Xki̱ 18 - Xo̱jo̱n eén Néná

Xá xí tsꞌén chináꞌmii̱ ko̱jo xota̱ tji̱e̱e̱ Lebii̱

¹ Néná bi̱ katsoó Aaroo̱n: «Kjiꞌanga ngo jé sa̱ꞌín xota̱ Israee̱l kjo̱a̱a̱ na̱ngo̱xi̱i̱, ji ko̱jo xota̱ tji̱e̱e̱, ko̱jo xota̱ tji̱e̱ xi ngasee̱ Lebii̱, chjiéngá chji̱a̱ꞌajnú kjo̱a̱niꞌánjetakón kjo̱a̱a̱ kui xotaa̱. Ta̱nga kjiꞌanga ji ko̱jo xota̱ tji̱e̱e̱ ndyi̱niꞌánjnú xá chináꞌmii̱ kó tsi si̱ꞌanjéjnú, ngojín xi ka̱ma ku̱i̱ꞌa kjo̱a̱niꞌánjetakón kjo̱a̱a̱ jún, ti̱ júnní xi chjiéngá chji̱a̱ꞌatjejnú yojojnú.

^2-7 »Kjo̱a̱a̱ xá xí niꞌán ki̱a̱ ndiꞌandikoón kjo̱a̱ꞌbíndaa̱, ji ko̱jo xota̱ tji̱e̱e̱ ka̱ma chji̱a̱ꞌajnúu̱ nga ko̱síko̱jójnú já ntsꞌiejnú xi chji̱a̱ni xota̱ tji̱e̱e̱ Lebii̱. Án boá xi jaꞌajin an ngi̱jii̱n ngayeje xota̱ tji̱e̱e̱ xota̱ Israee̱l, kó ngotꞌe̱ ꞌne̱ jún tjítsꞌenkꞌasꞌiénjnúꞌun tsi̱ꞌe̱ nga ko̱si̱ko̱jójnú nga si̱ꞌánjnú xaá ndiꞌandikoón. Kui jaá ka̱maa̱ ko̱síko̱jójnú, ta̱nga ka̱májín sa̱ꞌínjo̱ ni ndikón xi chji̱a̱ni ndiꞌandikoón, ko̱jo tsi ni xi síndo ṉchandikoón. Tsi sa̱ꞌínjo̱, jún ko̱jo kui jaá kju̱i̱e̱sónjnú. »Ta̱ jún tsí xi ka̱ma si̱ꞌánjnú xá chináꞌmii̱ ki̱a̱ ṉchandikoón ko̱jo ngi̱ndie xi ꞌniú ndikoón. Ta̱ jún tsí xi ka̱ma xchónjnúu̱ ṉchandikoón ko̱jo ngayeje ni ndikón xí síndo ndiꞌandikoón. Xota̱ tji̱e̱e̱ Lebii̱ xi ngasee̱ ka̱ma ki̱a̱ kꞌuíndojo̱jnú nga ko̱síko̱jójnú ngayeje xá xí si̱ꞌánjnú, ta̱nga ngata̱ boeꞌéndièjín ji nga kje̱ꞌe xota̱ xi ko̱e̱je̱kon tiñajnú. Ti̱ꞌankjatjosónjnú ngayeje kui nii̱, kó nginijánjín sa̱ꞌinxchánjo̱ an xota̱ Israee̱l, ti̱nde ngiti̱ kotijéjáa̱n. Ta̱ꞌyaní xi sa̱ꞌín xá chináꞌmii̱, kó tsi chináꞌmijín, chjiéngá ko̱yà».

Kjo̱a̱tjó xi tsi̱ꞌe̱ chináꞌmii̱ ka̱ma

⁸ Kó Néná ti̱ bi̱ ti̱ katsoó Aaroo̱n nga: «Xá chináꞌmi xi tse̱, kuí boá nga ji xi si̱ꞌinkꞌasꞌínní kjo̱a̱tjoó xota̱ Israee̱l. Ngayeje kui kjo̱a̱tjoó jí boá xi tsjaa ko̱jo xota̱ tji̱e̱e̱, kjo̱a̱a̱ xá xí ndyi̱niꞌánjnúꞌun. Kó kui kjo̱a̱kitii̱ ngatsjéni̱xtjin nga kꞌuijñá.

⁹ »Kjo̱a̱a̱ kjo̱a̱tjó xi ꞌbítií, jún tsoboájnú kjo̱a̱tjoó xi ni xi maxchá jno̱o̱, ko̱jo kui kjo̱a̱tjó xi tsꞌenkꞌásꞌién xota̱ Israee̱l kjiꞌanga míꞌá nga niꞌánjetakoón jeé.

¹⁰ Ta̱ꞌya jáxíꞌín xi ndokjo̱a̱nijnú xi ka̱ma skji̱ni̱e̱ kui kjo̱a̱tjoó, ta̱nga chjiéngá ki̱a̱ skji̱ni̱e̱ ndiꞌandikoón, ngatꞌa̱ kjo̱a̱tjó xi ndikón boá.

¹¹ »Ji ko̱jo xota̱ tji̱e̱e̱ xi chjo̱on xí xi̱ꞌin, kuí tsꞌéntsjàa̱ ngayeje kui kjo̱a̱tjó xi ndikón xí foeꞌejo̱na xota̱ Israee̱l. Ka̱ma skji̱ni̱e̱ ngayeje xota̱ xi je katsꞌénkjatjosón ni xi je tsíꞌá an nga sa̱ꞌínkjatjosón nga kjo̱chó ngindyikón án. Kui kjo̱a̱kitii̱ ngatsjéni̱xtjin nga kꞌuijñá.

^12-14 »Ti̱ jún tsꞌéntsjájnúꞌun ngayeje to xi tjón maxchá xí sa̱ꞌínkꞌasꞌienna xota̱ Israee̱l xki̱ nó. Jún boá xi tsꞌéntsjájnúꞌun isti̱ xi nda ngasee̱, ko̱jo binoo̱, ko̱jo to ndso̱ko̱a̱n ṉño̱paa̱n. Ka̱má skji̱ni̱e̱ ngayeje xota̱ xi je katsꞌénkjatjosón ni xi je tsíꞌá an nga sa̱ꞌínkjatjosón nga kjo̱chó ngindyikón án.

¹⁵ »Ti̱ tsa̱jún ka̱ma ndí tjoón ngayeje xota̱ Israee̱l, ko̱jo ndí tjoón cho̱ xi maxchaá, ta̱nga ka̱má ngo kjo̱a̱tjó ko̱sítꞌani ndií kui xotaa̱, ko̱jo ndí tjoón cho̱ xi maxchaá tsi tsjiejín ngindyikón án, xi májín chinie ko̱jo xi májín niꞌánkꞌién nga niꞌánkꞌasꞌienna.

¹⁶ Kjiꞌanga bo̱a̱ ka̱ma, chjiéngá skoyá mára kjiꞌanga ka̱maa̱ ngo sá kuí ndí xi katsee̱n. Kósꞌe̱ kjiꞌá boá nga ún to̱ntiboa sa̱ꞌínkꞌasꞌiee̱n, kui xkjín to̱n xi niꞌánkjién ki̱a̱ ndiꞌandikoón. Kui to̱ntiboaa̱ tiengo ngramo̱ é nga ngo nga ngo.

^17-18 »Cho̱yojoo̱, ko̱jo cho̱tsa̱nga̱a̱, ko̱jo tindso̱ chjo̱on májín bosítꞌani ngo kjo̱a̱tjó xi kje̱ꞌe. Kui cho̱o̱ chjiéngá an kꞌuijñátꞌaxínna. Ji ka̱ma chjábé jí yojoo̱ ni̱se̱e̱n ko̱jo yojo ti̱ꞌmi̱í xi kixi̱i̱, ta̱nga jiín ki̱a̱ chjatjén ji nga ngo foaꞌatjiyajoo̱n ṉchandikoón, kó kꞌuití ji xinieé. Bo̱a̱ tsꞌén nga tsja mana kui kjo̱a̱tjó xi xikoó xi̱ꞌbi̱.

¹⁹ »Ngayeje kjo̱a̱tjó xi sa̱ꞌínkꞌasꞌienna xota̱ Israee̱l, tse̱ ko̱jo tsi̱ꞌe̱ xota̱ tji̱e̱e̱ xi chjo̱on xí xi̱ꞌin boá. Kui kjo̱a̱kitii̱ ngatsjéni̱xtjin nga kꞌuijñá. Án boá xi tsꞌéntsjaa ndso̱ꞌba án. Sa̱ꞌinkjatjosoón kui nii̱ ko̱jo ti̱ sa̱ꞌinkjatjosóo̱n xota̱ tji̱e̱e̱ nga».

Kjo̱a̱tjó xi tsi̱ꞌe̱ ndií Lebii̱ ko̱jo xota̱ tji̱e̱e̱

^20-24 Néná bi̱ katsoó Aaroo̱n: «Ki̱a̱ na̱xi̱ńdá Israee̱l ngayeje xota̱ tji̱e̱e̱, jè kui katseꞌeé nangi nínga síndo, ta̱nga xota̱ tji̱e̱e̱ Lebii̱ ngojín nangi tsjàa̱, ngatꞌa̱ án boá xi ka̱ma an ni xi sa̱ko̱ó kui xotaa̱. Kjiꞌanga an sa̱ꞌínkꞌasꞌienna tie nga úchán ni xi tjiín xota̱ Israee̱l, ngayeje kui nii̱ xi tsi̱ꞌe̱ xota̱ tji̱e̱e̱ Lebii̱ ka̱ma, xikoó tsi ngo chjí kjo̱a̱a̱ xá xí tsꞌén ki̱a̱ ndiꞌandikoón. Ta̱kuítsí kui xotaa̱ xi ka̱maa̱ ko̱e̱je̱ tiña nínga tikón ndiꞌandikoón. Tsi xota̱ Israee̱l ko̱e̱je̱ tiñatꞌa nínga tikón ndiꞌandikoón, ko̱yà, ngatꞌa̱ jè boá kui nii̱, kó chjiéngá niꞌánkꞌién xi bo̱a̱ tsꞌeén. »Chjiéngá kjo̱a̱kiti xi kꞌuijñá ngatsjéni̱xtjin ka̱majnú kui nii̱».

²⁵ Kó Néná ti̱ bi̱ ti̱ tsꞌén atíxomaa̱ Moisee̱ nga:

²⁶ «Bo̱a̱ tꞌíi̱n xota̱ tji̱e̱e̱ Lebii̱ nga kjiꞌanga skjíbé kui ni xi tie nga úchán xi sa̱ꞌínkꞌasꞌienna xota̱ Israee̱l, kui xotaa̱ ti̱ chjiéngá an sa̱ꞌínkꞌasꞌienna tie nga úchaán ni xi sa̱ko̱ó nga,

²⁷ xikó tsꞌén xota̱ Israee̱l nga an tsꞌenkꞌásꞌienna tie nga úchaán to ndso̱ko̱a̱n ṉño̱paa̱n ko̱jo binoo̱.

²⁸ Chináꞌmi Aaroo̱n boá xi sa̱ꞌínkꞌasꞌiee̱n kui kjo̱a̱tjoó.

²⁹ Kó ngayeje ni xi si̱ꞌankꞌasꞌiee̱n, chjiéngá ku̱i̱ꞌíjñátꞌaxín ni xi nda ngasee̱, kó Néná sa̱ꞌínkꞌasꞌiee̱n xikoó ngo kjo̱a̱tjó.

^30-32 »Ngije katsꞌénkꞌasꞌienna ni xi nda ngasee̱, ni xi kꞌo̱ngii̱ tsi̱ꞌe̱ ngatama. Ka̱ma skji̱ni̱e̱ ta̱ nínga mejénrií, kó ka̱ma skji̱ni̱e̱jo xota̱ ndiꞌaa̱. Kuí boá kui nii̱ xi chjií ka̱ma kjo̱a̱a̱ nga xá tsa̱ꞌa̱n ndyi̱tsꞌèn ki̱a̱ ndiꞌandikoón. Bo̱a̱ tꞌíi̱n nga ngatintꞌièꞌénna, kó nga chꞌójín tsꞌén kondra̱na nga ndajín tsꞌén sa̱ꞌínkjién kjo̱a̱tjó xi ꞌbijñátꞌaxínna xota̱ Israee̱l, ngatꞌa̱ tsájmi̱ ko̱yà».