Xki̱ 1 - Xo̱jo̱n eén Néná

Jájuún na̱xi̱ńdá Israee̱l

¹ Nga síndo xota̱ Israee̱l ki̱a̱ nangi kixií na̱xi̱ Sinaii̱, Néná tsíchji̱a̱jo Moisee̱ ki̱a̱ ndiꞌandikoón. Jè má jaꞌa tie ján sá nga ja̱bo̱a̱ je jatjoni xota̱ Israee̱l ki̱a̱ nangi Ejiptoo̱. Nga bi̱ katsoó Moisee̱:

² «Chje̱ꞌéꞌyé ji xki̱i̱ ngayeje xota̱ Israee̱l, xki̱ tji̱e̱ ko̱jo xki̱ ndiꞌa. Ki̱a̱ ka̱maa̱ nga xchi̱e̱ cha̱n cha̱n ji kótjín má ko̱jo xchi̱e̱ ji jaꞌeén ngayeje

³ jáxíꞌín xi je tsꞌatio kan noó xi je ka̱ma ko̱e̱je̱ kjo̱a̱xchán, tꞌítꞌe ji jaꞌeén, xikótsꞌèn síndo xtín xota̱ ndiꞌa xí chji̱a̱ni, ngatasikójoo Aaroo̱n,

^4-16 ko̱jo ngito̱ko̱o̱ xtín xota̱ ndiꞌa, kui xi kꞌuíndotjoón nga ngo nga ngo xtín xota̱ tji̱e̱. Kuí bí xi̱ꞌbi̱ ngito̱ko̱o̱ xtín xota̱ ndiꞌa xi chjiéngá ko̱síko̱joo̱: Xi chji̱a̱ni xota̱ tji̱e̱e̱ Rubee̱n: Elisuu̱r ndií Sendeuu̱r. Xi chji̱a̱ni xota̱ tji̱e̱e̱ Simeoo̱n: Selumiee̱l ndií Surisandaii̱. Xi chji̱a̱ni xota̱ tji̱e̱e̱ Jundáa̱: Naasoo̱n ndií Aminandaa̱b. Xi chji̱a̱ni xota̱ tji̱e̱e̱ Isakaa̱r: Natanaee̱l ndií Suaa̱r. Xi chji̱a̱ni xota̱ tji̱e̱e̱ Sabuloo̱n: Eliaa̱b ndií Eloo̱n. Xi chji̱a̱ni xota̱ tji̱e̱e̱ Efraii̱n: Elisamaa̱ ndií Amiuu̱nd. Xi chji̱a̱ni xota̱ tji̱e̱e̱ Manasee̱: Ngamaliee̱l ndií Pendasuu̱r. Xi chji̱a̱ni xota̱ tji̱e̱e̱ Benjaa̱: Abindaa̱n ndií Ngindonii̱. Xi chji̱a̱ni xota̱ tji̱e̱e̱ Ndaa̱n: Ayiesee̱r ndií Amisandaii̱. Xi chji̱a̱ni xota̱ tji̱e̱e̱ Asee̱r: Pangiee̱l ndií Okraa̱n. Xi chji̱a̱ni xota̱ tji̱e̱e̱ Ngaa̱nd: Eliasaa̱f ndií Reuee̱l. Xi chji̱a̱ni xota̱ tji̱e̱e̱ Neftalii̱: Ayiraa̱ ndií Enaa̱n».

^17-19 Ngo sá jaskan to̱kó ki̱a̱ síndo ngi̱ndie kixií na̱xi̱ Sinaii̱. Kósꞌe̱ Moisee̱ ko̱jo Aaroo̱n ítikó ngayeje kui ngito̱ko̱ xi Néná je jaꞌájii̱n, ko̱jo ngayeje jáxíꞌín xi je tsꞌatio kan noó. Xota̱ na̱xi̱ńdá xí ngasee̱ ti̱ ki̱a̱ kisꞌińdo nga. Kósꞌe̱ ikꞌíxki̱ xikótsꞌèn síndo nga ngo nga ngo xtín xota̱ Israee̱l. Bo̱a̱ má katsꞌén xikó má katsoó Néná nga atíxomaa̱ Moisee̱ nga sa̱ꞌín.

^20-46 Kuí bí xki̱i̱ ngayeje já xi je síndonda nga ko̱e̱je̱ kjo̱a̱xcha̱án: Xi chji̱a̱ni xota̱ tji̱e̱e̱ Rubee̱n: Yichán jun mi̱ masien kamá. Xi chji̱a̱ni xota̱ tji̱e̱e̱ Simeoo̱n: Ichítié ko̱jo nijan mi̱ ján úchán kamá. Xi chji̱a̱ni xota̱ tji̱e̱e̱ Ngaa̱nd: Yichán ún mi̱ jun úchán ichítié kamá. Xi chji̱a̱ni xota̱ tji̱e̱e̱ Jundáa̱: Ichítié ko̱jo kan nijón mi̱ jun úchán kamá. Xi chji̱a̱ni xota̱ tji̱e̱e̱ Isakaa̱r: Ichítié ko̱jo nijón mi̱ nijón úchán kamá. Xi chji̱a̱ni xota̱ tji̱e̱e̱ Sabuloo̱n: Ichítié ko̱jo yito mi̱ nijón úchán kamá. Xi chji̱a̱ni xota̱ tji̱e̱e̱ Efraii̱n: Yichán mi̱ masien kamá. Xi chji̱a̱ni xota̱ tji̱e̱e̱ Manasee̱: Kantié jó mi̱ jó úchán kamá. Xi chji̱a̱ni xota̱ tji̱e̱e̱ Benjaa̱: Kantjiꞌún mi̱ nijón úchán kamá. Xi chji̱a̱ni xota̱ tji̱e̱e̱ Ndaa̱n: Ichítié ko̱jo tiejó mi̱ yito úchán kamá. Xi chji̱a̱ni xota̱ tji̱e̱e̱ Asee̱r: Yichán ngo mi̱ masien kamá. Xi chji̱a̱ni xota̱ tji̱e̱e̱ Neftalii̱: Ichítié ko̱jo ján mi̱ nijón úchán kamá. Jun úchán ko̱jo ján mi̱ ún úchán ichítié kamá ngayeje jájuún.

Xota̱ tji̱e̱e̱ Lebii̱

⁴⁷ Xota̱ tji̱e̱e̱ Lebii̱ kamáxki̱jín xikótsꞌèn kamáxki̱ xota̱ xi xchaá kui xotaa̱,

⁴⁸ ngatꞌa̱ Néná bi̱ katsoó Moisee̱:

⁴⁹ «Kjiꞌanga kꞌuíxki̱ ji xota̱ Israee̱l, ngata̱ ki̱a̱jín nijan chꞌiéxki̱je ji xota̱ tji̱e̱e̱ Lebii̱.

⁵⁰ Chjiéngá ki̱a̱ ko̱e̱ꞌéxée̱ ndiꞌandikoón, tsi̱ꞌe̱ nga kui xi skoón ngayeje ni xi niꞌánkjién ngi̱yaa̱ kui ngi̱ndie ndikoón. Kuí boá xi ko̱nkꞌá nga ko̱e̱je̱jo ndiꞌandikoón ko̱jo ngayeje ni xi ndyi̱a̱, kó chjiéngá ki̱a̱ ku̱i̱ꞌíndotꞌa ndiꞌaa̱ nga ngo foaꞌatjiyajoo̱n nínga kꞌuijñá kui ndiꞌandikoón.

⁵¹ »Kó kui xota̱ tji̱e̱e̱ Lebii̱, kuí boá xi kꞌo̱xiékjo kjiꞌanga tjín nínga ko̱e̱je̱ ndiꞌandikoón, kó kjiꞌanga sꞌi̱jña nginí ngo ngi̱ndie, kuí boá xi ku̱i̱ꞌíkjo nginí. »Ngayeje xota̱ xi kje̱ꞌe xí ko̱e̱je̱kon tiñaa̱ kui ndiꞌandikoón, kó nga ki̱a̱jín chji̱a̱ni xota̱ tji̱e̱e̱ Lebii̱, ko̱yà.

⁵² »Kó xi ngi tiengo tji̱e̱e̱ xota̱ Israee̱l chjiéngá xikótsꞌèn ꞌbíndo jájuún, bo̱a̱ tsꞌén kꞌuíndo: Xki̱ tji̱e̱e̱ kꞌuíndo nínga síndo ndiꞌaa̱, kó ki̱a̱ kꞌuíndotꞌaa̱ bandera̱ xi chji̱a̱ni.

⁵³ Ta̱nga xota̱ tji̱e̱e̱ Lebii̱ ki̱a̱ kꞌuíndo ndiꞌaa̱ nga ngo foaꞌatjiyajoo̱n ndiꞌandikoón, kó kuí boá xi skoón kui ngi̱ndiee̱, tsi̱ꞌe̱ nga Néná sa̱ꞌínxchánjo̱jín xota̱ na̱xi̱ńdaá».

⁵⁴ Kó xota̱ Israee̱l bo̱a̱ má katsꞌén, xikótsꞌèn Néná atíxomaa̱ Moisee̱ nga sa̱ꞌín.