Xki̱ 19 - Xo̱jo̱n eén Néná

Kjo̱a̱botíxomaa̱ nga niꞌántsjie yojoná

¹ Néná bi̱ katsoó Moisee̱ ko̱jo Aaroo̱n:

² «Bo̱a̱ tꞌínjnúu̱ xota̱ Israee̱l nga kuí bí kui nii̱ xi tsꞌénbotixoma an nga sa̱ꞌín: ngatjandibájo̱na ngo cho̱yojo xi iní tsja̱a̱, xi nda, ko̱jo xi kji̱e̱ tsꞌénxájinjín tꞌanangii̱.

³ Jún te̱ꞌéjnúu̱ chináꞌmi Eleasaa̱ kui cho̱yojoo̱ tsi̱ꞌe̱ nga kjo̱jo kui cho̱o̱ ndi̱tsee̱n nínga síndo ndiꞌaa̱, kó jún ki̱a̱ ti̱ꞌankꞌiènjnú ngindyi̱ko̱n kui.

⁴ Kósꞌe̱ Eleasaa̱ ngo xtiín tsjá sa̱ꞌínkꞌandyi̱ni jiín kui cho̱o̱, kósꞌe̱ yito ndi̱yà skjitjónjón ki̱a̱ ndiꞌandikón nínga fochó Néná.

⁵ »Sꞌe̱ jaskan kꞌuití ngayeje kui cho̱o̱ ngindyi̱ko̱n Eleasaa̱: kꞌuití tji̱xi̱ín, yojoo̱, jiín ko̱jo yeꞌee̱.

⁶ Chináꞌmii̱ skjíbé tjiaa̱ yákón, ko̱jo xka̱ isopo̱, ko̱jo ńjño iní, kó ki̱a̱ nínga tikón kui ndiꞌií nínga tjítí cho̱yojoo̱ ki̱a̱ ko̱títsojojin ngayeje kui nii̱.

^7-8 »Kó nga kui chináꞌmii̱ je ngiti̱ tsjiejín kamá, chjiéngá ko̱nié ńjñoo̱ ko̱jo ngatangóyá, kó ka̱májín kꞌo̱sꞌien nínga síndo ndiꞌaa̱ xotaa̱ ngaskande nga ka̱mangixoón. Ngije kjima ꞌña̱a̱ jè ka̱ma ko̱e̱je̱ nginí, kó chjiéngá ti̱ bo̱a̱ ti̱ sa̱ꞌín kui nda̱ xi ítí cho̱yojoo̱ nga.

⁹ Jaskan ngije kamá kui nii̱, ngo xota̱ xi tsjie, ngatjaꞌáꞌyá ndisoo̱ cho̱yojoo̱, kó ki̱a̱ ngatꞌíndo ngo ngi̱ndie xi tsjie, ndi̱tsen nínga síndo ndiꞌaa̱ xotaa̱. Kó xota̱ na̱xi̱ńdaá sa̱ꞌínkjién kuí ndisoo̱ kjiꞌanga ku̱i̱ꞌíjñanda ndáfoa xi ko̱niéjón ko̱jo xi kjo̱a̱ꞌáxínni jeé.

¹⁰ Kui nda̱ xi jaꞌáꞌyá ndisoo̱ cho̱yojoo̱ chjiéngá ko̱nié ńjñoo̱ nga, kó ka̱májín kꞌo̱sꞌien nínga síndo ndiꞌaa̱ xotaa̱ ngaskande nga ka̱mangixoón. »Kuí bí kui kjo̱a̱kitii̱ xi ngatsjéni̱xtjin nga sa̱ꞌínkjatjosón xota̱ Israee̱l, ko̱jo xota̱ xi xín nangi xi ki̱a̱ síndojinjnú.

Kjo̱a̱botíxoma tsi̱ꞌe̱ nga ka̱ma ko̱e̱je̱ ngindyi̱ko̱n Néná

^11-22 »Kjiꞌanga ngo xi ko̱yà ngi̱ya ndiꞌa nínga tikón, chjiéngá kui nii̱ xi si̱ꞌan: Yito ni̱xtjin ka̱májín ko̱e̱je̱ ngindyi̱ko̱n Néná kui xota̱ xi sa̱ꞌín kui nii̱: »Kui xota̱ xi katsꞌénjo̱ ini̱ma̱a̱. »Kui xota̱ xi kisꞌińdo ngi̱ya ndiꞌaa̱ xi kꞌiee̱n, kjiꞌa kjiꞌme kui xotaa̱. »Xota̱ xi tsꞌasꞌien kui ndiꞌaa̱. »Ko̱jo ngayeje ni ti̱jì xi kjiꞌmajín ko̱jo xi ndajín kjiꞌma, chjiéngá ni xi je ngiti̱ tsjiejín ka̱ma. »Ti̱nde ka̱májín ko̱e̱je̱ ngindyi̱ko̱n Néná xota̱ xi kui nii̱ katsꞌén: »Xota̱ xi ngo nga̱tsjo̱ó katsꞌénjo̱. »Xota̱ xi katsꞌénjo̱ ńdaa̱ ngo ini̱ma̱. »Xota̱ xi katsꞌénjo̱ ngo ini̱ma̱ ki̱a̱ ngi̱jin kꞌijñaá, tsi ki̱a̱ kiniꞌánkꞌién ko̱jo tsi ki̱a̱ kꞌien soboá. »Tsi̱ꞌe̱ nga ka̱ma ko̱e̱je̱ nginí ngindyikón an ngayeje kui xotaa̱, chjiéngá ndáfoaa̱ ndisoo̱ cho̱yojo xi je ikꞌítií ko̱niéjónni yojoo̱ xi ma jaán ko̱jo xi ma yito ni̱xtjin. Tsi ko̱niéjónjín yojoo̱ kui ni̱xtjin xi̱ꞌba̱, ka̱májín ko̱e̱je̱kasién ngindyikón an. »Chjiéngá ngo xota̱ xi kji̱e̱ tsꞌénjo̱jín ngo ini̱ma̱, skjíbé chií ndisoo̱ kui cho̱yojo xi iní tsja̱a̱, kó chií ndáfoaa̱ ngo ndáńchꞌi̱ xi sijén sa̱ꞌínkꞌájinni. Sꞌe̱ jaskan skjíbé tjiaa̱ xka̱ isopo̱, kó sa̱ꞌínkꞌandyi̱ni kui ndáfoa xi ndyi̱a̱a̱ ndisoo̱, kó skjitjónjón kui ndiꞌaa̱, ko̱jo ni ti̱ji̱í, ko̱jo kui xota̱ xi katsꞌénjo̱ ini̱ma̱a̱, ko̱jo tsi ńdaa̱ ini̱ma̱a̱, ko̱jo tsi nga̱tsjo̱ó. »Ngije jaꞌa xi yito ni̱xtjii̱n, ngayeje kui xotaa̱ chjiéngá ko̱nié ńjñoo̱ ko̱jo ngatangóyá, kó kui ni̱xtji̱e̱e̱n je ka̱ma ko̱e̱je̱ nginí ngindyikón an. »Tsi tjín xí sa̱ꞌínjo̱ ngo ini̱ma̱ kó tsi chjatjájónjín kui ndáfoaa̱ ndisoo̱ kui cho̱yojo xi iní tsja̱a̱, ka̱májín ko̱e̱je̱ ngindyikón an. Ti̱nde ka̱májín kꞌuijñájii̱n xota̱ Israee̱l, ngatꞌa̱ kuí boá kui xotaa̱ xi tsjiejín sa̱ꞌín ndiꞌandikónna. »Tsi tjín xí ko̱e̱je̱ tiña nínga tikón ndiꞌandikónna, kó tsi aniéjónjín yojoo̱, kuí boá xi tsjiejín sa̱ꞌín kui ndiꞌandikoón, kó ngiti̱ ka̱májín ki̱a̱ ku̱i̱chji̱a̱ni ngase xota̱ Israee̱l. »Tsi tjín xí sa̱ꞌínjo̱ ngo xota̱ xi je katsꞌénjo̱ ngo ini̱ma̱, ka̱májín kjo̱chó ngindyikón an ngaskande nga ka̱majñoó. »Ngayeje ni xi sa̱ꞌínjo̱ ngo xota̱ xi katsꞌénjo̱ ngo ini̱ma̱a̱, chjiéngá tsjiejín ka̱ma ngaskande nga ka̱majñoó. »Kui xota̱ xi skjitjónjón ndáfoaa̱ ndisoo̱, ko̱jo tsi xi sa̱ꞌínjo̱ kui ndáfoaa̱, ti̱ chjiéngá ko̱nié ńjñoo̱, kó ka̱májín ko̱e̱je̱ ngindyikón an ngaskande nga ka̱majñoó. »Kui kjo̱a̱kitii̱ ngatsjéni̱xtjin nga kꞌuijñá».