Xki̱ 13 - Xo̱jo̱n eén Néná

Moisee̱ katsangiya xota̱ xi kijíkatsijenꞌmá ki̱a̱ nangi Kanaa̱n

¹ Néná bi̱ katsoó Moisee̱:

² «Nangíyé ji jáxíꞌín ki̱a̱ nangi Kanaa̱n tsi̱ꞌe̱ nga skotsíjee̱n nangi xi an tsjàa̱. Ngatjí ngo ngito̱ko̱o̱ nga ngo nga ngo xtín xota̱ tji̱e̱e̱».

³ Kó kuíni nga Moisee̱ ndeskande nangi kixií nangi Paraa̱n katsangiyani tiejó ngito̱ko̱o̱ xota̱ Israee̱l, xikó má katsoó Néná nga sa̱ꞌín.

⁴ Já ngito̱ko̱ xi kanangiyaa̱ kuí bí xi̱ꞌbi̱: Samúaa̱, xi chji̱a̱ni xota̱ tji̱e̱e̱ Rubee̱n,

⁵ Safaa̱t, xi chji̱a̱ni xota̱ tji̱e̱e̱ Simeoo̱n,

⁶ Kalee̱b, xi chji̱a̱ni xota̱ tji̱e̱e̱ Jundáa̱,

⁷ Ingaa̱l, xi chji̱a̱ni xota̱ tji̱e̱e̱ Isakaa̱r,

⁸ Oseaa̱, xi chji̱a̱ni xota̱ tji̱e̱e̱ Efraii̱n,

⁹ Paltii̱, xi chji̱a̱ni xota̱ tji̱e̱e̱ Benjaa̱,

¹⁰ Ngandiee̱l, xi chji̱a̱ni xota̱ tji̱e̱e̱ Sabuloo̱n,

¹¹ Ngandii̱, xi chji̱a̱ni xota̱ tji̱e̱e̱ Manasee̱,

¹² Amiee̱l, xi chji̱a̱ni xota̱ tji̱e̱e̱ Ndaa̱n,

¹³ Setuu̱r, xi chji̱a̱ni xota̱ tji̱e̱e̱ Asee̱r,

¹⁴ Najbii̱, xi chji̱a̱ni xota̱ tji̱e̱e̱ Neftalii̱, ko̱jo

¹⁵ Ngeue̱l, xi chji̱a̱ni xota̱ tji̱e̱e̱ Ngaa̱nd.

^16-17 Kó Oseaa̱, kui xi ndií Nuu̱n, Moisee̱ asíkjoo̱ jaꞌeén kó “Josue̱” ítꞌajaꞌén. Sꞌe̱ jaskan Moisee̱ katsangiya kui já ngito̱ko̱o̱ xota̱ Israee̱l nga kijíkatsijen nangi Kanaa̱n, kó bi̱ katsoó: «Tangínjnú xtji̱e̱e̱n nangi kixií, ngaskande nga kjóchójnú na̱xi̱i̱.

¹⁸ Tsitsíjenjnúu̱ kui na̱xi̱ńdaá ko̱jo xota̱ xi síndo ki̱a̱a̱, tsi xota̱ xi ꞌniú ko̱jo tsi xota̱ xi inda, tsi kjín má ko̱jo tsi chiboa ma.

^19-20 Tsitsíjenjnúu̱ nga, kótsꞌèn katsꞌénda na̱xi̱ńdaá, tsi ꞌniú ko̱jo tsi ꞌniújín síndo ndiꞌaa̱ xikoó ndiꞌaa̱ xota̱ná. Tsitsíjenjnúu̱ tsi tjín yá kuí ngindiee̱, tsi nda kui yaá ko̱jo tsi ndajín, kó tsi kjín to tsjá, ko̱jo tsi jmí to tsjájín. Ngata̱ ndakonjínmájnú, kó ndibájo̱jnúꞌun kꞌi̱e̱e̱ chií ni xi tsjá kuí tꞌanangi jàn». Jè má ítsꞌi̱yanii̱ nga kjimaxchá tostsi̱jè xi tjoón

Já xí kijíkatsijenꞌmaá kijí kui ngi̱ndie xi katsóyàtjón Néná nga tsja̱á

²¹ kjiꞌanga já ngito̱ko̱o̱ xota̱ Israee̱l kijíkatsijenꞌmá kui ngi̱ndiee̱. Ki̱a̱ ítsꞌi̱yanii̱ xtji̱e̱e̱n na̱ngi, ki̱a̱ nínga tikón nangi kixií nangi Sii̱n, sꞌe̱ jaskan kijí ngaskande Rejoo̱b, kui nangi xi tikón tiñaa̱ nangi Amaa̱t.

²² Tsꞌasꞌien xtji̱e̱e̱n nangi kixií ngaskande nga jachó Ebroo̱n. Kui na̱xi̱ńdáꞌniuú kjiꞌá kamánda, yito nó ngindiee̱ nga ka̱manda nangi Soaa̱n xi tikón nangi Ejipto̱. Kui já xí kijíkatsijee̱n kamábe nga ki̱a̱ nangi Ebroo̱n síndo xota̱ Aimaa̱n, xota̱ Sesaii̱ ko̱jo xota̱ Talmaii̱, kui xi xota̱ tji̱e̱ kamánii̱ Anaa̱k, kui nda̱ xi ꞌniú nkꞌa ko̱jo xi ꞌniú je kamaá.

^23-24 Nga jachó kui jaá ngo xo̱ngàndántꞌié, tsatie ngo én tostsi̱jè xi achichí ichiboá je, xi ngaskande nde askajiín nga ngo kui jaá, ja̱chon nga jó kamá xi tsankꞌá. Já xí ngasee̱ tsaꞌa to ngrananda̱, ko̱jo toꞌingo̱. Achichí je kamá kui én tostsi̱jè xi tsatie kui já Israee̱l nga ngaskande kui xo̱ngàndántꞌieé “Eskoo̱l” ítꞌajaꞌén, «én» tsó kui jaꞌeén.

Já xi kijíkatsijenꞌmaá katsóyà ni xi kamábe

²⁵ Jaskan ngije yichán ni̱xtjin kisꞌiṉtso̱ma kui jaá kui nangii̱, kijíꞌoyá nginí

²⁶ ki̱a̱ Kandee̱, ki̱a̱ nangi kixií nangi Paraa̱n. Kó ki̱a̱ katsóyaà Moisee̱, ko̱jo Aaroo̱n ko̱jo ngayeje xota̱ Israee̱l ngayeje ni xi kamábe. Kó akoó to xi ndyi̱yaꞌa xi kasakoo̱ kui ngi̱ndiee̱.

²⁷ Kó kui jaá bi̱ katsoó Moisee̱: —Tsangínjne̱ ngi̱ndie nínga kanangiyejne̱. Achichí nda kui tꞌanangii̱, ¡ngatsjéni̱xtjin nga tsie nichinie tjín ki̱a̱a̱! Jéꞌe̱n, tsitsíjìi̱n, kuí bí kui too̱ xi maxchá jàn jàn.

²⁸ »Ta̱ kui toto ni xi ndajín, nga xota̱ xi tjín ki̱a̱a̱ achichí ꞌniú, kó jè katsꞌénda na̱xi̱ńdáꞌniú xi achichí nda tjíchjáꞌyá. ¡Ngaskande kamáyàjne̱ xota̱ tji̱e̱e̱ nda̱ xi ꞌniú nkꞌa ko̱jo xi ꞌniú je kamá kui xi kiꞌmí Anaa̱k!

²⁹ Ki̱a̱ nínga tikón nangi kixií síndo xota̱ Amalee̱k, ki̱a̱ ngi̱jin na̱xi̱i̱ síndo xota̱ Ee̱t, xota̱ Jebuu̱, ko̱jo xota̱ Amoo̱r, kó ki̱a̱ xtji̱e̱e̱n ndáchíkoón ko̱jo ndejèꞌ Jorndaa̱n síndo xota̱ tji̱e̱e̱ Kaa̱n.

³⁰ Kó xotaa̱, tji̱e̱nmá ítsꞌi̱yanii̱ nga tsíchji̱a̱taꞌin kui jaá, ta̱nga Kalee̱b atíxomaa̱ nga xió kꞌuíndo, kó bi̱ katsoó: —¡Chjiéngá ku̱i̱xkántjé, tsi̱ꞌe̱ nga tsa̱ñá ka̱ma nga si̱ꞌán kuí ngi̱ndiee̱! ¡Ka̱máná si̱ꞌán kuí nii̱!

^31-33 Ta̱nga kui xota̱ xi ngase kui xi nijan kijíjo̱ kui jaá, ítsꞌi̱yanii̱ nga tsíchji̱a̱jo xota̱ Israee̱l tsi̱ꞌe̱ nga katsꞌénkjiékjo̱a̱, kó bo̱a̱ katsoó nga ndajín chon kui ngi̱ndiee̱. Bi̱ katsoó: —¡Ngata̱ bo̱a̱jín niꞌánjnú! ¡Ka̱májínná si̱ꞌáa̱n kuí xota̱ xi ta̱nisién ꞌniuú! ¡Xota̱ xi síndo ki̱a̱a̱, xota̱ xi ꞌniú yiꞌi ko̱jo xi ꞌniú nkꞌa boá xikoó Anaa̱k! ¡Ngindyi̱ko̱n kui xotaa̱ achichí xi̱xi̱ kamá ji̱n, xikó maá ngo chjondi! Kó ingo ni ngase, kui ngi̱ndiee̱ májín mindyion ki̱a̱a̱. Achichí nga ndajín kui ngi̱ndiee̱ nga fesón xotaa̱ xikó maá tsi tꞌanangii̱ tjéjén.