²¹ tsi̱ꞌe̱ nga tsja̱ndièjiín nga ki̱a̱ kjo̱a̱ꞌa ki̱a̱ ngi̱ndie nínga botixómá. Kó kjo̱a̱ꞌniútjínnií nga kui xota̱ Israee̱l xín ndi̱yà tsangase nínga kijíni.

Nga kꞌien Aaroo̱n ki̱a̱ na̱xi̱ Oo̱r

²² Xota̱ Israee̱l jatjoni Kandee̱ kó kijí xtji̱e̱e̱n na̱xi̱ Oo̱r,

²³ ki̱a̱ nga̱ndee̱ na̱xi̱ńdá Endoo̱n. Kó nga síndo ki̱a̱a̱, Néná bi̱ katsoó Moisee̱ ko̱jo Aaroo̱n:

²⁴ «Aaroo̱n jè mejeén ma kꞌien, kó ka̱májín kꞌo̱sꞌien na̱xi̱ńdá xí katsjáa̱ xota̱ Israee̱l, ngatꞌa̱ ki̱a̱ Meribaa̱ kamáꞌniátakónjínjnúꞌun, kó kandaꞌyáꞌénjínjnúꞌun.

²⁵ Ji Moisee̱, chjábé jí Aaroo̱n ko̱jo Eleasaa̱ ndií, kó tꞌenje̱ ji ki̱a̱ nínga ꞌniú nkꞌaá na̱xi̱ Oo̱r.

²⁶ Ki̱a̱ ko̱yà Aaroo̱n. Ngije kꞌien, chje̱ꞌéxíi̱n ńjño chináꞌmii̱, kósꞌe̱ Eleasaa̱ ti̱ꞌinkajé ji».

²⁷ Kó Moisee̱ katsꞌén ni xi Néná atíxomaa̱ nga sa̱ꞌín. Ngayeje xota̱ na̱xi̱ńdaá kamábe nga kijínijíngí na̱xi̱ Oo̱r.

²⁸ Kó ngije kꞌien Aaroo̱n, Moisee̱ jaꞌáxiín ńjño chináꞌmii̱, kósꞌe̱ ndií Aaroo̱n kui xi ꞌmí Eleasaa̱ katsꞌénkajá. Jaskan ngije kamá kui nii̱, Moisee̱ ko̱jo Eleasaa̱ jatjajenni na̱xi̱i̱.

²⁹ Ngije tsintꞌié xota̱ na̱xi̱ńdaá nga je kꞌien Aaroo̱n, kantié ni̱xtjin askjandátjé.