Én xí nda xi ꞌniú tsjatsó ngasee̱ 5 - Xo̱jo̱n eén Néná

Nda̱ xo̱ngo̱ò

¹ Jè jéꞌe̱ an ngi̱ndie nínga tjitji̱e̱na nii̱, ji ndí ndíchja, ji ndí chjo̱onna. Jè jaꞌatikó án mirraa̱ ko̱jo tosijee̱n, jè iskjíni̱e̱ an ntsjién xí ndyi̱a̱ ndo̱bo̱a̱ cho̱ndo̱ꞌo̱sieèn, jè katsꞌe an binoo̱, ko̱jo ntsjeén. ¡Yàjnú já amingo̱ xi tjóna, chi̱ni̱e̱jnú ko̱jo tꞌi̱o̱jnú ngaskande nga nda stsi̱e̱jnú!

Já xí koón cho̱tsa̱nga̱a̱ Xi ma nijoón soó Na̱ xo̱ngo̱ò

² Jè kjiꞌifé an katsaki, ta̱nga tikón ini̱ma̱na, kó tsintꞌie an ngo nda̱. Nda̱a̱ xota̱ xi tjóna boá, kó bi̱ katsó nga tsíchji̱a̱ nga̱ntjo̱a̱a̱: «Chjéxꞌéní ji ndí ndíchja, ji ndí chjo̱onna, ji ndí tójo tsjakjiꞌina, na̱ xi jmíjiín ngo chi̱bo̱a̱ xi ndajín. Ngatꞌa̱ tokó án jè tjikítsie maá xoño, ¡kó tsja̱tokó án je tsꞌandyi̱ni stsé xí kjiboaꞌa nga jñoó!»

Nda̱ xo̱ngo̱ò Na̱ xo̱ngo̱ò

³ «Ta̱nga jè jaꞌáxín an ńjñona, ¡kó kótsꞌèn nga ti̱ koajà ngiñá an! Jè aniejón an ndsa̱ko án, ¡kó kótsꞌèn nga ti̱ sa̱ꞌindándí ngiñá an!»

⁴ Xota̱ xi tjóna katsangisꞌiendyió tsja ti̱xa̱a̱ xi tikoón nga̱ntjo̱a̱a̱, ¡kó achichí ni xi kamaá ngayeje yojona!

⁵ Jastjíe̱n an tsi̱ꞌe̱ nga skjíxꞌáa̱ xota̱ xi tjóna, ¡kó xtín ndsa̱ án kitín má ndásíje̱n mirraa̱, kó ki̱a̱ kitínsón ki̱cha̱ xi ꞌbíchjánii̱ nga̱ntjo̱a̱a̱!

⁶ Jastjíe̱n an, kó iskjíxꞌáa̱ nga̱ntjo̱a̱ xota̱ xi tjóna, ta̱nga ja̱bo̱a̱ jè kijí, ja̱bo̱a̱ jè jaꞌa. Kó nga tsíchji̱a̱ kui, mejeén kꞌien an katsaki. Tsangase an, ta̱nga ngiti̱ kasakojínna, tsíchji̱a̱ ngasèe̱, ta̱nga ngiti̱ katsꞌénsénjínna.

⁷ Kó jun xi konda na̱xi̱ńdáꞌniuú kasakoo̱ an, kó kuí yeꞌéna, kó katsꞌénꞌónna, ¡kó jaꞌáxínna ńjñobichitjéna!

⁸ Jún ínchjín xí chji̱a̱ni na̱xi̱ńdáꞌniú Jerusalee̱n, mejénna nga ko̱e̱ꞌéjnú ndso̱ꞌbájnú, nga tsi sa̱kójnú xota̱ xi tjóna, bo̱a̱ tꞌínjnúu̱ nga, ¡jè tjítsꞌénkꞌiénna kjo̱a̱tjoó!

Ínchjín xí chji̱a̱ni na̱xi̱ńdáꞌniú Jerusalee̱n

⁹ Mí ni xi nda ngase xi tjiín xota̱ xi tjoó jí. Ji chjo̱on tsjakjiꞌi, xi tsjakjiꞌi ngase ji ngi̱jii̱n ínchjín xí tsjakoo̱n. Mí ni xi nda ngase xi tjiín xota̱ xi tjoó jí, nga bo̱a̱ má ta̱ kjiꞌi ni xi chjiéꞌéjne̱.

Na̱ xo̱ngo̱ò

¹⁰ Xota̱ xi tjóna achichí tsjákjiꞌi, kó tiboayojó boá, nde niꞌínjín ka̱mana nga skuie an kui, ndatsi ngi̱jii̱n tie mi̱ xota̱.

¹¹ Ja̱kjiꞌi to̱nsinié má kjiꞌi to̱ko̱, ngaskande yó má tsja̱a̱, kó jmá tsja̱to̱ko̱ xikoó ngo ni̱sie kuerbo̱.

¹² Ndyi̱ko̱n xikó maá jó tójo xi síndo ki̱a̱ tꞌa ndáfoaa̱ xo̱ngàndántꞌieé, kui xi xikoó tsi ntsjén moniénjónni nga niꞌánkꞌíndo cha̱n cha̱n.

¹³ Tꞌanijon ja̱kon nínga ꞌbítji̱e̱ ni tjié má kón, nínga kjiꞌi xka̱ sije̱n, ko̱jo naxó sije̱n, tsꞌoa ja̱kon naxóndáfoa má kón xi fotjoo̱ tsie ndásíje̱n mirra̱.

¹⁴ Tjiaa̱, bo̱a̱ má kón xikoó sti̱ngaro to̱nsinié xi tjikítsie maá ndi̱jo̱ tsjakon. Yojoo̱ bo̱a̱ má kjiꞌi xikoó ndi̱ja̱a̱ ki̱ña̱ xi je kiniꞌánchoo̱n nga akjatꞌaa̱ ndi̱jo̱ safiro̱.

¹⁵ Ngajó ti̱ꞌmi̱í achichí ngaꞌniú tjiín, xikó maá jó yásé xi ndi̱jo̱ marmoo̱l kamándani, xi ngindiee̱ ni to̱nsinié ikꞌíndoo̱. Achichí tsjatsꞌèn bosién nínga bosién, xikó maá yákón xí ꞌbé ki̱a̱ nangi Líbanoo̱.

¹⁶ Achichí ixi tsꞌoa, achichí tsjá mána kui. ¡Bo̱a̱ kjíꞌí kui xota̱ xi tjóna an, jún ínchjín xi chji̱a̱ni na̱xi̱ńdáꞌniú Jerusalee̱n! ¡Bo̱a̱ kjíꞌí kui xota̱ xi mejénna an!