Rkaa̱ 5 - Xo̱jo̱n eén Néná

Bi̱ kamá nga kjín tji̱o̱ kjíyaá

¹ Ngo ndi̱yà nga tikón Kjisoo̱ tꞌa ngi̱ndiò tsie xi ꞌmí Jenesaree̱t, achichí xota̱ kamátikónié xi kamámejeén kintꞌié eén Néná.

² Kó Kjisoo̱ kamábe jó tjotso je tꞌa ndaá, kó já xi tsoboá tji̱o̱o̱ jatjajen nga ndyi̱monièjón nda̱ꞌya̱a̱.

³ Kó Kjisoo̱ tsꞌasꞌien ngi̱ya tjotso jee̱ nda̱ xi ꞌmí Ximoo̱, kó tsíꞌaá nga sa̱ngíńña chií ngi̱jin ndáfoaa̱, kó kisꞌijñaya ngi̱ya tjotso jee̱, kó ki̱a̱ ítsꞌi̱yanii̱ nga akóyaá xota̱ kjiín.

⁴ Ngije kamaá nga tsíchji̱a̱, Kjisoo̱ bi̱ katsoó Ximoo̱: –Tꞌenje̱ ji tjotso jee̱ nínga ꞌniú na̱nga̱a̱ ngi̱ndi̱o̱ò, kó ki̱a̱ tjiénjnú nda̱ꞌyajnú, tsi̱ꞌe̱ nga kjo̱yajnú tji̱o̱.

⁵ Kó bi̱ katsó Ximoo̱: –Mostro̱, nga ngo ni̱xtji̱e̱e̱n ikjienjne̱ nda̱ꞌyajne̱, kó nde ngo tji̱o̱ kjíyájínjne̱, ta̱nga tji̱e̱nga ji xi bo̱a̱ tꞌísé, kuijen an nda̱ꞌya̱a̱.

⁶ Kó ngije yején nda̱ꞌya̱a̱, achichí tji̱o̱ kjíyaá, ngaskande katjondiyájo̱ ma nda̱ꞌya̱a̱.

⁷ Kó yejeén tsja nga tsíchji̱a̱a̱ já xí tjimájo̱ kje̱ꞌe tjotso je, tsi̱ꞌe̱ nga kijíkasikójo, kó jachó kui jaá, sꞌe̱ íkitsie nga jó tjotso jee̱ nga ta̱ ngi̱chí chajaa̱ nga matingándá má.

⁸ Kó ngije kamábe kui nii̱ nda̱ xi ꞌmí Ximo̱ Peé, asiéntꞌaa̱tikoó Kjisoo̱, kó bi̱ katsoó: –¡Tji̱taxíntꞌení Ndi̱a̱, ngatꞌa̱ xota̱ jé án!

⁹ Ngatꞌa̱ Ximoo̱ ko̱jo já xí ngasee̱ achichí katsakjónní kjo̱a̱a̱ kui tji̱o̱ xi bo̱a̱ nda kjíyaá,

¹⁰ kó ti̱ bo̱a̱ ti̱ kamaá Sandiyaá ko̱jo Juaa̱, ndií nda̱ xi ꞌmí Sebedeoo̱, já xí nijan tsoꞌbájo̱ tji̱o̱ Ximoo̱, kó Kjisoo̱, bi̱ katsoó Ximoo̱: –Ngata̱ ndakinjín ma ji, ngatꞌa̱ ngotꞌe̱ ꞌne̱, ngiti̱ tji̱o̱jín xi ko̱ndo̱bo̱e̱, xota̱ xí kꞌuitíkí.

¹¹ Kó ngije kijíjo̱ tjotso jee̱ tꞌa ndaá, ki̱a̱ íjñámasien ngayeje ni xi ndyi̱yaꞌa, kósꞌe̱ kijítji̱ngii̱ Kjisoo̱.

Bi̱ tsꞌén katsꞌéndaya Kjisoo̱ ngo nda̱ xi tjiín chiꞌin xi tsꞌénkjátsón tji̱xin yojoná

¹² Kó ngo ndi̱yà nga tikón Kjisoo̱ ngo na̱xi̱ńdáꞌniú, ki̱a̱ jachókoón ngo nda̱ xi tjiín chiꞌin xi tsꞌénkjátsón tji̱xin yojoná, kó nga kamábe Kjisoo̱, kui nda̱a̱ kisꞌijñaxtien ngaskande nga jachótꞌaa̱ kje̱n tꞌanangii̱, kó ꞌniú tsíꞌaá Kjisoo̱, nga bi̱ katsoó: –Ndi̱a̱, tsi ji xi mejeén, ka̱ma ti̱ꞌintsjiejínní nga xtjo̱ꞌóxín chiꞌinna.

¹³ Kósꞌe̱ Kjisoo̱ yejénnié tsja, kó katsꞌénjo̱, nga bi̱ katsoó: –¡Mejénna, ngatamatsjiejón ji! Kó ti̱ kjiꞌa katjoꞌóxín chiꞌin xi koo̱n kui nda̱a̱.

¹⁴ Kó Kjisoo̱ ꞌniú tsíꞌáa̱, nga bi̱ katsoó: –Ngata̱ ꞌyàjín xi ꞌmíyée̱, ta̱sá tꞌenchíi̱n chináꞌmii̱, kó takèe̱ yojòo̱, kó te̱ꞌé ji ngo chji̱e̱ nga je kamátsjiejón ji, xikó katsó Moisee̱ nga atíxoma, tsi̱ꞌe̱ nga sku̱i̱e̱ kui jaá nga je kamándaya ji.

¹⁵ Ta̱nga ta̱sasá ꞌniú kamáyà ngase ni xi katsꞌén Kjisoo̱, kó achichí xota̱ kamátikó xi tsintꞌieé ni xi katsó, ko̱jo xi jachókoón tsi̱ꞌe̱ nga sa̱ꞌíndaya chiꞌin xi koo̱n.

¹⁶ Ta̱nga Kjisoo̱ tsangasendie nga kijítꞌaxín ngo ngi̱ndie nínga jmíjín xi tjín nga kijíchji̱a̱a̱ Néná.

Bi̱ tsꞌén katsꞌéndaya Kjisoo̱ ngo nda̱ xi májín fí

¹⁷ Kó ngo ni̱xtjin nga tsꞌénbokoyá Kjisoo̱, ki̱a̱ kisꞌińdojii̱n já fariseo̱ ko̱jo mostroo̱ kjo̱a̱kitii̱ xi kjindibáni ngayeje ndí na̱xi̱ńdá xí chji̱a̱ni nangi Ngalilea̱, ko̱jo nangi Jundea̱, ko̱jo na̱xi̱ńdáꞌniú Jerusale̱n. Kó ngaꞌniuú Néná kisꞌijñajii̱n Kjisoo̱ nga katsꞌéndaya xota̱ xi oo̱n.

¹⁸ Kó ki̱a̱ jachó já xí ndyi̱yaꞌankꞌá ngo nda̱ xi ni̱ma̱, xi májín fí xi je ta̱ ngo ṉchan kjiꞌijñasón, kó kui jaá kamámejeén kijíjo̱ ngaskande ngi̱ya ndiꞌa nínga tikón Kjisoo̱, kó ki̱a̱ ko̱ójñá ngindyi̱ko̱n.

¹⁹ Kó nga kasakojiín ñá xtji̱e̱e̱n sa̱ꞌínkꞌasꞌien, ngatꞌa̱ achichí xota̱ xi tjín, katsꞌénkjínijíngí kui nda̱ xi oo̱n nkꞌaa̱ ndiꞌaa̱, sꞌe̱ ngo ti̱xa̱ katsꞌénda, nínga katsꞌénkjatjajen ṉchan xi kjiꞌisón kui nda̱ xi ni̱ma̱a̱, ki̱a̱ ngamasiee̱n xotaa̱, ko̱jo ngindyi̱ko̱n Kjisoo̱ yíjñá.

²⁰ Kó nga kamábe Kjisoo̱ nga sꞌijii̱n Néná kuí jaá, bi̱ katsoó nda̱ xi ni̱ma̱a̱: –¡Ji nda̱, jée̱ jè kiniꞌánjetakoón!

²¹ Kósꞌe̱ já chji̱ni̱e̱kjo̱a̱kitii̱ ko̱jo já fariseoo̱, bi̱ tsꞌén yíjin kon: “ꞌYání kui nda̱a̱ nga Néná chꞌo tjítsoó. ꞌYání xi ka̱maa̱ sa̱ꞌínjetakón ngo jé, a mí tsi ta̱kuítsí Néná.”

²² Ta̱nga Kjisoo̱ kamákjiín ni xi katsꞌénkjó kuí jaá, sꞌe̱ bi̱ katsoó: Mí xí ndyi̱niꞌánkjójnú ngi̱jin ini̱ma̱jnú.

²³ Mí ni xi niꞌínjín kjiꞌi nga kꞌuín, a nga bi̱ kꞌuín: “Jée̱ jè kiniꞌánjetakoón”, axa̱ nga bi̱ kꞌuin: “Ti̱sítji̱n, kó tꞌen ji”.

²⁴ Ta̱nga tsi̱ꞌe̱ nga xcha̱jnú nga ndií nda̱ xi̱ꞌii̱n tjiín xá kuí nga̱sondiee̱ tsi̱ꞌe̱ nga ka̱maa̱ sa̱ꞌínjetakón jé. Kósꞌe̱ bi̱ katsoó nda̱ xi májín fií: –Ti̱sítji̱n, chjábé ṉcháa̱n, kó tꞌen ndiꞌàa̱.

²⁵ Kó ti̱ kjiꞌa, nda̱ xi ni̱ma̱a̱ jastjíe̱n ngindyi̱ko̱n ngayeje xotaa̱, kó iskjíbé ṉchan xi kisꞌiesón, sꞌe̱ kijí ndiꞌaa̱ nga katsjaá kjo̱a̱je Néná.

²⁶ Kó ngayeje xotaa̱ kijíndikoón, kó katsjaá kjo̱a̱je Néná, kó achichí katsakjónní, nga bi̱ katsoó xkjín: –¡Ngotꞌe̱ ꞌne̱ nga je kamáyà ngo ni xi ta̱nisién ꞌniú fíndikónná!

Kjisoo̱ bi̱ tsꞌén tsíchji̱a̱a̱ Lebii̱

²⁷ Kó jaskan ngije kamá kui nii̱, Kjisoo̱ jataxie, kósꞌe̱ askotsijen ndá ndaá ngo nda̱ xi foaꞌáꞌyá to̱n xi machjítjé ni, Lebi̱ ꞌmí kui nda̱a̱, kó ki̱a̱ tikóntꞌa yámíxa̱ nínga machjítjé nii̱, kó Kjisoo̱, bi̱ katsoó: –Ndibétji̱ngíní.

²⁸ Kó Lebii̱ jastjíe̱n, kó íjñámasien ngayeje ni xi tjítsꞌén, sꞌe̱ kijítji̱ngii̱ Kjisoo̱.

²⁹ Kó Lebii̱ ngo sꞌué ꞌniú katsꞌeén Kjisoo̱ ki̱a̱ ndiꞌaa̱, kó kjín já xí foaꞌáꞌyá to̱n xi machjítjé ni, ko̱jo kje̱ꞌe xota̱ xi nijan kisꞌińdotꞌajo̱ yámíxa̱.

³⁰ Kó já chji̱ni̱e̱kjo̱a̱kitii̱ ko̱jo já fariseoo̱, tsíchji̱a̱taꞌin xota̱ tsi̱ꞌe̱ Kjisoo̱, nga bi̱ katsó: –Míkjo̱a̱a̱ nga jún ndyi̱chiniejo̱ ko̱jo ndyi̱ꞌyòjo̱jnú ni xota̱ xi foaꞌáꞌyá to̱n xi machjítjé ni ko̱jo xota̱ jé.

³¹ Kó Kjisoo̱, bi̱ katsoó: –Xota̱ xi oo̱n xí chjieén chji̱ni̱e̱ndiki, jmí tsi xota̱ xi ndaa̱.

³² Kó án jmí xota̱ xi kixi̱ jéꞌe̱chjiajáa̱n, xota̱ jé boá xí jéꞌe̱chjiáa̱, tsi̱ꞌe̱ nga sa̱ꞌínkꞌoyà yojoo̱.

Bi̱ tsꞌén akasíyaá Kjisoo̱ kjo̱a̱a̱ kjindiaá

³³ Kósꞌe̱ kui jaá, bi̱ katsoó Kjisoo̱: –Míkjo̱a̱a̱ nga xota̱ tsi̱ꞌe̱ Juaa̱ ko̱jo já fariseoo̱, kjín ndi̱yà tsꞌénkjáꞌa kjindiá yojoo̱, ko̱jo achichí chji̱a̱a̱ Néná, ta̱nga xota̱ tse̱ ndyi̱kjinie ko̱jo ndyi̱ꞌbi kui.

³⁴ Kó Kjisoo̱, bi̱ katsoó: –A ka̱majnú si̱ꞌankjaꞌájnú kjindiá xota̱ xi tjimá ngo ndiꞌibixan, tji̱e̱nga nda̱ xi ku̱i̱xaa̱n ki̱a̱ tikónjo̱.

³⁵ Ta̱nga nga kjo̱chó ni̱xtjin nga xchje̱ꞌéxiín nda̱ xi ku̱i̱xaa̱n, kó kuí ni̱xtjii̱n nga ka̱ma kꞌuíndo kjindiá.

³⁶ Kó Kjisoo̱ ti̱ bo̱a̱ ti̱ tsꞌén katsóyaà ngo énkjín: –Ngojín xota̱ xi ko̱tie chií ńjñoo̱ ngo xtjí tja̱tsi̱e̱, sꞌe̱ ko̱óyaá nga ku̱i̱ꞌíxtió ngo xtjí xchá, tsi bo̱a̱ sa̱ꞌín, jmí tsi ta̱ skjíndiyá tsí ngase xtjí tja̱tsi̱e̱e̱, ngatꞌa̱ ko̱jo kui xi̱i̱ ńjño tja̱tsi̱e̱e̱ ndajín ko̱kiín xtjí xchaá nga.

³⁷ Ti̱nde ngojín xota̱ xi ku̱i̱ndyiá bino̱ tja̱tsi̱e̱ ngo ti̱jìtjíxin xchá, ngatꞌa̱ bino̱ tja̱tsi̱e̱e̱ skjíndiyá ti̱jìtjíxin xchaá, kó binoo̱ ko̱jo ti̱jìtjíxiín jmí chjí ka̱májínnii̱.

³⁸ Kuíni nga bino̱ tja̱tsi̱e̱e̱ ti̱jìtjíxin tja̱tsi̱e̱ ku̱i̱ndyia.

³⁹ Kó nde ngojín xota̱ xi je katsꞌe bino̱ xi je tsie ndyi̱a̱ni, sꞌe̱ jaskan bino̱ tja̱tsi̱e̱ ka̱mamejeén, ngatꞌa̱ bi̱ tsó: “Bino̱ xi xchá ndyi̱a̱a̱, nda ngase ꞌyó.”