Én xí nda xi ꞌniú tsjatsó ngasee̱ 8 - Xo̱jo̱n eén Néná

¹ ¡Tsi jira xi ntsꞌié án má ji katsaki xi katsꞌénkí na̱an xi katsꞌénkína an nga! Kjiꞌanga sa̱kóna ji ndi̱tsén jàn, ka̱mara̱ tsjaa ngo ndsó, kó nde ngojín xi sa̱ꞌínchꞌóna.

² Ka̱mara̱ skjíbengií nga kjuínjoo̱ ki̱a̱ ndiꞌaa̱ na̱anna, tsi̱ꞌe̱ nga ji xi ka̱ma ji mostro̱na. Kó an tsjaa nga sꞌi̱ ji bino̱ xi tjiín xka̱ sije̱n, ko̱jo ndaá to ngrananda̱na.

³ ¡Tsja xi skoón ngatꞌíjñangi ngindie tokó án! ¡Kó tsja xi kixi̱i̱ ngatjaníkjana!

Nda̱ xo̱ngo̱ò

⁴ Jún ínchjín xo̱ngo̱ò xí chji̱a̱ni na̱xi̱ńdáꞌniú Jerusalee̱n, mejénna nga si̱ꞌankjatjosónjnúꞌun ngo ni, nga si̱ꞌanxtijínjnúu̱ na̱ xi mejénna an, ti̱nde si̱ꞌankjaꞌájínjnúu̱ nga kjiꞌifé, ngaskande nga kui xi kjo̱a̱ꞌá soboaá.

Só xi ma juu̱n Ínchjín xí chji̱a̱ni na̱xi̱ńdáꞌniú Jerusalee̱n

⁵ ꞌYá kuií bo̱a̱ xi̱ꞌbi̱ xi tsꞌéndibá xtji̱e̱e̱n nangi kixií, xi tjiaa̱ xota̱ xi tjoó kjitꞌaa̱ to̱ko̱. Ngindiee̱ ngo yámásana̱ katsꞌenkjaꞌaá jí. Ki̱a̱ boá nínga kisꞌiee̱ tsi̱ndi̱o̱ na̱áa̱n, ki̱a̱ boá nínga kisꞌiee̱ tsi̱ndi̱o̱ xota̱chjo̱on xí yeꞌeé.

Na̱ xo̱ngo̱ò

⁶ ¡Tꞌíjñijìnní ngi̱jin ini̱ma̱a̱ xikoó tsi ngo chi̱bo̱a̱, xikoó ngo chi̱bo̱a̱ xi kjitꞌa tjiàa̱! ¡Ngatꞌa̱ xikótsꞌèn ꞌniú kjo̱a̱tjoó, ti̱ bo̱a̱ ti̱ tsꞌén ꞌniú kjo̱a̱bo̱yaa̱ nga! Kó kjo̱a̱chi̱ni̱i̱ ti̱ bo̱a̱ ti̱ tsꞌén ꞌbondíyaá xikoó nga̱tsjo̱ó, kó ndiꞌií kjo̱a̱tjoó, kuí boá ngo ndiꞌí xí íjñá Néná.

⁷ Ngayeje ndáfoaa̱ ndáchíkón xi tjiín, ka̱májiín sa̱ꞌínkꞌó ndiꞌií kjo̱a̱tjoó, ti̱nde ka̱májiín sa̱ꞌínkꞌó ngayeje ndáfoaa̱ ndejèꞌ xi tjiín. Tsi tjín xí sa̱ꞌínkꞌasꞌien ngayeje ni xi tjiín, kjo̱a̱a̱ kui kjo̱a̱tjoó, ta̱ ko̱jno̱cha tsí.

Ínchjín xí chji̱a̱ni na̱xi̱ńdáꞌniú Jerusale̱n

⁸ Tikónna ngo ndí ndíchja xi sꞌe̱ kjindí, xi nde kji̱e̱ tjojín chikii̱. Mí xí si̱ꞌáa̱n kjiꞌanga tjín xí kjo̱e̱ꞌékíꞌáná.

⁹ ¡Tsi kui xi ngo xó katsaki, ka̱mara̱ ki̱a̱ chjanínkꞌá ngo ndo̱bo̱a̱xa̱á xí to̱ntiboa! ¡Kó tsi kui xi ngo nga̱ntjo̱a̱ katsaki, ka̱mara̱ yákón kjojónni nga ko̱e̱ꞌéngaꞌniuú!

Na̱ xo̱ngo̱ò

¹⁰ ¡Án boá xi xikoó ngo xó, kó chikina, kuí boá xi xikoó jó tarié! ¡Kuíni nga ngindyi̱ko̱n xota̱ xi tjóna an, án boá xi kasakona kjo̱a̱xioó!

¹¹ Salomoo̱ kisꞌijñaa̱ ngo ngi̱ndie nínga tjitjíe̱ tostsi̱je̱è ki̱a̱ Baa̱l-Amoo̱n, kó xota̱jun xi kondaa̱ katsjá chjínangií, kó nga ngo nga ngo kui xotaa̱, ngo mi̱ to̱ntiboa tsꞌenkꞌásꞌieén kjo̱a̱a̱ to xi ꞌboje̱n.

¹² Ji Salomo̱, ka̱má chjábé jí kui xi ngo mi̱ to̱ntiboaa̱, te̱ꞌée̱ jó úchán kui xota̱jun xi kondaa̱, ta̱nga kui ngi̱ndie nínga tjitjíe̱ tostsi̱je̱è, án tsa̱ꞌa̱n.

Nda̱ xo̱ngo̱ò

¹³ Ji xi tindyin ji ki̱a̱ nínga tjitjíe̱ naxoó, xota̱ xi nda yaꞌaná ndyi̱ntꞌiè ndáa̱, ¡te̱ꞌéndièní nga kuintꞌièe̱!

Na̱ xo̱ngo̱ò

¹⁴ ¡Tsáyè ji, xota̱ xi tjóna an! ¡Ti̱yi jí xikoó ngo ndi̱kꞌijñá! ¡Ti̱yi jí xikoó ngo ndí chjo̱ón ngo ndi̱kꞌijñá, ki̱a̱ nga̱són na̱xi̱ nínga tjín xka̱ sije̱e̱n!