Én xí nda xi ꞌniú tsjatsó ngasee̱ 2 - Xo̱jo̱n eén Néná

Na̱ xo̱ngo̱ò

¹ Án boá xi xikoó ngo naxórsa̱ xi chji̱a̱ni nangi Saroo̱n, án boá xi xikoó ngo naxóndáfoa xi chji̱a̱ni nangi soón.

Nda̱ xo̱ngo̱ò

² Ngi̱jii̱n ínchjín xo̱ngo̱ò, na̱ xi mejénna, kuí boá xi xikoó ngo naxórsa̱ xi tjín ngi̱jii̱n ndaꞌyaá.

Na̱ xo̱ngo̱ò

³ Xota̱ xi tjóna, ngi̱jii̱n i̱xti xo̱ngo̱ò, kuí boá xi xikoó ngo yá masana̱, ngi̱jii̱n yá xí ꞌbé ngi̱jin kꞌijñaá. ¡Achichí tsjá kjimana nga je ki̱a̱ kotíjña̱ngi an tji̱nkꞌi̱e̱én, tsi̱ꞌe̱ nga skjíni̱e̱ an to nda chinie xi yajaá!

⁴ Xota̱ xi tjóna, ki̱a̱ kijíjo̱na ndiꞌa nínga tsie nichinie tjiín, kó achichí tjó katsꞌénjo̱na.

⁵ ¡Te̱ꞌéjnúꞌun tostsi̱je̱è! ¡Te̱ꞌéjnúꞌun masana̱! ¡Tasíko̱jojnúꞌun nga sa̱kóngaꞌniú nginína, ngatꞌa̱ jè tjítsꞌénkꞌiénna kjo̱a̱tjoó!

⁶ ¡Tsja xi skoón ngatꞌíjñangi ngindie tokó án! ¡Kó tsja xi kixi̱i̱ ngatjaníkjana!

Nda̱ xo̱ngo̱ò

⁷ Jún ínchjín xo̱ngo̱ò xí chji̱a̱ni na̱xi̱ńdáꞌniú Jerusalee̱n, mejénna nga si̱ꞌankjatjosónjnúꞌun ngo ni, kó ta̱ngatꞌanii̱ ndí ndí ínchjiín ndi̱kꞌijñaá, nga si̱ꞌanxtijínjnúu̱ na̱ xi mejénna an, ti̱nde si̱ꞌankjaꞌájínjnúu̱ nga kjiꞌifé, ngaskande nga kui xi kjo̱a̱ꞌá soboaá.

Xi ma joó soó Na̱ xo̱ngo̱ò

⁸ ¡Jè tsꞌéntꞌièe̱ nda̱a̱ xota̱ xi tjóna! ¡Tsitsíjenjnúu̱, jè tsꞌéndibá! ¡Jè tsꞌénkjínkꞌá ki̱a̱ ngi̱jin tji̱ngi̱i̱, jè tsꞌénkjínkꞌá ki̱a̱ ngi̱jin na̱xi̱i̱!

⁹ Xota̱ xi tjóna, xikónií ngo ndí xíꞌiín ngo ndi̱kꞌijñá. ¡Jànꞌa̱n, ki̱a̱ tikón nga̱xto̱n xoó! ¡Ki̱a̱ tsꞌénkotsijenni ki̱a̱ nga̱ntjo̱a̱masienkjaá, ki̱a̱ tsꞌénkotsijenxkjá nga tsꞌénkondana!

¹⁰ Xota̱ xi tjóna, bi̱ katsóna: «Tꞌenje̱ní jí chjo̱on xí tjóna, ¡ja̱bíꞌi̱n na̱ tsjakjiꞌi!

Nda̱ xo̱ngo̱ò

¹¹ Ngatꞌa̱ jè jaꞌa cho̱nchꞌaàn, kó jè ngiti̱ jmí stsé kjiboaꞌájín.

¹² Jè tjín naxó ngi̱jin kꞌijñaá, jè jachó ni̱xtjin nga si̱ꞌantsjie ńꞌniuú tostsi̱je̱è. ¡Kó tójoo̱, jè tjìndaꞌyaá nga ndyi̱sie, kꞌi̱e̱ nangíná!

¹³ Jè tjín toꞌingo̱ ki̱a̱ nínga tjitjíe̱ yáꞌingoo̱, kó jè kjifoaꞌándá nda̱sijee̱n, naxoó ńꞌniuú tostsi̱je̱è, ¡ja̱bíꞌi̱n na̱ tsjakjiꞌi!»

¹⁴ Ji ndí tójo xi tjóna, ji xi ki̱a̱ tindyinꞌmí ji ki̱a̱ ti̱xa̱a̱ ndi̱jo̱ yiꞌii̱, ki̱a̱ ngi̱ndyioó ndi̱jo̱ xi síndo nínga nkꞌaa̱, takéní kje̱n ji, te̱ꞌéndiè ji nga kuintꞌièe̱ nda̱a̱. ¡Achichí ixi ndaꞌyaá nda̱a̱! ¡Achichí tsjákjiꞌi kje̱n ji!

Ngajoó

¹⁵ Cho̱ńda xi xi̱xi̱i̱ tsꞌenkjié nínga tjitji̱e̱ná tostsi̱je̱è. ¡Tasíke̱jejne̱ tsi̱ꞌe̱ nga ko̱ndo̱bo̱a̱, ngatꞌa̱ kui ńꞌniú tostsi̱je̱è sꞌe̱ tsí yajaá naxó!

Na̱ xo̱ngo̱ò

¹⁶ Án tsa̱ꞌa̱n xota̱ xi tjoò an, kó án, kuí chji̱a̱ni an kui, ki̱a̱ koo̱n cho̱tsa̱nga̱a̱ ki̱a̱ tꞌa nínga tjín naxóndáfoaa̱.

¹⁷ Ndibéchin nginí ji xota̱ xi tjóna, tji̱e̱nga tsꞌéndibá tji̱nkꞌi̱e̱én, ko̱jo nga jè mejeén kjimajñoó. ¡Ti̱yi jí xikoó ngo ndi̱kꞌijñá xí mongajin tji̱ngi̱ Betee̱r!