Xki̱ 12 - Xo̱jo̱n eén Néná

Na̱ Riyaa̱ ko̱jo Aaroo̱n chꞌo tsꞌén tsíchji̱a̱taꞌin Moise̱ ntsꞌi̱e̱

¹ Na̱ Riyaa̱ ko̱jo Aaroo̱n chꞌo tsꞌén tsíchji̱a̱taꞌin Moise̱ ntsꞌi̱e̱, ngatꞌa̱ ngo na̱ xi chji̱a̱ni Etiopía̱ kisꞌijñajo̱, kó jmí tsi ngo na̱ Ebreo̱.

² Kó bi̱ katsó: «A ta̱ Moisee̱ tsí xi tsíchji̱a̱jo Néná. Ko̱jo ñá boá xi tsíchji̱a̱joná nga». Kó Néná tsintꞌieé ni xi katsó,

³ kó tsjajín kamaá ni xi tsintꞌié, ngatꞌa̱ Moisee̱ kuí boá xi ꞌniú ni̱ma̱kjo̱a̱ ngi̱jii̱n ngayeje xota̱ xi tjín nga̱sondiee̱.

⁴ Kósꞌe̱ Néná tsíchji̱a̱a̱ Moisee̱, ko̱jo Aaroo̱n ko̱jo na̱ Riyaa̱, kó bi̱ katsoó: «Tangínjnú ki̱a̱ ndiꞌandikoón». Ngije kijí nga jaán,

⁵ Néná jatjajenni kui ṉdi̱ xi ja̱kjiꞌi yásé má kjiꞌi, kó ki̱a̱ kisꞌijña nínga bitjasꞌi̱e̱nnii̱ ndiꞌandikoón, kó tsíchji̱a̱a̱ Aaroo̱n ko̱jo na̱ Riyaa̱, kó ngije jachókón tiñaa̱,

^6-8 Néná bi̱ katsoó nga jaán: «Nda má tasiénijónjnúꞌun. Ánní nga ma kon takónjnú nga chꞌo tsꞌén ndyi̱ndokjo̱a̱taꞌínjnú Moisee̱. Jè yàjnú jún nga kjiꞌanga tjín ni xi xiyàjnúꞌun, kjiꞌanga ngo chji̱ni̱e̱ꞌén tsꞌénkjién án, kuí boá kui chji̱ni̱e̱ꞌe̱én xi chjiájo an nga bokóo̱ ngo ni, ko̱jo tsi ngi̱jin ńjñaá chjiájo an. Ta̱nga Moisee̱, kuí boá xi ta̱nisién ꞌniáko̱n an ngi̱jii̱n ngayeje xota̱ xi tsꞌénxátꞌana, kó tíkje̱n tíkje̱n chjiájo an kui. Kó kuí boá xi xiya cha̱n cha̱a̱n nii̱, kó tsjandiè an nga be kje̱n án».

⁹ Kó Néná xín kijí, ngatꞌa̱ achichí ꞌniú katsꞌénxchán.

¹⁰ Kó ngije xín kijíboaꞌá kui ṉdi̱i̱ ki̱a̱ nínga tikón ndiꞌandikoón, na̱ Riyaa̱ chiꞌin xi tsꞌénkjátsón tji̱xin yojoná katsoboaá. ¡Kó tji̱xin yojoo̱ tiboa xó xó kamá! Nga kamábe Aaroo̱n nga bo̱a̱ kjiꞌi na̱ Riyaa̱,

¹¹ bi̱ katsoó Moisee̱: «Ti̱ꞌinjetakínjne̱, ngo kjo̱a̱nda, kó ngata̱ niꞌínjéjínjne̱ kjo̱a̱a̱ kui jé xí kiniꞌánjne̱. Ta̱ kjo̱a̱chi̱ni boá ni xi kiniꞌánjne̱.

¹² Tji̱xin yojoo̱ na̱ Riyaa̱ je jatson yeje, bo̱a̱ má kamaá xikó maá tji̱xin yojoo̱ ngo ndí kꞌien xi katsen xtió. ¡Ngo kjo̱a̱nda míꞌaá, chji̱e̱ꞌèe̱ Néná nga sa̱ꞌíndaya!»

¹³ Kósꞌe̱ Moisee̱ tsíꞌaá Néná nga ka̱mandaya na̱ Riyaa̱,

¹⁴ kó Néná bi̱ katsoó Moisee̱: —Tsi na̱ꞌmii̱ xi atítiajón kje̱n, achichíra̱ soboá ka̱maa̱ nga ngaskande chjiéngá yito ni̱xtjin kꞌuijñá ndi̱tsee̱n nínga síndo ndiꞌaa̱. Ja̱ ja̱bo̱a̱ tsꞌén nga niꞌánjeé.

¹⁵ Kó kuíni nga na̱ Riyaa̱ yito ni̱xtjin kisꞌijña ndi̱tsee̱n nínga síndo ndiꞌaa̱, kó ngayeje kui ni̱xtjii̱n nga kamátíyájiín ngi̱ndie nínga síndo ndiꞌaa̱ xotaa̱.

¹⁶ Sꞌe̱ jaskan kijí nangi Aseroo̱t, kó nde chií katsꞌénkjaꞌyájín ngaskande nga jachó ngi̱ndie kixií Paraa̱n.