Én xí nda xi ꞌniú tsjatsó ngasee̱ 7 - Xo̱jo̱n eén Néná

Xtín xota̱

¹ Jí ndí tsa̱kji̱ín re, ata̱ tsjatsꞌèn ya ndsa̱ki ji nga kjiyaa̱ tji̱xíndié, ndáyáa̱ bo̱a̱ má tsꞌén ńtsó xikoó ngo sti̱ngaro to̱nsinié, xi katsꞌénda ngo nda̱ chji̱ni̱e̱ xí ꞌniú maá.

² Xo̱ꞌóo̱ ja̱kjiꞌi ngo niso ńtsó má kjiꞌi, xi ngatsjéni̱xtjin nga ndyi̱a̱ bino̱ xi je kiniꞌánkꞌájii̱n. Nga̱ntsꞌoe ji ja̱kjiꞌi ngo xtín to ndso̱ko̱a̱n ṉño̱pan má kjiꞌi, xi tjítji̱e̱tꞌaa̱ naxóndáfoa nga ngo foaꞌatjiyajoo̱n.

³ Chikíi̱ bo̱a̱ má kón xikoó jó ndií ndi̱kꞌijñá xí ꞌni̱o̱ kamá.

⁴ Kjásen ji, ja̱kjiꞌi tarié xi ndi̱ja̱a̱ ki̱ña̱ má kamándani kjiꞌi. Ndyikin ji ja̱kon ndáńchꞌi̱ xi tjín nangi Esboo̱n má kón, xi síndotꞌa nga̱ntjo̱a̱a̱ na̱xi̱ńdáꞌniú Baa̱t-Rabii̱n. Ńtjen ji, ja̱kjiꞌi tarieé nangi Líbanoo̱ má kjiꞌi, kui xi tsꞌénkotsijen xtji̱e̱e̱n na̱xi̱ńdáꞌniú Ndamasko̱.

⁵ Taki ji, ja̱kjiꞌi na̱xi̱ Karmeloo̱ má kjiꞌi, kó tsja̱taki ji, ja̱kon ńchjón koán xi tjiín ńjño xi bótꞌa nga̱xto̱n nda̱ ree̱ má kón, ¡achichí tsjá kamaá nda̱ ree̱ nga kamábe tsja̱ni̱je̱e̱n!

⁶ ¡Achichí tsjákjiꞌi ji, kó achichí ixi ndokjo̱e̱ ji! ¡Achichí tsjákjiꞌi nga tsꞌéntjó xkjín xotaa̱!

Na̱ xo̱ngo̱ò

⁷ Nkꞌa ji, xikó maá ngo yáńtioó, kó chikíi̱ bo̱a̱ má kón xikoó én ńtiò.

⁸ Jè bi̱ kixian an: Kjuínkatie an ńtioò kui yáńtioó, kó án skjíbé án. Chikíi̱ xí ngatama xikoó én tostsi̱je̱è, kó nda̱ sije̱e̱n ndso̱ꞌbe ji, xikó má je̱n masanaa̱, bo̱a̱ má je̱n ngatama,

⁹ kó ngi̱yaa̱ ndso̱ꞌbe ji ngatama xikoó bino̱ xi ndaa̱, kui xi inda inda ꞌbi xota̱ xi tjóna, kui xi inda inda mongajon tsꞌoa ko̱jo ṉꞌni̱u̱.

¹⁰ Xota̱ xi tjóna kuí chji̱a̱ni an, kó achichí tsjá tsꞌénjo̱na.

¹¹ Ja̱bíꞌi̱n ji xota̱ tjóna, tjián nínga jno̱ jàn, kó ki̱a̱ ku̱i̱tjá ni̱xtji̱e̱e̱n nínga síndo ndiꞌaa̱ xotaa̱.

¹² Jñóyà ku̱i̱stjíe̱n, kó tjián nínga kjiꞌi tostsi̱je̱è, stsitsíjée̱n tsi je kjiꞌbíńtsꞌién, ko̱jo tsi je tjixó, tsi je tjixó yángranandaa̱, ¡ki̱a̱ sa̱ꞌinkꞌasꞌiee̱n kjo̱a̱tjóna!

¹³ Yámandrángoraa̱ je kjifoaꞌándá naxó xí boajaá, kó tꞌa nga̱ntjo̱a̱ná je tjín ngayeje to̱ko̱ya to xi nda chinie, to xi sꞌe̱ kichꞌieje̱n má, ko̱jo to xi je tsienii̱ nga kaꞌnaje̱n, jí boá xi tsꞌénfoaꞌatjoó kui too̱, ji xota̱ xi tjóna.