Rkaa̱ 23 - Xo̱jo̱n eén Néná

Bi̱ tsꞌén tsangínjo̱ Kjisoo̱ ngindyi̱ko̱n xtitjón Pilatoo̱

¹ Kó nga jastjíe̱n ngayeje xota̱ kjiín, tsangínjo̱ Kjisoo̱ ngindyi̱ko̱n xtitjón Pilatoo̱.

² Kó ítsꞌi̱yanii̱ xotaa̱ nga yíngítaꞌin, nga bi̱ katsó: –Kui nda̱a̱ kamáyàjne̱ nga indyiátsobeé xota̱ na̱xi̱ńdaá, kó íchjaá xotaa̱ tsi̱ꞌe̱ nga ku̱i̱ꞌíchjíjiín to̱n xi machjítjé ni nda̱ xtitjón Sesaa̱, kó kandaꞌyájne̱ nga kuí xò xí Kristoo̱, ngo nda̱ re, katsó.

³ Kósꞌe̱ Pilatoo̱, bi̱ katsó nga asíyaá: –A jí xí nda̱ Ree̱ xota̱ jundíoo̱ ji. Kó Kjisoo̱, bi̱ katsó: –Ja̱ bo̱a̱ kjiꞌi ni xi tꞌísé ji.

⁴ Kósꞌe̱ Pilatoo̱, bi̱ katsoó já ngito̱ko̱o̱ chináꞌmii̱ ko̱jo xotaa̱: –Sa̱kójínna míkjo̱a̱a̱ nga si̱ꞌanjénií kui nda̱a̱.

⁵ Ta̱nga kui jaá ꞌniú katsꞌén, nga bi̱ katsó: –Indyiátsobeé xota̱ na̱xi̱ńdaá nga akóyá ngayeje nangi Jundea̱, ki̱a̱ ítsꞌi̱yanii̱ nangi Ngalilea̱ ngaskande kꞌi̱e̱e̱.

Bi̱ tsꞌén kisꞌijña Kjisoo̱ ngindyi̱ko̱n Erondee̱

⁶ Kó Pilatoo̱ nga tsintꞌié kuí nii̱, asíyá tsi nangi Ngalilea̱ chji̱a̱ni kui nda̱a̱,

⁷ kó nga tsintꞌié nga Kjisoo̱ ki̱a̱ chji̱a̱ni nangi xi botixómaá nda̱ re Erondee̱, kui katsangiyakoo̱n, ngatꞌa̱ kui ni̱xtjii̱n ki̱a̱ na̱xi̱ńdáꞌniú Jerusale̱n tikón Erondee̱.

⁸ Kó nda̱ re Erondee̱ nga kamábe Kjisoo̱ achichí tsjá kamaá, ngatꞌa̱ antꞌe̱na nga kamámejeén kamábe ꞌyá kuí xi Kjisoo̱, ngatꞌa̱ achichí ni tsintꞌié kjo̱a̱a̱ kui, kó tsꞌénkoyaa̱ nga sku̱i̱e̱ nga sa̱ꞌín ngo kjo̱a̱ndikón.

⁹ Kó achichí ni xi asíyaá, ta̱nga jmíni̱xtjin tsíchji̱a̱ Kjisoo̱.

¹⁰ Kó já ngito̱ko̱o̱ chináꞌmii̱, ko̱jo já chji̱ni̱e̱kjo̱a̱kitii̱, achichí ꞌniú yíngítaꞌin.

¹¹ Kósꞌe̱ Erondee̱ ko̱jo jájuún, katsꞌénchꞌó ko̱jo tsajnókie Kjisoo̱, kó ngo ńjño xi tsjakjiꞌi katsꞌénkajá, sꞌe̱ katsangiyaꞌoyá nginií Pilatoo̱.

¹² Kó Erondee̱ ko̱jo Pilatoo̱ kamátjoó xkjín kuí ni̱xtjii̱n, ngatꞌa̱ kamáchꞌómararií xkjín ngasꞌe̱.

Bi̱ tsꞌén katseꞌéjeé nga si̱ꞌankꞌien Kjisoo̱

¹³ Kósꞌe̱ Pilatoo̱ ítikó ngayeje já ngito̱ko̱o̱ chináꞌmii̱, ko̱jo já xí botixómaá nangii̱ ko̱jo xota̱ na̱xi̱ńdaá,

¹⁴ kó bi̱ katsoó kui jaá: –Jún jéꞌe̱chiníjnúꞌun kui nda̱a̱ nga kui xi tsꞌénmindyiátsobeé xota̱ na̱xi̱ńdaá, ta̱nga jè asíyáa̱ ngindyikónjnú, kó jmí jéjiín kjo̱a̱a̱ ngayeje ni xi akjangitaꞌinjnú.

¹⁵ Kó ti̱nde Erondee̱ katsꞌénjéjiín, ngatꞌa̱ an katsangiyaꞌoyána, kó ja̱ jè yàjnú, jmí jéjiín xi ka̱ma si̱ꞌankꞌiénmáni,

¹⁶ ngije kjoaá, sꞌe̱ ku̱i̱ntjoen an ngijee̱.

¹⁷ Xki̱ nga ma sꞌueé, ngo xi tjiꞌyá ndo̱bo̱a̱yà ꞌbíjñándé.

¹⁸ Ta̱nga ngayeje xotaa̱ ta̱ ngo nda̱ kamá, nga bi̱ katsó nga askjandáyà: –¡Nga niꞌánkꞌién kui nda̱a̱, kó chjándéjne̱ Barrabaa̱!

¹⁹ Kui nda̱ xi ꞌmí Barrabaa̱ ndo̱bo̱a̱yà kanangisꞌien ngatꞌa̱ kjo̱a̱xchán katsꞌén na̱xi̱ńdáꞌniuú, ko̱jo kjo̱a̱a̱ nga ngo nda̱ katsꞌénkꞌién.

²⁰ Pilatoo̱ ingo ndi̱yà tsíchji̱a̱jo nginí xota̱ na̱xi̱ńdaá, nga kamámejeén tsintjoen Kjisoo̱.

²¹ Ta̱nga kui xotaa̱ achichí ꞌniú tsíꞌá, nga bi̱ katsó nga askjandáyà: –¡Tjatꞌe ji kro, tjatꞌe ji kro!

²² Ta̱nga Pilatoo̱ xi ma ján ndi̱yà tsíchji̱a̱jo xota̱ na̱xi̱ńdaá, kó bi̱ katsoó: –Ja̱, mí ni xi ndajín xi katsꞌén. Nde ngojín ni xi katsꞌén xi ka̱ma si̱ꞌankꞌienni, ngije kjoaá, ku̱i̱ntjoen an.

²³ Ta̱nga xota̱ na̱xi̱ńdaá ꞌniú askjandáyà nga tsíꞌá tsi̱ꞌe̱ nga akjatꞌa kro, kó nda̱a̱ xotaa̱ ta̱sá má ꞌniú kandaꞌyá ngase.

²⁴ Kósꞌe̱ Pilatoo̱ katsjákjo̱a̱ tsi̱ꞌe̱ nga ka̱ma ni xi tsíꞌá xota̱ na̱xi̱ńdaá,

²⁵ kó íjñandé kui nda̱ xi kanangisꞌien ndo̱bo̱a̱yà ngatꞌa̱ kjo̱a̱xchán tsꞌaxié, ko̱jo nga ngo nda̱ katsꞌénkꞌién, kó katsꞌénkꞌasꞌien Kjisoo̱ xikótsꞌèn kamámejeén xota̱ na̱xi̱ńdaá.

Bi̱ tsꞌén akjatꞌa kro Kjisoo̱

²⁶ Kó ngije tjifíjo̱ Kjisoo̱, ngo nda̱ xi kjoeꞌeni ngi̱jin jno̱o̱ xi ꞌmí Ximo̱, xi chji̱a̱ni na̱xi̱ńdáꞌniú Sirene̱, kiniꞌaán kjo̱a̱ꞌniú nga tsaꞌanijín kroo̱ nga kijítji̱ngii̱ Kjisoo̱.

²⁷ Kó achichí má xota̱ kjiín xi kijítji̱ngii̱, ko̱jo kjín ínchjín xí achichí askjandá nga on kamaá ni xi kiniꞌánjo̱ Kjisoo̱.

²⁸ Ta̱nga Kjisoo̱ askoꞌá kui ínchjiín, kó bi̱ katsoó: –Jún bo̱a̱ ínchjín Jerusale̱n, ngata̱ ánjín chaꞌátjéjnúꞌun, ta̱sá ti̱ juún xi chaꞌátjéjnú yojojnú, ko̱jo ndíjnú xí chaꞌátjéjnú,

²⁹ ngatꞌa̱ sꞌe̱ kji̱ndi̱bá ni̱xtjin, nga bi̱ ka̱tso̱ xotaa̱: “¡Achichíra̱tsjaa̱ ínchjín xí ndi̱ kamá, ko̱jo ndo̱bo̱a̱ndí xí jmí ndí kisꞌieyàjín, ko̱jo chiki xi jmí ndí katsꞌénxchájín!”

³⁰ Kósꞌe̱ ku̱i̱ꞌítsꞌi̱yani nga xotaa̱, bi̱ ka̱tso̱o̱ kꞌijñaá: “Ngatꞌákaniéjne̱ yojojnú, kó na̱xi̱i̱ ngataꞌmájne̱.”

³¹ Ngatꞌa̱ tsi kui nii̱ niꞌánjo̱ yá xkjuieén, mí ni xi si̱ꞌanjo̱ ngase xi kixií.

³² Ti̱ jó já xí ndajín nijan tsangínjo̱ ko̱jo Kjisoo̱, tsi̱ꞌe̱ nga si̱ꞌankꞌien nga.

³³ Kó nga jachó ngo ngi̱ndie xi ꞌmí ńdato̱ko̱ ini̱ma̱a̱, ki̱a̱ akjatꞌa kro Kjisoo̱, ko̱jo nga jó kui já xí ndajiín, ngo nga fojnií ko̱jo ngo nga skoón.

³⁴ Kó Kjisoo̱, bi̱ katsó: –Na̱ꞌmi, ti̱ꞌinjetakíi̱n kui xotaa̱, ngatꞌa̱ bejín ni xi ndyi̱tsꞌèn. Kó jájuún katsatonjo̱ kjo̱a̱chꞌáṉcha̱ ńjñoo̱.

³⁵ Kó ngayeje xota̱ na̱xi̱ńdaá, ki̱a̱ síndo nga askotsijen ndá ndaá ni xi kamá, kó ngaskande jáxaá tsajnókie Kjisoo̱, nga bi̱ katsó: –Tsꞌaxiéꞌá kje̱ꞌe xota̱, ja̱ ngatꞌaxiéꞌá soboá yojoo̱ tsi kui xi Kristoo̱, nda̱ xi Néná jaꞌájin.

³⁶ Ko̱jo jájuún kijíboaꞌátꞌaa̱ tsi̱ꞌe̱ nga tsajnókie, kó bino̱ san katsjaá,

³⁷ kó bi̱ katsoó: –Tsi ji xi nda̱ ree̱ xota̱ jundíoo̱ ji, ꞌna̱xiéꞌé so̱bo̱e̱ ji yojòo̱.

³⁸ Kó to̱ko̱ kroo̱ kisitꞌa ngo yátie xi bi̱ tsó: “KUI XI̱ꞌBI̱ XI NDA̱ REE̱ XOTA̱ JUNDÍOO̱.”

³⁹ Kó ngo nda̱ xi nijan tji̱e̱nboaꞌa kroo̱ ítsꞌi̱yanii̱ nga chꞌo katsoó Kjisoo̱, nga bi̱ katsoó: –Tsi ji xi Kristoo̱ ji, ꞌna̱xiéꞌé yojòo̱, kó ꞌna̱xiéꞌéjne̱ ji̱n nga.

⁴⁰ Kó nga tsíchji̱a̱ nda̱ xi ingoo̱, katsꞌénxchánjo̱ nda̱ xi tsíchji̱a̱a̱, nga bi̱ katsoó: –A nde Néná ndakinjín ji nga ti̱ kui jé tiꞌbíchjí jí.

⁴¹ Ñá, nga ja̱koxi̱, ndakjíꞌí nga kiniꞌánjéná, ngatꞌa̱ ndyi̱ꞌbíchjí ñá ni xi tsoboáná kjo̱a̱a̱ ni xi kiniꞌán, ta̱nga Kjisoo̱ jmí ni katsꞌénjín.

⁴² Kó kui nda̱a̱, bi̱ katsoó Kjisoo̱: –Ngatjaꞌátsjiee̱n an nga kꞌuítsꞌi̱yeníi̱ nga ko̱ti̱xome ji.

⁴³ Kó Kjisoo̱, bi̱ katsoó: –Ja̱koxi̱ ni xi xiáa̱n, nga ngotꞌe̱ má ku̱i̱ndyinje̱ní ndiꞌakꞌajmii̱.

⁴⁴ Kó nga kamándisꞌueé, ngaskande nga kamá chi̱bo̱a̱ ján nga kamángixón, ngayeje nga̱sondiee̱ kisꞌiejñó,

⁴⁵ tsꞌueé kamájñó, kó ńjñotjibé xi tjíchjáni ngi̱ya nínga ꞌniú ndikoón na̱ngo̱xi̱i̱, jó tjín kamá nga katjondiyá.

⁴⁶ Kósꞌe̱ Kjisoo̱ achichí ꞌniú askjandáyà, nga bi̱ katsó: –¡Na̱ꞌmi, ngi̱ya ndse̱ ji ꞌbijñá an ini̱ma̱na! Ngije bo̱a̱ katsó, jeꞌetsíꞌoón, sꞌe̱ kꞌien ngijee̱.

⁴⁷ Nga kamábe nda̱ ngito̱ko̱o̱ jájuún ngayeje kui ni xi kamaá, katsjaá kjo̱a̱je Néná, nga bi̱ katsó: –Ja̱koxi̱ nga nda̱ kixi̱ kamá kui nda̱a̱.

⁴⁸ Kó ngayeje xota̱ kjín xi kamátikó kuí ngi̱ndiee̱ xi kamábe kui ni xi kamaá, nga kijí ndiꞌaa̱ ngaskande yeꞌé maá ni̱se̱e̱n.

⁴⁹ Ngayeje xota̱ xi nda kamábe Kjisoo̱, ko̱jo ínchjín xí tsajátji̱ngii̱ ndeskande nangi Ngalilea̱, ta̱ kjín kixindyia nga askotsijee̱n ni xi kamaá.

Bi̱ tsꞌén akjanijín Kjisoo̱

⁵⁰ Kó ngo nda̱ xi ꞌmí Kosie̱, xi chji̱a̱ni na̱xi̱ńdáꞌniú Arimatea̱, xi chji̱a̱ni Jundea̱, xi tjiín xá, xi ndaxota̱ ko̱jo xi kixi̱,

⁵¹ kui nda̱a̱, ti̱ tsꞌénkoyaa̱ nga ko̱tíxoma Néná nga, kó ndse̱je̱njín kamá kui jaá kjo̱a̱a̱ ni xi katsꞌén,

⁵² kijíkoón Pilatoo̱, kó tsíꞌaá yojo kꞌiee̱n Kjisoo̱,

⁵³ kó ngije tsꞌenje̱ngi kroo̱ yojo kꞌiee̱n Kjisoo̱, ítsakjájón ngo ńjñotjibé sꞌe̱ íjñá yojoo̱ Kjisoo̱ ngo ngi̱ya nga̱tsjo̱ó xí kji̱e̱ jmíjín xi fonijín xi tikóntꞌa ngo ndi̱jo̱ na̱xi̱.

⁵⁴ Ni̱xtjin nga pirjñe̱ má nga bo̱a̱ kamá, kó jè má makjítsꞌi̱yanii̱ ni̱xtjin ndikoón.

⁵⁵ Ínchjín xí tsajátji̱ngii̱ Kjisoo̱ ndeskande nangi Ngalilea̱ kamábe nga̱tsjo̱ó, ko̱jo kótsꞌèn akjajña yojo kꞌiee̱n Kjisoo̱.

⁵⁶ Kui ínchjiín kijí ndiꞌaa̱, kó íjñanda ndásíje̱n ko̱jo nisije̱n, kó katsꞌénkjaꞌyá ni̱xtjin ndikoón, ngatꞌa̱ bo̱a̱ tsꞌén kjitꞌa kjo̱a̱botíxomaa̱.