Xki̱ 2 - Xo̱jo̱n eén Néná

Bi̱ tsꞌén kisꞌińdo ndiꞌaa̱ xota̱ Israee̱l

¹ Néná bi̱ katsoó Moisee̱ ko̱jo Aaroo̱n:

² «Xota̱ Israee̱l chjiéngá kjin kjin kꞌuíndonii̱ xkjín ndiꞌaa̱, ki̱a̱ nga ngo foaꞌatjiyajoo̱n ndiꞌandikoón, kó nga ngo nga ngo ngatꞌieé ngo bandera̱ ko̱jo ngo a̱si̱én xí ko̱kó xtín xotaa̱ ndiꞌaa̱.

Xtín xota̱ xi kisꞌińdo xtji̱e̱e̱n nínga fotjo tsꞌueé

^3-9 »Xtji̱e̱e̱n nínga fotjo tsꞌueé ndiꞌandikoón, ki̱a̱ ngatꞌíndo xota̱ tji̱e̱e̱ Jundáa̱. Kó nda̱ ngito̱ko̱o̱ jájuún, Naasoo̱n boá, kui xi ndií Aminandaa̱b. Nga kamáxki̱ jájuún, ichítié ko̱jo kan nijón mi̱ jun úchán kamá. »Nga kixi̱i̱ nínga síndo xota̱ tji̱e̱e̱ Jundáa̱, ki̱a̱ ngatꞌíndo xota̱ tji̱e̱e̱ Isakaa̱r. Kó nda̱ ngito̱ko̱o̱ jájuún, Natanaee̱l boá, kui xi ndií Suaa̱r. Nga kamáxki̱ jájuún, ichítié ko̱jo nijón mi̱ nijón úchán kamá. »Nga skoón nínga síndo xota̱ tji̱e̱e̱ Jundáa̱, ki̱a̱ ngatꞌíndo xota̱ tji̱e̱e̱ Sabuloo̱n. Kó nda̱ ngito̱ko̱o̱ jájuún, Eliaa̱b boá, kui xi ndií Eloo̱n. Nga kamáxki̱ jájuún, ichítié ko̱jo yito mi̱ nijón úchán kamá. »Ngayeje kui jájuún bandera̱ xi chji̱a̱ni Jundáa̱ boá xi ko̱e̱je̱tji̱ngi. Kó ngayeje jájuún, úchán ichítié ko̱jo kantjiꞌún ngo mi̱ nijón úchán kamá. Kó ngayejee̱ nga xtji̱e̱e̱n kje̱n jájuún xota̱ Israee̱l ko̱e̱je̱.

Xtín xota̱ xi kisꞌińdo xtji̱e̱e̱n na̱ngi

^10-17 »Xtji̱e̱e̱n na̱ngi kꞌuíndo xota̱ tji̱e̱e̱ Rubee̱n. Ngito̱ko̱o̱ jájuún, Elisuu̱r boá, kui xi ndií Sendeuu̱r. Nga kamáxki̱ jájuún, yichán jun mi̱ masien kamá. »Nga kixi̱i̱ xota̱ tji̱e̱e̱ Rubee̱n, ki̱a̱ ngatꞌíndo xota̱ tji̱e̱e̱ Simeoo̱n. Ngito̱ko̱o̱ jájuún, Selumiee̱l boá, kui xi ndií Surisandaii̱. Nga kamáxki̱ jájuún, ichítié ko̱jo nijan mi̱ ján úchán kamá. »Nga skoón nínga síndo xota̱ tji̱e̱e̱ Rubee̱n, ki̱a̱ ngatꞌíndo xota̱ tji̱e̱e̱ Ngaa̱nd. Ngito̱ko̱o̱ jájuún, Eliasaa̱f boá, kui xi ndií Reuee̱l. Nga kamáxki̱ jájuún, yichán ún mi̱ jun úchán ichítié kamá. »Ngayeje kui jájuún, bandera̱ xi chji̱a̱ni Rubee̱n xí ko̱e̱je̱tji̱ngi. Kó ngayeje jájuún, úchán ichítié ko̱jo ngo mi̱ nijón úchán ichítié kamá. Kó ngayejee̱ nga ki̱a̱ ko̱a̱ja̱ngii̱ jájún xi tjoón. »Nga̱xto̱n kui jaá ki̱a̱ ko̱e̱je̱tji̱ngi xota̱ tji̱e̱e̱ Lebii̱ kui xi ko̱a̱ꞌa̱nijín ndiꞌandikoón.

Xtín xota̱ xi kisꞌińdo xtji̱e̱e̱n nínga ꞌbosꞌien tsꞌueé

^18-24 »Xtji̱e̱e̱n nínga ꞌbosꞌien tsꞌueé kꞌuíndo xota̱ tji̱e̱e̱ Efraii̱n. Ngito̱ko̱o̱ jájuún, Elisamaa̱ boá, kui xi ndií Amiuu̱nd. Nga kamáxki̱ jájuún, yichán mi̱ masien kamá. »Nga kixi̱i̱ xota̱ tji̱e̱e̱ Efraii̱n, ki̱a̱ ngatꞌíndo xota̱ tji̱e̱e̱ Manasee̱. Ngito̱ko̱o̱ jájuún, Ngamaliee̱l boá, kui xi ndií Pendasuu̱r. Nga kamáxki̱ jájuún, kantié jó mi̱ jó úchán kamá. »Nga skoón xota̱ tji̱e̱e̱ Efraii̱n, ki̱a̱ ngatꞌíndo xota̱ tji̱e̱e̱ Benjaa̱. Ngito̱ko̱o̱ jájuún, Abindaa̱n boá, kui xi ndií Ngindonii̱. Nga kamáxki̱ jájuún, kantjiꞌún mi̱ nijón úchán kamá. »Ngayeje kui jájuún, bandera̱ xi chji̱a̱ni Efraii̱n xí ko̱e̱je̱tji̱ngi. Kó ngayeje jájuún, úchán ko̱jo jin mi̱ úchán jájún kamá. Kó ngayejee̱ nga xi ma jaán tíkjá ko̱e̱je̱tji̱ngi.

Xtín xota̱ xi kisꞌińdo xtji̱e̱e̱n ta̱ꞌin

^25-31 »Xtji̱e̱e̱n ta̱ꞌin kꞌuíndo xota̱ tji̱e̱e̱ Ndaa̱n. Ngito̱ko̱o̱ jájuún, Ayiesee̱r boá, kui xi ndií Amisandaii̱. Nga kamáxki̱ jájuún, ichítié ko̱jo tiejó mi̱ yito úchán kamá. »Nga kixi̱i̱ xota̱ tji̱e̱e̱ Ndaa̱n, ki̱a̱ ngatꞌíndo xota̱ tji̱e̱e̱ Asee̱r. Ngito̱ko̱o̱ jájuún, Pangiee̱l boá, kui xi ndií Okraa̱n. Nga kamáxki̱ jájuún, yichán ngo mi̱ masien kamá. »Nga skoón xota̱ tji̱e̱e̱ Ndaa̱n, ki̱a̱ ngatꞌíndo xota̱ tji̱e̱e̱ Neftalii̱. Ngito̱ko̱o̱ jájuún, Ayiraa̱ boá, kui xi ndií Enaa̱n. Nga kamáxki̱ jájuún, ichítié ko̱jo ján mi̱ nijón úchán kamá. »Ngayeje kui jájuún, bandera̱ xi chji̱a̱ni Ndaa̱n xí ko̱e̱je̱tji̱ngi. Kó ngayeje jájuún, úchán ichítié ko̱jo yito mi̱ jun úchán jájún kamá. Kó ngayejee̱ nga, nga fetꞌanii̱ nga ko̱e̱je̱».

Jájún Israee̱l

³² Kjiꞌanga kamáxki̱ xtín xota̱ ndiꞌa xi chji̱a̱ni xota̱ Israee̱l, jun úchán ko̱jo ján mi̱ ún úchán ko̱jo ichítié jájún kamá ngayejee̱.

³³ Néná ja̱bo̱a̱ jè bo̱a̱ katsoó Moisee̱ nga jmí tsi ko̱jo xota̱ tji̱e̱e̱ Lebii̱ xi nijan ko̱a̱ꞌa̱ xki̱jo.

³⁴ Xota̱ Israee̱l tsintꞌiéꞌeén ngayeje ni xi Néná jè atíxomaa̱ Moisee̱ nga sa̱ꞌín. Nga ngo nga ngo xtín kuí xotaa̱ ki̱a̱ kisꞌińdo nga tsaꞌa banderaa̱, ko̱jo ki̱a̱ nijan kijíjo̱ xota̱ ndiꞌaa̱, ko̱jo xota̱ tji̱e̱ xi chji̱a̱ni.