Titoo̱ 3 - Xo̱jo̱n eén Néná

Bi̱ tsꞌén íni̱jmì Pabloo̱ kjo̱a̱a̱ ni xi chjiéngá sa̱ꞌín xota̱ na̱ngo̱xi̱i̱

¹ Ti̱ꞌinkjaꞌátsjìi̱n xota̱ na̱ngo̱xi̱i̱ nga sku̱i̱e̱ndikón xota̱ xi botixómaá, ko̱jo jáxaá, ngatintꞌièꞌeén, kó ngatꞌíndonda nga sa̱ꞌín ngayeje ni xi nda.

² Ngata̱ jmí xota̱ chji̱a̱taꞌinjín, ko̱jo ngata̱ jmí kjo̱a̱xchán ꞌboxiéjín, ta̱sá ndaxota̱ ngatama, kó ngatamabe xota̱ xi ngasee̱ nga tjiín kjo̱a̱ni̱ma̱kjo̱a̱.

³ Ngatꞌa̱ ngasꞌe̱ ti̱ bo̱a̱ ti̱ tsꞌén ñá, xota̱ chi̱ni kamá ko̱jo kandaꞌyáꞌénjín ñá, kisꞌiṉtso̱ma kichajá, kó mosoo̱ ngayeje to̱ko̱ya kjo̱a̱tsjaa̱ yojoná xi mejeén ini̱ma̱ná kamá, kó ngi̱jii̱n ni xi ndajiín, ko̱jo ngi̱jii̱n kjo̱a̱ꞌontakoón kixindyionjìn, kó ñá kiniꞌánchꞌó, kó ti̱ kiniꞌánchꞌóná ñá.

⁴ Ta̱nga kjiꞌanga akó kjo̱a̱ndaa̱ Néná kui xi tsꞌaxiéꞌáná, ko̱jo kjo̱a̱tjó xi tjiín kjo̱a̱a̱ ngayeje xotaa̱,

⁵ tsꞌaxiéꞌáná, ta̱nga jmí tsi kjo̱a̱a̱ ni xi kiniꞌán, tsi kjo̱a̱a̱ ngo ni xi kixi̱ xi kiniꞌán, ta̱sá ta̱ngatꞌanii̱ nga kamáni̱ma̱a̱ ñá. Katsꞌéntsjiená kjiꞌanga katsꞌéntsen nginíná, kó A̱si̱énni̱xtjii̱n xí katsꞌéntja̱tsi̱e̱yaniná.

⁶ Néná achichí tsie A̱si̱énni̱xtjii̱n íjñajinná ngatꞌaa̱ kui Jesukristo̱ xi tsꞌaxiéꞌáná.

⁷ Néná katsꞌénkixi̱ná kjo̱a̱a̱ kjo̱a̱ndaa̱, bo̱a̱ katsꞌén tsi̱ꞌe̱ nga kꞌuiéná ngo kjo̱a̱chiyá nga sa̱kóná kuí kjo̱a̱mindyion ngatsjéni̱xtjii̱n.

⁸ Én xí ꞌniátakón boá xi̱ꞌbi̱, kó mejénna nga ꞌniú ko̱ndókjo̱a̱ kjo̱a̱a̱ kui nii̱, tsi̱ꞌe̱ nga kui xota̱ xi sꞌijii̱n Néná ta̱soboá ni xi nda xí sa̱ꞌín. Achichí nga nda kui eén, kó machjieén ngayeje xotaa̱.

⁹ Ta̱nga ngata̱ niꞌínsénjíi̱n kjo̱a̱ndokjo̱a̱tii̱ ni xi jmí ni chjíjiín, ko̱jo kjo̱a̱a̱ tji̱e̱e̱ xota̱ xi xchaá xotaa̱, ko̱jo kjo̱a̱a̱ kjo̱a̱ndokjo̱a̱tii̱, ko̱jo kjo̱a̱ndokjo̱a̱tii̱ kjo̱a̱kitii̱, ngatꞌa̱ jmí ni chjíjiín kui nii̱, kó bosikójojínná.

¹⁰ Kui nda̱ xi bokjangá xota̱ na̱ngo̱xi̱i̱, ndókjo̱e̱je tsi ngo ko̱jo tsi jó ndi̱yà, ta̱nga tsi sa̱ꞌínsénjín, ngiti̱ boeꞌéndièjíi̱n ngi̱ya na̱ngo̱xi̱i̱.

¹¹ Jè yé ji nga kui xi bo̱a̱ tjítsꞌeén jè katsꞌénkjatsón soboá yojoo̱, ngi̱jii̱n jeé tikónjin, kó ti̱kuíní tjítsꞌénkjí yojoo̱ nínga xcha̱ja.

Bi̱ tsꞌén katsꞌénkjietꞌa Pabloo̱ kui xo̱jo̱o̱n

¹² Ngije sangiyaa Artemaa̱, ko̱jo tsi Tikikoo̱, ti̱ꞌin ji ngo kjo̱a̱ꞌniú tsi̱ꞌe̱ nga kji̱ndi̱béchinní na̱xi̱ńdá Nikópoli̱, ngatꞌa̱ jè bo̱a̱ kixian an nga ki̱a̱ sa̱ꞌínkjaꞌa an cho̱nchꞌaàn.

¹³ Tasíke̱je ngayeje ni xi ka̱maa̱, nga ko̱si̱ke̱je nda̱ xi ꞌboxiéꞌáná xi ꞌmí Senaa̱, ko̱jo Apoloo̱, te̱ꞌée̱ ngayeje ni xi ka̱machjieén, tsi̱ꞌe̱ nga ta̱kó ko̱e̱je̱, kó nga jmí ni xcha̱jàjiín.

¹⁴ Kó xota̱ tsa̱ñá ngatamakjiín nga sa̱ꞌín ni xi ndaa̱, ko̱jo nga ko̱síko̱jo tsi ngo xota̱ xi chjieén tsja, tsi̱ꞌe̱ nga kꞌuíndo xikoó xota̱ xi ka̱ma ngasee̱ nda tsꞌén kꞌuíndo ngindyi̱ko̱n Néná.

¹⁵ Tinde xò bo̱a̱ tsó ngayeje xota̱ xi síndojo̱na kꞌi̱e̱e̱. Ti̱ꞌin tinde ji xota̱ xi tjoó ñá ngi̱yaa̱ kjo̱a̱sꞌijii̱n. Néná ngatsjájnú kjo̱a̱ndaa̱ ngayeje jún. Bo̱a̱ kjiꞌi.