Rkaa̱ 22 - Xo̱jo̱n eén Néná

Bi̱ tsꞌén índa jáxaá tsi̱ꞌe̱ nga si̱ꞌankꞌien Kjisoo̱

¹ Ngije ma kjachó ni̱xtjii̱n sꞌueé pan xi jmí nisanjiín, xi ꞌmí sꞌué paskuaa̱.

² Já ngito̱ko̱o̱ chináꞌmii̱ ko̱jo já chji̱ni̱e̱kjo̱a̱kitii̱, tsangasee̱ kótsꞌèn nga sa̱ꞌínkꞌién Kjisoo̱, ta̱nga katsakjónnií xota̱ na̱xi̱ńdaá.

³ Kósꞌe̱ xindajín Satanaa̱ tsꞌasꞌienjin yojoo̱ Jundaa̱, ngo nda̱ apostroo̱ Kjisoo̱ xi Iskariote̱ kiꞌmií nga, kui xi chji̱a̱ni ngo já xí tiejoó.

⁴ Kó kijí Jundaa̱, sꞌe̱ tsíchji̱a̱jo já ngito̱ko̱o̱ chináꞌmii̱, ko̱jo já ngito̱ko̱o̱ jájún xi konda na̱ngo̱xi̱i̱, kó índa kótsꞌèn sa̱ꞌínkꞌasꞌiee̱n Kjisoo̱.

⁵ Kó kui jaá achichí tsjá kamaá, kó índajo̱ nga to̱n ko̱e̱ꞌeé Jundaa̱.

⁶ Kó Jundaa̱ katsꞌénjo̱ꞌo, sꞌe̱ tsangasendiee̱ kótsꞌèn nga sa̱ꞌínkꞌasꞌien Kjisoo̱ nga̱xto̱n xota̱ na̱xi̱ńdaá.

Kjisoo̱ bi̱ tsꞌén iskjiniejo̱ ngase ṉño̱ xota̱a̱

⁷ Ti̱chaa̱n jachó ni̱xtjin nga chinie pan xi jmí nisan mindyiajiín, kjiꞌanga chjiéngá niꞌánkꞌién ngo cho̱tsa̱nga̱ tsi̱ꞌe̱ sꞌué paskuaa̱.

⁸ Kó Kjisoo̱ katsangiya Peé ko̱jo Juaa̱, nga bi̱ katsoó: –Tangínjnú, kó tꞌíjñandajnú ni xi xi̱ni̱e̱ ñá nga ka̱ma sꞌué paskuaa̱.

⁹ Sꞌe̱ bi̱ katsó kui jaá: –Ñání mejeén nga kꞌuijñándajne̱ nichiniee̱.

¹⁰ Sꞌe̱ Kjisoo̱, bi̱ katsoó kui jaá: –Kꞌi̱e̱ xiyàjnúꞌun, nga ku̱i̱tjásꞌi̱e̱njnú na̱xi̱ńdaá, ki̱a̱ sa̱kójnú ngo nda̱ xi tsꞌényaꞌa ngo nisa ndáfoa, kó kui tangíntji̱ngíjnúu̱ ngaskande ndiꞌa nínga kꞌo̱sꞌien,

¹¹ kó bi̱ tꞌínjnúu̱ ndi̱a̱a̱ ndiꞌaa̱: “Bi̱ tsó nda̱ Mostroo̱ nga bosíyá: Ñá xò tikón ngi̱ndie nínga skji̱ni̱e̱jo ṉño̱ xota̱ tsi̱ꞌe̱, ni̱xtjii̱n sꞌué paskuaa̱.”

¹² Kósꞌe̱ kui nda̱a̱ ko̱kójnú ngo ngi̱ya tiyá nkꞌaa̱ ngo ndiꞌa xi je tikónnda, ki̱a̱ tꞌíjñandajnú nichiniee̱.

¹³ Ngije kijí kui jaá, bo̱a̱ tsꞌén kasakoo̱ xikó katsoó Kjisoo̱, kó ki̱a̱ katsꞌénda nichinie tsi̱ꞌe̱ sꞌué paskuaa̱.

¹⁴ Kó nga jachó chi̱bo̱a̱, Kjisoo̱ ko̱jo já apostroo̱ kisꞌińdotꞌa yámíxa̱.

¹⁵ Kó bi̱ katsoó kui jaá: –Achichí kamámejénna nga skjíni̱e̱jo ngasejnúꞌun ṉño̱ kui sꞌué paskuaa̱, ngindiee̱ nga kjo̱a̱ꞌatio an kjo̱a̱ni̱ma̱.

¹⁶ Ngatꞌa̱ xiyàjnúꞌun nga ngiti̱ skjíni̱e̱jín an ngase ṉño̱ ngaskande nga kjo̱tjosón ni̱xtjin nga ko̱tíxoma Néná.

¹⁷ Kó Kjisoo̱ iskjíbé ngo chi̱tsen, katsjaá ndokꞌóchjì Néná, kó bi̱ katsó: –Chjábéjnú kui nii̱, kó ti̱ꞌangasónjnúu̱ xingi̱jnú,

¹⁸ ngatꞌa̱ xiyàjnúꞌun nga ngiti̱ kꞌuijín an ndaá tostsi̱je̱è, ngaskande ni̱xtjin nga ko̱tíxoma Néná.

¹⁹ Ti̱ iskjíbé paa̱n nga, katsjaá ndokꞌóchjì Néná, akjángá, nga bi̱ katsó: –Kuí xi̱ꞌbi̱ xi yojona, kui xi si̱ꞌankꞌien ta̱ngatꞌanii̱ nga kjo̱tjoꞌajnú, ti̱ꞌánjnú kui nii̱, tsi̱ꞌe̱ nga kjo̱a̱ꞌátsjienjnú an.

²⁰ Kó ti̱ bo̱a̱ ti̱ tsꞌén iskjíbé chi̱tse̱én ngije iskjinie nichiniee̱, kó bi̱ katsó: –Kuí xi̱ꞌbi̱ xi chi̱tsen nínga tjíꞌbínda ngo kjo̱a̱tja̱tsi̱e̱, tsi̱ꞌe̱ Néná ko̱jo jún. Jín xí xtjoón ta̱ngatꞌanií kjo̱a̱ndaa̱ kjín xota̱.

²¹ Ta̱nga ngotꞌe̱ ꞌne̱, tsja nda̱ xi sa̱ꞌínkꞌasꞌienna kꞌi̱e̱ tikóntꞌajo̱na yámíxa̱a̱.

²² Ja̱koxi̱ nga ndií nda̱ xi̱ꞌii̱n chjiéngá bo̱a̱ ka̱maa̱ xikótsꞌèn je kisꞌinda, ta̱nga ¡ni̱ma̱ xò kuí nda̱ xi ta̱ngatꞌanii̱ kui nga si̱ꞌankꞌasꞌien!

²³ Kó kui jaá ítsꞌi̱yanii̱ nga askjoyájo̱ xkjín ꞌyá kuií xi sa̱ꞌín kui nii̱.

Bi̱ tsꞌén katsóyà Kjisoo̱ kjo̱a̱a̱ ꞌyá kuií xi nkꞌa ngase xaá

²⁴ Sꞌe̱ kui jaá askjotíjo̱ xkjín kjo̱a̱a̱ ꞌyá kuií xi nkꞌa ngase xaá.

²⁵ Ta̱nga Kjisoo̱, bi̱ katsoó: –Já re xi botixómaá na̱xi̱ńdaá, tsjandièjiín xotaa̱ nga ta̱xkiya sa̱ꞌín ngo ni tsi tsja kjo̱a̱jiín, kó jáxaá kuí boá xi nda tsꞌén tsó xotaa̱.

²⁶ Ta̱nga jún nga bo̱a̱jín niꞌánjnú, ta̱sá xi nkꞌa xaá, chjiéngá xikoó tsi ngo xi ngindie xaá sa̱ꞌín yojoo̱, kó kui xi ngito̱ko̱jnú, chjiéngá kuí xi ka̱ma xi sa̱ꞌínseén xotaa̱.

²⁷ Ngatꞌa̱, ꞌyání xi nkꞌa ngase xaá, a xi tikóntꞌa yámíxa̱a̱, axa̱ moso̱ xi tsꞌénꞌbiyá nichiniee̱. A kuijín xi tikóntꞌa yámíxa̱a̱. Ta̱nga kꞌi̱e̱ tikónjin an ngamasienjnú xikoó ngo moso̱ xi tjítsꞌénsénjnú.

²⁸ Ta̱nga jún boá xi ngatsjéni̱xtjin tindyionjo̱jnúꞌun nga jaꞌa an ngayeje kjo̱a̱chjatꞌayákón.

²⁹ Kó kuíni nga an, tsjajnúꞌun nga ko̱ti̱xomájnú, xikótsꞌèn katsjána Na̱ꞌmina,

³⁰ tsi̱ꞌe̱ nga xi̱ni̱e̱jnú ko̱jo sꞌi̱o̱jnú tꞌa yámíxa̱ kjiꞌanga kotixoma an, ko̱jo tsi̱ꞌe̱ nga ko̱ti̱xomájnú nga bo̱a̱ kꞌuínjnú tsi tjiín ko̱jo tsi jmíjiín jé nga tiejó tji̱e̱e̱ xota̱ xi chji̱a̱ni Israee̱l.

Bi̱ tsꞌén katsóyàtjón Kjisoo̱ nga Peé sa̱ꞌínkiejín yojoo̱

³¹ Kó Ndi̱a̱a̱, ti̱ bi̱ ti̱ katsoó Peé nga: –Ximo̱, Ximo̱, xindajín Satanaa̱ tsíꞌá kjo̱a̱, tsi̱ꞌe̱ ku̱i̱ꞌítsanieyàjnú xikoó to ndso̱ko̱a̱n ṉño̱pan nga skjítꞌayákónjnú.

³² Ta̱nga an jè ꞌniú tsíꞌáa̱ Néná, tsi̱ꞌe̱ nga sꞌi̱jinraa̱ an, kó ji, kjiꞌanga ko̱si̱kje yojòo̱, te̱ꞌéngaꞌníi̱ já ntsꞌie.

³³ Ta̱nga Peé, bi̱ katsó: –Ndi̱a̱, kꞌi̱e̱ tikónjoo̱ nga tikónnda an, kó jmí tsi ta̱ ndo̱bo̱a̱yà tsí nga nijan kongín, ngaskande ndatsi si̱ꞌankꞌienna.

³⁴ Kó Kjisoo̱, bi̱ katsó: –Pé, xiyaá nga ngotꞌe̱, ngindiee̱ nga skja̱ndáyà xo̱nda̱xi̱ꞌii̱n, ján ndi̱yà je kiniꞌínkiejín yojòo̱ nga yení.

Bi̱ tsꞌén katsóyà Kjisoo̱ kjo̱a̱a̱ stsaa̱, ko̱jo nichiniee̱, ko̱jo ki̱cha̱a̱

³⁵ Kó Kjisoo̱, bi̱ katsoó kui jaá: –Kjiꞌanga katsangiyajnúꞌun jmí stsato̱n, ko̱jo jmí nichinie, ko̱jo jmí ndié kichꞌiájínjnú, kó, a tjín ni xi kichajájnú. –Ta̱ jmíjín ni. Katsó kui jaá.

³⁶ Sꞌe̱ bi̱ katsó Kjisoo̱: –Ta̱nga ngotꞌe̱ ꞌne̱, xi tjiín stsa ko̱jo nichinie nga kjíbé, kó xi jmíjiín ki̱cha̱ndojó, ngatatiñá ńjño xi bótꞌa nga̱xto̱n, sꞌe̱ ngatꞌatsie ngo.

³⁷ Ngatꞌa̱ xiyàjnúꞌun nga chjiéngá kjo̱tjosón ngayeje ni xi je kjitꞌa xo̱jo̱n eén Néná kjo̱a̱a̱ an, nínga bi̱ tsoó: “Kó ngi̱jii̱n xota̱ xi ndajiín kamáxki̱”, ngatꞌa̱ kjo̱a̱a̱ ni xi kjitꞌa kjo̱a̱a̱ an jè tikoón kótsꞌèn kju̱i̱e̱tꞌa.

³⁸ Sꞌe̱ bi̱ katsó kui jaá: –Ndi̱a̱, jéꞌe̱n, kꞌi̱e̱ síndo kꞌi̱e̱e̱ jó ki̱cha̱ndojó. Kó Kjisoo̱, bi̱ katsó: –Jè ndakjiꞌi.

Kjisoo̱ bi̱ tsꞌén tsíchji̱a̱a̱ Néná

³⁹ Kó ngije jataxie Kjisoo̱ kui na̱xi̱ńdaá, xikó tsꞌén síkijí, kijí nínga tikón tji̱ngi̱ nínga síndo yáꞌoliboo̱, kó ki̱a̱ kijítji̱ngii̱ xota̱ tsi̱ꞌe̱.

⁴⁰ Kó nga tsꞌasꞌien kui ngi̱ndiee̱, bi̱ katsoó kui jaá: –Ndókjo̱a̱jnúu̱ Néná tsi̱ꞌe̱ nga chjátꞌayákónjínjnú.

⁴¹ Kó Kjisoo̱ kijíboaꞌá, mejeén xikó kjiꞌi kjin fochóná nga bichijmí ngo ndi̱jo̱, kó ki̱a̱ asiéntikoó, sꞌe̱ tsíchji̱a̱a̱ Néná,

⁴² nga bi̱ katsó: –Na̱ꞌmi, tsi mejeén, chje̱ꞌéxín boeꞌéní kui kjo̱a̱ni̱ma̱a̱, ta̱nga jmí tsi ni xi xian an ni xi ngatama, ta̱sá ngatama ni xi mejeén jí.

⁴³ Kósꞌe̱ ngo ndítsjie xi chji̱a̱ni ndiꞌakꞌajmi jàn jatjokjàtꞌaa̱ xi katsjángaꞌniuú.

⁴⁴ Kó kjiꞌanga achichí nda̱ kamaá Kjisoo̱, ta̱sá má ꞌniú ngase tsíchji̱a̱a̱ Néná, kó ndándóboaá kitín xikó maá tsi jín xí tjítín nga̱són tꞌanangii̱.

⁴⁵ Kó ngije jastjíe̱n nga tsíchji̱a̱a̱ Néná, kijíkoón xota̱ tsi̱ꞌe̱, kó kamábe nga kjiyojofé ta̱ngatꞌanii̱ kjo̱a̱ndasee̱n,

⁴⁶ kó bi̱ katsoó kui jaá: –Ánní nga ndyi̱tsjaféjnú. Ti̱sítji̱e̱njnú, kó ndókjo̱a̱jnúu̱ Néná, tsi̱ꞌe̱ nga chjátꞌayákónjínjnú.

Bi̱ tsꞌén kandobá Kjisoo̱

⁴⁷ Kó ti̱ tsꞌénchji̱a̱ ngase Kjisoo̱ nga jachó ngo sen xota̱, ko̱jo nda̱ xi ꞌmí Jundaa̱, ngo nda̱ xi chji̱a̱ni nga tiejó xota̱a̱ Kjisoo̱, kui kijítjoón kui jaá, kó kijíkóntiñaa̱ Kjisoo̱ tsi̱ꞌe̱ nga ngo ndsó tsja̱á tꞌanijon.

⁴⁸ Kósꞌe̱ Kjisoo̱, bi̱ katsoó: –Junda̱, a ngo ndsó niꞌínkꞌasꞌinni ji ndií nda̱ xi̱ꞌii̱n.

⁴⁹ Nga kamábe kui já xí síndojo̱ Kjisoo̱ ni xi kamaá, bi̱ katsó: –Ndi̱a̱, a ko̱ꞌna̱xiéjne̱ ki̱cha̱jne̱.

⁵⁰ Kó ngo xota̱ tsi̱ꞌe̱ Kjisoo̱ katsꞌénꞌoón nga tsatie tji̱bo̱a̱nijon kixi̱i̱ ngo nda̱ mosoo̱ chináꞌmi xi ꞌniú nkꞌa xaá.

⁵¹ Kósꞌe̱ Kjisoo̱, bi̱ katsó: –Jè ndakjiꞌi, xióchònjnú ꞌne̱. Kósꞌe̱ Kjisoo̱ katsꞌénjo̱ tji̱bo̱a̱nijon kui nda̱a̱, sꞌe̱ katsꞌéndaya.

⁵² Kó Kjisoo̱, bi̱ katsoó já ngito̱ko̱o̱ chináꞌmii̱, ko̱jo já ngito̱ko̱o̱ jájún xi konda na̱ngo̱xi̱i̱, ko̱jo já xchá ngito̱ko̱ xi jachótsoboá: –A chejé án nga ki̱cha̱ndojó ko̱jo nga yá kichꞌiájnú nga jéꞌe̱ndoboájnúꞌun.

⁵³ Ndyiojón ndyiojón kisꞌijñajo̱jnúꞌun ki̱a̱ ndi̱tsen na̱ngo̱xi̱i̱, kó ikjienjínjnú ndsa̱jnú nga kandobájnúꞌun, ta̱nga kuí xi̱ꞌbi̱ xi ora̱jnú, kó jè ko̱tíxoma nínga jñoó.

Bi̱ katsó Peé nga katsꞌénkiejín yojoo̱ nga be Kjisoo̱

⁵⁴ Ngije kandobá Kjisoo̱, tsangínjo̱ ndiꞌaa̱ chináꞌmi xi ꞌniú nkꞌa xaá. Kó Peé ńkjin ńkjin kijítji̱ngii̱ Kjisoo̱.

⁵⁵ Kó kui jaá ngije ítsié ndiꞌí ngamasiee̱n ndi̱tsee̱n, ki̱a̱ kisꞌińdotꞌa, kó Peé ki̱a̱ ngamasiee̱n kui jaá kisꞌijñajin.

⁵⁶ Nga kamábe ngo na̱ chji̱ni̱e̱ꞌboo̱ nga Peé ki̱a̱ tikóntꞌa ndiꞌií, askotsijen ndá ndaá, sꞌe̱ bi̱ katsó: –Ko̱jo kuí xotaa̱ xi kistsoꞌbájo̱ Kjisoo̱ nga.

⁵⁷ Ta̱nga Peé katsꞌénkiejín yojoo̱ nga bi̱ katsó: –¡Ji xota̱chjo̱on, bejín an ꞌyá kuí bo̱a̱!

⁵⁸ Kó ngi̱chí sájín, ngo nda̱ kamábe, kó bi̱ katsoó: –¡Ko̱jo ji ki̱a̱ ndókjo̱e̱ni kui jaá nga! Ta̱nga Peé, bi̱ katsó: –¡Jmí nda̱, ánjín bo̱a̱!

⁵⁹ Kó ngije jaꞌa mara̱ tsi ta̱ ngo ora̱, ingo nda̱ xi bi̱ katsó nginií: –Ja̱koxi̱ boa nga kui nda̱a̱ xi kistsoꞌbájo̱ Kjisoo̱, ngatꞌa̱ Ngalilea̱ chji̱a̱ni.

⁶⁰ Kó bi̱ katsó Peé: –Ji nda̱, bejín an ni xi tꞌísé ji. Kó ngije bo̱a̱ katsó, ti̱ kjiꞌa askjandáyà xo̱nda̱xi̱ꞌii̱n.

⁶¹ Kósꞌe̱ Ndi̱a̱a̱, kjiꞌá má askoꞌá Peé, kó Peé jaꞌátsjiee̱n ni xi katsó Ndi̱a̱a̱, nga bi̱ katsoó: “Ngindiee̱ nga skja̱ndáyà xo̱nda̱xi̱ꞌii̱n, ján ndi̱yà je kiniꞌínkiejín yojòo̱ nga yení.”

⁶² Kó Peé jataxie ndi̱tsén jàn, kó achichí on askjandá.

Bi̱ tsꞌén akajnóchá ko̱jo akjaa̱ Kjisoo̱

⁶³ Kó kui já xí askondá Kjisoo̱ tsajnókie ko̱jo tsaꞌon.

⁶⁴ Kó yíꞌmá ndyi̱ko̱n Kjisoo̱, yeꞌeé tji̱ngo̱ kje̱n, sꞌe̱ bi̱ katsoó nga asíyaá: –Tꞌíyetjén ji xikoó ngo nda̱ chji̱ni̱e̱ꞌe̱én Néná, ꞌyání xi yeꞌeé tji̱ngo̱.

⁶⁵ Kó achichí kjín én chꞌo tsó xi kiꞌmií Kjisoo̱.

Bi̱ tsꞌén tsangínjo̱ Kjisoo̱ ngindyi̱ko̱n jáxaá

⁶⁶ Nga kisisie̱èn, kamátikó ngayeje já xchá ngito̱ko̱o̱ na̱xi̱ńdaá, ko̱jo já ngito̱ko̱o̱ chináꞌmii̱, ko̱jo já chji̱ni̱e̱kjo̱a̱kitii̱, kó kijíjo̱ Kjisoo̱ nínga kamátikó já xí tjiín xá, kó bi̱ katsoó:

⁶⁷ –Tsi ji xi Kristoo̱, tꞌíyéjne̱. Kó Kjisoo̱, bi̱ katsoó kui jaá: –Tsi xiyàjnúꞌun, sꞌi̱jinjínjnú,

⁶⁸ kó tsi ngo ni kosíyájnúꞌun, ko̱ndókjo̱a̱jojínjnúꞌun, ti̱nde ku̱i̱ntjoenjínjnúꞌun.

⁶⁹ Ta̱nga ndeskande ngotꞌe̱ ku̱i̱ꞌítsꞌi̱yani nga ndií nda̱ xi̱ꞌii̱n kꞌuijñá nga fojnií Néná xí tsi̱ꞌe̱ ngayeje ngaꞌniú xí tjiín.

⁷⁰ Sꞌe̱ ngayeje xotaa̱, bi̱ katsó xtín: –A jí xí ndií Néná jí. Sꞌe̱ Kjisoo̱, bi̱ katsó: –Ti̱ júnní xi bo̱a̱ ndyi̱ꞌmìjnú.

⁷¹ Kósꞌe̱ bi̱ katsó kui jaá: –Je nde ngiti̱ jmí chistiko̱ chjiénjínná. Ngatꞌa̱ ñá má xi kandaꞌyá nga tsíchji̱a̱ tsꞌoa.