Rkaa̱ 20 - Xo̱jo̱n eén Néná

Bi̱ kamá nga jáxaá asíyaá Kjisoo̱ ꞌyá xí katsjáxaá

¹ Kó ngo ndi̱yà nga Kjisoo̱ akóyaá ko̱jo íni̱jmi̱ì éntjatsi̱e̱e̱ Néná xota̱ na̱xi̱ńdaá ki̱a̱ ndi̱tsen na̱ngo̱xi̱i̱, jachókón tiñaa̱ já ngito̱ko̱o̱ chináꞌmii̱, já chji̱ni̱e̱kjo̱a̱kitii̱, ko̱jo já xchá ngito̱ko̱o̱ na̱xi̱ńdaá,

² kó bi̱ katsoó nga tsíchji̱a̱jo: –Tꞌíyéjne̱, mí xá í tjiín nga kui nii̱ niꞌín ji, axa̱, ꞌyá xí katsjaá kui xaá.

³ Sꞌe̱ Kjisoo̱, bi̱ katsoó: –Ti̱ bo̱a̱ ti̱ tsꞌén ngo ni kosíyájnúꞌun, kó tꞌíyájnúꞌun:

⁴ ꞌYá xí katsangiya Jua̱ xi botíndaá nga atíndá xotaa̱. A Néná, axa̱ xotaa̱.

⁵ Kósꞌe̱ kui jaá ítsꞌi̱yanii̱ nga bi̱ katsoó xkjín: –Tsi Néná xí katsangiya tsi kꞌuíi̱n, kó: “Ánní nga kisꞌijinjínjnú”, ka̱tso̱ná.

⁶ Kó tsi xotaa̱ xí katsangiya tsi kꞌuíi̱n, ngayeje xotaa̱ ndi̱jo̱ kꞌo̱yaná, ngatꞌa̱ ngayejee̱ nga sꞌijii̱n nga Jua̱ xi botíndaá, nda̱ chji̱ni̱e̱ꞌe̱én Néná boá.

⁷ Kó bi̱ katsó kui jaá: –Yàjínjne̱ ꞌyá xí katsangiya.

⁸ Kósꞌe̱ Kjisoo̱, bi̱ katsó: –Ja̱ ti̱ xiyàjínjnúꞌun mí xá xí tjínna nga tsꞌen an kui nii̱ nga.

Bi̱ tsꞌén íjñá chi̱bo̱a̱ Kjisoo̱ kjo̱a̱a̱ énkjiín moso̱ xi ndajiín

⁹ Kósꞌe̱ Kjisoo̱ ítsꞌi̱yanii̱ nga katsóyaà kui xota̱ na̱xi̱ńdaá, kui énkjín xi bi̱ tsoó: –Ngo nda̱ íjñanda ngo jno̱ nínga maxchá tostsi̱jè, kó katsjá chjínangií já xí tsꞌén kuí xaá, sꞌe̱ kjin kijí, kó tsie tsꞌandíyaá.

¹⁰ Kó nga jachó ni̱xtjii̱n nga je kamáxchá kuí too̱, katsangiya mosoo̱ kui nda̱a̱ nínga síndo já xí katsjaá chjínangí jno̱ tostsi̱je̱è, tsi̱ꞌe̱ nga ko̱kjángá, kó sa̱ꞌínkꞌasꞌiee̱n kui to xi tsoboaá nda̱ xi tsi̱ꞌe̱ kui ngi̱ndiee̱, ta̱nga kui já xí ndyi̱tsꞌènxájin kui ngi̱ndiee̱, katsꞌénkijenꞌon kui mosoo̱, kó jmí ni íyatsjajín.

¹¹ Kó katsangiya nginí ingo moso̱, ta̱nga ti̱ ikꞌié nginií, ko̱jo chꞌo kiꞌmií, kó ti̱ jmí ni ikꞌíyatsjajín nginí.

¹² Kó ti̱ katsangiya nginí xi ma ján mosoo̱, kó kui jaá, ti̱ katsꞌénꞌón nginií, sꞌe̱ tsꞌaxié kui ngi̱ndiee̱.

¹³ Kósꞌe̱ bi̱ katsó ndi̱a̱ xi tsi̱ꞌe̱ kui ngi̱ndiee̱: “Mí xí sa̱ꞌin an. Ta̱sá ndí tjóna sangiya an, tsi ta̱ꞌaní nga kjiꞌanga sku̱i̱e̱, sku̱i̱e̱ndikón ndína kui jaá.”

¹⁴ Ta̱nga nga kamábe já xí ndyi̱tsꞌènxájin kui ngi̱ndiee̱, bi̱ katsoó xkjín: “Kuí xi̱ꞌbi̱ xi tsi̱ꞌe̱ ka̱ma ngayeje kui ngi̱ndiee̱, ta̱sá si̱ꞌankꞌién, ki̱a̱ ka̱maa̱ nga tsa̱ñá ka̱ma ngayeje kui nii̱.”

¹⁵ Kó katsꞌénkꞌién ndií ndi̱a̱ xi tsi̱ꞌe̱ kui ngi̱ndiee̱, sꞌe̱ tsꞌaxié nínga tjitjíe̱ tostsi̱je̱è. Kósꞌe̱ Kjisoo̱ asíyá: –Kó mí xí sa̱ꞌín ndi̱a̱ xi tsi̱ꞌe̱ kui jno̱ tostsi̱je̱è.

¹⁶ Ja̱ kji̱ndi̱bá, kó sa̱ꞌínkjié ngayeje já xí ndyi̱tsꞌènxájin kui ngi̱ndiee̱, kósꞌe̱ kje̱ꞌe xí tsja̱á kui ngi̱ndiee̱. Nga tsintꞌié kuí nii̱ kui xotaa̱, bi̱ katsó: –¡Néná xín ngatsꞌénkjáꞌáná kui nii̱!

¹⁷ Kjisoo̱ askotsijen ndá ndaá xotaa̱, sꞌe̱ bi̱ katsó: –Mí xí mejeén tsó ni xi bi̱ tsó xi tjítꞌa xo̱jo̱o̱n: Ndi̱jo̱ xi katsꞌénchꞌó já chji̱ni̱e̱xo̱ó, kuí xí ndi̱jo̱ ngaꞌniuú ndiꞌaa̱ kamá.

¹⁸ Ngayeje xota̱ xi kꞌo̱kasón kui ndi̱jo̱o̱, ka̱ma xi̱, kó tsi tjín xí kꞌo̱kanieé kui ndi̱jo̱o̱, ka̱ma ndso̱ko̱a̱n.

Bi̱ tsꞌén akóyá Kjisoo̱ kjo̱a̱a̱ ꞌyá xí chjiéngá kꞌuíchjií ni xi machjítjeé

¹⁹ Kó já chji̱ni̱e̱kjo̱a̱kitii̱ ko̱jo já ngito̱ko̱o̱ chináꞌmii̱, kamámejeén nga ti̱ kui chi̱bo̱a̱ stso̱ba̱ Kjisoo̱, ngatꞌa̱ kamákjiín nga kui énkjiín, ta̱ngatꞌanii̱ kuí nga kandokjo̱a̱, ta̱nga katsakjónnií xota̱ na̱xi̱ńdaá.

²⁰ Kó kanangiyachoo̱n xota̱ xi askondá, xi ti̱xꞌi̱a̱n xota̱ xi kixi̱ sa̱ꞌín yojoo̱, tsi̱ꞌe̱ nga ku̱i̱ntꞌiè ngo én xí ndajín xi ka̱tso̱, kó bo̱a̱ tsꞌén sa̱ꞌínkꞌasꞌien Kjisoo̱ ngi̱ya ngaꞌniuú, ko̱jo xaá nda̱ xi xtitjoón kui ngi̱ndiee̱.

²¹ Kó bi̱ kiꞌmií nga akasíyaá: –Mostro̱, jè yàjne̱ nga kixi̱ ni xi se ko̱jo ni xi bokoyé ji, ko̱jo nga jmí tsi skján niꞌínje̱ ji xotaa̱, ko̱jo nga ta̱sá ja̱koxi̱i̱ ndi̱yà xí tsi̱ꞌe̱ Néná xi tibokoyé ji.

²² A tsjandiè kjo̱a̱kitii̱, axa̱ tsjandièjín nga kꞌuíchjíjne̱ to̱n xi machjítjé ni nda̱ xtitjón xi ꞌmí Sesaa̱.

²³ Ta̱nga Kjisoo̱ kamákjiín kjo̱a̱mañaa̱ kui jaá, sꞌe̱ bi̱ katsoó: –Ánní nga an ndyi̱chjatꞌayákónjnúꞌun.

²⁴ Takójnúꞌun ngo to̱n xi chji̱a̱ni Roma̱. ꞌYá xí tsi̱ꞌe̱ kui a̱si̱én ko̱jo kui jaꞌén xí kjitꞌa kui to̱o̱n. Kó bi̱ katsó kui jaá: –Tsi̱ꞌe̱ nda̱ xtitjón xi ꞌmí Sesaa̱ boá.

²⁵ Kósꞌe̱ Kjisoo̱, bi̱ katsó: –Ja̱ te̱ꞌéjnúu̱ nda̱ xtitjón xi ꞌmí Sesaa̱ ni xi tsi̱ꞌe̱ nda̱ xtitjoón, kó ni xi tsi̱ꞌe̱ Néná, Néná te̱ꞌéjnúu̱.

²⁶ Kó nde kamájiín kui jaá nga tsintꞌieé Kjisoo̱ nga tsíchji̱a̱ ngo én xí ndajín tsó ngindyi̱ko̱n xotaa̱, ta̱sá achichí kijíndikoón kjo̱a̱a̱ ni xi katsó, kó xió kisꞌińdo.

Bi̱ tsꞌén akóyá Kjisoo̱ kjo̱a̱a̱ xota̱ xi foaꞌáꞌyá nginií ngije fesón

²⁷ Kósꞌe̱ jachókón tiñaa̱ já sanduseo̱ xi tsó nga ngiti̱ foaꞌáꞌyájín xoò xota̱ xi je jesoón, bi̱ katsó nga asíyaá:

²⁸ –Ji Mostro̱, Moisee̱ ítꞌaná ngo xo̱jo̱n xi bi̱ tsó: tsi ngo nda̱ ko̱yà xí tjiín chjo̱on, kó tsi jmí ndíjiín, ntsꞌi̱e̱ kui nda̱a̱ chjiéngá kuí ku̱i̱xanjo̱ kui xota̱chjo̱on, tsi̱ꞌe̱ nga xcha̱jàjín tji̱e̱e̱ ntsꞌi̱e̱ xi kꞌiee̱n.

²⁹ Ngo ndi̱yà kisꞌińdo yito já xí ta̱ ngo ntsꞌi̱e̱ kamá, nda̱ xi tjoón ixánjo̱ chjo̱ón, kó kꞌien kui nda̱a̱, kó jmí ndí kisꞌiejiín.

³⁰ Kó ntsꞌie xi ma joó ixánjo̱ kui xota̱chjo̱on, kó ti̱ kꞌien nginí kui nda̱a̱, kó ti̱ jmí ndí kisꞌiejiín nga.

³¹ Nda̱ xi ma jaán ixánjo̱ nginí kui xota̱chjo̱on, kó ti̱ bo̱a̱ ti̱ kamaá nga. Kó nga yito kui jaá nga jesón, kó nde ngojín xi kisꞌiee̱ ndí.

³² Nga fetꞌani kꞌien kui xota̱chjo̱on.

³³ Ni̱xtjin nga kjo̱a̱ꞌáꞌyaá xota̱ xi je jesoón, ja̱, ꞌyání nga yito kui jaá xi xi̱ꞌii̱n kui xota̱chjo̱on ka̱ma, ngatꞌa̱ nga yitoo̱ nga kisꞌińdojo̱.

³⁴ Kósꞌe̱ Kjisoo̱, bi̱ katsó: –Xota̱ xi tjín kuí ni̱xtjin xi̱ꞌbi̱, bixan kó tsꞌénkíxán xkjín,

³⁵ ta̱nga xota̱ xi sa̱ko̱ó nga kꞌuíndo kui nga̱sondie xi̱ꞌba̱, kó nga kjo̱a̱ꞌáꞌyaá xota̱ xi je jesoón, ti̱nde ngiti̱ ku̱i̱xánjín, kó ti̱nde ngiti̱ sa̱ꞌínkixanjín xkjín,

³⁶ ngiti̱ ko̱yàjín, ngatꞌa̱ xikónií tsi ndítsjiee̱ Néná ka̱ma, kó ndií Néná boá, ngatꞌa̱ kjo̱a̱ꞌáꞌyá nginií.

³⁷ Ta̱nga kjo̱a̱ ngaá tsi foaꞌáꞌyá nginií xota̱ xi je jesoón, ngaskande Moisee̱ akóyá nga katsóyà énkjiín yásarsaa̱, nga bi̱ tsoó Ndi̱a̱ná, Nee̱ Abraa̱n, ko̱jo Nee̱ Isaa̱, ko̱jo Nee̱ Jako̱b boá.

³⁸ Ngatꞌa̱ Néná jmí tsi Nee̱ xota̱ xi je jesón, Nee̱ xota̱ xi síndo boá, ngatꞌa̱ ta̱ngatꞌanií Néná nga tindyión nga̱sondiee̱.

³⁹ Tjín já chji̱ni̱e̱kjo̱a̱kitii̱, xi bi̱ katsó: –Mostro̱, nda kandokjo̱e̱ ji.

⁴⁰ Kó ngiti̱ ingojín xota̱ xi asíyá ngasee̱ kje̱ꞌe ni.

Bi̱ tsꞌén akasíyaá Kjisoo̱ kjo̱a̱a̱ ꞌyání xi xota̱ tji̱e̱ xi kjindibáni Kristoo̱

⁴¹ Kósꞌe̱ Kjisoo̱, bi̱ katsoó kui xotaa̱: –Kótsꞌèn nga xotaa̱ tsó nga Kristoo̱ xota̱ tji̱e̱e̱ Ndabii̱ xò kjindibáni.

⁴² Ngatꞌa̱ ti̱kuíní Ndabii̱ xi bi̱ tsó nínga ítꞌa xo̱jo̱n Salmoo̱: Ndi̱a̱ná bi̱ katsoó Ndi̱a̱na: “Ti̱ndyintꞌení nga fojnína nínga botixoma an,

⁴³ ngaskande nga kꞌuindo an ngindie ndsa̱ki kondra̱ tse̱.”

⁴⁴ Ndabii̱ Ndi̱a̱na katsoó. Ja̱ kótsꞌèn nga xota̱ tji̱e̱e̱ Ndabii̱ kjindibáni Kristoo̱.

Kjisoo̱ bi̱ tsꞌén yíngítaꞌin já chji̱ni̱e̱kjo̱a̱kitii̱

⁴⁵ Nga tsintꞌieé ngayeje xota̱ na̱xi̱ńdaá, Kjisoo̱ bi̱ katsoó xota̱ tsi̱ꞌe̱:

⁴⁶ –Chónjnú já chji̱ni̱e̱kjo̱a̱kitii̱, ngatꞌa̱ achichí tsjá máa nga ꞌbítso̱ma nga boajá ńjñondio tsjakon, kó tsja máa nga ndikóntsꞌèn niꞌántinde nínga síndo ndi̱tse̱n, ko̱jo tsja máa nga ꞌbíndonié yáxíríe̱ xi tjón síndo, ngi̱ya ndiꞌa nínga ndokjo̱a̱ eén Néná, kó tsja máa nga kui tjón ꞌbíndo ngi̱ndie xi tjón síndoo̱ yámíxa̱ nínga chinie ṉño̱o̱.

⁴⁷ Kó kui jaá, kuí boá xi tsꞌénchéjeé ni xi tjiín ínchjín kꞌán xi je kꞌien xi̱ꞌii̱n, kó achichí xò tsí Néná chji̱a̱a̱ ꞌne̱ ja̱ma, tsi̱ꞌe̱ nga sku̱i̱e̱ndikón xotaa̱. Kuí xota̱ xi̱ꞌba̱ xi tsie ngase ka̱majeé.