Rkaa̱ 24 - Xo̱jo̱n eén Néná

Bi̱ tsꞌén jaꞌáꞌyaá Kjisoo̱

¹ Ni̱xtjin tjoón xomanaa̱, kjiꞌanga ta̱jñóyà ngasee̱, kijí kui ínchjiín, ko̱jo kje̱ꞌe ngase ínchjín nínga tikón nga̱tsjo̱ó Kjisoo̱, kó ndyi̱yaꞌa nisije̱n xi íjñanda.

² Kó kamábe nga ndi̱jo̱ xi kjiꞌixtioo̱ nga̱tsjo̱ó je kamátíyaá,

³ kó nga tsꞌasꞌien ngi̱yaa̱, ngiti̱ kasakojiín yojoo̱ Ndi̱a̱ Kjisoo̱.

⁴ Kó ta̱ bi̱ ta̱ kamaá kjo̱a̱a̱ kui nii̱, kó jó já jaꞌatꞌa tiñaa̱ xi ndyi̱yajá ńjño xi ꞌna̱,

⁵ kó achichí katsakjónní, kó ítꞌa maá kje̱n tꞌanangii̱, sꞌe̱ bi̱ kiꞌmií kui ínchjiín: –Míkjo̱a̱a̱ nga ngi̱jii̱n xota̱ xi jesoón ndyi̱mindyiséjnú kui xi tikoón.

⁶ Kꞌi̱e̱jín tikón, jè jaꞌáꞌyaá. Ngatjaꞌátsjienjnú ni xi tsíchji̱a̱ ngasꞌe̱ nga kisꞌijña nangi Ngalilea̱,

⁷ nga bi̱ katsó: Chjiéngá ndií nda̱ xi̱ꞌii̱n si̱ꞌankꞌasꞌien ngi̱ya tsja xota̱ jé, sꞌe̱ kjótꞌa kro, kó xi ma ján ni̱xtjin kjo̱a̱ꞌáꞌyaá.

⁸ Kó kui ínchjiín, jaꞌátsjiee̱n én xí tsíchji̱a̱ Kjisoo̱.

⁹ Kó ngije jataxie nga̱tsjo̱ó, katsóyaà kui nii̱ nga tiengo já apostroo̱ ko̱jo ngayeje xota̱ xi ngasee̱.

¹⁰ Na̱ Riya̱ Lenaa̱, ko̱jo na̱ Juaá, ko̱jo na̱ Riyaa̱ na̱aa̱n Sandiyaá, ko̱jo ínchjín xí ngasee̱ boá xi katsóyaà kui nii̱ já apostroo̱.

¹¹ Ta̱nga kui jaá, ta̱ kjo̱a̱tsobé tsí kamaá ni xi katsóyà kui ínchjiín, kó kisꞌijinjiín.

¹² Ta̱nga Peé jastjíe̱n, tsanga má kijí nínga tikón nga̱tsjo̱ó, kó nga askotsijen ngi̱yaa̱, kamábe nga ta̱ ńjñoo̱ Kjisoo̱ xí síndo, kó kijí ndiꞌaa̱ nga kijíndikoón ni xi kamaá.

Kjisoo̱ bi̱ tsꞌén tsíchji̱a̱jo jó xota̱a̱ xi ndyi̱fí ndi̱yà Emau̱

¹³ Kó ti̱ kui ni̱xtjin jó já kijí xtji̱e̱e̱n ngo ndí nangi xi ꞌmí Emau̱, xi mara̱ tiengo kilometro̱ tikónnii̱ na̱xi̱ńdáꞌniú Jerusale̱n,

¹⁴ kó kui jaá ndyi̱chji̱a̱jo xkjín kjo̱a̱a̱ kui ni xi kamaá.

¹⁵ Kó tji̱e̱nga ndyi̱chji̱a̱jo ko̱jo ndyi̱chji̱a̱tijo̱ xkjín, ti̱ kuii̱ Kjisoo̱ kijíkóntiñaa̱, kó nijan kitsjien nga kijí ko̱jo kui jaá,

¹⁶ ta̱nga kui jaá akjaꞌmaa̱ ndyi̱ko̱n, tsi̱ꞌe̱ nga sku̱i̱e̱jín tsi Kjisoo̱ xi̱ꞌba̱.

¹⁷ Kósꞌe̱ Kjisoo̱, bi̱ katsoó kui jaá: –Mí ni xi ndyi̱ndokjo̱a̱jnú tji̱e̱nga ndyi̱mongínjnú, kó míkjo̱a̱a̱ nga ndasen tindyiónjnú.

¹⁸ Sꞌe̱ bi̱ katsó nda̱ xi ꞌmí Kleofaa̱: –A ta̱ jí tsí nda̱ xi ki̱a̱jín ndokjo̱e̱ni na̱xi̱ńdáꞌniú Jerusale̱n xi bejín ngayeje ni xi kamá kui ni̱xtjii̱n.

¹⁹ Kó Kjisoo̱, bi̱ katsoó kui jaá: –Mí ni xi kamá. Sꞌe̱ bi̱ katsó kui jaá: –Kjo̱a̱a̱ Kjisoo̱, nda̱ xi chji̱a̱ni na̱xi̱ńdáꞌniú Nasaree̱t, nda̱ chji̱ni̱e̱ꞌe̱én Néná, xi nkꞌa kamá xaá kjo̱a̱a̱ ngayeje ni xi katsꞌén, ko̱jo ni xi akóyá, kó kamáyàndikón ngindyi̱ko̱n Néná ko̱jo ngindyi̱ko̱n ngayeje xota̱ na̱xi̱ńdaá,

²⁰ ko̱jo kótsꞌèn kiniꞌánkꞌasꞌiee̱n já ngito̱ko̱o̱ chináꞌmii̱, ko̱jo já xí botixómaá na̱xi̱ńdaá, tsi̱ꞌe̱ nga kiniꞌánkꞌién nga akjatꞌa kro.

²¹ Ta̱nga ji̱n kichiyájne̱ nga kui xi kꞌo̱xiéꞌá ngayeje xota̱ xi chji̱a̱ni Israee̱l, kó je ján ni̱xtjinnii̱ nga kamá ngayeje kui nii̱.

²² Kó kjín má ínchjín xí ndokjo̱a̱niji̱n xi kijíndikoón ngoye ta̱jñó nga kijí nga̱tsjo̱ó,

²³ kó nga kasakojiín yojoo̱ Kjisoo̱, ndyi̱tsó nga akako xoò ndítsjiee̱ Néná, xi katsóyà xoò nga tikón Kjisoo̱.

²⁴ Kó kijí já xí ndokjo̱a̱niji̱n ki̱a̱ nga̱tsjo̱ó, kó xikó má kjiꞌi ni xi katsó kui ínchjiín, bo̱a̱ má kjiꞌi ni xi kamábe, ta̱nga kamábejín Kjisoo̱.

²⁵ Kó Kjisoo̱, bi̱ katsoó kui jaá: –¡Mí xí ta̱ chi̱ninijnú ko̱jo mí xí ta̱ chjiya ini̱ma̱jnú nga kisꞌijinjínjnú ngayeje ni xi katsó já chji̱ni̱e̱ꞌe̱én Néná!

²⁶ A yàjínjnú nga Kristoo̱ chjiéngá tsie kjo̱a̱ni̱ma̱ kjo̱a̱ꞌatio ngindiee̱ nga sa̱ko̱ó kjo̱a̱je xi tsi̱ꞌe̱.

²⁷ Kó katsóyaà ni xi kjitꞌa xo̱jo̱n eén Néná nga ítsꞌi̱yanii̱ ndeskande kjo̱a̱kiti xi katsꞌénda Moisee̱, sꞌe̱ ngayeje ni xi katsꞌénꞌindó já chji̱ni̱e̱ꞌe̱én Néná xi tsáyà kjo̱a̱a̱ Kjisoo̱.

²⁸ Ngije ma kjachó má nangi Emau̱, Kjisoo̱ katsꞌén xikoó tsi kjin ngase kijí.

²⁹ Kó kui jaá ꞌniú tsíꞌáa̱ nga bi̱ katsoó: –Kꞌi̱e̱ tindyinje̱jne̱ kꞌi̱e̱e̱, ngatꞌa̱ jè kamángixón, kó jè mején kjimajñó. Kó Kjisoo̱ ki̱a̱ kisꞌijñajo̱ kui jaá.

³⁰ Kó ngije síndotꞌa yámíxa̱a̱, Kjisoo̱ iskjíbé paa̱n, katsꞌénchikonñé, akjángá sꞌe̱ katsjaá kui jaá,

³¹ kjiꞌá boá nga katjoxꞌá ndyi̱ko̱n kui jaá, kó kamákjiín nga Kjisoo̱ xi̱ꞌba̱, ta̱nga ta̱ yàjín ñá kijí Kjisoo̱ ngijee̱.

³² Kó ja̱kꞌi̱e̱ ja̱ngaján, bi̱ katsoó xkjín kuí jaá: –A kitíngájín ini̱ma̱ná ngi̱ya ndi̱ya̱à tji̱e̱nga tsíchji̱a̱joná kjo̱a̱a̱ xo̱jo̱n eén Néná.

³³ Kó ti̱ kuii̱ chi̱bo̱a̱ jastjíe̱n, kó kijíꞌoyá nginí kui jaá na̱xi̱ńdáꞌniú Jerusale̱n, kó kamábe nga je síndotikó nga tiengo já apostroo̱, ko̱jo xota̱ xi síndojo̱ kui jaá,

³⁴ xi bi̱ ndyi̱tsó: –Ja̱koxi̱ nga je jaꞌáꞌyaá Ndi̱a̱a̱, kó jè jatjokjaà Ximoo̱.

³⁵ Kó kui jaá katsóyà kui ni xi kamá ngi̱ya ndi̱ya̱à, ko̱jo kótsꞌèn kamábe nga Kjisoo̱ boá xi tikónjo̱ kjiꞌanga akjángá paa̱n.

Kjisoo̱ bi̱ tsꞌén akoó yojoo̱ xota̱ tsi̱ꞌe̱

³⁶ Tji̱e̱nga ta̱kó ndyi̱chji̱a̱ kui nii̱, Kjisoo̱ jachó, kó ki̱a̱ kisꞌijñajii̱n ngamasiee̱n kui jaá, kó bi̱ katsoó: –Ngasꞌiejnú kjo̱a̱xió.

³⁷ Kósꞌe̱ achichí katsakjónní, ngatꞌa̱ katsꞌénkjó nga a̱siénni̱xtjin kamaá xi ndyi̱be.

³⁸ Kó Kjisoo̱, bi̱ katsoó kui jaá: –Ánní nga ndyi̱ndakónjnú, kó míkjo̱a̱a̱ nga kui nii̱ ndibaá ini̱ma̱jnú.

³⁹ Tsitsíjenjnúu̱ ndsa̱ án, ko̱jo ndsa̱ko án, án boá, ti̱ꞌanjo̱jnúꞌun, kó tsitsíjenjnúꞌun, ngatꞌa̱ ngo a̱siénni̱xtjin jmíjiín yojo ko̱jo ńda xikótsꞌèn yàjnú nga tjínna án.

⁴⁰ Kó ngije bo̱a̱ katsó, akoó tsja ko̱jo se.

⁴¹ Kó nde kji̱e̱ sꞌijin nda ndajiín kjo̱a̱a̱ kjo̱a̱tsjaa̱, kó achichí kijíndikoón, sꞌe̱ Kjisoo̱, bi̱ katsoó: –A tjín chiíjnú nichinie.

⁴² Sꞌe̱ kui jaá chií tji̱o̱ tsjó katsjaá,

⁴³ kó Kjisoo̱ iskjíbé, sꞌe̱ iskjinie ngindyi̱ko̱n kui jaá.

⁴⁴ Sꞌe̱ bi̱ katsoó kui jaá: –Kuí eén xi tsíchji̱a̱ an, kjiꞌanga ta̱kó tikónjo̱jnúꞌun: nga chjiéngá kjo̱tjosón ngayeje ni xi kjitꞌa kjo̱a̱a̱ an ngi̱ya kjo̱a̱kitii̱ Moisee̱, xo̱jo̱n xi katsꞌénꞌindó já chji̱ni̱e̱ꞌe̱én Néná ko̱jo xo̱jo̱n Salmoo̱.

⁴⁵ Sꞌe̱ iskjíxꞌá kjo̱a̱kjíntakoón kui xotaa̱, tsi̱ꞌe̱ nga kamákjiín ni xi kjitꞌa xo̱jo̱n eén Néná,

⁴⁶ kó bi̱ katsoó: –Bo̱a̱ tsꞌén je kjitꞌa xo̱jo̱o̱n nga chjiéngá tsie kjo̱a̱ni̱ma̱ kjo̱a̱ꞌatio Kristoo̱, ko̱jo nga xi ma ján ni̱xtjin kjo̱a̱ꞌáꞌyaá ngi̱jii̱n xota̱ xi je jesoón,

⁴⁷ ko̱jo nga chjiéngá jaꞌeén Kjisoo̱ kꞌuini̱jmi̱ì xotaa̱ nga sa̱ꞌínkꞌoyà yojoo̱ kjo̱a̱a̱ jé xí ndyi̱tsꞌèn, ko̱jo tsi̱ꞌe̱ nga si̱ꞌanjetakoón jeé ngayeje xota̱ na̱xi̱ńdaá, kó nga na̱xi̱ńdáꞌniú Jerusale̱n ku̱i̱ꞌítsꞌi̱yani kui nii̱.

⁴⁸ Kó jún xi chistiko̱jnú kjo̱a̱a̱ ngayeje kui nii̱.

⁴⁹ Kó ngotꞌe̱ ꞌne̱, sangiyájnúꞌun ni xi katsóyàtjón nga tsja̱a Na̱ꞌmina, ta̱nga kꞌi̱e̱ ti̱ndyiónjnú na̱xi̱ńdáꞌniú Jerusale̱n, ngaskande nga sa̱kójnú ngaꞌniú xí kji̱ndi̱báni ndiꞌakꞌajmi jàn.

Bi̱ tsꞌén kijí Kjisoo̱ ndiꞌakꞌajmi jàn

⁵⁰ Kjisoo̱ kijíjo̱ já apostroo̱ ngaskande na̱xi̱ńdá Betania̱, ki̱a̱ iskjininkꞌa tsja, kó katsꞌénchikonñé.

⁵¹ Kó tji̱e̱nga katsꞌénchikonñé, kijíboaꞌátꞌaxiín, kó Kjisoo̱ kachjaninkꞌa ndiꞌakꞌajmi jàn.

⁵² Kó kui jaá, ngije katsꞌéntsjaà, achichí tsja kisꞌiee̱ nga kijí nginí na̱xi̱ńdáꞌniú Jerusale̱n,

⁵³ kó ngatsjéni̱xtjin katsꞌéntsjaà Néná ngi̱ya na̱ngo̱xi̱i̱. Bo̱a̱ kjiꞌi.