Xki̱ 14 - Xo̱jo̱n eén Néná

Xota̱ Israee̱l tsíchji̱a̱ kondraa̱ Néná

¹ Kui ni̱xtji̱e̱e̱n ngayeje xota̱ Israee̱l ítsꞌi̱yanii̱ nga askjandáyà ko̱jo nga askjandá.

² Tsíchji̱a̱taꞌin Moisee̱ ko̱jo Aaroo̱n nga bi̱ katsoó: «¡Ta̱sara̱ ndatsi ki̱a̱ akayà nangi Ejipto̱, ko̱jo tsi kꞌi̱e̱ nangi kixií!

³ Míkjo̱a̱a̱ nga kꞌi̱e̱ jeꞌejo̱ná Néná kui ngi̱ndiee̱. A ta̱ tsi̱ꞌe̱ nga kꞌi̱e̱ tsí si̱ꞌankꞌien yejená, kósꞌe̱ kongínjo̱ ꞌniú yeje ínchjínná ko̱jo ndíná. ¡Ta̱sá ndatsi konginꞌóyá ngíñá nangi Ejipto̱!»

⁴ Kó ja̱kꞌi̱e̱ ja̱ngaján bi̱ katsoó xkjín: «¡Ngo ngito̱ko̱ chje̱ꞌéjin xi ngatjíjo̱ꞌoyá nginíná nangi Ejipto̱!»

⁵ Kósꞌe̱ Moisee̱ ko̱jo Aaroo̱n kixindyiańña ngaskande nga kisitꞌaa̱ xtjien tꞌanangii̱ kje̱n nínga síndo xota̱ Israee̱l.

⁶ Kó Josuee̱ ko̱jo Kalee̱b ti̱ iskjíndiyájón ńjño xi ndyi̱yajá nga on kamaá kui nii̱. Nga jó kui jaá xi kijíkatsijenꞌmá ngayeje kui na̱xi̱ńdaá.

⁷ Kó bi̱ katsoó ngayeje xota̱ Israee̱l: «Ta̱nisién ꞌniú nda kui nangi xi kamáyàjne̱,

⁸ kui ngi̱ndiee̱ ngatsjéni̱xtjin nga tsie nichinie tjín. Néná tjórií ñá, kuí boá xi ko̱síko̱joná nga ku̱i̱tjásꞌi̱e̱n ki̱a̱a̱, kó tsja̱aná kuí ngi̱ndiee̱.

⁹ Ta̱nga ꞌniú ndikón nga ngata̱ kondra̱jín mindyiónjnúu̱ Néná, ti̱nde ngata̱ ndakonjínmájnú kjo̱a̱a̱ kui xota̱ xi síndo kui ngi̱ndiee̱ ngotꞌe̱. Niꞌínjín si̱ꞌaa̱n nga ku̱i̱xkánjo̱, ngatꞌa̱ kui xotaa̱ jmíjín xi ndyi̱koo̱n. Kó ñá tikónná kui Néná xi tsꞌénbosikójoná, kuíni nga, ¡ngata̱ ndakonjínmájnú!»

¹⁰ Ta̱nga xota̱ Israee̱l nde katsꞌénsénjiín én xí katsó, ta̱sá kamámejeén nga ndi̱jo̱ tsꞌaya katsaki. Kósꞌe̱ Néná jachójo̱ ngayeje kjo̱a̱je xi tjiín nga jatjokjà ki̱a̱ ndiꞌandikoón, ngindyi̱ko̱n ngayeje xota̱ Israee̱l,

Néná katsꞌénjeé xota̱ Israee̱l

¹¹ kó bi̱ katsoó Moisee̱: —Ngaskande kjiꞌání nga kui xota̱ na̱xi̱ńdaá sꞌi̱jii̱n nga ndikónjín an, ko̱jo nga jmíjínna ngaꞌniú. Achichí kjo̱a̱ndikón je katsꞌen an ngindyi̱ko̱n, kó a ta̱kó kji̱e̱ sꞌijinjiín an.

¹² Ngomára chiꞌin sangiyáa tsi̱ꞌe̱ nga sa̱ꞌinkjié an. Ta̱nga xota̱ tji̱e̱ tse̱ boá xi sa̱ꞌin an nga ngo na̱xi̱ńdá xí ꞌniú ngase ko̱jo xi kjín ngase ka̱ma.

^13-16 Ta̱nga Moisee̱, bi̱ katsoó Néná: —Tsi ta̱ ngo ndi̱yà si̱ꞌinkꞌin jí kui xota̱ na̱xi̱ńdaá, sku̱i̱e̱ kui nii̱ xota̱ Ejipto̱ xi kamábe nga kaꞌnaxié ji xota̱ Israee̱l kui ngi̱ndiee̱, kósꞌe̱ kui xota̱ Ejiptoo̱ ka̱tso̱yaa̱ kui nii̱ kje̱ꞌe tji̱e̱e̱ xota̱, kó kui xotaa̱ bi̱ ka̱tso̱: “Néná kamájiín kijíjo̱ xota̱ na̱xi̱ńdaá, ki̱a̱ tꞌanangi xi katsóyàtjoón nga tsja̱á. Kuíni nga ki̱a̱ índomasien nangi kixií tsi̱ꞌe̱ nga ki̱a̱ jesón”. »Ngayeje xota̱ Ejiptoo̱ be nga jí boá xi tichìi̱n kui xota̱ na̱xi̱ńdaá. Kó be nga ṉdi̱i̱ ki̱a̱ tikónsoón nínga síndo, kó be nga kuí boá xi bokoó ndi̱yà nga ni̱xtjii̱n, kó nga jñoó ndiꞌíi̱ xi ja̱kjiꞌi yásé má kjiꞌii̱ xí bokoó ndi̱yà, kó ti̱ be kuí xotaa̱, nga xota̱ na̱xi̱ńdáa̱ maa̱ be tíkje̱n tíkje̱e̱n.

¹⁷ »Kuíni nga an tsꞌénmíꞌaá nga take ji ngaꞌniú jèe̱. Ti̱ jíní bo̱a̱ xi bo̱a̱ kase ji,

¹⁸ nga achichí kjo̱a̱tjó tjiín ko̱jo nga tsie kjo̱a̱chiyákón tjiín, kó nga kuíni nga niꞌínjetakíi̱n xota̱jeé. Jí boá xi je bo̱a̱ kase ji nga niꞌínjée̱ ndií, ko̱jo ndíndee̱, ko̱jo ndínde xi ma joó, ta̱ngatꞌanii̱ ni xi ndajín xi katsꞌén xi xchaá.

¹⁹ Ji Ne tsa̱ꞌa̱n, tsi ndeskande nangi Ejipto̱ je kiniꞌínchíkjo̱e̱e̱ kui xota̱ na̱xi̱ńdaá, kó tsi ja̱koxi̱ nga ta̱nisién je kjo̱a̱tjóo̱, ti̱ꞌinjetakíi̱n jeé kui xotaa̱.

²⁰ Néná bi̱ katsoó Moisee̱: —Ndakjiꞌi, tsi bo̱a̱ tsꞌén mejeén ji, ja̱ sa̱ꞌinjetakóo̱n.

^21-23 Án boá xi Ne an, kó yandikónna ngayeje tꞌanangii̱. Ta̱ ngo tsí ni xi ꞌniú ꞌbíjñaá: Nde ngojín xota̱ xi kamábe kui kjo̱a̱ndikón xí katsꞌen an ki̱a̱ nangi Ejipto̱, ko̱jo ki̱a̱ nangi kixií xi sku̱i̱e̱ tꞌanangi xi kixiyatjóo̱n nga tsjàa̱. Án boá xi chꞌo tsꞌén tsíchji̱a̱taꞌinna, kó achichí kjín ndi̱yà askotꞌayákónna, kó ntꞌiéꞌénjínna nga.

^24-25 »Ta̱nga Kalee̱b, nda̱ xi tsꞌénxátꞌana, ki̱a̱jín nijan kamá xota̱ xi ngasee̱, ta̱sá kisꞌijii̱n ni xi kixiyatjón an nga sa̱ꞌinkjatjosón an, kuíni nga kꞌo̱sꞌien kuí, ko̱jo ndií kui ngi̱ndie xi kixiyatjón an nga tsjàa̱, nínga síndo xota̱ tji̱e̱e̱ Amalee̱k, ko̱jo xota̱ tji̱e̱e̱ Kaa̱n. Kó jún, ndyiojón kongínjnú nangi kixií xtji̱e̱e̱n nínga tikón Ndáchíkón Inií.

²⁶ Néná ti̱ bi̱ ti̱ katsó nginií Moisee̱ ko̱jo Aaroo̱n:

²⁷ —Jè tsintꞌié an nga xota̱ Israee̱l chꞌo tsꞌén ndyi̱chji̱a̱taꞌinna. Ngaskande kjiꞌání nga sa̱ꞌinchíkjo̱a̱a̱ ni xi ndyi̱tsó kui xota̱ xi ndajiín.

²⁸ Kó nga je bo̱a̱ ndyi̱tsó nga an xò bo̱a̱ xi atijée̱, ja̱ kotijée̱. Án boá xi Nee̱ xota̱ Israee̱l, kó ja̱koxi̱ boá nga bo̱a̱ sa̱ꞌin an.

²⁹ Ngayeje xota̱ xi je tsꞌatio kan noó xi chꞌo tsꞌén tsíchji̱a̱taꞌinna, ki̱a̱ nangi kixií kju̱i̱e̱són.

³⁰ Ta̱ Josuee̱ ko̱jo Kalee̱b tsí xi kꞌo̱sꞌien ki̱a̱ nangi xi kixiyatjónjnúꞌun nga tsjajnúꞌun, ta̱ꞌyajínni ngase.

^31-32 »Jún ki̱a̱ ku̱i̱xo̱jnú nga ko̱yàjnú ki̱a̱ nangi kixií, kó ki̱a̱ tsjayójo jesónjnú. Ta̱nga ndíjnú, kui xi kiniꞌánkjójnú nga moso̱ xi stiñá ka̱ma, kuí boá xi kꞌo̱sꞌien kui nangi xi kiniꞌánchꞌójnú jún.

³³ Kó nga kiniꞌán ꞌniátakónjínjnúꞌun, ndíjnú ki̱a̱ kꞌuitsómá nangi kixií yichán nó nga skoón cho̱tsa̱nga̱, chjiéngá skoyá ngaskande nga kju̱i̱e̱són yejejnú ki̱a̱ nangi kixií.

^34-35 »Tsi̱ꞌe̱ nga xcha̱jnú nga achichí chꞌokjiꞌi nga ndaꞌyáꞌénjínna, achichí ꞌniú kotijéjnúꞌun. Ja̱koxi̱ boá nga bo̱a̱ sa̱ꞌin an. Jún tsangíntsitsijenjnúu̱ kui tꞌanangii̱ yichán ni̱xtjin, kuíni nga xki̱ ngo ni̱xtjin ngo nó kotijéjnúꞌun. Yichán nó ta̱xkiya ku̱i̱ṉtja̱jnú ki̱a̱ nangi kixií, ngaskande nga kju̱i̱e̱ndajnú, kó ko̱yàjnú.

^36-37 Kó bo̱a̱ tsꞌén katsꞌénkꞌién Néná nga atíjeé kui xota̱ xi katsangiya Moisee̱ nga kijíkatsijen kui tꞌanangi xi katsóyàtjón Néná nga tsja̱á, ngatꞌa̱ kuí boá kui jaá xi konnii̱ nga xota̱ Israee̱l kondraa̱ Néná kisꞌińdoni.

³⁸ Nga tiejó kui já xi kijíkatsijen kui tꞌanangii̱, ta̱ Josuee̱ ko̱jo Kalee̱b tsí xi kisꞌińdo ngase.

³⁹ Nga katsóyaà Moisee̱ kui nii̱ ngayeje xota̱ Israee̱l, achichí ndasen kisꞌińdo.

Nga kiniꞌánchaja nga ikixkánjo̱ xota̱ Israee̱l

⁴⁰ Nga kamángindyiojón xota̱ Israee̱l achichí ta̱jñó jastjíe̱n, kó kijí nínga ꞌniú nkꞌaá na̱xi̱i̱, kó ki̱a̱ bi̱ katsoó Moisee̱: —Ndatsi jè yàjne̱ nga kiniꞌánjéjne̱, ta̱nga ti̱ kuí xí ku̱i̱tjásꞌi̱e̱nnijne̱ tꞌanangi xi katsóyàtjónjne̱ Néná nga tsja̱ajne̱.

⁴¹ Ta̱nga Moisee̱ bi̱ katsoó: —Ánní nga ndaꞌyáꞌénjínjnúu̱ Néná.

⁴² Ngata̱ mongínjínjnú kui ngi̱ndiee̱, ngatꞌa̱ Néná ko̱e̱je̱jojínjnú, kó kui xota̱ xi kondra̱jnú sa̱ꞌínjnú nga skjánjo̱jnú.

⁴³ Jún jè kiniꞌánkjinjnúu̱ yojojnú Néná, kó kuíni nga kui, je íjñámasienjnú. Tsi ki̱a̱ kongínjnú kui ngi̱ndiee̱, xota̱ xi síndo ki̱a̱a̱, ki̱a̱ stíkjájnú, kó sa̱ꞌínkꞌiénjnú.

⁴⁴ Kó ndatsi je bo̱a̱ kiꞌmií xota̱ Israee̱l, ti̱ kuí xí kijínijíngíni kui na̱xi̱i̱, ta̱nga Moisee̱ ko̱jo koxa̱a̱ kjo̱a̱ꞌbíndaa̱ ki̱a̱ kisꞌińdo nínga síndo ndiꞌaa̱.

⁴⁵ Kósꞌe̱ xota̱ xi chji̱a̱ni kui na̱xi̱ńdaá jatjajenni kui na̱xi̱i̱, kó askjanjo̱ xota̱ Israee̱l. Kó ngaskande nangi Jormaa̱ ikiyotji̱ngii̱ xota̱ Israee̱l, kó ki̱a̱ kiniꞌánchaja kjin ngijee̱.