Xki̱ 16 - Xo̱jo̱n eén Néná

Nga katsꞌénxchán Koree̱

^1-2 Koree̱ boá xi kamá ngo nda̱ xi xota̱ tji̱e̱e̱ Lebii̱ kjindibáni, xi chji̱a̱ni xota̱ ndiꞌaa̱ Koaa̱t, Isaa̱r kiꞌmí na̱ꞌmii̱ kui nda̱a̱, kó ján amingo̱ xi chji̱a̱ni xota̱ tji̱e̱e̱ Rubee̱n kisꞌiee̱, xi kiꞌmí Ndataa̱n ko̱jo Abiraa̱n, xi ndií Eliaa̱b kamá ko̱jo nda̱ xi kiꞌmí Oo̱n xi ndií Pelee̱t kamá. Nde ngojín kui jaá xi kamámejeén nga Moisee̱ xi kamá ngito̱ko̱o̱, kó kui jaá, ngi jó úchán ichítié já ngito̱ko̱ xi chji̱a̱ni xota̱ Israee̱l xi nijan kamá, xi atíxomaa̱ xotaa̱, ko̱jo xi achichí ꞌniú kamáyàndikón ki̱a̱a̱.

³ Kó Koree̱ ko̱jo xota̱ xi nijan majo̱ kijíkoón Moisee̱ ko̱jo Aaroo̱n, kó bi̱ kijítsoó: —¡Jè tsꞌajónjne̱ nga jún xi kjimajnú ngito̱ko̱jne̱! Néná tikónjo̱ ngayeje xota̱ na̱xi̱ńdaá, kó ngayeje ñá nga jè jaꞌájinná tsi̱ꞌe̱ nga si̱ꞌán xaá. Kó míkjo̱a̱a̱ nga jún mejénjnú si̱ꞌánjnú ngayeje nii̱.

⁴ Nga tsintꞌié kuí nii̱ Moisee̱, kasasienńña ngaskande nga kisitꞌaa̱ kje̱n tꞌanangii̱,

^5-7 kósꞌe̱ bi̱ katsoó Koree̱ ko̱jo xota̱ xi nijan tsoꞌbájo̱: —¡Jún boá xi xota̱ tji̱e̱e̱ Lebii̱, xi je tsꞌajónjne̱ ji̱n! Ndyiojón ta̱jñó ndibájnú, kó chꞌi̱a̱jnú ni xi mindyia xꞌueé, kósꞌe̱ ki̱a̱ tꞌíjñájnú kui nii̱ ngindyi̱ko̱n Néná. Kósꞌe̱ Néná kjo̱a̱ꞌájin xota̱ xi mejeén nga sa̱ꞌín xaá ki̱a̱ ndiꞌandikoón, kó ta̱kuítsí kui xotaa̱ xi ka̱ma sa̱ꞌín kui xaá.

⁸ Sꞌe̱ Moisee̱ bi̱ katsoó Koree̱: —¡Ndaꞌyámájnúꞌun, jí ko̱jo xota̱ tji̱e̱e̱ Lebii̱ xi tjimájoo̱!

⁹ A chiboa chjínií nga Néná jaꞌájinjnú jún ngi̱jii̱n ngayeje xota̱ Israee̱l, tsi̱ꞌe̱ nga jún xi si̱ꞌánjnú xaá ki̱a̱ ndiꞌandikoón.

¹⁰ Néná boá xi jaꞌájinjnú jún tsi̱ꞌe̱ nga tiñaa̱ kui ku̱i̱ndyionjnú. Kó míkjo̱a̱a̱ nga chináꞌmi mejénjnú ka̱majnú ngotꞌe̱.

¹¹ Jmí tsi kondraa̱ Aaroo̱n nga ndyi̱niꞌánxchánjnú, kondraa̱ Néná boá.

¹² Kósꞌe̱ Moisee̱ katsangiyakjaꞌá Ndataa̱n ko̱jo Abiraa̱n, ta̱nga kui jaá bi̱ katsó: «Kongínjínjne̱.

^13-14 Achichí ni xi ndajínkjiꞌi xi je kiniꞌínje̱jne̱ nga kaꞌnaxiéjne̱ na̱xi̱ńdá nínga achichí nichinie kisꞌiejne̱ xikó kamá ki̱a̱ Ejiptoo̱. Jí boá xi bo̱a̱ kasejne̱ nga ki̱a̱ kꞌuínje̱jne̱ ngo nangi nínga achichí ngi̱ndie tjín nínga maxchá tostsi̱jè, nínga ngatsjéni̱xtjin kꞌuié nichinie. ¡Ta̱nga ta̱ kꞌi̱e̱ jéꞌe̱je tsíjne̱ nangi kixií nínga jmíjín ni xi nda! Kó a to̱kó bo̱a̱ tsꞌén mejeén nga ko̱nda̱ꞌyáꞌénjne̱ ji ko̱jo nga ki̱a̱ kongintjingíjne̱. A xota̱ ti̱ka̱jne̱ kjimaa̱ ji. ¡Mejénjínjne̱ xcha̱jne̱ ji ko̱jo mejénjínjne̱ ko̱ndókjo̱a̱jojne̱ ji!»

¹⁵ Achichí ꞌniú katsꞌénxchán Moisee̱, kó bi̱ katsoó Néná: «Ngata̱ chjábéjíi̱n kjo̱a̱tjoó kui xotaa̱, ji Ne tsa̱ꞌa̱n. Kji̱e̱ ngo ndi̱yà nga ngo ni xi ndajín xi je katsꞌenjo̱ an kui xotaa̱, kó kji̱e̱ ngo ni je katsjána an. Kótsꞌèn bo̱a̱ ndyi̱tsóni nga ndajín tjítsꞌenjo̱ an.»

^16-17 Sꞌe̱ jaskan Moisee̱ katsꞌénkjaꞌátsjiee̱n Koree̱ nga kamángindyiojón kji̱ndi̱bákoón Aaroo̱n, ko̱jo xi jó úchán ichítié xota̱ tji̱e̱e̱ Lebii̱, kó nga ko̱a̱ꞌa̱ ni xi mindyia xꞌueé, tsi̱ꞌe̱ nga ku̱i̱ꞌítí nisije̱n ngindyi̱ko̱n Néná.

Néná atíjeé Koree̱ ko̱jo xota̱ xi nijan kamájo̱

^18-19 Nga kamángindyiojón, Koree̱ ítikó ngayeje xota̱ xi nijan kamá kó ki̱a̱ jachó kje̱n nínga tikón ndiꞌandikoón, tsi̱ꞌe̱ nga ki̱a̱ ku̱i̱chji̱a̱jo Moisee̱ ko̱jo Aaroo̱n. Nga ngo nga ngo ndyi̱yaꞌa ni xi mindyia xꞌueé. Kósꞌe̱ Néná jachó nga akó kjo̱a̱jee̱ ngindyi̱ko̱n xota̱ na̱xi̱ńdaá,

²⁰ kó Néná bi̱ katsoó Moisee̱ ko̱jo Aaroo̱n:

²¹ —¡Tji̱taxión boaꞌájnúu̱ kui xotaa̱, ngatꞌa̱ ngotꞌe̱ má sa̱ꞌinkjié an ngayejee̱!

²² Kó Moisee̱ ko̱jo Aaroo̱n kixindyiańña ngaskande nga kisitꞌaa̱ kje̱n tꞌanangii̱, kó bi̱ katsoó Néná: —Ne tsa̱ji̱n, ji xi boeꞌéjne̱ kjo̱a̱mindyion ngayejejne̱, ¡ngata̱ niꞌínkꞌínjín ji! A si̱ꞌinkꞌin jí ngayeje kui xotaa̱ ta̱ngatꞌanii̱ ngo nda̱.

²³ Kó Néná bi̱ katsoó Moisee̱:

²⁴ —Bo̱a̱ tꞌíi̱n ngayeje xota̱ Israee̱l nga kjin ngatꞌíndonii̱ nínga síndo ndiꞌaa̱ Koree̱, ko̱jo Ndataa̱n, ko̱jo Abiraa̱n.

²⁵ Kó Moisee̱ jastjíe̱n, kó kijí nínga tikón Ndataa̱n ko̱jo Abiraa̱n. Ki̱a̱ nijan kijíjo̱ xota̱ xi xchá xí ngito̱ko̱o̱ xota̱ na̱xi̱ńdaá.

²⁶ Kó Moisee̱ bi̱ katsoó ngayeje xota̱ na̱xi̱ńdaá: «Tji̱taxíntꞌajnúu̱ ndiꞌaa̱ kui xota̱ xi ndajiín, kó ndeskande nga niꞌánjo̱jínjnú ni xi tjiín. Ngatꞌa̱ tsájmi̱ ta̱ngatꞌanii̱ jeé kui xotaa̱, nga ngaskande jún kju̱i̱e̱sónjnú».

²⁷ Kó xota̱ na̱xi̱ńdaá jatjoxíntꞌaa nínga síndo Ndataa̱n, ko̱jo Abiraa̱n, ko̱jo Koree̱, nga ki̱a̱ síndo nínga bitjasꞌi̱e̱nnii̱ ndiꞌaa̱ ko̱jo ínchjiín ko̱jo ndií.

²⁸ Kósꞌe̱ Moisee̱ bi̱ katsoó: «Ngotꞌe̱ má xcha̱jnú nga ta̱ ni xi botixómá tsí Néná xí fitji̱ngi an, kó jmí tsi ni xi mejénna an xi tsꞌen an.

²⁹ Tsi xikótsꞌèn fesón ngo xota̱, tsi bo̱a̱ tsꞌén kju̱i̱e̱són kui xotaa̱, ja̱ kuí nii̱ xi ko̱kó nga ni xi mejénna án boá xi tsꞌen an.

³⁰ Ta̱nga tsi ngo ni xi fíndikónná xi sa̱ꞌín Néná, tsi xtjóxꞌá tꞌanangii̱, kó tsi xtje̱jen tikón kui xotaa̱, kuí nii̱ xi ko̱kó nga kui xotaa̱ kondraa̱ Néná boá nga katsꞌénjé».

³¹ Ngije kamaá nga tsíchji̱a̱ Moisee̱, katjoxꞌá tꞌanangii̱,

³² kó katjéjén tikón ngayeje xota̱ xi ki̱a̱ kijítji̱ngii̱ Koree̱, ko̱jo xota̱ ndiꞌaa̱ ko̱jo ngayeje ni xi kisꞌiee̱.

³³ Bo̱a̱ tsꞌén kiniꞌánkjié ngayeje kui xotaa̱.

³⁴ Nga kamábe kui nii̱ ngayeje xota̱ na̱xi̱ńdaá tsanga má nga kijí ko̱jo nga askjandáyà má nga bi̱ katsó: «¡Xín tjián! ¡Ngatꞌa̱ tsájmi̱ ko̱jo ñá xtje̱jenná tꞌanangii̱ nga!»

³⁵ Kósꞌe̱ Néná tji̱e̱nmá ngo ndiꞌí katsangiya, kó xi jó úchán ichítié xota̱ tji̱e̱e̱ Lebii̱ kití nga jesón.

³⁶ Sꞌe̱ jaskan Néná bi̱ katsoó Moisee̱:

^37-38 «Bo̱a̱ tꞌíi̱n Eleasaa̱ nga ngatjaꞌáxiín ni xi mindyia xꞌueé xi ndyi̱yaꞌa kui xota̱ xi ndajiín, kó ngatsꞌénkꞌó ngatꞌa̱ ta̱kó tjítí ngase. Kui ni xi mindyia xꞌueé, ndiꞌí jè katsꞌentsjieni an, kó ngotꞌe̱ ꞌne̱ xota̱ tji̱e̱e̱ Aaroo̱n boá xi sa̱ꞌínkjién nga sa̱ꞌín xána. Axtañó ti̱ꞌandajnú ki̱cha̱a̱ kui ni xi mindyia xꞌueé, kó kui tjaꞌmanijnú ṉchanna. Bo̱a̱ tsꞌén nga ngayeje xota̱ Israee̱l kjo̱a̱ꞌátsjiee̱n ni xi kamaá, kó ja̱ jè kiꞌmíyaà kui nii̱».

^39-40 Eleasaa̱ bo̱a̱ má katsꞌén xikó katsoó Néná nga atíxomaa̱ Moisee̱ nga sa̱ꞌín, kó xota̱ Israee̱l kamábe nga ngojín xi ta̱xkiya ko̱e̱je̱ tꞌa ṉchandikoón tsi̱ꞌe̱ nga ku̱i̱ꞌítí nisije̱n, ngototo tsi xota̱ tji̱e̱e̱ Aaroo̱n ma. Tsájmi̱ ko̱yà tsí bo̱a̱ sa̱ꞌín xikó kamaá Koree̱, ko̱jo xota̱ xi nijan kamájo̱.

Xota̱ na̱xi̱ńdaá ti̱ kondraa̱ Néná kisꞌińdo nginí

^41-43 Nga kamángindyiojón, ngayeje xota̱ na̱xi̱ńdaá kamátikó kó ítsꞌi̱yanii̱ nga yíngítaꞌin Moisee̱ ko̱jo Aaroo̱n. Kamámejeén katsꞌénꞌoón, kó bi̱ katsó: «¡Ta̱ngatꞌanii̱ jún nga kjifesón xota̱ na̱xi̱ńdaá Néná!» Kósꞌe̱ jó kui jaá tsꞌasꞌien ki̱a̱ ndiꞌandikoón, kó kui ṉdi̱i̱ yíꞌmáni. Kó Néná ki̱a̱ jachó nga jachójo̱ kjo̱a̱jee̱,

⁴⁴ kó Néná bi̱ katsoó Moisee̱:

⁴⁵ «Tji̱taxión boaꞌájnúu̱ kui xotaa̱, ngatꞌa̱ ngotꞌe̱ má sa̱ꞌinkjié an». Kó Moisee̱ ko̱jo Aaroo̱n kixindyiańña ngaskande nga kisitꞌaa̱ kje̱n tꞌanangii̱,

⁴⁶ kó Moisee̱ bi̱ katsoó Aaroo̱n: «Achichí tjitsꞌénxchán Néná, kó tsꞌénbotíjérií xotaa̱. Kó kuíni nga chjábé jí ni xi mindyia xꞌueé, kó tindyiée̱ xꞌué xi síndo ṉchandikoón, kósꞌe̱ tindyiée̱ nisije̱n, sꞌe̱ jaskan tꞌen ji nínga síndo xota̱ Israee̱l, kó chji̱e̱ꞌèe̱ Néná tsi̱ꞌe̱ nga sa̱ꞌínjetakoón xota̱ Israee̱l».

⁴⁷ Aaroo̱n katsꞌén ni xi katsoó Moisee̱, kó kijí nínga síndo xota̱ na̱xi̱ńdaá. Nga kamábe nga Néná tsꞌénbotíjeé kui xotaa̱, ítsꞌi̱yanii̱ nga ítí nisijee̱n, kó tsíꞌaá Néná tsi̱ꞌe̱ nga sa̱ꞌínjetakoón.

⁴⁸ Kó Aaroo̱n ki̱a̱ kasasien ngamasiee̱n xota̱ xi je jesoón ko̱jo xi ta̱kó síndo ngasee̱, kó bo̱a̱ tsí tsꞌén nga íchjaá kjo̱a̱botíjeé Néná.

⁴⁹ Kui ni̱xtjii̱n tienijón mi̱ yito úchán má xota̱ xi jesoón, kje̱ꞌení xota̱ xi nijan kꞌienjo̱ Koree̱.

⁵⁰ Ngije ngiti̱ jmí xota̱ jesónjín ngase, Aaroo̱n kijí nginí ndiꞌandikoón nga kijíkoón Moisee̱.