Xki̱ 11 - Xo̱jo̱n eén Néná

Xota̱ Israee̱l Néná katsóyaà kjo̱a̱xti xi kisꞌiee̱

¹ Xota̱ Israee̱l ngatsjéni̱xtjin nga Néná katsóyaà kjo̱a̱a̱ kjo̱a̱xti xi kisꞌiee̱. Kjiꞌanga Néná tsintꞌié ni xi katsó, achichí katsꞌénxchán, kó Néná ngo ndiꞌí ítsié nga ngo foaꞌatjiyajoo̱n nínga síndo ndiꞌaa̱ xotaa̱.

² Kó xotaa̱ askjandáyà má nga tsíꞌaá Moisee̱ nga ko̱síko̱jo. Kó Moisee̱ ꞌniú tsíꞌatjé kui xotaa̱ nga tsíchji̱a̱a̱ Néná, kósꞌe̱ katsꞌo kui ndiꞌií.

³ Kuíni nga kui ngi̱ndiee̱ “Tabera̱” katsoó, «nga kitíngá» tsó kui eén. Bo̱a̱ tsꞌén ítꞌajaꞌén tsi̱ꞌe̱ nga kjo̱a̱ꞌátsjiee̱n nga ki̱a̱ boá nínga Néná katsꞌénxchánjo̱ kui xotaa̱.

^4-9 Kó xki̱ jñó xki̱ jñó manaa̱ ko̱jo xoñoo̱ nijan ixó nga joó ki̱a̱ ngi̱jin kꞌijñaá. Manaa̱ xi̱xi̱ kamá xikoó to ndi̱ꞌee̱, kó sinié kamá xikoó ndándyíko̱n yaá. Nga ta̱jño̱ó boá nga kijíkjaꞌaꞌyá xotaa̱ ki̱a̱ ngi̱jin kꞌijñaá, sꞌe̱ jaskan katsꞌo, kó katsꞌénchján, kósꞌe̱ pan katsꞌéndani kui nii̱. Manaa̱, bo̱a̱ kichinie xikoó pan xi ndso̱ko̱a̱n ṉño̱pan niꞌándajo̱ni xi mindyiaa̱ isti̱. Ta̱nga ngi̱jii̱n xota̱ Israee̱l kisꞌińdo xota̱ xi xín nangi chji̱a̱ni, kui xi ta̱soboá nichiniee̱ xí nda̱ kamaá. Kó xota̱ Israee̱l ki̱a̱ nijan kamájo̱ kui xotaa̱, kó ítsꞌi̱yanii̱ nga askjandá nga bi̱ katsó: «¡Achichíra̱ ndakjiꞌi tsi ka̱ma xi̱ni̱e̱ yojo katsaki! A foaꞌátsjienjnú tji̱o̱ xi ta̱ kichinie kjo̱a̱nda ñá ki̱a̱ nangi Ejipto̱. ¡Kó achichí nda kichinié ṉcho̱ pepinoo̱, ko̱jo ṉcho̱ meloo̱n, ko̱jo xka̱ puerroo̱, ko̱jo tsjo̱o̱, ko̱jo jaxo̱ xi kichinié jàn jàn! Ta̱nga ngotꞌe̱ ꞌne̱, jè kjimaya bojó, ¡kó ta̱kuítsí manaa̱ xi ndyi̱yà ngotꞌe̱!»

¹⁰ Kó Moisee̱ tsintꞌié nga xota̱ Israee̱l ndyi̱kjandà ki̱a̱ tꞌa nga̱ntjo̱a̱a̱ ndiꞌa nínga síndo, kó tsjajín kamaá, ngatꞌa̱ be nga Néná sa̱ꞌínxchán kjo̱a̱a̱ kui nii̱.

¹¹ Kuíni nga bi̱ tsꞌén asíyaá Néná: —Míkjo̱a̱a̱ nga ndajín tiniꞌínje̱ní xi ye ji nga mosoo̱ ma an, kó tiniꞌínní kjo̱a̱ꞌniú nga tjítsꞌenchíkjo̱a̱a̱ kui xota̱ na̱xi̱ńdaá.

¹² ¡Jmí tsi ndína má kui xotaa̱! ¡Jmí kjo̱a̱jín nga an koaꞌanijín an nga kjuínjo̱ an ki̱a̱ nangi xi ji ko̱e̱ꞌée̱!

¹³ An ndyi̱foeꞌekónna nga ndyi̱kjandà, kó yojo ndyi̱míꞌána. Ñá kjuínkjáꞌaña an bo̱a̱ kjiꞌi yojo, tsi̱ꞌe̱ nga ka̱ma skji̱ni̱e̱ ngayeje kui xotaa̱.

¹⁴ »Ka̱májínna nga an so̱bo̱a̱ kotíjña̱tjóo̱n kui xota̱ na̱xi̱ńdaá, ¡ta̱nisién é kuí xá xí an tjítsꞌen an!

¹⁵ Tsi to̱kó bo̱a̱ si̱ꞌinje̱ní, ta̱sá ti̱ꞌinkꞌinní. ¡Ngo kjo̱a̱nda xi si̱ꞌínní tsí bo̱a̱ si̱ꞌin ji! ¡Achichí jè tsie kjo̱a̱xti xi tjínna an ko̱jo kui xotaa̱!

¹⁶ Kó Néná bi̱ katsoó Moisee̱: —Tꞌítikí jí ngi̱jii̱n xota̱ na̱xi̱ńdaá ichítié ko̱jo kan xota̱ xi xchá xí ngito̱ko̱. Tꞌenje̱ ji ki̱a̱ ndiꞌandikoón, kó ki̱a̱ nga koyara.

¹⁷ Ngije síndo ki̱a̱a̱, an kjo̱tjajen an kó kuichjiájoo. Kó kꞌuijñájíi̱n kui xotaa̱ ti̱ kuii̱ a̱siénni̱xtjin xi íjñajii̱n ji, tsi̱ꞌe̱ nga ka̱maa̱ ko̱síko̱joo̱ nga ku̱i̱ndyintjée̱n xota̱ na̱xi̱ńdaá, kó bo̱a̱ tsꞌén nga jmí tsi ta̱ jí tsí xi si̱ꞌin ji ngayeje nii̱.

¹⁸ Sꞌe̱ jaskan Néná bi̱ katsoó Moisee̱: —Bo̱a̱ tꞌíi̱n xota̱ na̱xi̱ńdaá nga ndyiojón skji̱ni̱e̱ yojo, ta̱nga chjiéngá sa̱ꞌíntsjiemára yojoo̱. Bo̱a̱ tꞌíi̱n nga jè tsintꞌie an nga ndyi̱kjandà kó jè tsintꞌie an ni xi ndyi̱chji̱a̱ nga bi̱ ndyi̱tsó: “¡Yojo xí mejénjne̱ xi̱ni̱e̱ji̱n! ¡Nda ngase kixindyionjne̱ nangi Ejipto̱!” »Án boá xi tsjàa̱ yojo xi skji̱ni̱e̱.

¹⁹ Kó jmí tsi ta̱ ngo tsí ni̱xtjin, ko̱jo tsi ta̱ jó tsí, ko̱jo tsi ta̱ ún tsí, ko̱jo tsi ta̱ tie tsí, ko̱jo tsi ta̱ kan tsí ni̱xtjin.

²⁰ Ngaskande ngo sá tsjàa̱ nga skji̱ni̱e̱ yojo, ngaskande nga kꞌo̱joo̱n nga skji̱ni̱e̱, ¡ngaskande nga ka̱ma tsꞌe̱e̱, ko̱jo ngaskande nga ṉtjo̱n kjo̱tjoni kui yojoo̱! »Kuí boá kui nii̱ xi ka̱majénií kjo̱a̱a̱ nga katsꞌénchꞌóna, kó nga kamábendikónjínna ngindyikónjnú. Kuí boá kui nii̱ xi ka̱maa̱ ta̱ngatꞌanii̱ nga bi̱ katsó: “¡Ta̱sara̱ nda ngase tsi ki̱a̱ kixindyión nangi Ejipto̱!”

²¹ Kó Moisee̱ bi̱ katsó: —Ji ne tsa̱ꞌa̱n, kó ñá ko̱ꞌna̱xiéni ji bo̱a̱ kjiꞌi yojo, tsi̱ꞌe̱ nga ngo sá ka̱ma skji̱ni̱e̱ kui xotaa̱. Mara̱ jun úchán mi̱ xi ta̱soboá jáxíꞌín, kje̱ꞌení ínchjín.

²² Ndatsi si̱ꞌankꞌién ngayeje cho̱yojo ko̱jo cho̱tsa̱nga̱ xi kjindibájo̱ kꞌi̱e̱e̱, ko̱jo ndatsi ko̱e̱ꞌée̱ ngayeje tji̱o̱ xi tjín ngi̱jin ndáchíkoón, nde ka̱májínnii̱ tsi̱ꞌe̱ nga sa̱ko̱ó yojo ngayejee̱.

²³ Ta̱nga Néná bi̱ katsoó Moisee̱: —A beriítakín nga ka̱májínna sa̱ꞌin an kui nii̱. Ja̱ ngotꞌe̱ má xchi̱e̱ ji tsi sa̱ꞌinkjatjosón an énna ko̱jo tsi jmí.

²⁴ Kó Moisee̱ kijítsáyaá xota̱ na̱xi̱ńdaá ni xi katsó Néná. Sꞌe̱ jaskan ítikó ichítié ko̱jo kan já ngito̱ko̱, kó ki̱a̱ índo nga ngo foaꞌatjiyajoo̱n ndiꞌandikoón.

²⁵ Néná ngo ṉdi̱ jatjajenni, kó tsíchji̱a̱jo Moisee̱, sꞌe̱ jaskan katsꞌén ni xi katsóyàtjoón nga sa̱ꞌín: íjñajii̱n kui já ngito̱ko̱o̱ kui a̱siénni̱xtjin xi kisꞌijñajii̱n Moisee̱, kó kui jaá ítsꞌi̱yani nga tsíchji̱a̱ én xí Néná tsjaá xota̱ xi chji̱ni̱e̱ꞌe̱én. Ta̱ ngo tsí ndi̱yà kamá kui nii̱.

Elndaa̱nd ko̱jo Mendaa̱nd

²⁶ Ngi̱jii̱n kui já xí ichítié ko̱jo kaa̱n, kisꞌińdojin jó já, ngo xi kiꞌmí Elndaa̱nd ko̱jo ngo xi kiꞌmí Mendaa̱nd xi kisꞌińdo ki̱a̱ nínga síndo ndiꞌaa̱. Kó nga ki̱a̱ síndo, kui a̱si̱énni̱xtjii̱n ti̱ kisꞌijñajii̱n nga, kó ítsꞌi̱yani nga tsíchji̱a̱ én xi Néná tsjá.

²⁷ Kó ngo nda̱ xo̱ngò kijí monga monga nga kijítsáyaá Moisee̱ kui nii̱.

²⁸ Kó Josuee̱, kui nda̱ xi ndeskande koó nga xo̱ngò nga asíko̱jo Moisee̱, ki̱a̱ kisꞌijña, kó nga tsintꞌié ni xi katsó kui nda̱a̱, bi̱ katsó: —Moisee̱, ji ndi̱a̱, ¡ngata̱ boeꞌéndièjíi̱n kui jaá nga ku̱i̱chji̱a̱ én xí Néná tsjá!

²⁹ Ta̱nga Moisee̱ bi̱ katsoó: —Ngata̱ ma chi̱ni̱jín ji, ti̱nde ngata̱ maꞌontakínjín ji. Achichíra̱ ndakjiꞌi tsi ngayeje xota̱ na̱xi̱ńdaá Néná sa̱ko̱ó kui a̱si̱énni̱xtjii̱n, kó nga ka̱maa̱ ku̱i̱chji̱a̱ én xí Néná tsjá.

³⁰ Jaskan ngije kamá kui nii̱, Moisee̱ ko̱jo kui já ngito̱ko̱o̱ kijí nginí ki̱a̱ nínga síndo ndiꞌaa̱.

Ni̱sie tosafoaá

³¹ Kó Néná katsꞌén nga ngi̱jii̱n ndáchíkoón yítsié ngo tjo̱ xi achichí ꞌniú. Kó kui tjo̱o̱ achichí ni̱sie tosafoá jeꞌejo̱, kó ki̱a̱ jachókatitsójó ki̱a̱ nínga síndo ndiꞌaa̱ xota̱ Israee̱l. Achichí kjín kamá kui ni̱siee̱ nga tsi nga ngo ni̱xtjii̱n kongín ndsa̱ko, sa̱kóná nga síndotikó ngaskande mejeén ngo metro̱ nga̱són tꞌanangii̱.

³² Kó xotaa̱ ítikó kui ni̱siee̱ nga ngo kui ni̱xtjii̱n ko̱jo kui ni̱xtji̱e̱e̱n ko̱jo nga kamángindyiojón. Xota̱ xi chiboa ngase jaꞌátikó, tie xtín jaꞌátikó, kó tjín xí ngaskande yíxí kui cho̱o̱ nga ngo foaꞌatjiyajoo̱n nínga síndo ndiꞌaa̱.

³³ Nde kji̱e̱ májiín xotaa̱ nga ndyi̱kjinie kui ni̱siee̱ nga katsꞌénxchán Néná kondra̱ tsi̱ꞌe̱ kui xotaa̱. Kó ꞌniú katsꞌénjeé nga achichí má xota̱ xi jesón.

³⁴ Kuíni nga kui ngi̱ndiee̱ Kibroo̱t-Ataabaa̱ ítꞌajaꞌén, «nga̱tsjo̱ó xota̱ xi bojoó», tsó kui jaꞌeén, ngatꞌa̱ ki̱a̱ boá nínga akjanijín xota̱ xi ta̱soboá nichiniee̱ tsí xi katsꞌénkjó.

³⁵ Kósꞌe̱ jatjoni ki̱a̱a̱ xota̱ na̱xi̱ńdaá, kó kijí nangi Aseroo̱t, nínga tsie kamaá nga ki̱a̱ kisꞌińdo.