Titoo̱ 2 - Xo̱jo̱n eén Néná

Pabloo̱ bi̱ tsꞌén tsíchji̱a̱jo Titoo̱ ni xi chjiéngá ko̱kóyá

¹ Ta̱nga ji, ndókjo̱e̱ ji ni xi nijanma kjo̱a̱bokoyá xi nda xi akakoyaá.

² Bo̱a̱ tꞌíi̱n xota̱ xi xchaá nga nda sa̱ꞌínkjó, ko̱jo nga xcha̱ndikón, ko̱jo nga nda sa̱ꞌínkjiín kon ni xi sa̱ꞌín, ko̱jo nga nda tsꞌén kꞌuíndojo̱ kjo̱a̱sꞌijii̱n, ko̱jo nga kꞌuieé kjo̱a̱tjó, ko̱jo nga kꞌuieé ngaꞌniú tsi̱ꞌe̱ nga sa̱ꞌínchíkjo̱a̱ ngayeje kjo̱a̱ni̱ma̱.

³ Ti̱ bo̱a̱ ti̱ tsꞌén ínchjín xi xchaá, chjiéngá sku̱i̱e̱ndikón Néná, ko̱jo chjiénjín nga éndísó kꞌuitsómajo̱, ko̱jo ka̱májín tsꞌatio kꞌuí bino̱, ko̱jo chjiéngá na̱ mostraa̱ ni xi ndaa̱ ka̱ma,

⁴ tsi̱ꞌe̱ nga ko̱kóyaá ínchjín xí kjindií nga sa̱ꞌíntjó xi̱ꞌii̱n, ko̱jo ndií,

⁵ chjiéngá nga nda sa̱ꞌínkjiín kon ni xi sa̱ꞌín, ko̱jo chjiéngá tsjie ka̱ma ini̱ma̱a̱, ko̱jo nga skoón ndiꞌaa̱, ko̱jo nga ndaxota̱ ka̱ma, ko̱jo nga sku̱i̱e̱ndikón xi̱ꞌii̱n, bo̱a̱ tsꞌén nga ta̱ꞌyajín xi chꞌo tsꞌén ku̱i̱chji̱a̱taꞌin eén Néná.

⁶ Ti̱ bo̱a̱ ti̱ tsꞌén, ꞌniú ndókjo̱e̱je ji já xo̱ngo̱ò tsi̱ꞌe̱ nga nda sa̱ꞌínkjiín kon ni xi sa̱ꞌín.

⁷ Ti̱ jii te̱ꞌée̱ ngo chi̱bo̱a̱ nga ni xi nda tiniꞌín ji. Nga ko̱ko̱yée̱, ngatamaya nga kixi̱ tiniꞌín ji, ko̱jo nga tiyendikín jí yojòo̱.

⁸ Én nda ndókjo̱e̱ ji, kó nde ngojín xi ka̱maa̱ ku̱i̱chji̱a̱taꞌii̱n, tsi̱ꞌe̱ nga soboá ka̱maa̱ kondraa̱, kó bo̱a̱ tsꞌén nga nde chií ka̱májiín chꞌo ka̱tso̱ná.

⁹ ꞌNiú ndókjo̱e̱je moso̱ xi kastiñaá, tsi̱ꞌe̱ nga sku̱i̱e̱ndikón xota̱ xi ndi̱a̱a̱ kjo̱a̱a̱ ngayeje ni xi sa̱ꞌín, ko̱jo nga ni xi tsja ka̱maa̱ ndi̱a̱a̱ xi sa̱ꞌín, ko̱jo nga ku̱i̱chji̱a̱ꞌájín,

¹⁰ ko̱jo ngata̱ tsꞌénchéjéjiín, ta̱sá ngo xota̱ xi ꞌniákón ngayeje nii̱ ngatama, tsi̱ꞌe̱ nga ko̱kó ngayeje kjo̱a̱tsjakjiꞌii̱ kjo̱a̱bokoyá xi tsi̱ꞌe̱ kui Néná xí tsꞌaxiéꞌáná.

¹¹ Ngatꞌa̱ Néná je akoó kjo̱a̱ndaa̱ ngayeje xotaa̱, kó kuí boá xi ꞌboxiéꞌáná,

¹² nga tsꞌén bokoyáná nga ngiti̱ si̱ꞌánjín ñá ni xi ndajín, ko̱jo ni nga̱sondie xi mejeén ini̱ma̱ná, ko̱jo nga nda si̱ꞌankjíi̱n takón ni xi si̱ꞌán, ko̱jo nga kixi̱ si̱ꞌán, ko̱jo nga xcha̱ndikón Néná, tji̱e̱nga tindyión kuí nga̱sondiee̱.

¹³ Xchiyàráa̱ kui kjo̱a̱chiyá xi tsjáná kjo̱a̱tsjaa̱: Nga ko̱kó yojoo̱ Jesukristoo̱ kui Néná xí tjiín kjo̱a̱jee̱, ko̱jo kui xi tsꞌaxiéꞌáná,

¹⁴ kui xi katsjá yojoo̱ nga kiniꞌánkꞌién ta̱ngatꞌanii̱ ñá, nga íchjítjéná nga jatjoꞌa ñá, kjo̱a̱a̱ ni xi ndajín xi kiniꞌán, ko̱jo tsi̱ꞌe̱ nga sa̱ꞌíntsjiená, nga ñá xí xota̱ na̱xi̱ńdá xí tsi̱ꞌe̱ ka̱ma ñá, kó nga ngayejee̱ takón nga ni xi nda si̱ꞌán.

¹⁵ Kuí nii̱ xi chjiéngá ko̱ko̱yée̱. Te̱ꞌéngaꞌníi̱, kó ti̱ꞌinchji̱ni̱ ji xotaa̱, nga si̱ꞌinkjìn jí xá xí tjiín. Ngata̱ ngojín xota̱ xi ta̱ ton sku̱i̱e̱e̱.