Titoo̱ 1 - Xo̱jo̱n eén Néná

Pabloo̱ bi̱ tsꞌén katsꞌéntinde Titoo̱

¹ Án boá xi ꞌmína Pabloo̱, mosoo̱ Néná ko̱jo apostroo̱ Jesukristoo̱, xikótsꞌèn sꞌijii̱n xota̱ xi je jaꞌájin Néná, ko̱jo xikó kjiꞌi kjo̱a̱kjíntakón xi ja̱koxi̱i̱ nga bendikón Néná, bo̱a̱ kjíꞌí xána,

² kuíni nga ndyi̱chiyáa̱ kjo̱a̱mindyion ngatsjéni̱xtjii̱n, kui ni xi ndeskande ngindiee̱ nga kamánda nga̱sondiee̱ katsóyàtjón nga tsja̱aná kui Néná xi májiín ꞌbíndisoo̱.

³ Nga jachó ni̱xtjin, Néná xi ꞌboxiéꞌáná, akó cha̱n cha̱n eén kó án katsjáxána nga tsꞌénꞌbini̱jmì án.

⁴ Ji tsꞌéntsangiyaa kui xo̱jo̱o̱n Titoo̱, ngatꞌa̱ ja̱koxi̱ boá nga ji xi ndína kjo̱a̱a̱ kjo̱a̱sꞌijinná. Néná xí Na̱ꞌminá, ko̱jo Ndi̱a̱ná Jesukristoo̱ kui xi tsꞌaxiéꞌáná nga tsjaá kjo̱a̱ndaa̱, ko̱jo kjo̱a̱ni̱ma̱takoón, ko̱jo kjo̱a̱xioó.

Bi̱ tsꞌén katsóyà Pabloo̱ kjo̱a̱a̱ xá xi sa̱ꞌín Titoo̱

⁵ Ki̱a̱ katsꞌenkꞌíjñaá jí tji̱ngi̱ Kreta̱, tsi̱ꞌe̱ nga si̱ꞌindaye ni xi chajaa̱ nga ka̱mandaya, ko̱jo tsi̱ꞌe̱ nga xki̱ nangi ko̱e̱ꞌéxée̱ xota̱ xi xchaá na̱ngo̱xi̱i̱, xikótsꞌèn atixomaa an nga si̱ꞌin ji.

⁶ Xi ka̱ma xota̱ xi xchaá, kuí boá xi jmíjín xi chꞌo tsꞌén ku̱i̱chji̱a̱taꞌin, kui xi ta̱ ngo tsi chjo̱on tjiín, kui xi ndií sꞌijin ka̱maa̱ Néná, ko̱jo xi ndií kixi̱ kꞌuíndo, nga jmíjín xi chꞌo tsꞌén ku̱i̱chji̱a̱taꞌin, ko̱jo nga ku̱i̱ntꞌiéꞌén.

⁷ Ngatꞌa̱ chjiéngá, nga kui xota̱ xi ngito̱ko̱o̱ na̱ngo̱xi̱i̱ ka̱ma, nga jmíjín xi chꞌo tsꞌén ku̱i̱chji̱a̱taꞌin nga tjítsꞌén xaá Néná, nga nkꞌakonjín kꞌo̱xié yojoo̱, nga ka̱májín xtinda ka̱ma, nga chjiénjín nga tsꞌatio kꞌuí bino̱, ti̱nde nga ka̱májín xota̱ xi kján ka̱ma, ti̱nde nga ka̱májín sa̱ꞌínmején ndyi̱ko̱n to̱o̱n ni xi ndajín tsꞌén kasakoni.

⁸ Ta̱sá chjiéngá nga tsja ka̱maa̱ nga kꞌuíndo xota̱ ndiꞌaa̱, chjiéngá sa̱ꞌíntjó ni xi ndaa̱, ngo nda̱ xi nda sa̱ꞌínkjiín kon ni xi sa̱ꞌín, ngo nda̱ xi kixi̱, ngo nda̱ xi tsjie, ko̱jo ngo nda̱ xi ti̱ kuii̱ botixómaá yojoo̱.

⁹ Én xi ꞌniátakón xí akakoyaá, kó kuí xí chjiéngá ko̱kóyá, tsi̱ꞌe̱ nga ka̱maa̱ tsja̱angaꞌniuú kje̱ꞌe xota̱ nga sa̱ꞌínkjién kuí kjo̱a̱bokoyá ndaa̱, ko̱jo tsi̱ꞌe̱ nga sa̱ꞌínkie nga sa̱ꞌínkꞌoyà yojoo̱ kui xota̱ xi kondra̱ síndonii̱ kui kjo̱a̱bokoyaá.

¹⁰ Ngatꞌa̱ achichí má xota̱ xi to̱kó tjín xi ntꞌiéꞌénjiín kjo̱a̱bokoyá xi ndaa̱, kui xota̱ xi chji̱a̱ én xi jmí ni chjíjiín, kó ꞌboṉcha̱jo xotaa̱, ngase má kui xota̱ jundío̱ xi bokoyá nga si̱ꞌan sirkunsisioo̱n.

¹¹ Kui xotaa̱ chjiéngá kjókjo tsꞌoa, ngatꞌa̱ ndyi̱bokoyá ni xi chjiénjín nga ko̱kóyá. Bo̱a̱ tsꞌén ꞌboṉcha̱jo kjín xota̱, ta̱ngatꞌanii̱ nga mejeén sa̱ꞌín to̱n.

¹² Ngo nda̱ chji̱ni̱e̱ꞌén xí tsi̱ꞌe̱ kui jaá xi bi̱ katsó: “Xota̱ xi chji̱a̱ni tji̱ngi̱ Kretaa̱, ngatsjéni̱xtjin nga xota̱ ndiso, ko̱jo xota̱ xi ndajín, xota̱ xki̱ꞌá, ko̱jo xota̱ tsiꞌé boá.”

¹³ Ja̱koxi̱ kuí ni xi katsó kui ndaa̱, kuíni nga ꞌniú ndókjo̱e̱je ji, tsi̱ꞌe̱ nga kixi̱ kjo̱jo kjo̱a̱sꞌijii̱n Néná,

¹⁴ ko̱jo tsi̱ꞌe̱ nga ki̱a̱jín sa̱ꞌínseén én xí jmí ni chjíjiín xi chji̱a̱ xota̱ jundíoo̱, ti̱nde nga ki̱a̱jín sa̱ꞌínseén kjo̱a̱botíxomaa̱ xota̱ xi ngiti̱ ki̱a̱jín ndyi̱fítji̱ngi ni xi ja̱koxi̱i̱ Néná.

¹⁵ Ngayeje nii̱ xi tsjie maá xota̱ xi tsjietsꞌén tikón ini̱ma̱a̱, ta̱nga xota̱ xi ndándí síndo ngindyi̱ko̱n Néná, ko̱jo xi sꞌijinjiín Néná, ngojín ni xi tsjie maá kui, ngatꞌa̱ ngaskande ni xi tsꞌénkjó, ko̱jo kjo̱a̱kjíntakoón tsjiejín tikón.

¹⁶ Be xò Néná ti̱xꞌi̱a̱n ndyi̱tsó, ta̱nga ni xi ndyi̱tsꞌèn, bokó nga jmí tsi sꞌijin ja̱koxi̱i̱ Néná. Kuí boá kui xotaa̱ xi ndajín, ko̱jo xi ntꞌiéꞌénjín, kó nde chiíjín maá tsꞌén ni xi nda.