Xki̱ 17 - Xo̱jo̱n eén Néná

Yánísieé Aaroo̱n

¹ Néná bi̱ tsꞌén atíxomaa̱ Moisee̱:

^2-3 «Bo̱a̱ tꞌíi̱n nga ngo nga ngo já ngito̱ko̱o̱ xota̱ tji̱e̱e̱ nga ngatjandibájoo̱ ngo yánísié xi ngatátꞌaa̱ jaꞌeén. Chjiéngá tiejó yánísié ka̱ma. Yánísieé Lebii̱ jaꞌeén Aaroo̱n ngatátꞌaa̱.

⁴ Tꞌenje̱ ji ngayeje kui yánísieé ki̱a̱ ndiꞌandikoón, kó ki̱a̱ tꞌínde ji kje̱n nínga tikón koxa̱a̱ kjo̱a̱ꞌbíndaa̱.

⁵ »Án boá xi sa̱ꞌin an nga naxó ko̱a̱ja̱a̱ ngo kui yánísieé, kó kui xi tsi̱ꞌe̱ kui yánísié xi kꞌuieé naxoó, kuí boá xi tsꞌénfoaꞌajin an nga kui xi kꞌuijñátjoón xota̱ na̱xi̱ńdána. Kó bo̱a̱ tsꞌén nga xota̱ na̱xi̱ńdaá jè ngiti̱ jmí ni xi ndajín ku̱i̱chji̱a̱ ngase kjo̱a̱a̱ jún».

⁶ Kósꞌe̱ Moisee̱ bi̱ katsoó xota̱ Israee̱l nga, nga ngo nga ngo ngito̱ko̱o̱ chjiéngá ko̱e̱je̱joo̱ ngo yánísié xi kjitꞌa jaꞌeén. Tiejó ka̱ma kui yánísieé, kó ti̱ ki̱a̱ kꞌuijñájin tsi̱ꞌe̱ Aaroo̱n nga.

⁷ Ngije jachóchinií yánísieé, Moisee̱ ki̱a̱ índo kje̱n nínga tikón koxa̱a̱ kjo̱a̱ꞌbíndaa̱.

⁸ Kó nga kamángindyiojón, kjiꞌanga Moisee̱ tsꞌasꞌien ndiꞌandikoón, kamábe nga yánísieé Aaroo̱n je íntsꞌién, kó ngaskande je tsajá maá naxó ko̱jo to almendra̱ xi je kichjí.

⁹ Kósꞌe̱ Moisee̱ tsꞌaxiéni ndiꞌandikoón ngayeje kui yánísieé, kó akoó xota̱ Israee̱l. Jaskan ngije askotꞌa já ngito̱ko̱o̱, nga ngo nga ngo kijíjo̱ yánísié xi tsi̱ꞌe̱.

¹⁰ Néná bi̱ katsoó Moisee̱: «Chjábé jí yánísieé Aaroo̱n, kó ki̱a̱ tꞌíjñí jí kje̱n koxa̱a̱ kjo̱a̱ꞌbíndaa̱. Kó ki̱a̱ chje̱ꞌétjé ji ngi̱yaa̱ koxa̱a̱, kuí nii̱ xi ko̱ko̱ó xota̱ xi kitikjo̱a̱a̱, tsi̱ꞌe̱ nga ngiti̱ sa̱ꞌínxchánjín. Tsi ku̱i̱ntꞌiéꞌénna, ko̱yàjín».

¹¹ Moisee̱ katsꞌén ngayeje ni xi Néná atíxoma nga sa̱ꞌín,

^12-13 ta̱nga xota̱ Israee̱l bi̱ katsoó Moisee̱: «Tsi kjiꞌanga ki̱a̱ mongín tiña ndiꞌandikoón Néná, kó tsi ko̱yà, ¡ja̱ ngayejera̱ ñá nga ko̱yà tsobo̱a̱!»