Rkaa̱ 19 - Xo̱jo̱n eén Néná

Bi̱ tsꞌén tsꞌasꞌien Kjisoo̱ ndiꞌaa̱ nda̱ xi ꞌmí Sakeoo̱

¹ Kjisoo̱ jachó na̱xi̱ńdáꞌniú Jeriko̱, kó nga jaꞌajin kui na̱xi̱ńdaá.

² Ki̱a̱ kisꞌijña ngo nda̱ cho̱n xi ꞌmí Sakeo̱, kó ngito̱ko̱o̱ já xí foaꞌáꞌyá to̱n xi machjítjé ni kamá kui nda̱a̱,

³ kó Sakeoo̱ kamámejeén kamábe ꞌyání xi Kjisoo̱, ta̱nga kamájiín, ngatꞌa̱ achichí xota̱ xi tjín, kó kato kamá kui nda̱a̱.

⁴ Sꞌe̱ tsanga má kijítjón nínga kjo̱a̱ꞌa Kjisoo̱, sꞌe̱ kijíkijin ngo yásikómoro̱ tsi̱ꞌe̱ nga sku̱i̱e̱.

⁵ Kó nga jaꞌa Kjisoo̱ kui ngi̱ndiee̱, askotsijen nkꞌa jàn, kó bi̱ katsoó kui nda̱a̱: –Sakeo̱, tsá ti̱tjaje̱n, ngatꞌa̱ chjiéngá ndiꞌàa̱ kjojña an ngotꞌe̱.

⁶ Kó achichí tsá jatjajen, kó ꞌniú tsjá kamaá nga Kjisoo̱ kisꞌijña ndiꞌaa̱.

⁷ Kó nga kamábe ngayeje xotaa̱, bi̱ katsoó xkjín: Ndiꞌaa̱ ngo nda̱jé kꞌuijñá.

⁸ Kósꞌe̱ Sakeoo̱ kasasienkixi̱, kó bi̱ katsoó Ndi̱a̱a̱: –Ngotꞌe̱ ꞌne̱ Ndi̱a̱, masien ni xi tjínna tsjàa̱ ngayeje xota̱ ni̱ma̱a̱, kó tsi tjín káꞌá xota̱ xi katsꞌenchejée̱, nijón bo̱a̱ kjiꞌi tsjaꞌoyá ngiñáa̱.

⁹ Sꞌe̱ Kjisoo̱, bi̱ katsó: –Ngotꞌe̱ jè jatjoꞌa xotaa̱ kui ndiꞌaa̱, ngatꞌa̱ ti̱ xota̱ tji̱e̱e̱ Abraa̱n xi̱ꞌbi̱.

¹⁰ Ngatꞌa̱ ndií nda̱ xi̱ꞌii̱n, jeꞌekꞌaxiéꞌá xota̱ xi je ndi̱yà kichajá tjimá.

Bi̱ tsꞌén íjñá chi̱bo̱a̱ Kjisoo̱ kjo̱a̱a̱ énkjiín to̱o̱n

¹¹ Ngije tsintꞌié kuí eén xotaa̱, Kjisoo̱ katsóyà kui énkjiín, ngatꞌa̱ je tikón tiña na̱xi̱ńdáꞌniú Jerusale̱n, kó kui jaá katsꞌénkjó nga Néná je ko̱tíxoma tji̱ꞌni̱u̱.

¹² Sꞌe̱ Kjisoo̱, bi̱ katsó: –Ngo ndií ngo nda̱ cho̱n kijí ngo na̱xi̱ńdá xí achichí kjin, tsi̱ꞌe̱ nga ki̱a̱ si̱ꞌan re nga ko̱tíxomaa̱ ngo ngi̱ndie, sꞌe̱ kjo̱e̱ꞌe̱ꞌóyá nginí.

¹³ Kuíni nga kui nda̱a̱ tsíchji̱a̱a̱ tie já mosoo̱, kó katsjaá to̱n, nga bi̱ katsoó: “Ti̱ꞌanxájo̱jnú kui to̱o̱n, ngaskande nga kjoéꞌe̱ nginí an.”

¹⁴ Ta̱nga xota̱ xi chji̱a̱ni kui na̱xi̱ńdaá, chꞌo kamaá kui nda̱a̱, kó katsangiyaa̱ xota̱xchà xí bi̱ katsoó: “Mejénjínjne̱ nga kui nda̱a̱ ko̱tíxomajne̱.”

¹⁵ Kó ngije jeꞌe nginí kui nda̱a̱ ngije re kamá, katsangiyakjaꞌá kuí já moso̱ xi katsjaá to̱n, tsi̱ꞌe̱ nga sku̱i̱e̱ kótsꞌèn kiniꞌánxájo̱ to̱o̱n.

¹⁶ Jachó nda̱ xi tjoón, kó bi̱ katsoó: “Ndi̱a̱, to̱n xi katseꞌéní katsꞌénxájo̱ an, kó tie bo̱a̱ kjiꞌi askjasón ngase.”

¹⁷ Kó bi̱ katsó nda̱ ree̱: “Nda kiniꞌín ji, moso̱ nda, kjo̱a̱a̱ nga chiboa to̱n xi kamáꞌniátakón ji nga kichíi̱n, tie na̱xi̱ńdá ko̱ti̱xomée̱.”

¹⁸ Sꞌe̱ jachó xi ingo mosoo̱, kó bi̱ katsó: “Ndi̱a̱, to̱n xi katseꞌéní, ún bo̱a̱ kjiꞌi askjasón ngase.”

¹⁹ Kó ti̱ bi̱ ti̱ katsoó kui nda̱a̱: “Ti̱ ún na̱xi̱ńdá ko̱ti̱xomée̱ ji nga.”

²⁰ Kó jachókoón xi ingo mosoo̱, kó bi̱ katsoó: “Ndi̱a̱, kꞌi̱e̱ tikón tòo̱n kꞌi̱e̱e̱, ngo poño ixtie án, kó jaꞌatjó an,

²¹ ngatꞌa̱ katsakjonñaa̱ ji, kjo̱a̱a̱ nga be án nga ta̱nisién tajá jí, ngatꞌa̱ chjábé jí ni xi jmí tsi ji ikꞌíjñí, kó chꞌiji̱n ji ni xi jijín ikꞌítji̱e̱.”

²² Kósꞌe̱ bi̱ katsó kui nda̱ ree̱: “Moso̱ xi ndajín boá jí, ti̱ kuii̱ ndso̱ꞌbe xi kotijéñaá. Tsi ja̱bo̱a̱ je ye ji nga tajá án, nga kjíbé án ni xi ijñájín an, ko̱jo nga ꞌboje̱n an ni xi itji̱e̱jín an,

²³ kósꞌe̱, ja̱ kó míkjo̱a̱a̱ nga banko̱jín ikꞌíjñí ji to̱nna, tsi̱ꞌe̱ nga kjiꞌanga kjoéꞌe̱ ngiñá an, kjoaꞌachjí án ndyi̱ko̱n.”

²⁴ Kó kui nda̱ ree̱, bi̱ katsoó xota̱ xi síndo ki̱a̱a̱: “Chje̱ꞌéxínjnúu̱ to̱o̱n kui nda̱a̱, kó xi je tie kamá tsi̱ꞌe̱, kui te̱ꞌéjnúu̱.”

²⁵ Sꞌe̱ bi̱ katsó kui jaá: “Ndi̱a̱, ta̱nga kui nda̱a̱ jè tie bo̱a̱ kjiꞌi ma tsi̱ꞌe̱.”

²⁶ Ta̱nga bi̱ katsó nda̱ ree̱: “An xiyàjnúꞌun nga ngayeje xi tjiín, ko̱e̱ꞌeé, ta̱nga xi jmíjiín, ngaskande ni xi tjiín xi chje̱ꞌéxiín.

²⁷ Kó kui xota̱ xi kondra̱na xi kamámejénjiín nga re ka̱ma an, ndibájo̱jnúꞌun kꞌi̱e̱e̱, kó ngindyikón án ti̱chásénjnú nga si̱ꞌankꞌiénjnú.”

Bi̱ tsꞌén tsꞌasꞌien Kjisoo̱ na̱xi̱ńdáꞌniú Jerusale̱n

²⁸ Kó ngije tsíchji̱a̱ kui nii̱, Kjisoo̱ kijítjoón xotaa̱ na̱xi̱ńdáꞌniú Jerusale̱n.

²⁹ Kó ngije ma kjachó má ngo nangi xi ꞌmí Betfaje̱ ko̱jo Betania̱, ki̱a̱ tꞌa tji̱ngi̱ nínga tjín yáꞌoliboo̱, katsangiya jó xota̱ tsi̱ꞌe̱,

³⁰ xi bi̱ katsoó: –Tangínjnú kui ndí nangi xi tikón kje̱e̱n, kó ngije ku̱i̱tjásꞌi̱e̱njnú kui ngi̱ndiee̱, ki̱a̱ sa̱kójnú ngo ndí bórró xí nde kji̱e̱ ngo xi ꞌbíjñasoón, chjándójnú, kó ndibájo̱jnúꞌun kꞌi̱e̱e̱.

³¹ Kó tsi tjín xí bi̱ ka̱tso̱jnú nga ko̱síyájnú: Ánní nga ndyi̱chjándojnú. Bi̱ tꞌínjnúu̱ jún: Kjo̱a̱a̱ nga Ndi̱a̱a̱ xí chjieén.

³² Sꞌe̱ kijí kui jaá, kó kasakoo̱ bórroó xikó kiꞌmií.

³³ Kó ngije ndyi̱kjíndó bórroó, xi tsi̱ꞌe̱ cho̱o̱, bi̱ katsoó: –Ánní nga ndyi̱chjándojnú bórroó.

³⁴ Kósꞌe̱ bi̱ katsó kui jaá: –Kjo̱a̱a̱ nga Ndi̱a̱a̱ xí chjieén.

³⁵ Kó tsangínjoo̱ Kjisoo̱, kó ngije ísoón ńjñoo̱ bórroó, kiniꞌánkꞌíjñasón Kjisoo̱.

³⁶ Tji̱e̱nga ndyi̱fí, ngayeje xotaa̱ yítie ńjñoo̱ ngi̱ya ndi̱ya̱à.

³⁷ Kó ngije ma kjachó tiña xtji̱e̱e̱n nga fíjaya nínga tikón tji̱ngi̱ nínga tjín yáꞌoliboo̱, ngayeje xota̱ tsi̱ꞌe̱ Kjisoo̱ tsja kamaá, kó ítsꞌi̱yanii̱ nga katsꞌéntsjaà Néná kjo̱a̱a̱ ngayeje kjo̱a̱ndikón xí je kamábe,

³⁸ bi̱ katsó nga askjandáyà: –¡Ngatamachikonñé nda̱ re xi kjindibáni ngajoo̱ Ndi̱a̱ná, xió ngatjaꞌbé ndiꞌakꞌajmii̱, kó ngatꞌieé kjo̱a̱je Néná nkꞌa jàn!

³⁹ Kó ngi̱jii̱n xota̱ tsi̱ꞌe̱ kisꞌiṉtso̱ma já fariseo̱, xi bi̱ katsoó Kjisoo̱: –Mostro̱, ti̱ꞌinxchínje̱ xotaa̱, ánní nga bo̱a̱ ndyi̱tsó kon.

⁴⁰ Kó Kjisoo̱, bi̱ katsoó kui xotaa̱: –Bi̱ xiánjnúꞌun jún, tsi xió kꞌuíndo kui xotaa̱, ndi̱jo̱o̱ xí skja̱ndáyà.

⁴¹ Kó ngije ma kjachó tiña na̱xi̱ńdáꞌniú Jerusale̱n, nga askotsijen Kjisoo̱, askjandá kjo̱a̱a̱ kui na̱xi̱ńdaá,

⁴² kó bi̱ katsó: –¡Tsi yera ji ndatsi ta̱kuítsí ni̱xtjii̱n, ni xi tsja̱á kjo̱a̱xió! Ta̱nga ngotꞌe̱ tjiꞌmárií ndyikin kui nii̱.

⁴³ Ngatꞌa̱, sꞌe̱ ndibaá ni̱xtjin xi ndajín, kjiꞌanga kondra̱ tse̱ skjinínkꞌá nga ngo foaꞌatjiyajoo̱n ji ngo xó xí ku̱i̱ꞌíchjáꞌyaá, kó ngayeje ngi̱ndie nga skjánjoo̱,

⁴⁴ kó kꞌo̱jmii ji ko̱jo ndíi̱ ngi̱yaa̱ xó xí tjíchjáꞌyáni ji, kó nde ngojín ndi̱jo̱ ku̱i̱ꞌíndo xi sꞌi̱ńdosoón xkjín, ngatꞌa̱ kamáyèjín ji ni̱xtjin nga jeꞌekoón Néná.

Bi̱ tsꞌén tsꞌaxié Kjisoo̱ já xí ndyi̱botiñá cho̱ ndi̱tsee̱n na̱ngo̱xi̱i̱

⁴⁵ Kó nga jachó Kjisoo̱ ndi̱tsen na̱ngo̱xi̱i̱, ítsꞌi̱yanii̱ nga tsangatji̱ngii̱ ngayeje xota̱ xi ndyi̱botiñá ko̱jo xi ndyi̱ꞌbotsie ni,

⁴⁶ kó bi̱ katsoó: –Jè kjitꞌa xo̱jo̱n eén Néná, nínga bi̱ tsoó: “Ndiꞌana, ndiꞌa nínga ku̱i̱chji̱a̱a̱ Néná ngayeje xota̱ kꞌuiín, ta̱nga jún ndo̱bo̱a̱a̱ chejé jè kiniꞌánjnú.”

⁴⁷ Kó ndyiojón ndyiojón akóyá Kjisoo̱ ndi̱tsee̱n na̱ngo̱xi̱i̱, ta̱nga já ngito̱ko̱o̱ chináꞌmii̱, já chji̱ni̱e̱kjo̱a̱kitii̱ ko̱jo já ngito̱ko̱o̱ na̱xi̱ńdaá kamámejeén katsꞌénkꞌién Kjisoo̱.

⁴⁸ Kó kasakondièjiín kótsꞌèn sa̱ꞌínkꞌién, ngatꞌa̱ ngayeje xota̱ na̱xi̱ńdaá tsintꞌié ndá ndaá ni xi tsíchji̱a̱.